ಮನೆಯಲ್ಲಿ ಹಳೆಯ, ಹರಿದ ಚಪ್ಪಲಿ ಇಟ್ಟಿದ್ದೀರಾ? ಶನಿ-ರಾಹು ದೋಷ ತಪ್ಪಿಸಲು ವಾಸ್ತು ತಜ್ಞರು ಹೇಳುವುದೇನು?

ಮನೆಯಲ್ಲಿ ಸ್ವಚ್ಛತೆ ಮತ್ತು ಶಿಸ್ತನ್ನು ಕಾಪಾಡಿಕೊಳ್ಳುವುದು ಕೇವಲ ಆರೋಗ್ಯಕ್ಕೆ ಮಾತ್ರವಲ್ಲ, ವಾಸ್ತು ಶಾಸ್ತ್ರದ ದೃಷ್ಟಿಯಿಂದಲೂ ಅತ್ಯಂತ ಮಹತ್ವದ್ದಾಗಿದೆ. ವಾಸ್ತು ತಜ್ಞರ ಪ್ರಕಾರ, ನಾವು ನಿತ್ಯ ಬಳಸುವ ಪಾದರಕ್ಷೆಗಳು ಮತ್ತು ಚಪ್ಪಲಿಗಳು ನೇರವಾಗಿ ಶನಿ ಗ್ರಹಕ್ಕೆ ಸಂಬಂಧಿಸಿವೆ. ಮನೆಯಲ್ಲಿ ಹಳೆಯ, ಕೊಳಕು ಅಥವಾ ಹರಿದ ಪಾದರಕ್ಷೆಗಳನ್ನು ಇಟ್ಟುಕೊಳ್ಳುವುದರಿಂದ ಶನಿಯ ಅಶುಭ ಪರಿಣಾಮಗಳು ಹೆಚ್ಚಾಗಿ, ಮಾಡುವ ಕೆಲಸಗಳಲ್ಲಿ ಅಡೆತಡೆಗಳು ಎದುರಾಗಬಹುದು ಎಂಬ ನಂಬಿಕೆಯಿದೆ. ಹಳೆಯ ಪಾದರಕ್ಷೆಗಳ ವಿಚಾರದಲ್ಲಿ ವಾಸ್ತು ಮತ್ತು ಜ್ಯೋತಿಷ್ಯ ಶಾಸ್ತ್ರ ಏನು ಹೇಳುತ್ತದೆ? ಮನೆಯಲ್ಲಿ ಪಾದರಕ್ಷೆಗಳನ್ನು ಹೇಗೆ ಇಡಬೇಕು ಎಂಬ ಸಂಪೂರ್ಣ ವಿವರ ಇಲ್ಲಿದೆ.

ರಾಹು-ಕೇತು ದೋಷ ಮತ್ತು ಕುಟುಂಬದಲ್ಲಿ ಅಶಾಂತಿ:

ಜ್ಯೋತಿಷ್ಯ ನಂಬಿಕೆಗಳ ಪ್ರಕಾರ, ಬಳಸದ ಹಳೆಯ ಬೂಟುಗಳು ಮತ್ತು ಚಪ್ಪಲಿಗಳ ಮೇಲೆ ಧೂಳು ಹಾಗೂ ಕೊಳಕು ಸಂಗ್ರಹವಾಗುವುದರಿಂದ ರಾಹು ಮತ್ತು ಕೇತುವಿನ ದೋಷಗಳು ಉಂಟಾಗುತ್ತವೆ. ಇದರಿಂದ ಮನೆಯಲ್ಲಿ ವಿನಾಕಾರಣ ತಪ್ಪು ತಿಳುವಳಿಕೆ, ಮಾನಸಿಕ ಗೊಂದಲ ಮತ್ತು ಅಶಾಂತಿ ನೆಲೆಸುವ ಸಾಧ್ಯತೆಯಿರುತ್ತದೆ.

ಮುಖ್ಯ ದ್ವಾರದ ಬಳಿ ಚಪ್ಪಲಿ ರಾಶಿ ಬೇಡ:

ವಾಸ್ತು ಶಾಸ್ತ್ರದಲ್ಲಿ ಮನೆಯ ಮುಖ್ಯ ದ್ವಾರಕ್ಕೆ ವಿಶೇಷ ಸ್ಥಾನವಿದೆ. ಈ ದ್ವಾರದ ಮೂಲಕವೇ ಮನೆಗೆ ಸಕಾರಾತ್ಮಕ ಶಕ್ತಿ ಮತ್ತು ಸಮೃದ್ಧಿ ಪ್ರವೇಶಿಸುತ್ತದೆ. ಹೀಗಾಗಿ, ಮುಖ್ಯ ಬಾಗಿಲಿನ ಎದುರು ಹಳೆಯ, ಹರಿದ ಚಪ್ಪಲಿಗಳನ್ನು ಎಲ್ಲೆಂದರಲ್ಲಿ ಹರಡಿ ಇಡುವುದು ಅಥವಾ ರಾಶಿ ಹಾಕುವುದು ಶುಭವಲ್ಲ. ಮನೆಯ ಪ್ರತಿಯೊಂದು ಮೂಲೆಯಲ್ಲೂ ಚಪ್ಪಲಿಗಳನ್ನು ಬಿಡುವುದನ್ನು ತಪ್ಪಿಸಬೇಕು.

