Rohit Sharma: ಹೀಗೂ ಸೋಲ್ತಾರಾ? ರೋಹಿತ್ ಶರ್ಮಾ ನಾಯಕತ್ವದ ಬಗ್ಗೆ ಅಪಸ್ವರ
India vs England Test: ಫೆಬ್ರವರಿ 2 ರಿಂದ ಭಾರತ ಮತ್ತು ಇಂಗ್ಲೆಂಡ್ ನಡುವಣ ಎರಡನೇ ಟೆಸ್ಟ್ ಪಂದ್ಯ ಶುರುವಾಗಲಿದ್ದು, ಈ ಪಂದ್ಯಕ್ಕೆ ವಿಶಾಖಪಟ್ಟಣಂನಲ್ಲಿ ಡಾ. ವೈಎಸ್ ರಾಜಶೇಖರ ರೆಡ್ಡಿ ಕ್ರಿಕೆಟ್ ಸ್ಟೇಡಿಯಂ ಆತಿಥ್ಯವಹಿಸಲಿದೆ. ಈ ಪಂದ್ಯದ ಮೂಲಕ ಟೀಮ್ ಇಂಡಿಯಾ ಕಂಬ್ಯಾಕ್ ಮಾಡುವ ನಿರೀಕ್ಷೆಯಿದೆ.
ಹೈದರಾಬಾದ್ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಭಾರತ ತಂಡ ಸೋಲನುಭವಿಸಿದೆ. ಗೆಲ್ಲಬಹುದಾಗಿದ್ದ ಪಂದ್ಯವನ್ನು ಕೇವಲ 28 ರನ್ಗಳಿಂದ ಟೀಮ್ ಇಂಡಿಯಾ ಕೈಚೆಲ್ಲಿಕೊಂಡಿದೆ. ಈ ಸೋಲಿನ ಬೆನ್ನಲ್ಲೇ ಟೆಸ್ಟ್ ಕ್ರಿಕೆಟ್ನಲ್ಲಿ ರೋಹಿತ್ ಶರ್ಮಾ (Rohit Sharma) ಅವರ ನಾಯಕತ್ವದ ಬಗ್ಗೆ ಅಪಸ್ವರಗಳು ಕೇಳಿಬರಲಾಂಭಿಸಿದೆ.
ಏಕೆಂದರೆ ಈ ಪಂದ್ಯದ ಮೊದಲ ದಿನದಾಟದಿಂದಲೇ ಟೀಮ್ ಇಂಡಿಯಾ ಮೇಲುಗೈ ಸಾಧಿಸಿತ್ತು. ಮೊದಲ ಇನಿಂಗ್ಸ್ನಲ್ಲಿ ಇಂಗ್ಲೆಂಡ್ 246 ರನ್ ಬಾರಿಸಿದರೆ, ಭಾರತ ತಂಡ 436 ರನ್ ಪೇರಿಸಿತು. ಈ ಮೂಲಕ ಟೀಮ್ ಇಂಡಿಯಾ 190 ರನ್ಗಳ ಮುನ್ನಡೆ ಸಾಧಿಸಿತ್ತು.
ಇನ್ನು ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ತಂಡವು ಕೇವಲ 163 ರನ್ಗಳಿಗೆ 5 ಪ್ರಮುಖ ವಿಕೆಟ್ ಕಳೆದುಕೊಂಡಿತು. ಅಂದರೆ 27 ರನ್ಗಳ ಹಿನ್ನಡೆ ಇರುವಾಗಲೇ ಆಂಗ್ಲರು ಐದು ವಿಕೆಟ್ಗಳನ್ನು ಕಳೆದುಕೊಂಡಿದ್ದರು. ಆದರೆ ಆ ಬಳಿಕ ಒಲೀ ಪೋಪ್ ಮತ್ತು ಬೆನ್ ಫೋಕ್ಸ್ 6ನೇ ವಿಕೆಟ್‌ಗೆ 112 ರನ್ಗಳ ಜೊತೆಯಾಟವಾಡಿದರು. ಇನ್ನು 7ನೇ ವಿಕೆಟ್ನಲ್ಲೂ ಅರ್ಧಶತಕದ ಪಾಲುದಾರಿಕೆ ನೀಡುವಲ್ಲಿ ಪೋಪ್-ರೆಹಾನ್ ಯಶಸ್ವಿಯಾದರು. ಈ ಮೂಲಕ ಟೀಮ್ ಇಂಡಿಯಾಗೆ 231 ರನ್ಗಳ ಟಾರ್ಗೆಟ್ ನೀಡಿದ್ದರು.
