ಪಿತೃಪಕ್ಷದಲ್ಲಿ ಮರಣ ಸಂಭವಿದರೆ ಶುಭವೋ ಅಶುಭವೋ? ಗರುಡ ಪುರಾಣ ಹೇಳುವುದೇನು?

ಹಿಂದೂ ಧರ್ಮದಲ್ಲಿ ಪಿತೃಪಕ್ಷಕ್ಕೆ ಅತ್ಯಂತ ಪವಿತ್ರವಾದ ಸ್ಥಾನವಿದೆ. ಭಾದ್ರಪದ ಮಾಸದ ಪೂರ್ಣಿಮೆಯಿಂದ ಅಮಾವಾಸ್ಯೆಯವರೆಗಿನ 16 ದಿನಗಳ ಈ ಕಾಲಾವಧಿಯಲ್ಲಿ, ಭಕ್ತರು ತಮ್ಮ ಅಗಲಿದ ಪೂರ್ವಜರನ್ನು ಅತ್ಯಂತ ಭಕ್ತಿಯಿಂದ ಸ್ಮರಿಸುತ್ತಾರೆ. ಈ ದಿನಗಳಲ್ಲಿ ಪೂರ್ವಜರ ಶಾಂತಿಗಾಗಿ ಶ್ರಾದ್ಧ, ತರ್ಪಣ ಮತ್ತು ಪಿಂಡದಾನಗಳನ್ನು ನೆರವೇರಿಸಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಈ 16 ದಿನಗಳ ಕಾಲ ಪಿತೃ ದೇವತೆಗಳು ನೇರವಾಗಿ ಭೂಲೋಕಕ್ಕೆ ಆಗಮಿಸಿ ತಮ್ಮ ವಂಶಸ್ಥರನ್ನು ಆಶೀರ್ವದಿಸುತ್ತಾರೆ.

ಜನನ ಮತ್ತು ಮರಣಗಳು ಸೃಷ್ಟಿಯ ನಿಯಮವಾಗಿದ್ದು, ಇವುಗಳನ್ನು ತಪ್ಪಿಸಲು ಸಾಧ್ಯವಿಲ್ಲ. ಆದರೆ, ಪಿತೃಗಳಿಗೆ ಮೀಸಲಾದ ಈ ಪವಿತ್ರ ಅವಧಿಯಲ್ಲಿ ಯಾರಾದರೂ ಮರಣ ಹೊಂದಿದರೆ ಅದು ಶುಭವೋ ಅಥವಾ ಅಶುಭವೋ ಹಾಗೂ ಅಕಾಲಿಕ ಮರಣ ಸಂಭವಿಸಿದರೆ ಏನಾಗುತ್ತದೆ ಎಂಬ ಗರುಡ ಪುರಾಣದ ವಿವರಣೆಗಳು ಇಲ್ಲಿವೆ.

ಪಿತೃಪಕ್ಷದಲ್ಲಿ ಸಂಭವಿಸುವ ನೈಸರ್ಗಿಕ ಮರಣದ ಶ್ರೇಷ್ಠತೆ:

ಗರುಡ ಪುರಾಣದ ಪ್ರಕಾರ, ಪಿತೃಪಕ್ಷದ ಅವಧಿಯಲ್ಲಿ ಸಂಭವಿಸುವ ನೈಸರ್ಗಿಕ ಮರಣವನ್ನು ಅತ್ಯಂತ ಶುಭ, ಪವಿತ್ರ ಮತ್ತು ಪುಣ್ಯದ ಫಲ ಎಂದು ಪರಿಗಣಿಸಲಾಗುತ್ತದೆ. ಈ 16 ದಿನಗಳಲ್ಲಿ ಸಾವು ಸಂಭವಿಸುವುದು ಅತ್ಯಂತ ಅಪರೂಪ ಹಾಗೂ ಆ ವ್ಯಕ್ತಿಯು ಜನ್ಮ-ಜನ್ಮಾಂತರಗಳ ಪುಣ್ಯವನ್ನು ಪಡೆದಿದ್ದಾನೆ ಎಂಬುದರ ಸಂಕೇತವಾಗಿದೆ.

ಈ ದಿನಗಳಲ್ಲಿ ಯಮಲೋಕದ ಬಾಗಿಲುಗಳು ಮುಕ್ತವಾಗಿರುತ್ತವೆ ಎಂದು ನಂಬಲಾಗಿದೆ. ಇದರಿಂದಾಗಿ ಈ ಅವಧಿಯಲ್ಲಿ ದೇಹತ್ಯಾಗ ಮಾಡುವ ಆತ್ಮವು ಯಾವುದೇ ಅಡೆತಡೆಯಿಲ್ಲದೆ ಸುಲಭವಾಗಿ ಸ್ವರ್ಗ ಮತ್ತು ಮೋಕ್ಷದತ್ತ ಸಾಗುತ್ತದೆ. ನೈಸರ್ಗಿಕವಾಗಿ ಮರಣ ಹೊಂದುವ ವ್ಯಕ್ತಿಯ ಆತ್ಮವು ಎಲ್ಲೂ ಅಲೆದಾಡಬೇಕಾಗಿಲ್ಲ, ನೇರವಾಗಿ ಪೂರ್ವಜರ ಆಶೀರ್ವಾದವನ್ನು ಪಡೆದು ಪುನರಾವರ್ತಿತ ಜನನ ಮತ್ತು ಮರಣದ ಚಕ್ರದಿಂದ ಸಂಪೂರ್ಣ ಮುಕ್ತಿ ಪಡೆಯುತ್ತದೆ.

