IPL 2025: ಆರ್ಸಿಬಿಯ ಹೊಸ ಆಪತ್ಭಾಂಧವ ಜೋಶ್ ಹೇಜಲ್ವುಡ್ ಎಷ್ಟು ಕೋಟಿಯ ಒಡೆಯ ಗೊತ್ತಾ?
Josh Hazelwood Net Worth: ಆರ್ಸಿಬಿ ತಂಡ ಸೇರಿದ ಬಳಿಕ ಜೋಶ್ ಹೇಜಲ್ವುಡ್ ಅವರ ಅದ್ಭುತ ಬೌಲಿಂಗ್ ಪ್ರದರ್ಶನದಿಂದ ತಂಡದ ಚಿತ್ರಣವೇ ಬದಲಾಗಿದೆ. 11 ಪಂದ್ಯಗಳಲ್ಲಿ 21 ವಿಕೆಟ್ಗಳನ್ನು ಪಡೆದ ಅವರು 12.5 ಕೋಟಿ ರೂ.ಗಳಿಗೆ ಆರ್ಸಿಬಿ ಸೇರಿಕೊಂಡಿದ್ದರು. ಐಪಿಎಲ್ನಿಂದ 32.5 ಕೋಟಿ ರೂ. ಗಳಿಸಿರುವ ಹೇಜಲ್ವುಡ್ ಅವರ ನಿವ್ವಳ ಮೌಲ್ಯ 80 ಕೋಟಿ ರೂ.ಗಿಂತ ಹೆಚ್ಚು ಎಂದು ಅಂದಾಜಿಸಲಾಗಿದೆ.
ಆಸ್ಟ್ರೇಲಿಯಾ ವೇಗಿ ಜೋಶ್ ಹೇಜಲ್ವುಡ್ ಆರ್ಸಿಬಿ ತಂಡವನ್ನು ಸೇರಿಕೊಂಡ ಬಳಿಕ ತಂಡದ ಚಿತ್ರಣವೇ ಬದಲಾಗಿದೆ. ಹೇಜಲ್ವುಡ್ ಇಲ್ಲದೆ ಬ್ಯಾಕ್ ಟು ಬ್ಯಾಕ್ ಪಂದ್ಯಗಳಲ್ಲಿ ದುಬಾರಿಯಾಗಿದ್ದ ಆರ್ಸಿಬಿ ಬೌಲಿಂಗ್ ವಿಭಾಗ, ಹೇಜಲ್ವುಡ್ ತಂಡವನ್ನು ಸೇರಿಕೊಂಡ ಬಳಿಕ ಪಂಜಾಬ್ ಕಿಂಗ್ಸ್ ವಿರುದ್ಧ ಮಾರಕ ಪ್ರದರ್ಶನ ನೀಡಿ ಬಲಿಷ್ಠ ತಂಡವನ್ನು 101 ರನ್ಗಳಿಗೆ ಆಲೌಟ್ ಮಾಡಿತ್ತು.
ಹೀಗಾಗಿಯೇ ಆರ್ಸಿಬಿ ವೇಗಿ ಜೋಶ್ ಹೇಜಲ್ವುಡ್ ಅವರನ್ನು ಎಲ್ಲೆಡೆ ಪ್ರಶಂಸಿಸಲಾಗುತ್ತಿದೆ. ಈ ವೇಗದ ಬೌಲರ್ ಆರ್ಸಿಬಿ ತಂಡವನ್ನು ಫೈನಲ್ಗೆ ಕೊಂಡೊಯ್ಯುವಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದಾರೆ. ಹೇಜಲ್ವುಡ್ ಇದುವರೆಗೆ 11 ಪಂದ್ಯಗಳಲ್ಲಿ 21 ವಿಕೆಟ್ಗಳನ್ನು ಕಬಳಿಸಿದ್ದಾರೆ.
