Vaibhava Lakshmi Vrat: ವಿವಾಹದಲ್ಲಿ ಅಡೆತಡೆ ಅಥವಾ ವಿಳಂಬವಾಗುತ್ತಿದೆಯೇ? ಜ್ಯೋತಿಷ್ಯ ಪರಿಹಾರ ಇಲ್ಲಿದೆ

ಸಾಕಷ್ಟು ಜನರ ಜೀವನದಲ್ಲಿ ವಿವಾಹದಂತಹ ಶುಭ ಕಾರ್ಯಗಳು ತಡವಾಗುವುದು ಅಥವಾ ಎಷ್ಟೇ ಪ್ರಯತ್ನಗಳ ನಡುವೆಯೂ ಮುಂದೂಡಲ್ಪಡುವುದು ಸಾಮಾನ್ಯವಾಗಿದೆ. ಇದಕ್ಕೆ ಕುಜದೋಷ, ಕೌಟುಂಬಿಕ ಸಮಸ್ಯೆಗಳು ಅಥವಾ ಇತರ ಅಡೆತಡೆಗಳು ಕಾರಣವಾಗಬಹುದು. ಇಂತಹ ಸಂದರ್ಭಗಳಲ್ಲಿ, ನಮ್ಮ ಧರ್ಮ ಗ್ರಂಥಗಳು, ಧಾರ್ಮಿಕ ಹಾಗೂ ಆಧ್ಯಾತ್ಮಿಕ ಆಚರಣೆಗಳಲ್ಲಿ ಶ್ರೀ ವೈಭವ ಲಕ್ಷ್ಮಿ ವ್ರತವನ್ನು ತಕ್ಷಣದ ಮತ್ತು ಅತ್ಯಂತ ಶುಭಫಲಗಳನ್ನು ನೀಡುವ ಪರಿಹಾರವೆಂದು ಪರಿಗಣಿಸಲಾಗಿದೆ. ಶೀಘ್ರ ವಿವಾಹಕ್ಕಾಗಿ ಇದು ಬಹು ವಿಶೇಷವಾದ ವ್ರತವಾಗಿದೆ. ಈ ಬಗ್ಗೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯಭಕ್ತಿ ಕಾರ್ಯಕ್ರಮದಲ್ಲಿ ನೀಡಿರುವ ಮಾಹಿತಿ ಇಲ್ಲಿದೆ.

ವಿಡಿಯೋ ಇಲ್ಲಿದೆ ನೋಡಿ:

ಗುರೂಜಿಯವರು ಹೇಳುವಂತೆ, ಈ ವ್ರತವು ಕೇವಲ ವಿವಾಹಕ್ಕಾಗಿ ಮಾತ್ರವಲ್ಲದೆ, ವಿವಾಹವಾದವರಿಗೆ ಸಂತಾನ ಪ್ರಾಪ್ತಿಗಾಗಿ, ಕುಟುಂಬದ ಶ್ರೇಯಸ್ಸಿಗಾಗಿ, ಸಂಪತ್ತು ಮತ್ತು ಸಮೃದ್ಧಿಗಾಗಿ, ಆರ್ಥಿಕ ತೊಂದರೆಗಳ ನಿವಾರಣೆಗಾಗಿ ಮತ್ತು ಕೀರ್ತಿ ಪ್ರತಿಷ್ಠೆಗಳಿಗಾಗಿಯೂ ಫಲಪ್ರದವಾಗಿದೆ. ಇದು ಎಲ್ಲಾ ರೀತಿಯಲ್ಲೂ ಶುಭವನ್ನು ತರುತ್ತದೆ ಎಂದು ಹೇಳಲಾಗುತ್ತದೆ. ಈ ಸರಳ ವ್ರತವನ್ನು ಕನ್ಯೆಯರು, ವಿವಾಹಿತರು ಮತ್ತು ನವದಂಪತಿಗಳು ಸೇರಿದಂತೆ ಯಾರಾದರೂ ಆಚರಿಸಬಹುದು. ವೈಭವ ಲಕ್ಷ್ಮಿ ವ್ರತವನ್ನು ಸ್ವತಃ ಪರಮೇಶ್ವರನು ಪಾರ್ವತಿದೇವಿಗೆ ಉಪದೇಶಿಸಿದನೆಂಬ ನಂಬಿಕೆಯಿದೆ.