ಪಿತೃಪಕ್ಷದಲ್ಲಿ ಅಕಾಲಿಕ ಮರಣ ಸಂಭವಿಸಿದರೆ ಏನಾಗುತ್ತದೆ?

ನೈಸರ್ಗಿಕ ಮರಣವು ಅತ್ಯಂತ ಶ್ರೇಷ್ಠವೆನಿಸಿದರೂ, ಪಿತೃಪಕ್ಷದ ಸಮಯದಲ್ಲಿ ಅಪಘಾತ ಅಥವಾ ಆತ್ಮಹತ್ಯೆಯಂತಹ ಅಕಾಲಿಕ ಮರಣ ಸಂಭವಿಸಿದರೆ ಅದನ್ನು ಶುಭವೆಂದು ಪರಿಗಣಿಸಲಾಗುವುದಿಲ್ಲ. ಅಕಾಲಿಕ ಮರಣವು ಆತ್ಮದ ಅಪೂರ್ಣ ಆಸೆಗಳನ್ನು ಮತ್ತು ಬಾಂಧವ್ಯಗಳನ್ನು ಹಾಗೆಯೇ ಬಿಟ್ಟುಬಿಡುತ್ತದೆ. ಸಾಮಾನ್ಯವಾಗಿ ಒಬ್ಬ ವ್ಯಕ್ತಿಯು ತನ್ನ ಪೂರ್ಣ ಜೀವಿತಾವಧಿಯನ್ನು ಮುಗಿಸಿದಾಗ ನೈಸರ್ಗಿಕ ಮರಣ ಸಂಭವಿಸುತ್ತದೆ. ಆದರೆ ಅಕಾಲಿಕ ಮರಣ ಹೊಂದಿದಾಗ, ಆತ್ಮದ ಮೂಲ ನಿಗದಿತ ಜೀವಿತಾವಧಿ ಪೂರ್ಣಗೊಳ್ಳುವವರೆಗೆ ಅದಕ್ಕೆ ಶಾಂತಿ ಸಿಗದೆ ಭೂಲೋಕ ಮತ್ತು ಪ್ರೇತಲೋಕಗಳ ನಡುವೆ ಅಲೆದಾಡುವ ಪರಿಸ್ಥಿತಿ ನಿರ್ಮಾಣವಾಗುತ್ತದೆ. ಇದರಿಂದ ಕುಟುಂಬವು ಪಿತೃ ದೋಷದ ಬೆದರಿಕೆಯನ್ನು ಎದುರಿಸಬೇಕಾಗಬಹುದು.

ಇದನ್ನೂ ಓದಿ: ಮಂತ್ರ ಪಠಣ ಮಾಡುವಾಗ ಕಣ್ಣುಗಳನ್ನು ಏಕೆ ಮುಚ್ಚಬೇಕು? ಆಧ್ಯಾತ್ಮಿಕ ಕಾರಣ ಇಲ್ಲಿದೆ

ಅಕಾಲಿಕ ಮರಣ ಹೊಂದಿದ ಆತ್ಮದ ಶಾಂತಿಗೆ ಪರಿಹಾರಗಳು:

ಅಕಾಲಿಕ ಮರಣ ಹೊಂದಿದ ಆತ್ಮಕ್ಕೆ ಶಾಂತಿ ಸಿಗಲು ಮತ್ತು ಪಿತೃ ದೋಷದಿಂದ ಮುಕ್ತಿ ಪಡೆಯಲು ಧಾರ್ಮಿಕ ಗ್ರಂಥಗಳಲ್ಲಿ ವಿಶೇಷ ಪೂಜಾ ವಿಧಿಗಳನ್ನು ಸೂಚಿಸಲಾಗಿದೆ. ಇಂತಹ ಸಂದರ್ಭಗಳಲ್ಲಿ ಕುಟುಂಬಸ್ಥರು ವಿಶೇಷ ಕಾಳಜಿ ವಹಿಸಿ ಪರಿಹಾರ ಕಾರ್ಯಗಳನ್ನು ನೆರವೇರಿಸಬೇಕು.

ಬಿಹಾರದ ಗಯಾ, ರಾಮೇಶ್ವರಂ ಅಥವಾ ಗೋಕರ್ಣದಂತಹ ಪವಿತ್ರ ಧಾರ್ಮಿಕ ಕ್ಷೇತ್ರಗಳಿಗೆ ಭೇಟಿ ನೀಡಿ ಆತ್ಮದ ಹೆಸರಿನಲ್ಲಿ ವಿಶೇಷ ಪಿಂಡದಾನ ಮತ್ತು ತರ್ಪಣವನ್ನು ಅರ್ಪಿಸುವುದು ಅತ್ಯಂತ ಅವಶ್ಯಕ. ಇದರೊಂದಿಗೆ ನಾರಾಯಣ ಬಲಿ ಅಥವಾ ತ್ರಿಪಿಂಡಿ ಶ್ರಾದ್ಧ ಯಜ್ಞಗಳನ್ನು ನೆರವೇರಿಸುವುದರಿಂದ ಹಾಗೂ ಬಡವರಿಗೆ ಅನ್ನದಾನ ಮಾಡುವುದರಿಂದ ಅಕಾಲಿಕ ಮರಣ ಹೊಂದಿದ ಆತ್ಮಕ್ಕೆ ಅಲೆದಾಟದಿಂದ ಮುಕ್ತಿ ಸಿಕ್ಕು ಶಾಂತಿ ಲಭಿಸುತ್ತದೆ.

Published On - 8:58 am, Tue, 29 September 26