ಸೋತ ಹತಾಶೆಯಲ್ಲಿ ಮಾಡಬಾರದನ್ನು ಮಾಡಿದ ಮೆಡ್ವೆಡೆವ್​ಗೆ 66 ಲಕ್ಷ ರೂ. ದಂಡ..!

ಯಾವುದೇ ಕ್ರೀಡೆಯಾಗಿರಲಿ, ಅದರಲ್ಲಿ ಸೋಲು ಗೆಲುವು ಸಹಜ. ಗೆದ್ದ ಆಟಗಾರರು ಗೆಲುವನ್ನು ಸಂಭ್ರಮದಿಂದ ಆಚರಿಸಿದರೆ, ಇತ್ತ ಸೋತ ಆಟಗಾರರು ಸೋತ ನಿರಾಶೆಯಲ್ಲಿ ತಮ್ಮ ಕೋಪವನ್ನು ಇತರ ವ್ಯಕ್ತಿಗಳ ಮೇಲೆ ಅಥವಾ ವಸ್ತುಗಳ ಮೇಲೆ ತೋರಿಸುತ್ತಾರೆ. ಇದನ್ನು ನಾವು ಕ್ರಿಕೆಟ್​ನಲ್ಲಿ ಸಾಕಷ್ಟು ಬಾರಿ ನೋಡುತ್ತೇವೆ. ಹಾಗೆಯೇ ಟೆನಿಸ್​​ನ್ಲ್ಲೂ ಈ ರೀತಿಯ ಘಟನೆಗಳು ನಡೆಯುವುದು ಸರ್ವೆ ಸಾಮಾನ್ಯ. ಟೆನಿಸ್​ನಲ್ಲಿ ಆಟಗಾರರು ಗೆದ್ದ ಬಳಿಕ ತಮ್ಮ ರ್‍ಯಾಕೆಟ್‌ ಅನ್ನು ನೆಲಕ್ಕೆ ಬಡಿದು ಸಂಭ್ರಮಿಸುವುದನ್ನು ನಾವು ನೋಡಿರುತ್ತೇವೆ. ಇತ್ತ ಸೋತಾಗಲೂ ಸಹ ಆಟಗಾರರು ತಮ್ಮ ರ್‍ಯಾಕೆಟ್‌ ಅನ್ನು ಮುರಿದು ಹಾಕುವ ಮೂಲಕ ತಮ್ಮ ಕೋಪವನ್ನು ಹೊರಹಾಕುವುದನ್ನು ಕಂಡಿರುತ್ತೇವೆ. ಆದರೀಗ ಇದೇ ರೀತಿಯ ವರ್ತನೆ ತೋರಿದ ಖ್ಯಾತ ಟೆನಿಸ್ ಆಟಗಾರ ಡೇನಿಯಲ್ ಮೆಡ್ವೆಡೆವ್​ಗೆ ಭಾರಿ ದಂಡವನ್ನು ವಿಧಿಸಲಾಗಿದೆ.

ವಾಸ್ತವವಾಗಿ 28ರ ಹರೆಯದ ಟೆನಿಸ್ ತಾರೆ ಮೆಡ್ವೆಡೆವ್ ಅವರಿಗೆ 2025ರ ಆರಂಭ ಚೆನ್ನಾಗಿಲ್ಲ. ವರ್ಷದ ಮೊದಲ ಗ್ರ್ಯಾಂಡ್ ಸ್ಲಾಮ್, ಆಸ್ಟ್ರೇಲಿಯನ್ ಓಪನ್‌ನಲ್ಲಿ ಅವರು ಎರಡನೇ ಸುತ್ತಿನಲ್ಲಿಯೇ ಸೋಲನ್ನು ಎದುರಿಸಬೇಕಾಯಿತು. ಇದರಿಂದಾಗಿ ಅವರು ಗ್ರ್ಯಾಂಡ್ ಸ್ಲಾಮ್​ನಿಂದ ಹೊರಬೀಳಬೇಕಾಯಿತು. 5 ಸೆಟ್‌ಗಳ ಕಾಲ ನಡೆದ ಈ ಪಂದ್ಯದಲ್ಲಿ ಮೊದಲ ಸುತ್ತನ್ನು ಗೆದ್ದುಕೊಂಡ ಮೆಡ್ವೆಡೆವ್​ ಆ ಬಳಿಕ ಅಮೆರಿಕದ ಲೆರ್ನರ್ ಟಿಯಾನ್ ವಿರುದ್ಧ 6-3 7-6 6-7 1-6 7-6 ರಿಂದ ಸೋಲಬೇಕಾಯಿತು.

