Rishabh Pant: ಅಪಘಾತದ ಬಳಿಕ ಜೀವನ ಹೇಗಿದೆ? ಮುಕ್ತವಾಗಿ ಮಾತನಾಡಿದ ರಿಷಭ್ ಪಂತ್
Rishabh Pant Updates: ಈ ಭೀಕರ ಅಪಘಾತದ ಬಳಿಕ ರಿಷಭ್ ಪಂತ್ ಎಲ್ಲೂ ತಮ್ಮ ಕೆಟ್ಟ ಅನುಭವವನ್ನು ಹಂಚಿಕೊಂಡಿರಲಿಲ್ಲ. ಅದರಲ್ಲೂ ಪ್ರಸ್ತುತ ಆರೋಗ್ಯ ಪರಿಸ್ಥಿತಿಯ ಬಗ್ಗೆ ಮಾಹಿತಿಯನ್ನು ಬಹಿರಂಗಪಡಿಸಿರಲಿಲ್ಲ.
ಕಳೆದ ವರ್ಷ ಡಿಸೆಂಬರ್‌ನಲ್ಲಿ ನಡೆದ ಭೀಕರ ರಸ್ತೆ ಅಪಘಾತದಲ್ಲಿ ಟೀಮ್ ಇಂಡಿಯಾದ ಯುವ ಆಟಗಾರ ರಿಷಭ್ ಪಂತ್ ಪವಾಡಸದೃಶವಾಗಿ ಪಾರಾಗಿದ್ದರು. ದೆಹಲಿಯಿಂದ ರೂರ್ಕಿಯಲ್ಲಿರುವ ತನ್ನ ಮನೆಗೆ ಪ್ರಯಾಣಿಸುತ್ತಿದ್ದಾಗ ಹರಿದ್ವಾರ ಜಿಲ್ಲೆಯ ಮಂಗಳೌರ್ ಮತ್ತು ನರ್ಸನ್ ನಡುವಿನ ಡಿವೈಡರ್‌ಗೆ ಪಂತ್ ಅವರ ಕಾರು ಡಿಕ್ಕಿ ಹೊಡೆದಿತ್ತು.
1 / 11
ಇದರಿಂದ ಗಂಭೀರವಾಗಿ ಗಾಯಗೊಂಡಿದ್ದ ರಿಷಭ್ ಪಂತ್ ಆಸ್ಪತ್ರೆಗೆ ದಾಖಲಾಗಿದ್ದರು. ಇದಾದ ಬಳಿಕ ಆಸ್ಪತ್ರೆಯಿಂದ ಡಿಸ್ಚಾರ್ಚ್ ಆದ ಪಂತ್ ಇದೀಗ ಮನೆಯಲ್ಲಿಯೇ ಚಿಕಿತ್ಸೆ ಮುಂದುವರೆಸಿದ್ದಾರೆ.
2 / 11
ಈ ಭೀಕರ ಅಪಘಾತದ ಬಳಿಕ ರಿಷಭ್ ಪಂತ್ ಎಲ್ಲೂ ತಮ್ಮ ಕೆಟ್ಟ ಅನುಭವವನ್ನು ಹಂಚಿಕೊಂಡಿರಲಿಲ್ಲ. ಅದರಲ್ಲೂ ಪ್ರಸ್ತುತ ಆರೋಗ್ಯ ಪರಿಸ್ಥಿತಿಯ ಬಗ್ಗೆ ಮಾಹಿತಿಯನ್ನು ಬಹಿರಂಗಪಡಿಸಿರಲಿಲ್ಲ. ಇದೀಗ ಖುದ್ದು ಪಂತ್ ಅವರೇ ಮಾಧ್ಯಮವೊಂದಕ್ಕೆ ಸಂದರ್ಶನ ನೀಡಿದ್ದಾರೆ. ಈ ವೇಳೆ ತಮಗಾದ ಅನುಭವಗಳು, ಈಗ ಹೇಗಿದ್ದೀನಿ ಎಂಬುದರ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ.
3 / 11
ಅಪಘಾತದಿಂದಾಗಿ ನಾನು ಅನೇಕ ರೀತಿಯಲ್ಲಿ ಗಾಯಗೊಂಡಿದ್ದೇನೆ. ಇದಕ್ಕಾಗಿ ಈಗ ಫಿಸಿಯೋಥೆರಪಿಗಳನ್ನು ಮಾಡಿಸಿಕೊಳ್ಳುತ್ತಿದ್ದೇನೆ. ಇದೀಗ ಮನೆಯಲ್ಲಿಯೇ ಇದ್ದೇನೆ. ಎಲ್ಲವೂ ಶೀಘ್ರದಲ್ಲೇ ಗುಣಮುಖವಾಗಲಿದೆ ಎಂದು ಭಾವಿಸುತ್ತೇನೆ ಎಂದು ರಿಷಭ್ ಪಂತ್ ಹೇಳಿದ್ದಾರೆ.
