ಲಕ್ಷ ರೂ. ಜೇಬಿನಲ್ಲಿರಲಿ; ಭಾರತ- ಪಾಕ್ ಪಂದ್ಯ ನೋಡಲು ಅಹಮದಾಬಾದ್​ಗೆ ಪ್ರಯಾಣಿಸುವವರ ಗಮನಕ್ಕೆ

ಭಾರತ ಮತ್ತು ಪಾಕಿಸ್ತಾನ (IND vs PAK) ವಿಶ್ವಕಪ್ ಮುಖಾಮುಖಿಗೆ ಅಕ್ಟೋಬರ್ 14ಕ್ಕಗಾಗಿ ಎಲ್ಲರೂ ಕಾಯುತ್ತಿದ್ದಾರೆ. ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ (Narendra Modi Stadium in Ahmedabad) ವಿಶ್ವಕಪ್‌ನ (ICC World Cup 2023) ಈ ಅಮೋಘ ಪಂದ್ಯ ನಡೆಯಲಿದೆ. ಎಂದಿನಂತೆ ಈ ಪಂದ್ಯಕ್ಕೆ ಕುತೂಹಲ ಕೆರಳಿಸಿದ್ದು, ಅದರಲ್ಲೂ ವಿಶ್ವದ ಅತಿ ದೊಡ್ಡ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯುತ್ತಿರುವುದರಿಂದ ಅಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುವುದು ಖಚಿತವಾಗಿದೆ. ಈ ಪಂದ್ಯಕ್ಕೆ ಅಭಿಮಾನಿಗಳು ಮಾತ್ರವಲ್ಲದೆ ಅನೇಕ ಪ್ರಸಿದ್ಧ ವ್ಯಕ್ತಿಗಳು ಸಹ ಕ್ರೀಡಾಂಗಣದಲ್ಲಿ ಉಪಸ್ಥಿತರಿರುತ್ತಾರೆ. ಹೀಗಾಗಿ ಕ್ರಿಕೆಟ್​ ಲೋಕದ ಈ ಮಹಾ ಸಂಭ್ರಮವನ್ನು ಕಣ್ತುಂಬಿಕೊಳ್ಳಲು ಅಹಮದಾಬಾದ್​ಗೆ ತೆರಳುತ್ತಿರುವ ಕ್ರಿಕೆಟ್ ಅಭಿಮಾನಿಗಳು ಕೊಂಚ ಈ ಸುದ್ದಿಯತ್ತ ಕಣ್ಣಾಯಿಸುವುದು ಅವಶ್ಯಕವಾಗಿದೆ.

ಎಲ್ಲವೂ ದುಬಾರಿ

ಕ್ರಿಕೆಟ್ ಲೋಕದಲ್ಲಿ ಭಾರತ- ಪಾಕಿಸ್ತಾನ ಪಂದ್ಯವೆಂದರೆ ಅದಕ್ಕಿರುವ ಮಹತ್ವವೇ ಬೇರೆ. ಅದರಲ್ಲೂ ವಿಶ್ವದ ಅತಿ ದೊಡ್ಡ ಕ್ರೀಡಾಂಗಣದಲ್ಲಿ ಈ ಪಂದ್ಯ ನಡೆಯುತ್ತಿರುವುದು ಅಭಿಮಾನಿಗಳಿಗೆ ಹಬ್ಬವೇ ಸರಿ. ಹೀಗಾಗಿ ಈ ಪಂದ್ಯದ ಬಿಸಿ ಈಗಾಗಲೇ ಆರಂಭವಾಗಿ ತಿಂಗಳುಗಳೇ ಕಳೆದಿದೆ. ಇದರ ತೀವ್ರತೆಯನ್ನು ಅರಿತ ಕ್ರಿಕೆಟ್​ ಅಭಿಮಾನಿಗಳು ಈಗಾಗಲೇ ಟಿಕೆಟ್ ಖರೀದಿ ಇಂದ ಹಿಡಿದು, ಅಹಮದಾಬಾದ್​ನಲ್ಲಿ ಹೋಟೆಲ್ ಬುಕ್ ಮಾಡುವುದರವರೆಗೆ ಎಲ್ಲಾ ಕೆಲಸಗಳನ್ನು ಪೂರ್ಣಗೊಳಿಸಿಕೊಂಡಿದ್ದಾರೆ.

