ICC ODI Ranking: ಏಷ್ಯಾಕಪ್ ಗೆದ್ದ ಭಾರತ; ಅಗ್ರಸ್ಥಾನಕ್ಕೇರಿದ ಪಾಕಿಸ್ತಾನ..!
ICC ODI Ranking: ಏಷ್ಯಾಕಪ್ 2023ರ ಅಂತಿಮ ಸುತ್ತಿನಲ್ಲಿ ಶ್ರೀಲಂಕಾವನ್ನು ಸೋಲಿಸಿದ ಭಾರತ ದಾಖಲೆಯ 8ನೇ ಬಾರಿಗೆ ಪ್ರಶಸ್ತಿಯನ್ನು ಗೆದ್ದುಕೊಂಡಿದೆ. ಆದರೆ ಭಾರತದ ಈ ಅಮೋಘ ಗೆಲುವು ಪಾಕಿಸ್ತಾನಕ್ಕೆ ಲಾಭ ತಂದಿದೆ. ಏಕೆಂದರೆ ಐಸಿಸಿ ಏಕದಿನ ಶ್ರೇಯಾಂಕದಲ್ಲಿ ಪಾಕಿಸ್ತಾನ ಮತ್ತೊಮ್ಮೆ ಅಗ್ರಸ್ಥಾನಕ್ಕೇರಿದೆ.
Updated on:Sep 18, 2023 | 7:37 AM
ಏಷ್ಯಾಕಪ್ 2023ರ (Asia Cup 2023) ಅಂತಿಮ ಸುತ್ತಿನಲ್ಲಿ ಶ್ರೀಲಂಕಾವನ್ನು ಸೋಲಿಸಿದ ಭಾರತ (India vs Sri lanka) ದಾಖಲೆಯ 8ನೇ ಬಾರಿಗೆ ಪ್ರಶಸ್ತಿಯನ್ನು ಗೆದ್ದುಕೊಂಡಿದೆ. ಆದರೆ ಭಾರತದ ಈ ಅಮೋಘ ಗೆಲುವು ಪಾಕಿಸ್ತಾನಕ್ಕೆ ಲಾಭ ತಂದಿದೆ. ಏಕೆಂದರೆ ಐಸಿಸಿ ಏಕದಿನ ಶ್ರೇಯಾಂಕದಲ್ಲಿ (ICC ODI Ranking) ಪಾಕಿಸ್ತಾನ ಮತ್ತೊಮ್ಮೆ ಅಗ್ರಸ್ಥಾನಕ್ಕೇರಿದೆ. ಏಷ್ಯಾಕಪ್ ಫೈನಲ್ ಪಂದ್ಯದಲ್ಲಿ ಭಾರತದ ಗೆಲುವು ಮತ್ತು ಆಸ್ಟ್ರೇಲಿಯ ಮತ್ತು ದಕ್ಷಿಣ ಆಫ್ರಿಕಾ (Australia vs South Africa) ನಡುವಿನ ಪಂದ್ಯದ ಫಲಿತಾಂಶ ಏಕದಿನ ಶ್ರೇಯಾಂಕದಲ್ಲಿ ದೊಡ್ಡ ಬದಲಾವಣೆಯನ್ನು ತಂದಿದೆ. ಹೀಗಾಗಿ ಐಸಿಸಿ ಏಕದಿನ ರ್ಯಾಂಕಿಂಗ್ನಲ್ಲಿ ಇದೀಗ ಪಾಕಿಸ್ತಾನ (Pakistan) ತಂಡ ಮೊದಲ ಸ್ಥಾನ, ಭಾರತ ತಂಡ ಎರಡನೇ ಸ್ಥಾನ, ಆಸ್ಟ್ರೇಲಿಯಾ ಮೂರನೇ ಸ್ಥಾನಕ್ಕೆ ತಲುಪಿವೆ. ಭಾರತ ಮತ್ತು ಪಾಕಿಸ್ತಾನ ಸಮಾನ ಅಂದರೆ 115 ರೇಟಿಂಗ್ ಹೊಂದಿವೆ. ಆದರೆ ಆಡಿದ ಪಂದ್ಯಗಳು ಮತ್ತು ಗೆಲುವಿನ ಶೇಕಡಾವಾರು ಟೀಮ್ ಇಂಡಿಯಾದ ಮೇಲೆ ಪರಿಣಾಮ ಬೀರಿದೆ.
ಸಮಾನ ಅಂಕಗಳಿದ್ದರೂ ಭಾರತ ಏಕೆ ಎರಡನೇ ಸ್ಥಾನದಲ್ಲಿದೆ?
