ಬೌಲರ್‌ಗಳ ದರ್ಬಾರ್‌ಗೆ ಬ್ರೇಕ್: ಆಸ್ಟ್ರೇಲಿಯಾ ಅಂಗಳದಲ್ಲಿ ಇನ್ಮುಂದೆ ರನ್ ಮಳೆ!

ಆಸ್ಟ್ರೇಲಿಯಾ ದೇಶಿ ಕ್ರಿಕೆಟ್‌ನಲ್ಲಿ ಸದಾ ಬೌಲರ್‌ಗಳದ್ದೇ ದರ್ಬಾರ್. ಹಸಿರು ಹುಲ್ಲಿನಿಂದ ಕೂಡಿದ ವೇಗದ ಪಿಚ್‌ಗಳು ಬ್ಯಾಟರ್‌ಗಳ ಪಾಲಿಗೆ ಸಿಂಹಸ್ವಪ್ನವಾಗಿದ್ದವು. ಆದರೆ ಈಗ ಕಾಲ ಬದಲಾಗಿದೆ. ಆಸ್ಟ್ರೇಲಿಯಾ ಪಿಚ್‌ಗಳಲ್ಲಿ ರನ್ ಮಳೆ ಹರಿಸಲು ಕ್ರಿಕೆಟ್ ಆಸ್ಟ್ರೇಲಿಯಾ (CA) ಮಾಸ್ಟರ್ ಪ್ಲ್ಯಾನ್ ಒಂದನ್ನು ರೂಪಿಸಿದೆ. ಅಲ್ಲದೆ ಮುಂಬರುವ ದೇಶಿ ಕ್ರಿಕೆಟ್ ಸೀಸನ್‌ಗಾಗಿ ಪಿಚ್ ಕ್ಯುರೇಟರ್‌ಗಳಿಗೆ ಮಹತ್ವದ ಹೊಸ ಮಾರ್ಗಸೂಚಿಯನ್ನು ನೀಡಿದೆ.

‘ಅನುಮಾನವಿದ್ದರೆ, ಬ್ಯಾಟರ್‌ಗಳಿಗೆ ಸಾಥ್ ನೀಡಿ’

“ಕಳೆದ ಒಂದು ದಶಕದಿಂದ ನಾವು ‘ಯಾವುದೇ ಗೊಂದಲವಿದ್ದರೆ ಬೌಲರ್‌ಗಳಿಗೆ ಪೂರಕವಾದ ಪಿಚ್ ಸಿದ್ಧಪಡಿಸಿ’ ಎಂಬ ನೀತಿಯನ್ನು ಪಾಲಿಸುತ್ತಿದ್ದೆವು. ಆದರೆ ಈಗ ಅದನ್ನು ಬದಲಾಯಿಸುತ್ತಿದ್ದೇವೆ. ಇನ್ಮುಂದೆ ಪಿಚ್ ಸಿದ್ಧಪಡಿಸುವಾಗ ಗೊಂದಲ ಮೂಡಿದರೆ, ಬ್ಯಾಟರ್‌ಗಳಿಗೆ ನೆರವಾಗುವಂತೆ ಪಿಚ್ ರೂಪಿಸಿ ಎಂದು ಕ್ಯುರೇಟರ್‌ಗಳಿಗೆ ತಿಳಿಸಿದ್ದೇವೆ,” ಎಂದು ಕ್ರಿಕೆಟ್ ಆಸ್ಟ್ರೇಲಿಯಾದ ಕ್ರಿಕೆಟ್ ಆಪರೇಷನ್ಸ್ ಮುಖ್ಯಸ್ಥ ಪೀಟರ್ ರೋಚ್ ಹೇಳಿದ್ದಾರೆ.

ಈ ದಿಢೀರ್ ಬದಲಾವಣೆಗೆ ಕಾರಣಗಳೇನು?

