ಅಳಿಯ ಅತ್ತೆ-ಮಾವನಿಗೆ ಶ್ರಾದ್ಧ ಮಾಡಬಹುದೇ? ಈ ಬಗ್ಗೆ ಗರುಡ ಪುರಾಣ ಹೇಳುವುದೇನು?

ಹಿಂದೂ ಧರ್ಮದಲ್ಲಿ ಮರಣೋತ್ತರ ಸಂಸ್ಕಾರಗಳಿಗೆ ಹಾಗೂ ಪಿತೃಪಕ್ಷದ ಸಮಯದಲ್ಲಿ ನೆರವೇರಿಸುವ ಶ್ರಾದ್ಧ, ತರ್ಪಣ ಮತ್ತು ಪಿಂಡದಾನಗಳಿಗೆ ಅತ್ಯಂತ ಮಹತ್ವದ ಸ್ಥಾನವಿದೆ. ಅಗಲಿದ ಪಿತೃಗಳ ಆತ್ಮಕ್ಕೆ ಶಾಂತಿ ಮತ್ತು ಮೋಕ್ಷ ಸಿಗಲೆಂದು ಈ ಆಚರಣೆಗಳನ್ನು ಶ್ರದ್ಧೆಯಿಂದ ಮಾಡಲಾಗುತ್ತದೆ. ಗರುಡ ಪುರಾಣದಲ್ಲಿ ಶ್ರಾದ್ಧ ಕರ್ಮಗಳನ್ನು ಯಾರು ಮಾಡಬೇಕು ಮತ್ತು ಯಾರು ಮಾಡಬಾರದು ಎಂಬುದರ ಕುರಿತು ಸ್ಪಷ್ಟವಾದ ನಿಯಮಗಳನ್ನು ವಿವರಿಸಲಾಗಿದೆ.

ಸಾಮಾನ್ಯವಾಗಿ ಕುಟುಂಬದ ಹಿರಿಯ ಮಗ ಶ್ರಾದ್ಧ ಮತ್ತು ಪಿಂಡದಾನವನ್ನು ನೆರವೇರಿಸುತ್ತಾನೆ. ಆದರೆ ಗಂಡು ಮಗ ಇಲ್ಲದಿದ್ದಾಗ, ಅಳಿಯನು ಅತ್ತೆ-ಮಾವಂದಿರಿಗೆ ಶ್ರಾದ್ಧ ಅಥವಾ ಪಿಂಡದಾನ ಮಾಡಬಹುದೇ? ಅಳಿಯ ಮಾಡಿದ ಶ್ರಾದ್ಧದಿಂದ ಪಿತೃಗಳಿಗೆ ಮೋಕ್ಷ ಸಿಗುತ್ತದೆಯೇ? ಈ ಕುರಿತು ಗರುಡ ಪುರಾಣ ತಿಳಿಸುವ ಆಸಕ್ತಿಕರ ವಿಷಯಗಳು ಇಲ್ಲಿವೆ.

ಶ್ರಾದ್ಧ ಮಾಡಲು ಮೊದಲ ಹಕ್ಕು ಯಾರಿಗೆ?

ಗರುಡ ಪುರಾಣದ ಪ್ರಕಾರ, ಪಿತೃಗಳಿಗೆ ಶ್ರಾದ್ಧ ಹಾಗೂ ತರ್ಪಣ ನೀಡುವ ಮೊದಲ ಹಕ್ಕು ಅವರ ಮಗನಿಗೆ ಇರುತ್ತದೆ. ಒಂದು ವೇಳೆ ಕುಟುಂಬದಲ್ಲಿ ಗಂಡು ಮಗ ಇಲ್ಲದಿದ್ದರೆ, ಮಗನ ಮಗ (ಮೊಮ್ಮಗ) ಈ ಕರ್ಮಗಳನ್ನು ಮಾಡಬಹುದು. ಮೊಮ್ಮಗನೂ ಇಲ್ಲದಿದ್ದ ಪಕ್ಷದಲ್ಲಿ, ಮಗಳ ಮಗ (ದೌಹಿತ್ರ) ಶ್ರಾದ್ಧ ಆಚರಣೆಯನ್ನು ನೆರವೇರಿಸಲು ಅರ್ಹನಾಗುತ್ತಾನೆ. ಸಾಮಾನ್ಯವಾಗಿ ಅಳಿಯನನ್ನು ಮಗನಂತೆಯೇ ಗೌರವಿಸಲಾಗುತ್ತದೆಯಾದರೂ, ಶ್ರಾದ್ಧ ಕರ್ಮಗಳ ವಿಷಯಕ್ಕೆ ಬಂದಾಗ ಅಳಿಯನಿಗೆ ಕೆಲವು ವಿಧಿ-ನಿಷೇಧಗಳಿವೆ.

ಇದನ್ನೂ ಓದಿ: ಪಿತೃಪಕ್ಷದಲ್ಲಿ ಮರಣ ಸಂಭವಿದರೆ ಶುಭವೋ ಅಶುಭವೋ? ಗರುಡ ಪುರಾಣ ಹೇಳುವುದೇನು?

ಅಳಿಯನಿಗೆ ಶ್ರಾದ್ಧ ಕರ್ಮ ನಿಷೇಧಿಸಿರುವುದೇಕೆ?

