ಏಕದಿನ ವಿಶ್ವಕಪ್ನಲ್ಲಿ ಅಧಿಕ ರನ್ ಬಾರಿಸುವ ಆಟಗಾರನನ್ನು ಹೆಸರಿಸಿದ ಸಿಡಿಲಮರಿ ಸೆಹ್ವಾಗ್
ODI World Cup 2023: ಈ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ರನ್ ಕಲೆಹಾಕುವ ಅವಕಾಶ ಆರಂಭಿಕರಿಗೆ ಸಿಗಲಿದೆ. ಭಾರತದ ಪಿಚ್ಗಳು ಬ್ಯಾಟಿಂಗ್ ಸ್ನೇಹಿಯಾಗಿವೆ. ಆದ್ದರಿಂದ ಆರಂಭಿಕರಿಗೆ ಇದು ಉತ್ತಮ ಅವಕಾಶ ಎಂದು ನಾನು ಭಾವಿಸುತ್ತೇನೆ. ನನ್ನ ಮನಸ್ಸಿನಲ್ಲಿ ರೋಹಿತ್ ಅಲ್ಲದೆ ಇನ್ನೊಂದೆರಡು ಹೆಸರುಗಳಿವೆ. ಆದರೆ ನಾನು ಭಾರತೀಯನಾಗಿ, ಭಾರತೀಯ ಆಟಗಾರನನ್ನು ಆರಿಸಬೇಕು. ಆದ್ದರಿಂದ ನನ್ನ ಆಯ್ಕೆ ರೋಹಿತ್ ಶರ್ಮಾ’ ಎಂದಿದ್ದಾರೆ.
ವಿಶ್ವಕಪ್ ಸನಿಹವಾಗುತ್ತಿದ್ದಂತೆ ಮಾಜಿ ಕ್ರಿಕೆಟಿಗರು, ಈ ಬಾರಿಯ ವಿಶ್ವಕಪ್ ಗೆಲ್ಲುವ ತನ್ನ ನೆಚ್ಚಿನ ತಂಡ ಹಾಗೂ ಈ ವಿಶ್ವಕಪ್ಗೆ ತಮ್ಮ ನೆಚ್ಚಿನ ತಂಡದಲ್ಲಿ ಯಾರೆಲ್ಲ ಇರಬೇಕು ಎಂಬುದನ್ನು ಊಹಿಸಲಾರಂಭಿಸಿದ್ದಾರೆ. ಇದೀಗ ಆ ಸಾಲಿಗೆ ಟೀಂ ಇಂಡಿಯಾದ ಮಾಜಿ ಓಪನರ್ ವೀರೇಂದ್ರ ಸೆಹ್ವಾಗ್ ಸೇರ್ಪಡೆಗೊಂಡಿದ್ದು, ಈ ವಿಶ್ವಕಪ್ನಲ್ಲಿ ಯಾವ ಆಟಗಾರ ಹೆಚ್ಚು ರನ್ ಕಲೆಹಾಕಲಿದ್ದಾನೆ ಎಂಬ ಪ್ರಶ್ನೆಗೆ ಟೀಂ ಇಂಡಿಯಾದ ಹಾಲಿ ನಾಯಕ ರೋಹಿತ್ ಶರ್ಮಾ ಅವರ ಹೆಸರನ್ನು ಸೂಚಿಸಿದ್ದಾರೆ.
ಈ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿರುವ ಸೆಹ್ವಾಗ್, ಈ ಬಾರಿಯ ವಿಶ್ವಕಪ್ನಲ್ಲಿ ಪ್ರಸ್ತುತ ಟೀಂ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಪ್ರಮುಖ ರನ್ ಗೆಟರ್ ಆಗಲಿದ್ದಾರೆ ಎಂದು ವೀರೇಂದ್ರ ಸೆಹ್ವಾಗ್ ಭವಿಷ್ಯ ನುಡಿದಿದ್ದಾರೆ.
ಮುಂದುವರೆದು ಮಾತನಾಡಿದ ಸೆಹ್ವಾಗ್, ‘ಈ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ರನ್ ಕಲೆಹಾಕುವ ಅವಕಾಶ ಆರಂಭಿಕರಿಗೆ ಸಿಗಲಿದೆ. ಭಾರತದ ಪಿಚ್ಗಳು ಬ್ಯಾಟಿಂಗ್ ಸ್ನೇಹಿಯಾಗಿವೆ. ಆದ್ದರಿಂದ ಆರಂಭಿಕರಿಗೆ ಇದು ಉತ್ತಮ ಅವಕಾಶ ಎಂದು ನಾನು ಭಾವಿಸುತ್ತೇನೆ. ನನ್ನ ಮನಸ್ಸಿನಲ್ಲಿ ರೋಹಿತ್ ಅಲ್ಲದೆ ಇನ್ನೊಂದೆರಡು ಹೆಸರುಗಳಿವೆ. ಆದರೆ ನಾನು ಭಾರತೀಯನಾಗಿ, ಭಾರತೀಯ ಆಟಗಾರನನ್ನು ಆರಿಸಬೇಕು. ಆದ್ದರಿಂದ ನನ್ನ ಆಯ್ಕೆ ರೋಹಿತ್ ಶರ್ಮಾ’ ಎಂದಿದ್ದಾರೆ.
