Lakshya Sen: ಗುರಿ ತಪ್ಪದ ಲಕ್ಷ್ಯ: ಭಾರತಕ್ಕೆ ಮತ್ತೊಂದು ಚಿನ್ನ

ಬರ್ಮಿಂಗ್​ಹ್ಯಾಮ್​ನಲ್ಲಿ ನಡೆಯುತ್ತಿರುವ ಕಾಮನ್​ವೆಲ್ತ್ ಗೇಮ್ಸ್​ನ (CWG 2022) ಪುರುಷರ ಬ್ಯಾಡ್ಮಿಂಟನ್ ಸಿಂಗಲ್ಸ್​ ಭಾರತದ ಲಕ್ಷ್ಯ ಸೇನ್ (Lakshya Sen) ಚಿನ್ನದ ಪದಕಕ್ಕೆ ಮುತ್ತಿಟ್ಟಿದ್ದಾರೆ. ಫೈನಲ್​ನಲ್ಲಿ ಮಲೇಷ್ಯಾದ ಎನ್‌ಜಿ ತ್ಸೆ ಯೋಂಗ್ ಅವರನ್ನು 21-191, 21-9, 21-16 ಸೆಟ್​ಗಳಿಂದ ಮಣಿಸುವ ಮೂಲಕ ಭಾರತೀಯ ಬ್ಯಾಡ್ಮಿಂಟನ್ ತಾರೆ ಈ ಸಾಧನೆ ಮಾಡಿದರು. ಆರಂಭದಿಂದಲೇ ಭರ್ಜರಿ ಪೈಪೋಟಿಗೆ ಕಾರಣವಾಗಿದ್ದ ಈ ಪಂದ್ಯದಲ್ಲಿ ಇಬ್ಬರು ಆಟಗಾರರು ಅತ್ಯುತ್ತಮ ಪ್ರದರ್ಶನ ನೀಡಿದ್ದರು. ಮೊದಲ 7 ಪಾಯಿಂಟ್​ಗಳವರೆಗೆ ಸಮಬಲ ಸಾಧಿಸಿದ್ದ ಈ ಪಂದ್ಯದಲ್ಲಿ ಆ ಬಳಿಕ ಎನ್‌ಜಿ ತ್ಸೆ ಯೋಂಗ್ ಕಾಯ್ದುಕೊಂಡರು. ಇದಾಗ್ಯೂ ಕಂಬ್ಯಾಕ್ ಮಾಡಿದ ಲಕ್ಷ್ಯ ಸೇನ್ ಮೊದಲ ಸುತ್ತಿನ ಅಂತ್ಯದವರೆಗೆ ಪೈಪೋಟಿ ನೀಡಿದರು. ಪರಿಣಾಮ ಕೇವಲ 2 ಪಾಯಿಂಟ್​ಗಳ ಅಂತರದಿಂದ ಲಕ್ಷ್ಯ ಸೇನ್ ಸೋಲನುಭವಿಸಬೇಕಾಯಿತು. ಅದರಂತೆ ಯೋಂಗ್ ಮೊದಲ ಸುತ್ತನ್ನು 21-19 ಅಂತರದಿಂದ ಗೆದ್ದುಕೊಂಡರು.

ಇನ್ನು 2ನೇ ಸುತ್ತಿನಲ್ಲಿ ಲಕ್ಷ್ಯ ಸೇನ್ ಆರಂಭದಲ್ಲಿ ಮುನ್ನಡೆ ಪಡೆದರೂ, ಮಲೇಷ್ಯಾ ಆಟಗಾರರಿಂದ ತೀವ್ರ ಪೈಪೋಟಿ ಎದುರಿಸಿದ್ದರು. ಆದರೆ ಈ ಹಂತದಲ್ಲಿ ತಮ್ಮ ಅನುಭವವನ್ನು ಧಾರೆಯೆರೆದ ಲಕ್ಷ್ಯ ಎನ್‌ಜಿ ತ್ಸೆ ಯೋಂಗ್ ವಿರುದ್ದ ಸಂಪೂರ್ಣ ಹಿಡಿತ ಸಾಧಿಸಿದರು. ಅಲ್ಲದೆ ಬ್ಯಾಕ್ ಟು ಬ್ಯಾಕ್ ಪಾಯಿಂಟ್​ಗಳನ್ನು ಕಲೆಹಾಕುವ ಮೂಲಕ ಒತ್ತಡ ಹೇರಿದರು. ಈ ಮೂಲಕ 2ನೇ ಸೆಟ್​ ಅನ್ನು 21-9 ಅಂತರದಿಂದ ಭರ್ಜರಿಯಾಗಿ ಗೆದ್ದುಕೊಂಡರು.

