KCL 2025: 37 ಬೌಂಡರಿ, 30 ಸಿಕ್ಸರ್, ಬರೋಬ್ಬರಿ 465 ರನ್..! ಸ್ಯಾಮ್ಸನ್ ತಂಡಕ್ಕೆ ಹೀನಾಯ ಸೋಲು
Kerala Cricket League: ಕ್ಯಾಲಿಕಟ್ ಗ್ಲೋಬ್ಸ್ಟಾರ್ಸ್ ಮತ್ತು ಕೊಚ್ಚಿ ಬ್ಲೂ ಟೈಗರ್ಸ್ ನಡುವಿನ ಕೇರಳ ಕ್ರಿಕೆಟ್ ಲೀಗ್ (ಕೆಸಿಎಲ್) 2025ರ 13ನೇ ಪಂದ್ಯದಲ್ಲಿ ರನ್ಗಳ ಮಳೆಯಾಯಿತು. ಮೊದಲು ಬ್ಯಾಟ್ ಮಾಡಿದ ಗ್ಲೋಬ್ಸ್ಟಾರ್ಸ್ 249 ರನ್ ಗಳಿಸಿತು. ರೋಹನ್ ಕುನ್ನುಮಲ್ ಅವರ 94 ರನ್ಗಳ ಇನ್ನಿಂಗ್ಸ್ ಗಮನಾರ್ಹವಾಗಿತ್ತು. ಕೊಚ್ಚಿ ತಂಡ 216 ರನ್ಗಳಿಗೆ ಆಲೌಟ್ ಆಗಿ 33 ರನ್ಗಳಿಂದ ಸೋಲೊಪ್ಪಿಕೊಂಡಿತು.
ಕೇರಳ ಕ್ರಿಕೆಟ್ ಲೀಗ್ (KCL 2025) 2025 ರ 13 ನೇ ಪಂದ್ಯದಲ್ಲಿ, ಕ್ಯಾಲಿಕಟ್ ಗ್ಲೋಬ್ಸ್ಟಾರ್ಸ್ ಮತ್ತು ಕೊಚ್ಚಿ ಬ್ಲೂ ಟೈಗರ್ಸ್ (Calicut Globstars vs Kochi Blue Tigers) ಮುಖಾಮುಖಿಯಾಗಿದ್ದವು. ತಿರುವನಂತಪುರದ ಗ್ರೀನ್ಫೀಲ್ಡ್ ಅಂತರರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯದಲ್ಲಿ ಬೌಂಡರಿ, ಸಿಕ್ಸರ್ಗಳ ಮಳೆ ಸುರಿಯಿತು. ಇದರಿಂದಾಗಿ ರನ್ಗಳ ಮಳೆಯೂ ಹರಿಯಿತು. ಆದಾಗ್ಯೂ ಬೆಟ್ಟದಂತಹ ಗುರಿ ಬೆನ್ನಟ್ಟಿದ ಸಂಜು ಸ್ಯಾಮ್ಸನ್ (Sanju Samson) ತಂಡ ಕೊಚ್ಚಿ ಬ್ಲೂ ಟೈಗರ್ಸ್ ಕೊನೆಗೂ ಹೀನಾಯ ಸೋಲನ್ನು ಎದುರಿಸಬೇಕಾಯಿತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಕ್ಯಾಲಿಕಟ್ ಗ್ಲೋಬ್ಸ್ಟಾರ್ಸ್ ತಂಡ 249 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಕೊಚ್ಚಿ ಬ್ಲೂ ಟೈಗರ್ಸ್ 216 ರನ್ ಕಲೆಹಾಕಲಷ್ಟೇ ಶಕ್ತವಾಗಿ 33 ರನ್ಗಳಿಂದ ಸೋಲೊಪ್ಪಿಕೊಂಡಿತು.