ಇನ್ನು ರೋಹಿತ್ ಬಗ್ಗೆ ಮೆಚ್ಚುಗೆಯ ಮಾತನಾಡಿದ ಸೆಹ್ವಾಗ್, ‘ವಿಶ್ವಕಪ್ ಬಂದಾಗ, ರೋಹಿತ್ ಅವರ ಶಕ್ತಿಯ ಮಟ್ಟ, ಅವರ ಪ್ರದರ್ಶನ ಹೆಚ್ಚಾಗುತ್ತದೆ. ಆದ್ದರಿಂದ, ಈ ವಿಶ್ವಕಪ್ನಲ್ಲಿ ರೋಹಿತ್ ಅದ್ಭುತ ಪ್ರದರ್ಶನ ನೀಡಲಿದ್ದಾರೆ ಎಂದು ನನಗೆ ಖಚಿತವಾಗಿದೆ. ಅಲ್ಲದೆ ಈ ಬಾರಿ ಅವರೇ ತಂಡದ ನಾಯಕರಾಗಿರುವುದರಿಂದ ತಂಡಕ್ಕೆ ಪ್ರಮುಖ ಕೊಡುಗೆ ನೀಡಲಿದ್ದು, ಸಾಕಷ್ಟು ರನ್ ಗಳಿಸುತ್ತಾರೆ ಎಂದು ನನಗೆ ಖಾತ್ರಿಯಿದೆ’ ಎಂದು ಸೆಹ್ವಾಗ್ ಹೇಳಿದ್ದಾರೆ.
ಸೆಹ್ವಾಗ್ ಹೇಳಿಕೆಗೆ ಪೂರಕವಾಗಿ ರೋಹಿತ್ ಅವರ ವಿಶ್ವಕಪ್ ಪ್ರದರ್ಶನ ಕೂಡ ಇದಕ್ಕೆ ಪುಷ್ಠಿ ನೀಡುತ್ತದೆ. ಇಂಗ್ಲೆಂಡ್ನಲ್ಲಿ ನಡೆದ 2019 ರ ಏಕದಿನ ವಿಶ್ವಕಪ್ನಲ್ಲಿ ರೋಹಿತ್ ಇಡೀ ಪಂದ್ಯಾವಳಿಯಲ್ಲಿ ಅತಿ ಹೆಚ್ಚು ರನ್ ಕಲೆ ಹಾಕಿದ ಆಟಗಾರ ಎನಿಸಿಕೊಂಡಿದ್ದರು. ಆಡಿದ ಒಂಬತ್ತು ಪಂದ್ಯಗಳಲ್ಲಿ, ಅವರು ಐದು ಶತಕಗಳನ್ನು ಒಳಗೊಂಡಂತೆ 81 ರ ಸರಾಸರಿಯಲ್ಲಿ 648 ರನ್ ಕಲೆಹಾಕಿದ್ದರು.
ಒಟ್ಟಾರೆಯಾಗಿ ಭಾರತದ ಪರ 244 ಏಕದಿನ ಪಂದ್ಯಗಳನ್ನಾಡಿರುವ ರೋಹಿತ್, 48.69 ರ ಸರಾಸರಿಯಲ್ಲಿ 30 ಶತಕ ಮತ್ತು 48 ಅರ್ಧ ಶತಕಗಳೊಂದಿಗೆ 9837 ರನ್ ಬಾರಿಸಿದ್ದಾರೆ.
ಇನ್ನು ಈ ವರ್ಷ ರೋಹಿತ್ ಎಲ್ಲಾ ಮಾದರಿಯ ಕ್ರಿಕೆಟ್ನಲ್ಲಿ 16 ಪಂದ್ಯಗಳನ್ನಾಡಿದ್ದು, ಇದರಲ್ಲಿ 48.57 ಸರಾಸರಿಯಲ್ಲಿ 923 ರನ್ ಕಲೆಹಾಕಿದ್ದಾರೆ. ಇದು ರೋಹಿತ್ ಉತ್ತಮ ಫಾರ್ಮ್ನಲ್ಲಿರುವ ಸೂಚಕವಾಗಿದ್ದು, ಈ ಮೆಗಾ ಈವೆಂಟ್ನಲ್ಲಿ ರೋಹಿತ್ ಅಬ್ಬರಿಸುವ ಸಾಧ್ಯತೆಗಳಿವೆ.
ಇನ್ನು ಟೀಂ ಇಂಡಿಯಾ ಅಕ್ಟೋಬರ್ 8 ರಂದು ಚೆನ್ನೈನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಕಣಕ್ಕಿಳಿಯುವ ಮೂಲಕ ತನ್ನ ವಿಶ್ವಕಪ್ ಪ್ರಯಾಣವನ್ನು ಆರಂಭಿಸಲಿದೆ. ಆ ಬಳಿಕ ಅಕ್ಟೋಬರ್ 14 ರಂದು ಭಾರತ ಹಾಗೂ ಪಾಕಿಸ್ತಾನ ನಡುವೆ ಹೈವೋಲ್ಟೇಜ್ ಕದನ ನಡೆಯಲ್ಲಿದೆ.