4 / 11
ಇನ್ನು ಗಾಯಗಳ ಚೇತರಿಕೆಯ ಪ್ರತಿಕ್ರಿಯಿಸಿದ ಪಂತ್, ಈಗ ನೋವು ಕಡಿಮೆಯಾಗಿದೆ. ಚೇತರಿಕೆಯಲ್ಲೂ ಉತ್ತಮ ಪ್ರಗತಿಯನ್ನು ಸಾಧಿಸುತ್ತಿದ್ದೇನೆ. ದೇವರ ದಯೆ ಮತ್ತು ವೈದ್ಯಕೀಯ ತಂಡದ ಬೆಂಬಲದೊಂದಿಗೆ, ನಾನು ಶೀಘ್ರದಲ್ಲೇ ಸಂಪೂರ್ಣವಾಗಿ ಫಿಟ್ ಆಗುತ್ತೇನೆ ಎಂದು ವಿಶ್ವಾಸವಿದೆ ಎಂದು ಪಂತ್ ತಿಳಿಸಿದ್ದಾರೆ.
5 / 11
ಈ ಅಪಘಾತದ ಬಳಿಕ ನನ್ನ ಜೀವನಕ್ಕೆ ಹೊಸ ದೃಷ್ಟಿಕೋನ ಸಿಕ್ಕಿದೆ. ನನ್ನ ಸುತ್ತಲಿನ ಎಲ್ಲವೂ ಹೆಚ್ಚು ಧನಾತ್ಮಕವಾಗಿದೆಯೇ ಅಥವಾ ನಕಾರಾತ್ಮಕವಾಗಿದೆಯೇ ಎಂದು ಹೇಳುವುದು ನನಗೆ ಕಷ್ಟ. ಆದಾಗ್ಯೂ, ಈಗ ನನ್ನ ಜೀವನವನ್ನು ಹೇಗೆ ನೋಡುತ್ತೇನೆ ಎಂಬುದರ ಕುರಿತು ನಾನು ಹೊಸ ದೃಷ್ಟಿಕೋನವನ್ನು ಹೊಂದಿದ್ದೇನೆ.
6 / 11
ಇಂದು ನಾನು ಮೌಲ್ಯಯುತವಾದ ಜೀವನವನ್ನು ಪೂರ್ಣವಾಗಿ ಆನಂದಿಸುತ್ತಿದ್ದೇನೆ. ನಮ್ಮ ದೈನಂದಿನ ದಿನಚರಿಯಲ್ಲಿ ನಾವು ನಿರ್ಲಕ್ಷಿಸುವ ಚಿಕ್ಕ ಚಿಕ್ಕ ವಿಷಯಗಳನ್ನು ಸಹ ಇದು ಒಳಗೊಂಡಿದೆ. ಇಂದು ಪ್ರತಿಯೊಬ್ಬರೂ ವಿಶೇಷವಾದದ್ದನ್ನು ಸಾಧಿಸಲು ಹರಸಾಹಸಪಡುತ್ತಿದ್ದಾರೆ ಮತ್ತು ಹೆಚ್ಚು ಶ್ರಮಿಸುತ್ತಿದ್ದಾರೆ. ಆದರೆ ಪ್ರತಿದಿನ ನಮಗೆ ಸಂತೋಷವನ್ನು ನೀಡುವ ಸಣ್ಣ ವಿಷಯಗಳನ್ನು ಆನಂದಿಸಲು ನಾವು ಮರೆತಿದ್ದೇವೆ. ಇದೆಲ್ಲವನ್ನು ಈಗ ನಾನು ಆನಂದಿಸುತ್ತಿದ್ದೇನೆ ಎಂದು ರಿಷಭ್ ಪಂತ್ ತಿಳಿಸಿದ್ದಾರೆ.
7 / 11
ಇದೇ ವೇಳೆ ಮಿಸ್ ಮಾಡಿಕೊಳ್ಳುತ್ತಿರುವುದೇನು ಎಂಬುದನ್ನು ಕೂಡ ರಿಷಭ್ ಪಂತ್ ತಿಳಿಸಿದ್ದಾರೆ. ನಾನು ಕ್ರಿಕೆಟ್ ಅನ್ನು ಎಷ್ಟು ಕಳೆದುಕೊಳ್ಳುತ್ತೇನೆ ಎಂದು ಹೇಳುವುದು ಕಷ್ಟ. ಏಕೆಂದರೆ ನನ್ನ ಜೀವನವು ಅಕ್ಷರಶಃ ಅದರ ಸುತ್ತ ಸುತ್ತುತ್ತದೆ. ಆದರೆ ನಾನು ಈಗ ನನ್ನ ಪಾದಗಳತ್ತ ಗಮನಹರಿಸುತ್ತಿದ್ದೇನೆ. ನಾನು ಹೆಚ್ಚು ಇಷ್ಟಪಡುವುದನ್ನು ಮಾಡಲು, ಕ್ರಿಕೆಟ್ ಆಡಲು ಹಿಂತಿರುಗಲು ಮತ್ತಷ್ಟು ದಿನ ಕಾಯಲು ನನಗೆ ಸಾಧ್ಯವಿಲ್ಲ ಎಂದು ಪಂತ್ ತಿಳಿಸಿದರು.