• ಎರಡೇ ದಿನಕ್ಕೆ ಮುಗಿಯುತ್ತಿರುವ ಟೆಸ್ಟ್ ಪಂದ್ಯಗಳು: ಇತ್ತೀಚಿನ ದಿನಗಳಲ್ಲಿ ಆಸ್ಟ್ರೇಲಿಯಾದಲ್ಲಿ ಟೆಸ್ಟ್ ಪಂದ್ಯಗಳು ಕೇವಲ 2 ದಿನಗಳಲ್ಲೇ ಮುಕ್ತಾಯಗೊಳ್ಳುತ್ತಿವೆ. ಬಾಂಗ್ಲಾದೇಶ್ ವಿರುದ್ಧ ಮಕೈನಲ್ಲಿ ನಡೆದ ಟೆಸ್ಟ್ ಪಂದ್ಯ ಸೇರಿದಂತೆ ಇತ್ತೀಚಿನ 20 ಹೋಮ್ ಟೆಸ್ಟ್‌ಗಳಲ್ಲಿ 4 ಪಂದ್ಯಗಳು ಕೇವಲ ಎರಡೇ ದಿನಕ್ಕೆ ಮುಗಿದಿರುವುದು ಕ್ರಿಕೆಟ್ ಮಂಡಳಿಯ ಆತಂಕಕ್ಕೆ ಕಾರಣವಾಗಿದೆ.
• ಕುಸಿದ ಬ್ಯಾಟಿಂಗ್ ಸರಾಸರಿ: ಕಳೆದ 2025–26ರ ಶೆಫೀಲ್ಡ್ ಶೀಲ್ಡ್ ಟೂರ್ನಿಯಲ್ಲಿ ಬ್ಯಾಟರ್‌ಗಳ ಪ್ರದರ್ಶನ ತೀರಾ ಕಳಪೆಯಾಗಿತ್ತು. 50 ವರ್ಷಗಳ ಇತಿಹಾಸದಲ್ಲೇ ಇದು ಮೂರನೇ ಅತಿ ಕಡಿಮೆ ರನ್-ಪರ್-ವಿಕೆಟ್ ಸರಾಸರಿಯನ್ನು ಹೊಂದಿತ್ತು. ಟಾಪ್ 10 ರನ್ ಸ್ಕೋರರ್‌ಗಳಲ್ಲಿ ಒಬ್ಬರೇ ಒಬ್ಬ ಬ್ಯಾಟರ್ ಕೂಡ 37ಕ್ಕಿಂತ ಹೆಚ್ಚು ಸರಾಸರಿ ಹೊಂದಿರಲಿಲ್ಲ ಎಂದರೆ ಪಿಚ್‌ಗಳು ಎಷ್ಟು ಕಠಿಣವಾಗಿದ್ದವು ಎಂದು ಊಹಿಸಬಹುದು.
• ಕೂಕಬುರ್ರಾ ಚೆಂಡಿನ ಕಾಟ: 2019 ರಿಂದ ಜಾರಿಗೆ ತಂದ ಹೊಸ ಮಾದರಿಯ ಗಟ್ಟಿಯಾದ ಕೂಕಬುರ್ರಾ ಚೆಂಡುಗಳು ಬೌಲರ್‌ಗಳಿಗೆ ದೀರ್ಘಕಾಲದವರೆಗೆ ಸ್ವಿಂಗ್ ಮತ್ತು ಸೀಮ್ ಮೂವ್‌ಮೆಂಟ್ ನೀಡುತ್ತಿವೆ. ಸ್ಟೀವ್ ಸ್ಮಿತ್ ಅವರಂತಹ ದಿಗ್ಗಜ ಬ್ಯಾಟರ್‌ಗಳೇ ಆಸ್ಟ್ರೇಲಿಯಾದಲ್ಲಿ ಬ್ಯಾಟಿಂಗ್ ಮಾಡುವುದು ನರಕಸದೃಶವಾಗಿದೆ ಎಂದು ಒಪ್ಪಿಕೊಂಡಿದ್ದಾರೆ.
• ಯುವ ಬ್ಯಾಟರ್‌ಗಳ ಭವಿಷ್ಯಕ್ಕೆ ಧಕ್ಕೆ: ಕೇವಲ ಬೌಲರ್‌ಗಳಿಗೇ ನೆರವಾಗುವ ಪಿಚ್‌ಗಳಿಂದಾಗಿ ಆಸ್ಟ್ರೇಲಿಯಾದ ಯುವ ಬ್ಯಾಟರ್‌ಗಳಿಗೆ ಕ್ರೀಸ್‌ನಲ್ಲಿ ದೀರ್ಘಕಾಲ ನಿಂತು ಇನ್ನಿಂಗ್ಸ್ ಕಟ್ಟುವ ಕಲೆ ಮರೆತುಹೋಗುತ್ತಿದೆ. ಇದು ಭವಿಷ್ಯದ ಟೆಸ್ಟ್ ತಂಡದ ಮೇಲೆ ಕೆಟ್ಟ ಪರಿಣಾಮ ಬೀರಲಿದೆ ಎಂದು CA ಈ ನಿರ್ಧಾರಕ್ಕೆ ಬಂದಿದೆ.

ನಿಯಮಗಳಲ್ಲೂ ಭಾರಿ ಬದಲಾವಣೆ!