ವ್ರತದ ಆಚರಣೆಯು ಶುಕ್ರವಾರದಂದು ಪ್ರಾರಂಭವಾಗುತ್ತದೆ. ಮೊದಲು ಮನೆಯನ್ನು ಶುದ್ಧಿ ಮಾಡಿ, ಶುಚಿರ್ಭೂತರಾಗಿ ಒಂದು ಶುಭ್ರ ಸ್ಥಳವನ್ನು ಆರಿಸಿ. ಆ ಸ್ಥಳದಲ್ಲಿ ಕೆಂಪು ವಸ್ತ್ರವನ್ನು ಹಾಸಿ ಅದರ ಮೇಲೆ ಲಕ್ಷ್ಮಿ ದೇವಿಯ ವಿಗ್ರಹ, ಫೋಟೋ ಅಥವಾ ಕಲಶವನ್ನು ಪ್ರತಿಷ್ಠಾಪಿಸಬೇಕು. ನಂತರ ಪ್ರಥಮವಾಗಿ ಗಣೇಶ ಪೂಜೆಯೊಂದಿಗೆ ವ್ರತವನ್ನು ಪ್ರಾರಂಭಿಸಬೇಕು. ಗಂಧ, ಅಕ್ಷತೆ, ಷೋಡಶೋಪಚಾರ ಪೂಜೆಗಳನ್ನು ನೆರವೇರಿಸಿ, ಮಹಾಲಕ್ಷ್ಮಿಯ ಅಷ್ಟೋತ್ತರವನ್ನು ಹೇಳಿಕೊಳ್ಳಬೇಕು. ವೈಭವ ಲಕ್ಷ್ಮಿ ವ್ರತದ ಕಥೆಯನ್ನು ಕೇಳುವುದು ಕೂಡ ಮುಖ್ಯ. ಪೂಜೆಯನ್ನು ಪೂರ್ವ ದಿಕ್ಕಿಗೆ ಮುಖ ಮಾಡಿ ಮಾಡಬೇಕು. ಅಲಂಕಾರಕ್ಕಾಗಿ ವಿವಿಧ ರೀತಿಯ ಹೂವುಗಳು, ಸಾಧ್ಯವಾದರೆ ಆಭರಣಗಳನ್ನು ಬಳಸಬಹುದು. ನೈವೇದ್ಯಕ್ಕೆ ಸಕ್ಕರೆ, ಹಾಲು ಅಥವಾ ಬೆಲ್ಲದ ಪಾಯಸವನ್ನು ಅರ್ಪಿಸಬಹುದು. “ಓಂ ಶ್ರೀ ಮಹಾಲಕ್ಷ್ಮೈ ನಮಃ” ಎಂಬ ಮಂತ್ರವನ್ನು ಜಪಿಸುವುದರಿಂದ ತಾಯಿಯನ್ನು ಆವಾಹನೆ ಮಾಡಿ ಪೂಜಿಸಬಹುದು.

ಇದನ್ನೂ ಓದಿ: ವಾಸ್ತು ಪ್ರಕಾರ ಫ್ರಿಡ್ಜ್ ಮೇಲೆ ಈ ವಸ್ತುಗಳನ್ನು ಇಡಲೇಬಾರದು; ಸಮಸ್ಯೆ ತಪ್ಪಿದ್ದಲ್ಲ

ಈ ವ್ರತವನ್ನು ಐದು ಅಥವಾ ಏಳು ಶುಕ್ರವಾರಗಳ ಕಾಲ ಶ್ರದ್ಧಾಭಕ್ತಿಯಿಂದ ಆಚರಿಸಬೇಕು. ಮಧ್ಯದಲ್ಲಿ ಯಾವುದಾದರೂ ವಾರ ಆಚರಿಸಲು ಅಡಚಣೆಯಾದರೆ, ಅದನ್ನು ಮುಂದಿನ ಶುಕ್ರವಾರಕ್ಕೆ ಸೇರಿಸಿ ಒಟ್ಟು ಸಂಖ್ಯೆಯನ್ನು ಪೂರ್ಣಗೊಳಿಸಬಹುದು. ವ್ರತದ ಅವಧಿಯಲ್ಲಿ ಉಪ್ಪಿದ ಆಹಾರ ಸೇವನೆ ಮಾಡಬಾರದು ಮತ್ತು ಹಗಲು ನಿದ್ದೆ ಮಾಡಬಾರದು. ಸಾಧ್ಯವಾದರೆ ಉಪವಾಸ ಇರುವುದು ಉತ್ತಮ. ಐದನೇ ಅಥವಾ ಏಳನೇ ಶುಕ್ರವಾರ ವ್ರತದ ಸಮಾಪ್ತಿಯಲ್ಲಿ ಐದು ಅಥವಾ ಏಳು ಮುತ್ತೈದೆಯರನ್ನು ಕರೆದು ಅವರಿಗೆ ಅರಿಶಿನ-ಕುಂಕುಮ, ತಾಂಬೂಲ ಮತ್ತು ಕದಳಿ ಫಲವನ್ನು ಅರ್ಪಿಸಬೇಕು. ಮನೆಯಲ್ಲಿರುವ ಮುತ್ತೈದೆಯರನ್ನು ಸಹ ಪೂಜೆಯಲ್ಲಿ ಬಳಸಿಕೊಂಡು ಅವರಿಗೆ ತಾಂಬೂಲ ನೀಡಬಹುದು. ಈ ರೀತಿ ನಂಬಿಕೆಯಿಂದ ವ್ರತವನ್ನು ಆಚರಿಸಿದರೆ ಸಕಲ ಇಷ್ಟಾರ್ಥಗಳು ತಕ್ಷಣವೇ ಈಡೇರುತ್ತವೆ ಎಂದು ಗುರೂಜಿ ಸಲಹೆ ನೀಡಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