ಭರ್ಜರಿ ಪೈಪೋಟಿಗೆ ಕಾರಣವಾಗಿದ್ದ ಮೊದಲ ಎರಡು ಸುತ್ತಿನ ಸಮಬಲದ ಬಳಿಕ ಫೈನಲ್​ ರೌಂಡ್​ಗೆ ಪಂದ್ಯ ಸಾಗಿತು. ಮೊದಲ ಲೆಮನ್ ಬ್ರೇಕ್​ ವೇಳೆಗೆ 11 ಪಾಯಿಂಟ್ ಕಲೆಹಾಕುವ ಮೂಲಕ ಲಕ್ಷ್ಯ ಸೇನ್ ಮುನ್ನಡೆ ಕಾಯ್ದುಕೊಂಡರು. ಈ ವೇಳೆ ಎನ್‌ಜಿ ತ್ಸೆ ಯೋಂಗ್ ಗಳಿಸಿದ್ದು ಕೇವಲ 7 ಪಾಯಿಂಟ್ ಮಾತ್ರ. 11-7 ಅಂತರದಿಂದ ಮತ್ತೆ ಶುರುವಾದ ಪಂದ್ಯದಲ್ಲಿ ಲಕ್ಷ್ಯ ಸೇನ್ ಫಾರ್ವಡ್ ಶಾಟ್​ಗಳ ಮೂಲಕ ಗಮನ ಸೆಳೆದರು. ಈ ಮೂಲಕ ಮರು ಆರಂಭದಲ್ಲೇ 6 ಪಾಯಿಂಟ್​ಗಳನ್ನು ಕಲೆಹಾಕಿದರು. ಅಂತಿಮವಾಗಿ ಮೂರನೇ ಸೆಟ್​ ಅನ್ನು 21-16 ಪಾಯಿಂಟ್​ಗಳ ಅಂತರದಿಂದ ಗೆಲ್ಲುವ ಮೂಲಕ ಲಕ್ಷ್ಯ ಸೇನ್ ಭಾರತಕ್ಕೆ ಮತ್ತೊಂದು ಬಂಗಾರದ ತಂದುಕೊಟ್ಟರು.

ಇದಕ್ಕೂ ಮುನ್ನ ಸೆಮಿಫೈನಲ್​ನಲ್ಲಿ ಸಿಂಗಾಪುರದ ಜಿಯಾ ಹೆಂಗ್‌ ತೇಹ್‌ ಅವರನ್ನು 21-10, 18-21, 21-16 ವಿರುದ್ದ ಕಠಿಣ ಜಯ ಸಾಧಿಸಿ ಲಕ್ಷ್ಯ ಫೈನಲ್​ಗೆ ಎಂಟ್ರಿ ಕೊಟ್ಟಿದ್ದರು. ಸೆಮಿಫೈನಲ್​ನಲ್ಲಿ 10ನೇ ಶ್ರೇಯಾಂಕಿತ ಲಕ್ಷ್ಯ ಸೇನ್​ಗೆ 87ನೇ ಶ್ರೇಯಾಂಕಿತ ಜಿಯಾ ಹೆಂಗ್ ಪ್ರಬಲ ಪೈಪೋಟಿ ನೀಡಿದ್ದರು. ಹೀಗಾಗಿಯೇ ಫೈನಲ್ ಪಂದ್ಯದ ಫಲಿತಾಂಶದಲ್ಲೂ ರೋಚಕತೆಯನ್ನು ನಿರೀಕ್ಷಿಸಲಾಗಿತ್ತು. ಅದರಂತೆ ಮೂರು ಸುತ್ತಿನ ಹೋರಾಟದಲ್ಲಿ ಗೆಲ್ಲುವ ಮೂಲಕ ಲಕ್ಷ್ಯ ಸೇನ್ ಭಾರತ ಕೀರ್ತಿ ಪಾತಾಕೆಯನ್ನು ಎತ್ತಿ ಹಿಡಿದಿದ್ದಾರೆ,