ಕೇವಲ ಪಿಚ್ ಮಾತ್ರವಲ್ಲದೆ, ಬ್ಯಾಟರ್‌ಗಳಿಗೆ ಕ್ರೀಸ್‌ನಲ್ಲಿ ಸೆಟ್ ಆಗಲು ನೆರವಾಗುವಂತೆ ಶೆಫೀಲ್ಡ್ ಶೀಲ್ಡ್ ಪಂದ್ಯಗಳ ನಿಯಮಗಳಲ್ಲೂ ಬದಲಾವಣೆ ತರಲಾಗಿದೆ:

• ದೀರ್ಘಾವಧಿಯ ಎರಡನೇ ಸೆಷನ್: ಪಂದ್ಯದ ಮಧ್ಯದ ಸೆಷನ್ ಸಮಯವನ್ನು 2 ಗಂಟೆ 15 ನಿಮಿಷಗಳಿಗೆ ಹೆಚ್ಚಿಸಲಾಗಿದೆ. ಇದರಿಂದ ಬೌಲರ್‌ಗಳು ಸುಸ್ತಾಗಲಿದ್ದು, ಬ್ಯಾಟರ್‌ಗಳು ರನ್ ಗಳಿಸಲು ಸುಲಭವಾಗಲಿದೆ.
• ಸ್ಪಿನ್ನರ್‌ಗಳಿಗೆ ಮಣೆ: ವೇಗದ ಬೌಲರ್‌ಗಳು ದಣಿದಾಗ ನಾಯಕರು ಕಡ್ಡಾಯವಾಗಿ ಸ್ಪಿನ್ನರ್‌ಗಳನ್ನು ಬಳಸಬೇಕಾಗುತ್ತದೆ. ಇದು ಆಸ್ಟ್ರೇಲಿಯಾದಲ್ಲಿ ಸತ್ತೇ ಹೋಗಿರುವ ಸ್ಪಿನ್ ಕಲೆಗೆ ಮರುಜೀವ ನೀಡಲಿದೆ.
• ಡ್ರಿಂಕ್ಸ್ ಬ್ರೇಕ್ ಕಡಿತ: ಪಂದ್ಯದ ಕೊನೆಯ ಸೆಷನ್‌ನಲ್ಲಿ ಒಂದು ಡ್ರಿಂಕ್ಸ್ ಬ್ರೇಕ್ ಅನ್ನು ಕಡಿತಗೊಳಿಸಲಾಗಿದೆ. ಇದರಿಂದ ಪಂದ್ಯದ ವೇಗ ಮತ್ತು ಬ್ಯಾಟರ್‌ಗಳ ಏಕಾಗ್ರತೆ ಭಂಗವಾಗುವುದು ತಪ್ಪುತ್ತದೆ.

ನೀರಸ ಡ್ರಾ ಪಂದ್ಯಗಳು ಬೇಡ:

“ಇದರರ್ಥ ನಾವು ಯಾವುದೇ ಜೀವವಿಲ್ಲದ ಫ್ಲ್ಯಾಟ್ ಪಿಚ್‌ಗಳನ್ನು ಬಯಸುತ್ತಿದ್ದೇವೆ ಎಂದಲ್ಲ. ಪಂದ್ಯಗಳು 4ನೇ ಅಥವಾ 5ನೇ ದಿನದವರೆಗೆ ಸಾಗಬೇಕು. ಅಲ್ಲಿ ಬ್ಯಾಟರ್‌ಗಳು ಶತಕ ಬಾರಿಸಬೇಕು, ಬೌಲರ್‌ಗಳು ವಿಕೆಟ್ ಪಡೆಯಲು ಕಷ್ಟಪಡಬೇಕು. ಆಗಲೇ ಕ್ರಿಕೆಟ್ ರೋಚಕವಾಗಿರುತ್ತದೆ,” ಎಂದು ಪೀಟರ್ ರೋಚ್ ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: ಏಷ್ಯನ್ ಗೇಮ್ಸ್ ಕ್ರಿಕೆಟ್ ವೇಳಾಪಟ್ಟಿ ಪ್ರಕಟ

ಒಟ್ಟಿನಲ್ಲಿ ಕ್ರಿಕೆಟ್ ಆಸ್ಟ್ರೇಲಿಯಾದ ಹೊಸ ನೀತಿಯು ಬ್ಯಾಟರ್‌ಗಳಿಗೆ ಪೂರಕವಾಗಿದ್ದು, ಮುಂಬರುವ ಸೀಸನ್‌ನಲ್ಲಿ ರನ್‌ಗಳ ಮಳೆ ಹರಿಸುವುದರೊಂದಿಗೆ ಬೌಲರ್‌ಗಳ ಅಧಿಪತ್ಯಕ್ಕೆ ತಡೆ ಒಡ್ಡಲಿದೆ. ಈ ಬದಲಾವಣೆಯು ಶೆಫೀಲ್ಡ್ ಶೀಲ್ಡ್‌ನಲ್ಲಿ ರೋಚಕ ಆಟಕ್ಕೆ ದಾರಿ ಮಾಡಿಕೊಡಲಿದ್ದು, ಬ್ಯಾಟ್-ಬಾಲ್ ಸಮಬಲದ ಹೋರಾಟವನ್ನು ಮತ್ತೆ ತರುವ ನಿರೀಕ್ಷೆಯಿದೆ.

Published On - 2:27 pm, Wed, 26 August 26