ಏಷ್ಯಾಕಪ್ ಪ್ರಶಸ್ತಿ ಗೆದ್ದರೂ ಭಾರತ ಏಕೆ ಅಗ್ರ ಸ್ಥಾನದಲ್ಲಿಲ್ಲ? ಈ ಪ್ರಶ್ನೆ ಹಲವರನ್ನು ಕಾಡುತ್ತಿರಬಹುದು. ಅದಕ್ಕೆ ಉತ್ತರವೆಂದರೆ, ಪಾಕಿಸ್ತಾನ ಆಡಿರುವ 27 ಪಂದ್ಯಗಳಿಂದ 3102 ಅಂಕಗಳೊಂದಿಗೆ 115 ರೇಟಿಂಗ್ ಹೊಂದಿದೆ. ಆದರೆ ಭಾರತ ಆಡಿರುವ 41 ಪಂದ್ಯಗಳಲ್ಲಿ 4701 ಅಂಕಗಳನ್ನು ಗಳಿಸಿ 115 ರೇಟಿಂಗ್ ಸಂಪಾದಿಸಿದೆ. ಮತ್ತೊಂದೆಡೆ ಆಸ್ಟ್ರೇಲಿಯಾ ಆಡಿರುವ 28 ಪಂದ್ಯಗಳಿಂದ 3166 ಅಂಕಗಳೊಂದಿಗೆ 113 ರೇಟಿಂಗ್ ಗಳಿಸಿದೆ. ಹೀಗಾಗಿ ರೇಟಿಂಗ್ಗಳು ಸಮಾನವಾದಾಗ, ಆಡಿದ ಪಂದ್ಯಗಳನ್ನು ಗಣನೆಗೆ ತೆಗೆದುಕೊಂಡು ಶ್ರೇಯಾಂಕವನ್ನು ನಿರ್ಧರಿಸಲಾಗುತ್ತದೆ. ಈ ವಿಚಾರದಲ್ಲಿ ಟೀಂ ಇಂಡಿಯಾ ತೀರಾ ಹಿಂದುಳಿದಿದೆ.
IND vs AUS: ಭಾರತ ವಿರುದ್ಧದ ಮೂರು ಪಂದ್ಯಗಳ ಏಕದಿನ ಸರಣಿಗೆ ಆಸ್ಟ್ರೇಲಿಯಾ ತಂಡ ಪ್ರಕಟ
ಮೊದಲ ಸ್ಥಾನದಿಂದ ಮೂರನೇ ಸ್ಥಾನಕ್ಕೆ ಕುಸಿದ ಆಸ್ಟ್ರೇಲಿಯಾ
ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಗೂ ಮುನ್ನ ಹಾಗೂ ಸರಣಿಯಲ್ಲಿ ಆಸ್ಟ್ರೇಲಿಯಾ ತಂಡ ಏಕದಿನ ಶ್ರೇಯಾಂಕದಲ್ಲಿ ಅಗ್ರಸ್ಥಾನದಲ್ಲಿತ್ತು. ಆದರೆ ಐದು ಪಂದ್ಯಗಳ ಏಕದಿನ ಸರಣಿಯನ್ನು ಆಸೀಸ್ ಪಡೆ 2-3 ಅಂತರದಿಂದ ಸೋತಿತು. ಅಂತಿಮ ಹಾಗೂ ನಿರ್ಣಾಯಕ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಆಸ್ಟ್ರೇಲಿಯಾವನ್ನು 122 ರನ್ಗಳಿಂದ ಸೋಲಿಸಿತು. ಈ ಸರಣಿಯ ಆರಂಭಿಕ ಎರಡೂ ಪಂದ್ಯಗಳನ್ನು ಆಸ್ಟ್ರೇಲಿಯಾ ಗೆದ್ದಿತ್ತು. ಆದರೆ ಆತಿಥೇಯ ದಕ್ಷಿಣ ಆಫ್ರಿಕಾ ಪುನರಾಗಮನ ಮಾಡಿ, ಸತತ ಮೂರು ಪಂದ್ಯಗಳನ್ನು ಗೆದ್ದುಕೊಂಡಿತು.
ಭಾರತಕ್ಕೆ ಅಗ್ರಸ್ಥಾನಕ್ಕೇರುವ ಅವಕಾಶ
2023 ರ ಏಕದಿನ ವಿಶ್ವಕಪ್ಗೆ ಮುಂಚಿತವಾಗಿ ಏಕದಿನ ರ್ಯಾಂಕಿಂಗ್ನಲ್ಲಿ ಭಾರತಕ್ಕೆ ಮತ್ತೊಮ್ಮೆ ಅಗ್ರಸ್ಥಾನಕ್ಕೇರುವ ಅವಕಾಶವಿದೆ. ಭಾರತ ಮಾತ್ರವಲ್ಲದೆ ಆಸ್ಟ್ರೇಲಿಯಾ ತಂಡಕ್ಕೂ ಸಮಾನ ಅವಕಾಶ ಸಿಗಲಿದೆ. ಉಭಯ ದೇಶಗಳ ನಡುವೆ ಆರಂಭವಾಗಲಿರುವ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಯಾವ ತಂಡ ವಿಜಯಿಶಾಲಿಯಾಗುತ್ತದೋ ಆ ತಂಡಕ್ಕೆ ಏಕದಿನ ರ್ಯಾಂಕಿಂಗ್ನಲ್ಲಿ ನಂಬರ್ 1 ಪಟ್ಟ ಸಿಗಲಿದೆ. ಈ ಎರಡೂ ತಂಡಗಳ ನಡುವಿನ ಏಕದಿನ ಸರಣಿ ಸೆಪ್ಟೆಂಬರ್ 22 ರಿಂದ ಆರಂಭವಾಗಲಿದ್ದು, ಈ ಸರಣಿಯ ಮೊದಲ ಪಂದ್ಯ ಮೊಹಾಲಿಯಲ್ಲಿ ನಡೆಯಲಿದೆ.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 7:36 am, Mon, 18 September 23
