ಕೊಟ್ಟ ಮಾತು ಉಳಿಸಿಕೊಂಡ ಜೂ. ಸೆಹ್ವಾಗ್: ‘ಸೀತಾ-ರಾಮ್’ ಜಪಿಸುತ್ತಲೇ ಭರ್ಜರಿ ಶತಕ!

ಟೀಮ್ ಇಂಡಿಯಾದ ಮಾಜಿ ಸ್ಫೋಟಕ ಆರಂಭಿಕ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ ಆರ್ಯವೀರ್ ಸೆಹ್ವಾಗ್, ತಮ್ಮ ತಂದೆಗೆ ನೀಡಿದ್ದ ಭರವಸೆಯನ್ನು ಭರ್ಜರಿಯಾಗಿ ಈಡೇರಿಸಿದ್ದಾರೆ. ಎಸಿಸಿ ಪುರುಷರ ಅಂಡರ್-19 ಏಷ್ಯಾಕಪ್ 2026 ಟೂರ್ನಿಯ ನಿರ್ಣಾಯಕ ಪಂದ್ಯದಲ್ಲಿ ಯುಎಇ ವಿರುದ್ಧ ಕೇವಲ 168 ಎಸೆತಗಳಲ್ಲಿ 160 ರನ್ ಚಚ್ಚುವ ಮೂಲಕ ಭಾರತ ತಂಡಕ್ಕೆ 70 ರನ್‌ಗಳ ಭರ್ಜರಿ ಗೆಲುವು ತಂದುಕೊಟ್ಟಿದ್ದಾರೆ. ಇದರ ಜೊತೆಗೆ, ಕ್ರೀಸ್‌ನಲ್ಲಿ ತಮ್ಮ ತಂದೆಯಂತೆಯೇ ಹಾಡು ಗುನುಗುತ್ತಾ ಬ್ಯಾಟಿಂಗ್ ಮಾಡುವ ವಿಶಿಷ್ಟ ಶೈಲಿಯನ್ನು ಆರ್ಯವೀರ್ ಕೂಡ ಮೈಗೂಡಿಸಿಕೊಂಡಿರುವುದು ಇದೀಗ ಬಹಿರಂಗವಾಗಿದೆ.

ಅಪ್ಪನ ಹಾಡು, ಮಗನ ರಾಮ ಜಪ!

ವೀರೇಂದ್ರ ಸೆಹ್ವಾಗ್ ಅವರು ಬ್ಯಾಟಿಂಗ್ ಮಾಡುವಾಗ ಒತ್ತಡವನ್ನು ನಿವಾರಿಸಿಕೊಳ್ಳಲು ಬಾಲಿವುಡ್ ಹಾಡುಗಳನ್ನು ಗುನುಗುತ್ತಿದ್ದರು ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ಆದರೆ, ಅವರ ಪುತ್ರ ಆರ್ಯವೀರ್ ಅವರ ಶೈಲಿ ಸ್ವಲ್ಪ ಭಿನ್ನವಾಗಿದೆ. ಪಂದ್ಯದ ವೇಳೆ ಏಕಾಗ್ರತೆ ಕಾಯ್ದುಕೊಳ್ಳಲು ಮತ್ತು ಮನಸ್ಸನ್ನು ಶಾಂತವಾಗಿರಿಸಿಕೊಳ್ಳಲು ತಾನು ಬ್ಯಾಟಿಂಗ್ ಮಾಡುವಾಗ ನಿರಂತರವಾಗಿ ‘ಸೀತಾ-ರಾಮ್’ ಎಂದು ಜಪಿಸುತ್ತೇನೆ ಎಂಬ ಕುತೂಹಲಕಾರಿ ಸಂಗತಿಯನ್ನು ಆರ್ಯವೀರ್ ಬಹಿರಂಗಪಡಿಸಿದ್ದಾರೆ.

ತಂದೆಗೆ ನೀಡಿದ್ದ ಆ ಭರವಸೆ ಏನು?

