ಅನಿಲ್ ಕುಂಬ್ಳೆ ಭಾರತೀಯ ಬೌಲಿಂಗ್ ವಿಭಾಗದ ರಾಹುಲ್ ದ್ರಾವಿಡ್ ಆಗಿದ್ದರು: ಸ್ಟೀವ್ ವಾ

1997 ರಿಂದ 2004ರವರೆಗೆ ಅಸ್ಟ್ರೇಲಿಯಾ ಟೀಮನ್ನು ಅದ್ವಿತೀಯವಾಗಿ ಮುನ್ನಡೆಸಿ, ನಾಯಕನಾಗಿ ಕರ್ತವ್ಯ ನಿರ್ವಹಿಸಿದ 57 ಟೆಸ್ಟ್​ಗಳಲ್ಲಿ 41 ರಲ್ಲಿ ಜಯ ಸಾಧಿಸಿ ವಿಶ್ವದ ಶ್ರೇಷ್ಠ ಕ್ಯಾಪ್ಟನ್​ಗಳಲ್ಲೊಬ್ಬರೆಂಬ ಕೀರ್ತಿಯೊಂದಿಗೆ ಕ್ರಿಕೆಟ್​ಗೆ ಗುಡ್​ ಬೈ ಹೇಳಿದ ಆಸ್ಟ್ರೇಲಿಯಾದ ಸ್ಟೀವ್ ವಾ ಅವರಿಗೆ ಭಾರತೀಯ ಆಟಗಾರರು ಮತ್ತು ಭಾರತದ ಮೇಲೆ ಅತೀವ ಪ್ರೀತಿ.

ಮೊನ್ನೆಯಷ್ಟೇ ವಾ, ಭಾರತದ ಮಾಜಿ ನಾಯಕರಾದ ಸೌರವ್ ಗಂಗೂಲಿ ಮತ್ತು ರಾಹುಲ್ ದ್ರಾವಿಡ್ ಭಾರತೀಯ ಕ್ರಿಕೆಟ್​ಗೆ ನೀಡಿದ ಕೊಡುಗೆಯನ್ನು ಅಪಾರವಾಗಿ ಕೊಂಡಾಡಿದ್ದರು. ಈಗ ಮತ್ತೊಬ್ಬ ಲೆಜಂಟರಿ ಬೌಲರ್​ ಬಗ್ಗೆ ಮಾತಾಡಿ ಟೀಮ್ ಇಂಡಿಯಾಗೆ ಅವರು ಬೌಲಿಂಗ್ ವಿಭಾಗದ ರಾಹುಲ್ ದ್ರಾವಿಡ್ ಅಗಿದ್ದಾರೆಂದು ಹೇಳಿದ್ದಾರೆ. ಅವರು ಮಾತಾಡಿರುವುದು ಭಾರತದ ಪರ ಅತಿಹೆಚ್ಚು ವಿಕೆಟ್​ ಪಡೆದಿರುವ ಲೆಜಂಡರಿ ಲೆಗ್​ಸ್ಪಿನ್ನರ್ ಅನಿಲ್ ಕುಂಬ್ಳೆ ಕುರಿತು.

‘ತಮ್ಮ ದೇಶದ ಪರವಾಗಿ ಅನಿಲ್ ಕುಂಬ್ಳೆಯಷ್ಟು ಬದ್ಧತೆ ಮತ್ತು ವ್ಯಾಮೋಹದಿಂದ ಕ್ರಿಕೆಟ್​ ಆಡಿರುವ ಆಟಗಾರ ಮತ್ತೊಬ್ಬನಿರಲಿಕ್ಕಿಲ್ಲ ಎಂದು ನಾನು ಭಾವಿಸುತ್ತೇನೆ. ಅವರಿಗೆ ಕ್ರಿಕೆಟ್​ ಎಲ್ಲವೂ ಆಗಿತ್ತು. ಅವರನ್ನು ನಾವು ಒಬ್ಬ ಲೆಗ್ ಸ್ಪಿನ್ನರನಂತೆ ಆಡದೆ, ನಿಧಾನಗತಿಯ ಇನ್-ಸ್ವಿಂಗ್ ಬೌಲರ್​ನಂತೆ ಆಡುತ್ತಿದ್ದೆವು’ ಎಂದು, cricket.com.au. ನಲ್ಲಿ ತಾವು ಪೋಸ್ಟ್​ ಮಾಡಿರುವ ವಿಡಿಯೊನಲ್ಲಿ ವಾ ಹೇಳಿದ್ದಾರೆ.

