Video: ವಿಕೆಟ್​ ಪಡೆದ ಸಂಭ್ರಮದಲ್ಲಿ.. ಡಬಲ್​ ‘ಸ್ಪಿನ್​’ ಪಲ್ಟಿ ಹೊಡೆದ ಬೌಲರ್​

ಕ್ರಿಕೆಟ್​ ಮ್ಯಾಚ್​ನಲ್ಲಿ ಎದುರಾಳಿ ಬ್ಯಾಟ್ಸ್​ಮನ್​ನ​ ವಿಕೆಟ್​ ಪಡೆಯುವುದೇ ಪ್ರತಿ ಬೌಲರ್​ನ ಗುರಿ. ಬ್ಯಾಟ್ಸ್​ಮನ್​ನ​ ಯಾವ ರೀತಿಯ ಎಸೆತದಿಂದ ಮಣಿಸಿ ಆತನ ವಿಕೆಟ್​ ಎಗರಿಸಬಹುದು ಅನ್ನೋ ಯೋಚನೆಯನ್ನ ಎಲ್ಲಾ ಬೌಲರ್​ಗಳು ಮಾಡುತ್ತಾರೆ. ಅಂತೆಯೇ, ಬೌಲ್​ ಮಾಡಿದ ಇನ್​ಸ್ವಿಂಗ್​, ಔಟ್​ಸ್ವಿಂಗ್​ ಮತ್ತು ಗೂಗ್ಲಿಗೆ ಬ್ಯಾಟ್ಸ್​ಮನ್​ ವಿಕೆಟ್​ ಬಿದ್ರೆ ಸಾಕು. ಬೌಲರ್​ನ ಸಂತೋಷಕ್ಕೆ ಪಾರವೇ ಇರಲ್ಲ.

ಹೀಗೆ, ವಿಕೆಟ್​ ಪಡೆದಾಗ ಬೌಲರ್ ಹಾಗೂ ಆತನ ಟೀಂ ಸಂಭ್ರಮಿಸುವುದನ್ನ ನೋಡಿದ್ದೇವೆ. ಕೆಲವೊಂದು ಬಾರಿ ಈ ಸಂಭ್ರಮಾಚರಣೆ ಕೊಂಚ ವಿಭಿನ್ನವಾಗಿಯೇ ಇರುತ್ತದೆ. ಹಾಗೆಯೇ, ಎದುರಾಳಿ ಬ್ಯಾಟ್ಸ್​ಮನ್​ನ ವಿಕೆಟ್​ ಪಡೆದ ಆನಂದದಲ್ಲಿ ಆಫ್​ ಸ್ಪಿನ್ನರ್​ ಒಬ್ಬ ಡಬಲ್​ ಪಲ್ಟಿ ಹೊಡೆದಿರುವ ರೋಚಕ ಪ್ರಸಂಗ ವೆಸ್ಟ್​ ಇಂಡೀಸ್​ನ ಕ್ಯಾರಿಬಿಯನ್​ ಪ್ರೀಮಿಯರ್​ ಲೀಗ್​ನಲ್ಲಿ ನಡೆದಿದೆ.

ಗಯಾನಾ ಅಮೆಜಾನ್​ ತಂಡದ ಆಫ್ ಸ್ಪಿನ್ನರ್​ ಆದ 20 ವರ್ಷದ ಕೆವಿನ್​ ಸಿನ್​ಕ್ಲೇರ್​ ಪಂದ್ಯದ ವೇಳೆ ಎದುರಾಳಿ ತಂಡವಾದ ಬಾರ್ಬೇಡೋಸ್​ ಟ್ರೈಡೆಂಟ್ಸ್​ನ ಬ್ಯಾಟ್ಸ್​ಮನ್​ ಮಿಚ್ಚೆಲ್​ ಸ್ಯಾಂಟ್ನರ್​ನ ವಿಕೆಟ್​ ಪಡೆದನು. ಅದೇ ಖುಷಿಯಲ್ಲಿ ಕುಣಿದು ಕುಪ್ಪಳಿಸುವ ಜೊತೆಗೆ ಕೆವಿನ್​ ಡಬಲ್​ ಪಲ್ಟಿ ಸಹ ಹೊಡೆದಿದ್ದಾನೆ. ಕೆವಿನ್​ನ ಈ ಸ್ಟಂಟ್​ ಈಗ ಸಿಕ್ಕಾಪಟ್ಟೆ ವೈರಲ್​ ಆಗಿದ್ದು ಜನರು ವಾವ್​ ಅನ್ನುತ್ತಿದ್ದಾರೆ. ಆದರೆ, ಮತ್ತೊಂದೆಡೆ, ಈ ಥರದ ಅಪಾಯಕಾರಿ ಸ್ಟಂಟ್​ಗಳನ್ನ ಮಾಡಲು ಅವಕಾಶ ಕೊಡಬೇಡಿ ಎಂದು ಪಂದ್ಯಾವಳಿಯ ಕೆಲ ಅಭಿಮಾನಿಗಳು ಕಾಳಜಿ ತೋರಿದ್ದಾರೆ.