ನವೆಂಬರ್ 10ರಂದು ನಡೆದ ‘ಎ’ ಗುಂಪಿನ ಈ ಮಾಡು ಇಲ್ಲವೇ ಮಡಿ ಪಂದ್ಯಕ್ಕೂ ಮುನ್ನ ಆರ್ಯವೀರ್ ತಮ್ಮ ತಂದೆಯೊಂದಿಗೆ ಮಾತನಾಡಿದ್ದರು. “ಈ ಪಂದ್ಯದಲ್ಲಿ ನಾನು ದೊಡ್ಡ ಶತಕ ಬಾರಿಸುತ್ತೇನೆ” ಎಂದು ವೀರೇಂದ್ರ ಸೆಹ್ವಾಗ್ ಅವರಿಗೆ ಮಾತು ಕೊಟ್ಟಿದ್ದರು. ಪಂದ್ಯಶ್ರೇಷ್ಠ ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಆರ್ಯವೀರ್, “ನನ್ನ ತಂದೆಗೆ ಕೇವಲ ಶತಕಗಳಿಗಿಂತ ದೊಡ್ಡ ಇನ್ನಿಂಗ್ಸ್‌ಗಳೇ ಹೆಚ್ಚು ಇಷ್ಟ. ಅವರ ಪರಂಪರೆಯನ್ನು ಮುಂದುವರಿಸುವ ಜವಾಬ್ದಾರಿ ನನ್ನ ಮೇಲಿದೆ. ಅಪ್ಪನಿಗೆ ಕೊಟ್ಟ ಮಾತಿನಂತೆ ಆಡಲು ಸಾಧ್ಯವಾಗಿರುವುದಕ್ಕೆ ತುಂಬಾ ಖುಷಿಯಾಗುತ್ತಿದೆ” ಎಂದು ಸಂತಸ ಹಂಚಿಕೊಂಡರು.

ಪಂದ್ಯದ ಹೈಲೈಟ್ಸ್:

ಜವಾಬ್ದಾರಿಯುತ ಇನ್ನಿಂಗ್ಸ್: ಒಮಾನ್‌ನ ಸ್ಪಿನ್ ಸ್ನೇಹಿ ಪಿಚ್‌ನಲ್ಲಿ ಆರಂಭದಲ್ಲಿ ಎಚ್ಚರಿಕೆಯ ಆಟವಾಡಿದ ಆರ್ಯವೀರ್ ಸೆಹ್ವಾಗ್, 131 ಎಸೆತಗಳಲ್ಲಿ ತಮ್ಮ ಚೊಚ್ಚಲ ಯೂತ್ ಏಕದಿನ ಶತಕ ಪೂರೈಸಿದರು. ನಂತರ ಬಿರುಸಿನ ಬ್ಯಾಟಿಂಗ್ ನಡೆಸಿ ಒಟ್ಟು 17 ಬೌಂಡರಿ ಹಾಗೂ 7 ಭರ್ಜರಿ ಸಿಕ್ಸರ್‌ಗಳೊಂದಿಗೆ 160 ರನ್ ಕಲೆಹಾಕಿದ್ದರು.

ಇದನ್ನೂ ಓದಿ: ಹಾರ್ದಿಕ್ ಪಾಂಡ್ಯ vs ಅರ್ಷದೀಪ್ ಸಿಂಗ್:  36 ಕೋಟಿ ರೂ. ಸ್ವಾಪ್ ಡೀಲ್..!

ಭಾರತಕ್ಕೆ ಭರ್ಜರಿ ಜಯ: ಆರ್ಯವೀರ್ ಮತ್ತು ವಿ.ಕೆ. ವಿನೀತ್ (67 ರನ್) ಅವರ 193 ರನ್‌ಗಳ ಅಮೋಘ ಜೊತೆಯಾಟದ ನೆರವಿನಿಂದ ಭಾರತ ತಂಡ 50 ಓವರ್​ಗಳಲ್ಲಿ 309/7 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಯುಎಇ ತಂಡವನ್ನು 70 ರನ್‌ಗಳಿಂದ ಮಣಿಸಿದ ಭಾರತ, ಸೆಮಿಫೈನಲ್‌ಗೆ ಲಗ್ಗೆ ಇಟ್ಟಿದೆ. ಅದರಂತೆ ಗುರುವಾರ ನಡೆಯಲಿರುವ ಸೆಮಿಫೈನಲ್ ಪಂದ್ಯದಲ್ಲಿ ಭಾರತ ತಂಡವು ಅಫ್ಘಾನಿಸ್ತಾನವನ್ನು ಎದುರಿಸಲಿದೆ.