ಈ ಬಾರಿಯ ಮೆಗಾ ಹರಾಜಿನಲ್ಲಿ ಹೇಜಲ್ವುಡ್ ಅವರನ್ನು ಖರೀದಿಸಲು ಸಾಕಷ್ಟು ತಂಡಗಳ ನಡುವೆ ಪೈಪೋಟಿ ಇತ್ತು. ಹೀಗಾಗಿ ಹೇಜಲ್ವುಡ್ ಅವರನ್ನು ತನ್ನ ತಂಡಕ್ಕೆ ಸೇರಿಸಿಕೊಳ್ಳಲು ಆರ್ಸಿಬಿ ಸಾಕಷ್ಟು ಹಣವನ್ನು ಖರ್ಚು ಮಾಡಬೇಕಾಯಿತು. ಅಂತಿಮವಾಗಿ ಈ ಬಲಗೈ ವೇಗದ ಬೌಲರ್ನನ್ನು ಆರ್ಸಿಬಿ 12.5 ಕೋಟಿ ರೂ.ಗೆ ಖರೀದಿಸಿತು.
ಐಪಿಎಲ್ನಲ್ಲಿ ವರ್ಷಗಳಿಂದ ಆಡುತ್ತಿರುವ ಹೇಜಲ್ವುಡ್ಗೆ ಈ ಬಾರಿಯ ಮೆಗಾ ಹರಾಜಿನಲ್ಲಿ ಭಾರಿ ಮೊತ್ತವನ್ನೇ ನೀಡಲಾಯಿತು. ಹಾಗಿದ್ದರೆ, ಐಪಿಎಲ್ನಿಂದ ಹೇಜಲ್ವುಡ್ ಎಷ್ಟು ಸಂಪಾಧನೆ ಮಾಡಿದ್ದಾರೆ ಎಂಬುದನ್ನು ನೋಡುವುದಾದರೆ.. ಈ ಆಸೀಸ್ ವೇಗಿ ಒಟ್ಟು 32 ಕೋಟಿ 50 ಲಕ್ಷ ರೂ.ಗಳನ್ನು ಗಳಿಸಿದ್ದಾರೆ.
ವಾಸ್ತವವಾಗಿ ಹೇಜಲ್ವುಡ್ ಐಪಿಎಲ್ನಿಂದ ಇದಕ್ಕೂ ಅಧಿಕ ಮೊತ್ತವನ್ನು ಸಂಪಾಧಿಸಬಹುದಾಗಿತ್ತು. ಆದರೆ ಅವರು ಕಳೆದ ಬಾರಿಯ ಐಪಿಎಲ್ ಆಡಲು ಸಾಧ್ಯವಾಗಲಿಲ್ಲ. ಇನ್ನು ಹೇಜಲ್ವುಡ್ ಎಷ್ಟು ಕೋಟಿಗಳ ಒಡೆಯ ಎಂಬುದನ್ನು ನೋಡುವುದಾದರೆ. ಮಾಧ್ಯಮ ವರದಿಗಳ ಪ್ರಕಾರ, ಹೇಜಲ್ವುಡ್ ಅವರ ನಿವ್ವಳ ಮೌಲ್ಯ 80 ಕೋಟಿ ರೂ.ಗಳಿಗಿಂತ ಹೆಚ್ಚು.
ಹೇಜಲ್ವುಡ್ ಅಪಾರ ಪ್ರಮಾಣದ ಆಸ್ತಿಯನ್ನು ಹೊಂದಿದ್ದಾರೆ. ಅವರ ಮನೆ ಸಿಡ್ನಿಯ ಹಂಟರ್ಸ್ ಹಿಲ್ನಲ್ಲಿದ್ದು, ಅಲ್ಲಿ ಅವರು ಐಷಾರಾಮಿ ಬಂಗಲೆಯಲ್ಲಿ ವಾಸಿಸುತ್ತಿದ್ದಾರೆ. ಹೇಜಲ್ವುಡ್ ಈ ಮನೆಯನ್ನು 2016 ರಲ್ಲಿ 29 ಕೋಟಿ ರೂ.ಗಳಿಗೆ ಖರೀದಿಸಿದ್ದರು.