ಇನ್ನು ಮಹಿಳಾ ಸಿಂಗಲ್ಸ್ ಫೈನಲ್​ನಲ್ಲಿ ಭಾರತೀಯ ಸ್ಟಾರ್ ಬ್ಯಾಡ್ಮಿಂಟನ್ ತಾರೆ ಪಿವಿ ಸಿಂಧು  ಕೆನಡಾದ ಮಿಶೆಲ್ ಲಿ ಅವರನ್ನು 21-15, 21-13 ನೇರ ಸೆಟ್​ಗಳಿಂದ ಸೋಲಿಸುವ ಮೂಲಕ ಸ್ವರ್ಣ ಪದಕಕ್ಕೆ ಕೊರೊಳೊಡ್ಡಿದ್ದರು. ಇದೀಗ ಲಕ್ಷ್ಯ ಸೇನ್ ಕೂಡ ಚಿನ್ನದ ಪದಕ ಗೆಲ್ಲುವ ಮೂಲಕ ಪುರುಷರ ಮತ್ತು ಮಹಿಳಾ ಬ್ಯಾಡ್ಮಿಂಟನ್​ ಸಿಂಗಲ್ಸ್​ನಲ್ಲಿ ಭಾರತೀಯ ಕ್ರೀಡಾಪಟುಗಳು ಪಾರುಪತ್ಯ ಮೆರೆದಿದ್ದಾರೆ.

ಕಾಮನ್​ವೆಲ್ತ್​ ಗೇಮ್ಸ್​ 2022 ಬ್ಯಾಡ್ಮಿಂಟನ್​ ಫೈನಲ್‌ವರೆಗಿನ ಲಕ್ಷ್ಯ ಸೇನ್ ಅವರ ಪ್ರಯಾಣದ ಸಂಕ್ಷಿಪ್ತ ನೋಟ:

• 32 ರ ಸುತ್ತು: ಸೇಂಟ್ ಹೆಲೆನಾದ ಟ್ರಿಸ್ಟಾನ್ ಡ ಕುನ್ಹಾ ಅವರನ್ನು 21-4, 21-5 ಸೆಟ್​ಗಳಿಂದ ಸೋಲಿಸಿ ಅಭಿಯಾನ ಆರಂಭಿಸಿದ ಲಕ್ಷ್ಯ ಸೇನ್
• 16 ರ ಸುತ್ತು: ಆಸ್ಟ್ರೇಲಿಯಾದ ಲಿನ್ ಯಿಂಗ್ ಕ್ಸಿಯಾಂಗ್ ವಿರುದ್ಧ 21-9, 16-21 ಭರ್ಜರಿ ಜಯ.
• ಕ್ವಾರ್ಟರ್ ಫೈನಲ್: ಮಾರಿಷಸ್‌ನ ಪೌಲ್ ಜೂಲಿಯನ್ ಜಾರ್ಜಸ್ ವಿರುದ್ಧ 21-12, 21-11 ವಿರುದ್ದ ಭರ್ಜರಿ ಜಯ.
• ಸೆಮಿಫೈನಲ್: ತೆಹ್ ಜಿಯಾ ಹೆಂಗ್ ವಿರುದ್ಧ 21-10, 18-21, 21-16 ಸೆಟ್​ಗಳ ರೋಚಕ ಹೋರಾಟದ ಜಯದೊಂದಿಗೆ ಫೈನಲ್​ಗೆ​ ಎಂಟ್ರಿ.