ಕ್ಯಾಮರಾ ಮತ್ತು ರಾಕೆಟ್ ಮೇಲೆ ಕೋಪ

19 ವರ್ಷದ ಆಟಗಾರನ ವಿರುದ್ಧ ಸೋತ ಬಳಿಕ ತಾಳ್ಮೆ ಕಳೆದುಕೊಂಡ ಮೆಡ್ವೆಡೆವ್, ತಮ್ಮ ರ್‍ಯಾಕೆಟ್​ನಿಂದ ನೆಟ್​ಗೆ ಅಳವಡಿಸಿದ್ದ ಚಿಕ್ಕ ಕ್ಯಾಮೆರಾಕ್ಕೆ ಹೊಡೆಯಲಾರಂಭಿಸಿದರು. ಮೆಡ್ವೆಡೆವ್ ಈ ರೀತಿ ಮಾಡಿದ್ದು, ಸ್ಪಷ್ಟವಾಗಿ ಕ್ಯಾಮರಾದಲ್ಲಿ ರೆಕಾರ್ಡ್ ಆಗಿದಲ್ಲದೆ ಟಿವಿಯಲ್ಲೂ ನೇರ ಪ್ರಸಾರವಾಯಿತು. ಇತ್ತ ಮೆಡ್ವೆಡೆವ್ ಕೋಪಕ್ಕೆ ಕ್ಯಾಮೆರಾ ಹಾನಿಗೊಳಗಾದರೆ ಅವರ ರಾಕೆಟ್ ಕೂಡ ಮುರಿದುಹೋಯಿತು.

ದಂಡ ವಿಧಿಸಿದ ಆಸ್ಟ್ರೇಲಿಯನ್ ಓಪನ್

ಇದು ಸಾಲದೆಂಬಂತೆ ಪಂದ್ಯವನ್ನು ಸೋತ ಬಳಿಕ ಮೆಡ್ವೆಡೆವ್ ಪತ್ರಿಕಾಗೋಷ್ಠಿಗೆ ಬರಲಿಲ್ಲ. ಪಂದ್ಯಾವಳಿಯ ನಿಯಮಗಳ ಪ್ರಕಾರ ಪ್ರತಿ ಆಟಗಾರ ಪಂದ್ಯದಲ್ಲಿ ಗೆದ್ದರೂ ಅಥವಾ ಸೋತರೂ ಪತ್ರಿಕಾಗೋಷ್ಠಿಗೆ ಬರುವುದು ಕಡ್ಡಾಯವಾಗಿದೆ. ಆದಾಗ್ಯೂ ಮೆಡ್ವೆಡೆವ್ ಪತ್ರಿಕಾಗೋಷ್ಠಿಗೆ ಬಂದಿಲ್ಲ. ಹೀಗಾಗಿ ಆಸ್ಟ್ರೇಲಿಯನ್ ಓಪನ್ ಆಯೋಜಕರು ಮೆಡ್ವೆಡೆವ್‌ಗೆ ಭಾರಿ ದಂಡ ವಿಧಿಸಿದ್ದಾರೆ. ನೀತಿ ಸಂಹಿತೆಯ ವಿವಿಧ ನಿಯಮಗಳನ್ನು ಉಲ್ಲಂಘಿಸಿದ ಆರೋಪ ಸಾಬೀತಾದ ನಂತರ ಮೆಡ್ವೆಡೆವ್‌ಗೆ 76 ಸಾವಿರ ಅಮೆರಿಕನ್ ಡಾಲರ್ ಅಂದರೆ ಸುಮಾರು 66 ಲಕ್ಷ ರೂಗಳನ್ನು ದಂಡವಾಗಿ ವಿಧಿಸಿದ್ದಾರೆ. 2021 ರ ಯುಎಸ್ ಓಪನ್ ಚಾಂಪಿಯನ್ ಮೆಡ್ವೆಡೆವ್ ಕಳೆದ ನಾಲ್ಕು ವರ್ಷಗಳಲ್ಲಿ ಮೂರು ಬಾರಿ ಆಸ್ಟ್ರೇಲಿಯನ್ ಓಪನ್ ಫೈನಲ್‌ಗೆ ತಲುಪಿದರಾದರೂ ಪ್ರತಿ ಬಾರಿ ಸೋಲನ್ನು ಎದುರಿಸಬೇಕಾಯಿತು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