ಗರುಡ ಪುರಾಣದಲ್ಲಿ “ಪುತ್ರ” ಎಂಬ ಪದದ ಅರ್ಥವನ್ನು ವಿಶೇಷವಾಗಿ ವಿವರಿಸಲಾಗಿದೆ. ‘ಪು’ ಎಂದರೆ ನರಕ ಅಥವಾ ಪಾಪ, ಹಾಗೂ ‘ತ್ರ’ ಎಂದರೆ ಮುಕ್ತಿ ಅಥವಾ ಮೋಕ್ಷ. ಅಂದರೆ ತಂದೆ-ತಾಯಿಯರನ್ನು ಪಾಪ ಮತ್ತು ನರಕದಿಂದ ಮುಕ್ತಗೊಳಿಸಿ ಮೋಕ್ಷ ನೀಡುವವನೇ ಮಗ.

ಅಳಿಯನಿಗೆ ಕುಟುಂಬದಲ್ಲಿ ಅತ್ಯುನ್ನತ ಸ್ಥಾನ ನೀಡಲಾಗುತ್ತದೆ. ಅಳಿಯನು ಅತ್ತೆ-ಮಾವಂದಿರ ಶ್ರಾದ್ಧ ಕರ್ಮಗಳನ್ನು ನೆರವೇರಿಸಿದರೆ ಅವರ ಆತ್ಮಕ್ಕೆ ಸಂಪೂರ್ಣ ಮೋಕ್ಷ ದೊರೆಯುವುದಿಲ್ಲ ಎಂಬ ನಂಬಿಕೆಯಿದೆ. ಅಷ್ಟೇ ಅಲ್ಲದೆ, ಅಳಿಯನು ಅತ್ತೆ-ಮಾವಂದಿರ ಶವವನ್ನು ಹೊರುವುದು ಅಥವಾ ಅಂತ್ಯಕ್ರಿಯೆಯ ಮುಖ್ಯ ವಿಧಿಗಳನ್ನು ನೆರವೇರಿಸುವುದು ಸೂಕ್ತವಲ್ಲ ಎಂದು ಪರಿಗಣಿಸಲಾಗುತ್ತದೆ. ಒಂದು ವೇಳೆ ಅಳಿಯನು ಈ ವಿಧಿಗಳನ್ನು ನೆರವೇರಿಸಿದರೆ, ಆತನ ಶುಭ ಕಾರ್ಯಗಳ ಪುಣ್ಯ ಫಲಗಳು ಕಡಿಮೆಯಾಗುತ್ತವೆ ಎಂದು ಹೇಳಲಾಗುತ್ತದೆ.

ಅಳಿಯ ಪಿಂಡದಾನ ಮಾಡಬಹುದಾದ ವಿನಾಯಿತಿ ಸಂದರ್ಭಗಳು:

ಸಾಮಾನ್ಯವಾಗಿ ನಿಷೇಧವಿದ್ದರೂ, ಕೆಲವು ವಿಶೇಷ ಸಂದರ್ಭಗಳಲ್ಲಿ ಅಳಿಯನಿಗೆ ಶ್ರಾದ್ಧ ಮಾಡಲು ಗರುಡ ಪುರಾಣದಲ್ಲಿ ವಿನಾಯಿತಿ ನೀಡಲಾಗಿದೆ. ಸಂತಾನವಿಲ್ಲದಿರುವಾಗ ಅಂದರೆ ಕುಟುಂಬದಲ್ಲಿ ಗಂಡು ಮಗ, ಮೊಮ್ಮಗ ಅಥವಾ ಮಗಳ ಮಗ ಇಲ್ಲದಿದ್ದಾಗ ಅಳಿಯ ಶ್ರಾದ್ಧ ಮಾಡಬಹುದು. ಈ ಸಂದರ್ಭದಲ್ಲಿ ಶ್ರಾದ್ಧ ಮಾಡುವಾಗ ಅಳಿಯನು ಯಾವುದೇ ಒತ್ತಡ, ಕೋಪ ಅಥವಾ ನಕಾರಾತ್ಮಕ ಆಲೋಚನೆಗಳಿಲ್ಲದೆ ಅತ್ಯಂತ ಶ್ರದ್ಧೆ ಹಾಗೂ ಗೌರವದಿಂದ ವಿಧಿವಿಧಾನಗಳನ್ನು ಪೂರ್ಣಗೊಳಿಸಬೇಕು. ಅಲ್ಲದೆ, ಅಳಿಯನು ತನ್ನ ಸ್ವಂತ ಕುಟುಂಬದಲ್ಲಿ ಕಿರಿಯ ಮಗನಾಗಿದ್ದರೆ, ಆತ ಈ ಆಚರಣೆಯನ್ನು ಮಾಡಲು ಅರ್ಹನಾಗಿರುವುದಿಲ್ಲ. ಪಿತೃಗಳ ಆತ್ಮಕ್ಕೆ ಮುಕ್ತಿ ಸಿಗಬೇಕಾದರೆ ಗರುಡ ಪುರಾಣದಲ್ಲಿ ತಿಳಿಸಲಾದ ಈ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದು ಅಗತ್ಯವೆಂದು ನಂಬಲಾಗಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:45 am, Thu, 1 October 26