ವೈಭವ್ ಸೂರ್ಯವಂಶಿಗೆ ಇಂಗ್ಲೆಂಡ್ನಲ್ಲಿ ಪ್ರತ್ಯೇಕ ಡ್ರೆಸಿಂಗ್ ರೂಂ! ಕಾರಣವೇನು ಗೊತ್ತಾ?
Vaibhav Sooryavanshi: ಭಾರತದ ಅತಿ ಕಿರಿಯ ಕ್ರಿಕೆಟಿಗ ವೈಭವ್ ಸೂರ್ಯವಂಶಿ 15ನೇ ವಯಸ್ಸಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡುತ್ತಿದ್ದಾರೆ. ಐರ್ಲೆಂಡ್ ಹಾಗೂ ಇಂಗ್ಲೆಂಡ್ ಪ್ರವಾಸಕ್ಕೆ ಆಯ್ಕೆಯಾಗಿರುವ ವೈಭವ್ ಇಂಗ್ಲೆಂಡ್ನಲ್ಲಿ ಐಸಿಸಿ ಮತ್ತು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿಯ ಮಕ್ಕಳ ಸುರಕ್ಷತಾ ನೀತಿಗಳ ಅಡಿಯಲ್ಲಿ ಪ್ರತ್ಯೇಕ ಡ್ರೆಸ್ಸಿಂಗ್ ರೂಂ ಬಳಸಬೇಕಾಗುತ್ತದೆ. 16 ವರ್ಷದೊಳಗಿನ ಆಟಗಾರರು ವಯಸ್ಕರೊಂದಿಗೆ ಡ್ರೆಸ್ಸಿಂಗ್ ಕೋಣೆಯನ್ನು ಹಂಚಿಕೊಳ್ಳುವಂತಿಲ್ಲ ಎಂಬುದು ಇದಕ್ಕೆ ಕಾರಣ.
ಭಾರತ ಹಾಗೂ ಐರ್ಲೆಂಡ್ ನಡುವೆ ಎರಡು ಪಂದ್ಯಗಳ ಟಿ20 ಸರಣಿ ಜೂನ್ 26 ರಿಂದ ಆರಂಭವಾಗಲಿದೆ. ಈ ಸರಣಿಗಾಗಿ ಟೀಂ ಇಂಡಿಯಾ ಈಗಾಗಲೇ ಐರ್ಲೆಂಡ್ ತಲುಪಿದೆ. ಈ ಸರಣಿ ಮುಗಿದ ಕೂಡಲೇ ಟೀಂ ಇಂಡಿಯಾ, ಇಂಗ್ಲೆಂಡ್ಗೆ (India vs England) ಹಾರಲಿದೆ. ಅಲ್ಲಿ ಉಭಯ ತಂಡಗಳ ನಡುವೆ ಐದು ಪಂದ್ಯಗಳ ಟಿ20 ಸರಣಿ ನಡೆಯಲಿದೆ. ಈ ಎರಡೂ ಪ್ರವಾಸಗಳಿಗೂ ಟೀಂ ಇಂಡಿಯಾದಲ್ಲಿ ವೈಭವ್ ಸೂರ್ಯವಂಶಿ (Vaibhav Sooryavanshi) ಆಯ್ಕೆಯಾಗಿದ್ದಾರೆ. ಕೇವಲ 15ನೇ ವಯಸ್ಸಿಗೆ ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡುವ ಮೂಲಕ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಕ್ರಿಕೆಟಿಗನೆಂಬ ದಾಖಲೆ ವೈಭವ್ ಪಾಲಾಗಲಿದೆ. ಐರ್ಲೆಂಡ್ ಪ್ರವಾಸದಲ್ಲಿ ವೈಭವ್ಗೆ ಆಡುವ ಅವಕಾಶ ಸಿಗದಿದ್ದರೂ, ಇಂಗ್ಲೆಂಡ್ನಲ್ಲಿ ವೈಭವ್ ಆಡುವುದು ಖಚಿತ. ಈ ನಡುವೆ ಹೊರಬಿದ್ದಿರುವ ಮಾಹಿತಿ ಪ್ರಕಾರ, ಇಂಗ್ಲೆಂಡ್ನಲ್ಲಿ ವೈಭವ್ ಪ್ರತ್ಯೇಕ ಡ್ರೆಸ್ಸಿಂಗ್ ರೂಂ ಬಳಸಬೇಕಾಗುತ್ತದೆ.
ವೈಭವ್ಗೆ ಪ್ರತ್ಯೇಕ ಡ್ರೆಸಿಂಗ್ ರೂಂ
ವಾಸ್ತವವಾಗಿ ತಂಡದ ಎಲ್ಲಾ ಆಟಗಾರರು ಒಂದೇ ಡ್ರೆಸ್ಸಿಂಗ್ ರೂಮ್ ಬಳಸುವುದು ವಾಡಿಕೆ. ಆದರೆ ಇಂಗ್ಲೆಂಡ್ನಲ್ಲಿ ಮಾತ್ರ ವೈಭವ್ಗೆ ಈ ನಿಯಮ ಅನ್ವಯವಾಗುವುದಿಲ್ಲ. ಹೀಗಾಗಿ ವೈಭವ್ ಆಂಗ್ಲರ ನಾಡಿನಲ್ಲಿ ನಡೆಯುವ ಎಲ್ಲಾ 5 ಪಂದ್ಯಗಳಲ್ಲೂ ತಮ್ಮ ಬಟ್ಟೆ ಬದಲಿಸಲು ಪ್ರತ್ಯೇಕ ಡ್ರೆಸ್ಸಿಂಗ್ ರೂಮ್ ಬಳಸಬೇಕಾಗುತ್ತದೆ. ಇದಕ್ಕೆ ಕಾರಣ ಐಸಿಸಿ ಮತ್ತು ಇಂಗ್ಲೆಂಡ್ ಕ್ರಿಕೆಟ್ನಲ್ಲಿನ ನಿಯಮ. ಅಷ್ಟಕ್ಕೂ ವೈಭವ್ ಯಾವ ಕಾರಣಕ್ಕೆ ಪ್ರತ್ಯೇಕ ಡ್ರೆಸ್ಸಿಂಗ್ ಕೊಠಡಿ ಬಳಸಬೇಕು? ಭಾರತದಲ್ಲಿ ಅಥವಾ ಇತರೆ ದೇಶಗಳಲ್ಲಿ ವೈಭವ್ಗೆ ಯಾಕೆ ಈ ನಿಯಮ ಅನ್ವಯವಾಗಲಿಲ್ಲ ಎಂಬುದನ್ನು ನೋಡುವುದಾದರೆ..