8 / 11
ಸದ್ಯದ ಪರಿಸ್ಥಿತಿಯಲ್ಲಿ ನಾನು ಸಾಧ್ಯವಾದಷ್ಟು ನೋವನ್ನು ಸಹಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದೇನೆ. ವೇಳಾಪಟ್ಟಿಯ ಪ್ರಕಾರ ನನ್ನ ದಿನಚರಿಯನ್ನು ಅನುಸರಿಸಲು ಪ್ರಯತ್ನಿಸುತ್ತೇನೆ. ನಾನು ಬೆಳಿಗ್ಗೆ ಎದ್ದೇಳುತ್ತೇನೆ. ಆ ನಂತರ ನನ್ನ ಫಿಸಿಯೋಥೆರಪಿಸ್ಟ್‌ನೊಂದಿಗೆ ದಿನದ ನನ್ನ ಮೊದಲ ಫಿಸಿಯೋಥೆರಪಿ ಸೆಷನ್‌ಗೆ ಒಳಗಾಗುತ್ತೇನೆ. ಆ ಬಳಿಕ ನಾನು ಸ್ವಲ್ಪ ವಿಶ್ರಾಂತಿ ತೆಗೆದುಕೊಳ್ಳುತ್ತೇನೆ. ಇನ್ನು ಎರಡನೇ ಸೆಷನ್‌ಗಾಗಿ ನನ್ನನ್ನು ರಿಫ್ರೆಶ್ ಮಾಡಲು ಸಮಯ ತೆಗೆದುಕೊಳ್ಳುತ್ತೇನೆ.
9 / 11
ನಾನು ಎಷ್ಟು ನೋವನ್ನು ಸಹಿಸಿಕೊಳ್ಳಬಲ್ಲೆ ಎಂಬುದಕ್ಕೆ ಅನುಗುಣವಾಗಿ ತರಬೇತಿ ತೆಗೆದುಕೊಳ್ಳುತ್ತಿದ್ದೇನೆ. ಇದಾಗ್ಯೂ ಮೊದಲ ಸೆಷನ್ ಫಿಸಿಯೋಥೆರಪಿ ಬಳಿಕ ಮತ್ತೊಮ್ಮೆ ಥೆರಪಿಗೆ ಒಳಗಾಗುವುದು ತುಂಬಾ ಕಷ್ಟ. ಇದಾಗ್ಯೂ ಸಂಜೆ ಮೂರನೇ ಬಾರಿಗೆ ಫಿಸಿಯೋಥೆರಪಿಯನ್ನು ಮಾಡುತ್ತಿದ್ದೇನೆ. ಇದರ ನಡುವೆ ಆಹಾರ ಸೇವನೆ ಇರುತ್ತದೆ. ಹಾಗೆಯೇ ಸ್ವಲ್ಪ ಸಮಯದವರೆಗೆ ಸೂರ್ಯನ ಬೆಳಕಿನಲ್ಲಿ ಕುಳಿತುಕೊಳ್ಳುತ್ತೇನೆ. ನಾನು ಮತ್ತೆ ಸರಿಯಾಗಿ ನಡೆಯಲು ಸಾಧ್ಯವಾಗುವವರೆಗೆ ಈ ದಿನಚರಿ ಪ್ರಕ್ರಿಯೆಯು ಮುಂದುವರಿಯುತ್ತದೆ ಎಂದು ರಿಷಭ್ ಪಂತ್ ತಿಳಿಸಿದರು.
10 / 11
ಸದ್ಯ ಚಿಕಿತ್ಸೆಯಲ್ಲಿರುವ ರಿಷಭ್ ಪಂತ್ ಟೀಮ್ ಇಂಡಿಯಾಗೆ ಕಂಬ್ಯಾಕ್ ಮಾಡಲು ಕನಿಷ್ಠ ಒಂದು ವರ್ಷ ತೆಗೆದುಕೊಳ್ಳಲಿದೆ. ಇದರಿಂದ ಮುಂಬರುವ ಏಕದಿನ ವಿಶ್ವಕಪ್ ಸೇರಿದಂತೆ ಪ್ರಮುಖ ಟೂರ್ನಿಗಳಲ್ಲಿ ಯುವ ಸ್ಪೋಟಕ ದಾಂಡಿಗ ಕಾಣಿಸಿಕೊಳ್ಳುವುದಿಲ್ಲ.