ಸ್ಟೀವ್ ವಾ

‘ಬೌಲಿಂಗ್ ವೇಗದಲ್ಲಿ ಅನಿಲ್ ಕುಂಬ್ಳೆ ತರುತ್ತಿದ್ದ ಬದಲಾವಣೆ ಅದ್ಭುತವಾಗಿದ್ದವು. ಕ್ರೀಸನ್ನು ಬಳಸುವುದರಲ್ಲಿ ಮತ್ತು ಬೌಲಿಂಗ್​ನಲ್ಲಿ ಅವರು ತೋರುತ್ತಿದ್ದ ವೈವಿಧ್ಯತೆ ಬೇರೆ ಬೌಲರ್​ಗಳಿಗೆ ಸಾಧ್ಯವಾಗುತ್ತಿಲಿಲ್ಲ. ಪಿಚ್​ನಲ್ಲಿ ಬಿರುಕುಗಳು ಕಾಣಿಸಿಕೊಂಡಿದ್ದರೆ ಅಥವಾ ಅದರಲ್ಲಿ ಅಸಮವಾದ ಪುಟಿತವಿದ್ದರೆ ಅವರು ಬ್ಯಾಟ್ಸ್​ಮನ್​ಗಳನ್ನು ತಲ್ಲಣಿಸುವಂತೆ ಮಾಡುತ್ತಿದ್ದರು’ ಅಂತ ವಿಡಿಯೊದಲ್ಲಿ ವಾ ಹೇಳಿದ್ದಾರೆ.

ಟೆಸ್ಟ್​ ಕ್ರಿಕೆಟ್​ನಲ್ಲಿ 619 ವಿಕೆಟ್​ಗಳನ್ನು ಪಡೆದ ಕುಂಬ್ಳೆ, ಈ ಫಾರ್ಮಾಟ್​ನಲ್ಲಿ ಅತಿಹೆಚ್ಚು ವಿಕೆಟ್ ವಿಶ್ವದ ಬೌಲರ್​ಗಳ ಪಟ್ಟಿಯಲ್ಲಿ ಮುತ್ತಯ್ಯ ಮುರಳಿಧರನ್ ಮತ್ತು ಶೇನ್ ವಾರ್ನ್ ನಂತರ ಮೂರನೇ ಸ್ಥಾನದಲ್ಲಿದ್ದಾರೆ. ಅಸ್ಟ್ರೇಲಿಯಾದ ವಿರುದ್ಧ ಆಡಿದ 20 ಟೆಸ್ಟ್​ಗಳಲ್ಲಿ ಕುಂಬ್ಳೆ 21.33 ಸರಾಸರಿಯಲ್ಲಿ 111 ವಿಕೆಟ್ ಪಡೆದಿದ್ದಾರೆ ಮತ್ತು 5 ವಿಕೆಟ್ ಪಡೆಯುವ ಸಾಧನೆಯನ್ನು 10 ಬಾರಿ ಮಾಡಿದ್ದಾರೆ. 2003-04 ನಡೆದ 3-ಟೆಸ್ಟ್​ಗಳ ಬಾರ್ಡರ್​-ಗಾವಸ್ಕರ್ ಸರಣಿಯಲ್ಲಿ (ಇದು ವಾ ಟೆಸ್ಟ್​ ಕ್ರಿಕೆಟ್​ ಕರೀಯರ್​ನ ಅಂತಿಮ ಸರಣಿ) ಕುಂಬ್ಳೆ 24 ವಿಕೆಟ್​ ಪಡೆದರು. ಆ ಸರಣಿಯಲ್ಲಿ ದ್ರಾವಿಡ್​ ಅವರ ಬ್ಯಾಟಿಂಗ್​ಗೆ ಸರಿಸಮವಾಗಿ ಕುಂಬ್ಳೆ ಬೌಲ್ ಮಾಡಿದರು ಎಂದು ವಾ ಹೇಳಿದ್ದಾರೆ.

‘ಮೈದಾನದಲ್ಲಿ ಅನಿಲ್ ಕುಂಬ್ಳೆ ಭೀತಿ ಹುಟ್ಟಿಸುವ ಪ್ರತಿಸ್ಪರ್ಧಿಯಾಗಿದ್ದರು. ಎದುರಾಳಿಗಳಿಗೆ ತಮ್ಮ ವಿರುದ್ಧ ಮೇಲುಗೈ ಸಾಧಿಸುವ ಅವಕಾಶವನ್ನು ಅವರು ನೀಡುತ್ತಿರಲಿಲ್ಲ. ಅವರು ನಮ್ಮ ವಿರುದ್ಧ ಕಳಪೆಯಾಗಿ ಬೌಲ್​ ಮಾಡಿರುವ ನಿದರ್ಶನಗಳೇ ಇಲ್ಲ. ಭಾರತೀಯರ ಬೌಲಿಂಗ್ ಲೈನ್​-ಅಪ್​ನಲ್ಲಿ ಅವರು ರಾಹುಲ್ ದ್ರಾವಿಡ್ ಅವರಂತಿದ್ದರು. ಕುಂಬ್ಳೆ ಟೀಮಿಗೆ ಏನು ನೀಡಬಲ್ಲರು ಎನ್ನುವುದು ಕ್ಯಾಪ್ಟನ್​ಗಳಿಗೆ ಗೊತ್ತಿರುತ್ತಿತ್ತು. ಆಟದ ಮೇಲಿನ ಅವರ ಫೋಕಸ್ ಒಂದಿಷ್ಟೂ ವಿಚಲಿತಗೊಳ್ಳುತ್ತಿರಲಿಲ್ಲ’ ಎಂದು ವಾ ಹೇಳಿದ್ದಾರೆ.