- ಐಸಿಸಿ ಮತ್ತು ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ ಸುರಕ್ಷತೆ ಮತ್ತು ಮಕ್ಕಳ ರಕ್ಷಣಾ ನೀತಿಗಳ ಅಡಿಯಲ್ಲಿ, 16 ವರ್ಷದೊಳಗಿನ ಆಟಗಾರರು ವಯಸ್ಕರೊಂದಿಗೆ ಡ್ರೆಸ್ಸಿಂಗ್ ಕೋಣೆಯನ್ನು ಹಂಚಿಕೊಳ್ಳುವಂತಿಲ್ಲ.
- ಈ ನಿಯಮದನ್ವಯ 15 ವರ್ಷದವರಾಗಿರುವ ವೈಭವ್ ಇಂಗ್ಲೆಂಡ್ನ ಎಲ್ಲಾ ಐದು ಸ್ಥಳಗಳಲ್ಲಿ ಪಂದ್ಯಗಳ ಮೊದಲು ಮತ್ತು ನಂತರ ಬಟ್ಟೆ ಬದಲಾಯಿಸಲು ಅಥವಾ ಸಿದ್ಧರಾಗಲು ಪ್ರತ್ಯೇಕವಾದ ಬಟ್ಟೆ ಬದಲಾಯಿಸುವ ಕೋಣೆಯನ್ನು ಬಳಸಲಿದ್ದಾರೆ.
- ಈ ನಿಯಮದಿಂದಾಗಿ ವೈಭವ್ ಅವರ ಆಟದ ಮೇಲಾಗಲಿ ಅಥವಾ ತಂಡದ ಮೀಟಿಂಗ್ನ ಮೇಲಾಗಲಿ ಯಾವುದೇ ಪರಿಣಾಮ ಬೀರುವುದಿಲ್ಲ. ಏಕೆಂದರೆ ಪಂದ್ಯಗಳ ಸಮಯದಲ್ಲಿ ಮತ್ತು ತಂಡದ ಮಾತುಕತೆಯ ವೇಳೆ ವೈಭವ್ ತಂಡದೊಂದಿಗೆ ಇರಬಹುದಾಗಿದೆ.
IND A vs SL A: ವೈಭವ್ ಸಿಡಿಲಬ್ಬರ.. ತ್ರಿಕೋನ ಸರಣಿ ಗೆದ್ದ ಟೀಂ ಇಂಡಿಯಾ
ಈ ನಿಯಮವನ್ನು ಏಕೆ ಜಾರಿಗೆ ತರಲಾಗಿದೆ?
- ಇಂಗ್ಲೆಂಡ್ನ ಕ್ರೀಡಾ ವ್ಯವಸ್ಥೆಯಲ್ಲಿ ಇದು ಮಕ್ಕಳ ಸುರಕ್ಷತೆಗಾಗಿ ಸಾಮಾನ್ಯ ಆಡಳಿತಾತ್ಮಕ ನಿಯಮವಾಗಿದೆ. ಇದಕ್ಕೂ ಮೊದಲು, ಇಂಗ್ಲಿಷ್ ಫುಟ್ಬಾಲ್ನಲ್ಲಿ, ಆರ್ಸೆನಲ್ ಆಟಗಾರ ಮ್ಯಾಕ್ಸ್ ಡೌಮನ್ಗೆ 16 ವರ್ಷ ತುಂಬುವವರೆಗೆ ಪ್ರತ್ಯೇಕ ಬಟ್ಟೆ ಬದಲಾಯಿಸುವ ಕೋಣೆಯನ್ನು ನೀಡಲಾಗಿತ್ತು. ಅದರಂತೆ ಇದೀಗ ವೈಭವ್ಗೆ ಪ್ರತ್ಯೇಕ ಕೊಠಡಿ ನೀಡಲಾಗುತ್ತದೆ.
- ಹಾಗೆಯೇ ಇಡೀ ಇಂಗ್ಲೆಂಡ್ ಪ್ರವಾಸದಲ್ಲಿ ವೈಭವ್ ಅವರ ಪೋಷಕರು ಕೂಡ ವೈಭವ್ ಅವರೊಂದಿಗೆ ಇರಲಿದ್ದಾರೆ. ಅಲ್ಲದೆ ತಂಡ ತಂಗುವ ಹೋಟೆಲ್ನಲ್ಲಿಯೇ ವೈಭವ್ ಪೋಷಕರು ವಾಸ್ತವ್ಯ ಹೂಡಲಿದ್ದು, ವೈಭವ್ ಅವರೊಂದಿಗೆ ಅವರ ಹೆತ್ತವರು ಕೂಡ ಒಂದೇ ಕೋಣೆಯಲ್ಲಿ ಇರುವ ಸಾಧ್ಯತೆಯೂ ಇದೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:17 pm, Wed, 24 June 26