ಹಾಸಿಗೆಯ ಕೆಳಗೆ ಶೂಗಳನ್ನು ಇಡಲೇಬೇಡಿ:

ಅನೇಕರು ಮನೆಯಲ್ಲಿ ಜಾಗ ಉಳಿಸುವ ಉದ್ದೇಶದಿಂದ ಮಲಗುವ ಹಾಸಿಗೆಯ (ಮಂಚದ) ಕೆಳಗೆ ಶೂ ಹಾಗೂ ಚಪ್ಪಲಿಗಳನ್ನು ಇಡುತ್ತಾರೆ. ಆದರೆ, ವಾಸ್ತು ಪ್ರಕಾರ ಹಳೆಯ ಅಥವಾ ಕೊಳಕು ಪಾದರಕ್ಷೆಗಳನ್ನು ಹಾಸಿಗೆಯ ಕೆಳಗೆ ಇಡುವುದು ಅತ್ಯಂತ ಅಶುಭ. ಇದರಿಂದ ಕುಟುಂಬ ಸದಸ್ಯರ ಮಾನಸಿಕ ನೆಮ್ಮದಿ ಮತ್ತು ಪ್ರಗತಿಗೆ ಧಕ್ಕೆಯಾಗುತ್ತದೆ. ಪಾದರಕ್ಷೆಗಳಿಗಾಗಿ ಯಾವಾಗಲೂ ಪ್ರತ್ಯೇಕ ಶೂ ರ್ಯಾಕ್ (Shoe Rack) ಬಳಸುವುದು ಉತ್ತಮ.

ಇದನ್ನೂ ಓದಿ: ಶನಿ ಸಾಡೇ ಸಾತಿ ಮುಗಿದ ತಕ್ಷಣ ಜೀವನದಲ್ಲಿ ನಡೆಯುವ 5 ಪ್ರಮುಖ ಬದಲಾವಣೆಗಳಿವು!

ಹಳೆಯ ಚಪ್ಪಲಿಗಳನ್ನು ಏನು ಮಾಡಬೇಕು?

ನಿಮ್ಮ ಬಳಿ ಇರುವ ಹಳೆಯ ಪಾದರಕ್ಷೆಗಳು ಉತ್ತಮ ಸ್ಥಿತಿಯಲ್ಲಿದ್ದು, ಇತರರು ಬಳಸಲು ಯೋಗ್ಯವಾಗಿದ್ದರೆ ಅವುಗಳನ್ನು ಸ್ವಚ್ಛಗೊಳಿಸಿ ನಿರ್ಗತಿಕರಿಗೆ ದಾನ ಮಾಡಿ. ಜ್ಯೋತಿಷ್ಯ ನಂಬಿಕೆಯಂತೆ ಶನಿವಾರ ಸಂಜೆ ಪಾದರಕ್ಷೆಗಳನ್ನು ದಾನ ಮಾಡುವುದರಿಂದ ಶನಿದೋಷದ ಪ್ರಭಾವ ಕಡಿಮೆಯಾಗುತ್ತದೆ. ಸಂಪೂರ್ಣವಾಗಿ ಹರಿದು ಹೋಗಿರುವ ಮತ್ತು ಧರಿಸಲು ಯೋಗ್ಯವಲ್ಲದ ಚಪ್ಪಲಿಗಳನ್ನು ಮನೆಯಲ್ಲಿ ಕೂಡಿಡದೆ ತಕ್ಷಣವೇ ಮನೆಯಿಂದ ಹೊರಗೆ ಎಸೆಯಿರಿ. ಶೂ ರ್ಯಾಕ್ ಅನ್ನು ಕಾಲಕಾಲಕ್ಕೆ ಸ್ವಚ್ಛಗೊಳಿಸುತ್ತಿರಿ ಮತ್ತು ಪಾದರಕ್ಷೆಗಳನ್ನು ಅಚ್ಚುಕಟ್ಟಾಗಿ ಜೋಡಿಸಿಡಿ.

ಗಮನಿಸಿ: ಇಲ್ಲಿ ಉಲ್ಲೇಖಿಸಲಾದ ಶನಿ, ರಾಹು ಮತ್ತು ಕೇತು ಗ್ರಹಗಳ ಪ್ರಭಾವಗಳು ಸಾಂಪ್ರದಾಯಿಕ ಜ್ಯೋತಿಷ್ಯ ಹಾಗೂ ವಾಸ್ತು ನಂಬಿಕೆಗಳನ್ನು ಆಧರಿಸಿವೆ; ಇವುಗಳಿಗೆ ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ. ಆದರೆ, ಮನೆಯನ್ನು ಸ್ವಚ್ಛವಾಗಿ ಮತ್ತು ಅಚ್ಚುಕಟ್ಟಾಗಿ ಇಟ್ಟುಕೊಳ್ಳುವುದರಿಂದ ಆರೋಗ್ಯಕರ ಹಾಗೂ ಆಹ್ಲಾದಕರ ವಾತಾವರಣ ನಿರ್ಮಾಣವಾಗುವುದು ಖಚಿತ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 7:59 am, Sat, 14 November 26