ಅಂದರೆ ಇಲ್ಲಿ ಒಲೀ ಪೋಪ್ (196) ಅವರನ್ನು ಹೊರತುಪಡಿಸಿ ಉಳಿದ ನಾಲ್ವರ ವಿಕೆಟ್ ಪಡೆಯುವಲ್ಲಿ ಟೀಮ್ ಇಂಡಿಯಾ ಬೌಲರ್ಗಳು ವಿಫಲರಾಗಿದ್ದರು. ಇದಕ್ಕೆ ಮುಖ್ಯ ಕಾರಣ ರೋಹಿತ್ ಶರ್ಮಾ ಅವರ ಕಳಪೆ ನಾಯಕತ್ವ ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಇಂಗ್ಲೆಂಡ್ ಆಟಗಾರರು ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿದ್ದರೂ ರೋಹಿತ್ ಶರ್ಮಾ ಫೀಲ್ಡಿಂಗ್ನಲ್ಲಿ ಮಹತ್ವದ ಬದಲಾವಣೆ ಮಾಡಿರಲಿಲ್ಲ. ಪೋಪ್ ಸ್ವೀಪ್ ಅಥವಾ ರಿವರ್ಸ್ ಸ್ವೀಪ್‌ಗಳನ್ನು ಬಾರಿಸುತ್ತಿದ್ದರೂ ಅದಕ್ಕೆ ತಕ್ಕದಂತಹ ಪ್ರತಿತಂತ್ರವನ್ನು ರೂಪಿಸುವಲ್ಲಿ ಟೀಮ್ ಇಂಡಿಯಾ ನಾಯಕ ವಿಫಲರಾದರು. ಪರಿಣಾಮ ಪೋಪ್ ಸುಲಭವಾಗಿ ರನ್ಗಳಿಸುತ್ತಾ ಸಾಗಿದರು.
ಇತ್ತ 163 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡರೂ ಕೊನೆಯ ಐದು ವಿಕೆಟ್ಗಳೊಂದಿಗೆ ಇಂಗ್ಲೆಂಡ್ ತಂಡ 257 ರನ್ ಪೇರಿಸಿತು. ಅದು ಕೂಡ ಬೌಲರ್ಗಳ ನೆರವಿನಿಂದ ಎಂಬುದು ಇಲ್ಲಿ ಉಲ್ಲೇಖಾರ್ಹ. ಹೀಗಾಗಿಯೇ ರೋಹಿತ್ ಶರ್ಮಾ ಅವರದ್ದು ಸಾಧಾರಣ ನಾಯಕತ್ವ, ಅದರಲ್ಲೇನು ವಿಶೇಷವಿರಲಿಲ್ಲ ಎಂದು ಇಂಗ್ಲೆಂಡ್ ತಂಡದ ಮಾಜಿ ನಾಯಕ ಮೈಕಲ್ ವಾನ್ ಅಭಿಪ್ರಾಯಪಟ್ಟಿದ್ದಾರೆ.
ಇಂಗ್ಲೆಂಡ್ ತಂಡವು ಆಕ್ರಮಣಕಾರಿಯಾಗಿ ಆಡುತ್ತಿದ್ದರೂ ರೋಹಿತ್ ಶರ್ಮಾ ಕಡೆಯಿಂದ ಬೌಲರ್ಗಳಿಗೆ ಬೇಕಾದ ಬೆಂಬಲ ದೊರೆತಿರಲಿಲ್ಲ. ಸ್ವೀಪ್ ಶಾಟ್ ಆಡುವ ಆಟಗಾರರಿಗೆ ಶ್ರೇಷ್ಠ ಸ್ಪಿನ್ನರ್ ಶೇನ್ ವಾರ್ನ್ ವಿಕೆಟ್ ಸುತ್ತಲೂ ಫೀಲ್ಡಿಂಗ್ ನಿಲ್ಲಿಸಿ ರಣತಂತ್ರ ಹೆಣೆಯುತ್ತಾರೆ. ಅಂತಹ ಯಾವುದೇ ಪ್ರಯೋಗಗಳೂ ಭಾರತದ ನಾಯಕನ ಕಡೆಯಿಂದ ಕಂಡು ಬಂದಿರಲಿಲ್ಲ. ಹೀಗಾಗಿಯೇ ಟೆಸ್ಟ್ನಲ್ಲಿ ರೋಹಿತ್ ಶರ್ಮಾ ಅವರ ನಾಯಕತ್ವದ ಗುಣಗಳು ಸಾಧಾರಣ ಮಟ್ಟದಲ್ಲಿದೆ ಎಂದೆನಿಸುತ್ತದೆ ಎಂದು ಮೈಕಲ್ ವಾನ್ ತಿಳಿಸಿದ್ದಾರೆ.
ಒಟ್ಟಿನಲ್ಲಿ ಇಂಗ್ಲೆಂಡ್ ವಿರುದ್ಧದ ಸೋಲಿನ ಬೆನ್ನಲ್ಲೇ ರೋಹಿತ್ ಶರ್ಮಾ ಅವರ ಟೆಸ್ಟ್ ನಾಯಕತ್ವದ ಬಗ್ಗೆ ಟೀಕೆಗಳು ಕೇಳಿ ಬರಲಾರಂಭಿಸಿದೆ. ಈ ಎಲ್ಲಾ ಟೀಕೆ ಟಿಪ್ಪಣಿಗಳಿಗೆ ದ್ವಿತೀಯ ಟೆಸ್ಟ್ ಮೂಲಕ ಹಿಟ್ಮ್ಯಾನ್ ಉತ್ತರ ನೀಡಲಿದ್ದಾರಾ ಕಾದು ನೋಡಬೇಕಿದೆ.