2 ಸಾವಿರಕ್ಕೆ ಖರೀದಿಸಿ 22 ಸಾವಿರಕ್ಕೆ ಮಾರಾಟ..! ಗಗನಕ್ಕೇರಿದ ಭಾರತ- ಪಾಕ್ ಪಂದ್ಯದ ಟಿಕೆಟ್ ಬೆಲೆ

10 ಪಟ್ಟು ಹೆಚ್ಚಾಗಿದೆ

ಆದರೆ ಇತ್ತೀಚೆಗೆ ಈ ಪಂದ್ಯದ ಟಿಕೆಟ್ ಪಡೆದು ಅಹಮದಾಬಾದ್​ಗೆ ತೆರಳುತ್ತಿರುವ ಅಭಿಮಾನಿಗಳು ತಮ್ಮ ಪರ್ಸ್​ ಭಾರವನ್ನು ಕೊಂಚ ಹೆಚ್ಚೆ ಹೆಚ್ಚಿಸಿಕೊಳ್ಳಬೇಕಾಗಿದೆ. ಅದಕ್ಕೆ ಕಾರಣವೂ ಇದ್ದು, ಅಹಮದಾಬಾದ್​ಗೆ ವಿಮಾನ ಹತ್ತುವುದರಿಂದ ಹಿಡಿದು, ಭಾರತ- ಪಾಕ್ ಪಂದ್ಯದ ಟಿಕೆಟ್, ಹೋಟೆಲ್​ ರೂಮ್​ಗಳ ಬೆಲೆ 10 ಪಟ್ಟು ಹೆಚ್ಚಾಗಿದೆ. ಹೀಗಾಗಿ ಈ ಹೈವೋಲ್ಟೇಜ್ ಕದನವನ್ನು ಕ್ರೀಡಾಂಗಣದಲ್ಲಿ ನೋಡಲಿಚ್ಚಿಸುವ ಅಭಿಮಾನಿಗಳು ತಮ್ಮ ಜೇಬಿನಲ್ಲಿ ಲಕ್ಷಕ್ಕೂ ಅಧಿಕ ಹಣವನ್ನು ಇಟ್ಟುಕೊಳ್ಳುವುದು ಸೂಕ್ತ.

10,000 ರೂ. ಗೆ ಏರಿಕೆಯಾಗಿದೆ

ಅಕ್ಟೋಬರ್ 14 ರಂದು ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲ್ಲಿರುವ ಈ ಪಂದ್ಯವನ್ನು ನೋಡಲಿಚ್ಚಿಸುವವರು, ಹೋಟೆಲ್​ನಲ್ಲಿ ತಂಗುವುದಕ್ಕಾಗಿಯೇ ಎರಡು ರಾತ್ರಿಗಳಿಗೆ 43,000 ರೂಗಳಿಗೂ ಅಧಿಕ ಹಣವನ್ನು ವ್ಯಯಿಸಬೇಕಾಗಿದೆ. ಹಾಗೆಯೇ ಈ ಹಿಂದೆ ದೆಹಲಿಯಿಂದ ಅಹಮದಾಬಾದ್​ಗೆ ತೆರಳಲು ವಿಮಾನ ದರ 3 ಸಾವಿರ ರೂ ಇತ್ತು. ಆದರೀಗ ಅದರ ಬೆಲೆ 10,000 ರೂ. ಗೆ ಏರಿಕೆಯಾಗಿದೆ. ಇನ್ನು ಭಾರತ- ಪಾಕ್ ಪಂದ್ಯದ ಟಿಕೆಟ್​ಗಳನ್ನು ಕಾಳಸಂತೆಯಲ್ಲಿ ಖರೀದಿಸುವವರು ಟಿಕೆಟ್​ನ ಮೂಲ ಬೆಲೆಗಿಂತ 10 ಪಟ್ಟು ಅಧಿಕ ಹಣವನ್ನು ವ್ಯಯಿಸಬೇಕಾಗಿದೆ.

ಐಫೋನ್ 15 ಗಿಂತ ದುಬಾರಿ

ವರದಿಯಾಗಿರುವಂತೆ, ಪಂದ್ಯದ ದಿನದಂದು ಅಹಮದಾಬಾದ್​ಗೆ ಹೋಗಲು ಯೋಜಿಸುತ್ತಿರುವವರು ಮೇಕ್‌ಮೈಟ್ರಿಪ್‌ನಲ್ಲಿ ದೆಹಲಿಯಿಂದ ಅಹಮದಾಬಾದ್‌ಗೆ ವಿಮಾನ ದರ 10,000 ರಿಂದ 12,000 ರೂ. ವ್ಯಯಿಸಬೇಕಾಗಿದೆ. ಅಲ್ಲದೆ ಅಹಮದಾಬಾದ್‌ನಲ್ಲಿ ತ್ರಿ ಸ್ಟಾರ್ ಹೋಟೆಲ್​ನಲ್ಲಿ ಎರಡು ರಾತ್ರಿ ತಂಗಲು 40,000‘ ಕ್ಕೂ ಅಧಿಕ ಹಣ ವ್ಯಯಿಸಬೇಕಿದೆ. ಹಾಗೆಯೇ ಸಾಮಾನ್ಯ ಹೋಟೆಲ್​ಗಳಲ್ಲಿ ಅಕ್ಟೋಬರ್ 13 ರಿಂದ ಅಕ್ಟೋಬರ್ 15 ರವರೆಗೆ ಪ್ರತಿ ರಾತ್ರಿಗೆ 6,000 ರಿಂದ 24,000 ರೂ. ಚಾರ್ಚ್​ ಮಾಡಲಾಗುತ್ತಿದೆ.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 9:13 am, Fri, 13 October 23