ಅತಿಯಾಗಿ ಸ್ಮಾರ್ಟ್ಫೋನ್ ಬಳಸುತ್ತೀರಾ?; ಟ್ರಿಗರ್ ಫಿಂಗರ್ ಸಮಸ್ಯೆ ಬಗ್ಗೆಯೂ ತಿಳಿದಿರಲಿ
ನೀವು ಟಚ್‌ಸ್ಕ್ರೀನ್ ಅನ್ನು ಎಷ್ಟು ಸಮಯ ಬಳಸುತ್ತಿದ್ದೀರಿ ಎಂಬುದರ ಆಧಾರದ ಮೇಲೆ ಟ್ರಿಗರ್ ಫಿಂಗರ್ ಸಮಸ್ಯೆಯ ಲಕ್ಷಣಗಳ ತೀವ್ರತೆ ನಿರ್ಧರಿತವಾಗುತ್ತದೆ. ಟಚ್‌ಸ್ಕ್ರೀನ್‌ಗಳಲ್ಲಿ ನಿರಂತರವಾಗಿ ಟ್ಯಾಪಿಂಗ್ ಮತ್ತು ಸ್ಕ್ರೋಲಿಂಗ್ ಮಾಡುವುದರಿಂದ ಬೆರಳುಗಳ ಸ್ನಾಯುರಜ್ಜುಗಳ ಮೇಲೆ ಅತಿಯಾದ ಒತ್ತಡವನ್ನು ಉಂಟುಮಾಡಬಹುದು.
ಡಿಜಿಟಲೀಕರಣದ ಯುಗದಲ್ಲಿ ಸ್ಮಾರ್ಟ್‌ಫೋನ್‌ಗಳು, ಟ್ಯಾಬ್ಲೆಟ್‌ಗಳು ಮತ್ತು ಟಚ್ ಸ್ಕ್ರೀನ್‌ಗಳು ಜನರ ಮೇಲೆ ತಮ್ಮ ಸಂಪೂರ್ಣ ಪ್ರಾಬಲ್ಯ ಸಾಧಿಸಿವೆ.
ಸ್ಮಾರ್ಟ್ಫೋನ್ ಬಳಸದೇ ಇರುವವರೇ ಇಲ್ಲ ಎನ್ನುವಷ್ಟರ ಮಟ್ಟಿಗೆ ಟಚ್ಸ್ಕ್ರೀನ್ಗಳು ಜನರನ್ನು ಆವರಿಸಿಕೊಂಡಿವೆ.
ನಾವು ಸ್ಮಾರ್ಟ್‌ಫೋನ್‌ಗಳಿಗೆ ಅಂಟಿಕೊಂಡು ಅದನ್ನೇ ಚಟವನ್ನಾಗಿ ಮಾಡಿಕೊಂಡಿದ್ದೇವೆ. ಈ ಚಟ ಟ್ರಿಗರ್ ಫಿಂಗರ್ ಎಂಬ ಆರೋಗ್ಯ ಸಮಸ್ಯೆಗೆ ಕಾರಣವಾಗಬಹುದು.
ಈ ಟ್ರಿಗರ್ ಫಿಂಗರ್ ಕೈ ನೋವಿನ ಸಾಮಾನ್ಯ ಕಾರಣಗಳಲ್ಲಿ ಒಂದಾಗಿದೆ.
ಮೊಬೈಲ್ ಸ್ಕ್ರೀನ್ ಮೇಲೆ ನಮ್ಮ ಬೆರಳುಗಳನ್ನು ಇಟ್ಟು ಬ್ರೌಸ್ ಮಾಡುತ್ತಾ ಇರುವುದರಿಂದ ಬೆರಳಿನ ನೋವು, ಕೈಗಳ ನೋವು ಮುಂತಾದ ಆರೋಗ್ಯ ಸಮಸ್ಯೆಗಳು ಉಂಟಾಗಬಹುದು.
ಪ್ರಪಂಚದ ಜನಸಂಖ್ಯೆಯ ಸುಮಾರು ಶೇ. 2ರಷ್ಟು ಜನರು ಈ ಟ್ರಿಗರ್ ಫಿಂಗರ್ ಸಮಸ್ಯೆಗೆ ತುತ್ತಾಗಿದ್ದಾರೆ ಎಂದರೆ ನಿಮಗೆ ಆಶ್ಚರ್ಯವಾಗಬಹುದು.
ಟ್ರಿಗರ್ ಫಿಂಗರ್ ಎಂದರೆ ಸಾಮಾನ್ಯವಾಗಿ ಬೆರಳುಗಳು ಅಥವಾ ಹೆಬ್ಬೆರಳು ಲಾಕ್ ಮಾಡುವ ಅಥವಾ ಬಾಗುವ ಮತ್ತು ನೇರಗೊಳಿಸುವ ಚಲನೆಯ ಸಮಯದಲ್ಲಿ ತಡೆಹಿಡಿಯುವ ಒಂದು ಬಗೆಯ ಸ್ನಾಯುವಿನ ಸಮಸ್ಯೆಯಾಗಿದೆ.
ಈ ಸಮಸ್ಯೆ ಉಂಟಾದರೆ ನಿಮಗೆ ಹೆಬ್ಬೆರಳು ಮತ್ತಿತರೆ ಬೆರಳುಗಳನ್ನು ಸುಲಭವಾಗಿ ಅಲ್ಲಾಡಿಸಲು ಸಾಧ್ಯವಾಗುವುದಿಲ್ಲ. ಬೆರಳು ಬಿಗಿದಂತೆ ಭಾಸವಾಗುತ್ತದೆ.
ನೀವು ಟಚ್‌ಸ್ಕ್ರೀನ್ ಅನ್ನು ಎಷ್ಟು ಸಮಯ ಬಳಸುತ್ತಿದ್ದೀರಿ ಎಂಬುದರ ಆಧಾರದ ಮೇಲೆ ಟ್ರಿಗರ್ ಫಿಂಗರ್ ಸಮಸ್ಯೆಯ ಲಕ್ಷಣಗಳ ತೀವ್ರತೆ ನಿರ್ಧರಿತವಾಗುತ್ತದೆ.
ಬೆರಳು ಊದಿಕೊಳ್ಳುವುದು ಅಥವಾ ನೋವಿನಿಂದ ಕೂಡಿರುವುದು, ಬೆರಳಿನ ಬಿಗಿತ ಅದರಲ್ಲೂ ವಿಶೇಷವಾಗಿ ಬೆಳಿಗ್ಗೆ ಬೆರಳಿನ ಬಿಗಿತ ಉಂಟಾಗುವುದು ಈ ಟ್ರಿಗರ್ ಫಿಂಗರ್ನ ಲಕ್ಷಣ.
ನೋವಿರುವ ಬೆರಳಿನ ಬುಡದಲ್ಲಿ ಗಂಟಿನಲ್ಲಿ ಬಿಗಿತ, ಯಾವುದಾದರೂ ವಸ್ತುವನ್ನು ಗಟ್ಟಿಯಾಗಿ ಹಿಡಿದುಕೊಳ್ಳಲು ಸಾಧ್ಯವಾಗದಿರುವುದು, ತುಂಬ ಸಮಯದವರೆಗೆ ಬೆರಳು ಬಾಗಿದ ಸ್ಥಿತಿಯಲ್ಲಿರುವುದು ಟ್ರಿಗರ್ ಫಿಂಗರ್ ಸಮಸ್ಯೆಯ ಲಕ್ಷಣವಾಗಿದೆ.
ಟಚ್‌ಸ್ಕ್ರೀನ್‌ಗಳಲ್ಲಿ ನಿರಂತರವಾಗಿ ಟ್ಯಾಪಿಂಗ್ ಮತ್ತು ಸ್ಕ್ರೋಲಿಂಗ್ ಮಾಡುವುದರಿಂದ ಬೆರಳುಗಳ ಸ್ನಾಯುರಜ್ಜುಗಳ ಮೇಲೆ ಅತಿಯಾದ ಒತ್ತಡವನ್ನು ಉಂಟುಮಾಡಬಹುದು.
ಇದು ಉರಿಯೂತಕ್ಕೆ ಕಾರಣವಾಗುತ್ತದೆ. ಇದರಿಂದ ಟ್ರಿಗರ್ ಫಿಂಗರ್ ಸಮಸ್ಯೆ ಉಂಟಾಗುತ್ತದೆ.
ಈ ಟ್ರಿಗರ್ ಫಿಂಗರ್ ಸಮಸ್ಯೆ ಪುರುಷರಿಗಿಂತ ಮಹಿಳೆಯರಲ್ಲಿ 6 ಪಟ್ಟು ಹೆಚ್ಚು ಎಂದು ಅಧ್ಯಯನಗಳು ತಿಳಿಸಿವೆ.
ಟ್ರಿಗರ್ ಫಿಂಗರ್ ಸಮಸ್ಯೆ ಉಂಟಾದರೆ, ಫಿಜಿಯೋಥೆರಪಿಸ್ಟ್‌ಗಳನ್ನು ಭೇಟಿ ಮಾಡಿ.
ಫಿಸಿಯೋಥೆರಪಿಸ್ಟ್ಗಳು ಹೇಳುವ ಬೆರಳಿನ ವ್ಯಾಯಾಮಗಳು ಪೀಡಿತ ಸ್ನಾಯುರಜ್ಜುಗಳನ್ನು ಬಲಪಡಿಸಲು ಮತ್ತು ಹೆಚ್ಚಿನ ತೊಡಕುಗಳನ್ನು ತಡೆಯಲು ಸಹಾಯ ಮಾಡುತ್ತದೆ.