ಕೇರಳ ಕ್ರಿಕೆಟ್ ಲೀಗ್ನಲ್ಲಿ ರನ್ ಮಳೆ
ಈ ಪಂದ್ಯದಲ್ಲಿ, ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಗ್ಲೋಬ್ಸ್ಟಾರ್ಸ್ ತಂಡವು 20 ಓವರ್ಗಳಲ್ಲಿ 249 ರನ್ಗಳ ಬೃಹತ್ ಸ್ಕೋರ್ ದಾಖಲಿಸಿತು. ತಂಡದ ಪರ ಆರಂಭಿಕರಾದ ಸುರೇಶ್ ಸಚಿನ್ ಮತ್ತು ರೋಹನ್ ಕುನ್ನುಮಲ್ ಶತಕದ ಜೊತೆಯಾಟ ನಡೆಸಿದರು. ಈ ವೇಳೆ ಸುರೇಶ್ ಸಚಿನ್ 28 ರನ್ ಗಳಿಸಿದರೆ, ನಾಯಕ ರೋಹನ್ ಕುನ್ನುಮಲ್ ಕೇವಲ 43 ಎಸೆತಗಳಲ್ಲಿ 94 ರನ್ಗಳ ಸ್ಫೋಟಕ ಇನ್ನಿಂಗ್ಸ್ ಆಡಿದರು. ಈ ಸಮಯದಲ್ಲಿ, ರೋಹನ್ ಕುನ್ನುಮಲ್ 6 ಬೌಂಡರಿ ಮತ್ತು 8 ಸಿಕ್ಸರ್ಗಳನ್ನು ಬಾರಿಸಿದರು. ಇವರ ಬಳಿಕ ಬಂದ ಮರುತುಂಗಲ್ ಅಜಿನ್ನಾಸ್ 49 ರನ್ ಮತ್ತು ಅಖಿಲ್ ಸ್ಕೇರಿಯಾ 45 ರನ್ಗಳ ಕಾಣಿಕೆ ನೀಡಿದರು.
ಮತ್ತೊಂದೆಡೆ, ಅಫ್ರಾದ್ ನಜರ್ ಹೊರತುಪಡಿಸಿ, ಕೊಚ್ಚಿ ಬ್ಲೂ ಟೈಗರ್ಸ್ನ ಎಲ್ಲಾ ಬೌಲರ್ಗಳು 10 ಅಥವಾ ಅದಕ್ಕಿಂತ ಹೆಚ್ಚಿನ ಎಕಾನಮಿ ದರದಲ್ಲಿ ರನ್ಗಳನ್ನು ಬಿಟ್ಟುಕೊಟ್ಟರು. ನಾಯಕ ಸ್ಯಾಲಿ ಸ್ಯಾಮ್ಸನ್ 2 ಓವರ್ಗಳಲ್ಲಿ 20 ರನ್ಗಳನ್ನು ಬಿಟ್ಟುಕೊಟ್ಟು, ಒಂದೇ ಒಂದು ವಿಕೆಟ್ ಪಡೆಯಲಿಲ್ಲ. ಉಳಿದಂತೆ ಅಖಿಲ್ ಕೆ.ಜಿ., ಅಜೀಶ್ ಕೆ., ಅಫ್ರಾದ್ ನಜರ್ ಮತ್ತು ಮುಹಮ್ಮದ್ ಆಶಿಕ್ ತಲಾ 1 ವಿಕೆಟ್ ಪಡೆದರು.
Sanju Samson: ಏಷ್ಯಾಕಪ್ಗಾಗಿ ಬ್ಯಾಟಿಂಗ್ ಕ್ರಮಾಂಕ ಬದಲಿಸಿದ ಸಂಜು ಸ್ಯಾಮ್ಸನ್
ಕೊಚ್ಚಿ ಬ್ಲೂ ಟೈಗರ್ಸ್ ಹೋರಾಟ
ಇದಕ್ಕೆ ಉತ್ತರವಾಗಿ, ಸಂಜು ಸ್ಯಾಮ್ಸನ್ ಇಲ್ಲದೆಯೇ ಕಣಕ್ಕಿಳಿದಿದ್ದ ಕೊಚ್ಚಿ ತಂಡ ಕೂಡ ಉತ್ತಮ ಆರಂಭವನ್ನು ಪಡೆಯಿತು. ಆದರೆ ಯಾವುದೇ ಬ್ಯಾಟ್ಸ್ಮನ್ಗೂ ದೀರ್ಘ ಇನ್ನಿಂಗ್ಸ್ ಆಡಲು ಸಾಧ್ಯವಾಗಲಿಲ್ಲ. ತಂಡದ ಪರ ಮುಹಮ್ಮದ್ ಶಾನು ಅತಿ ಹೆಚ್ಚು ಅಂದರೆ 53 ರನ್ ಗಳಿಸಿದರೆ, ವಿನೂಪ್ ಮನೋಹರನ್ 36 ರನ್ಗಳ ಕಾಣಿಕೆ ನೀಡಿದರು. ಇವರ ಜೊತೆಗೆ ರಾಕೇಶ್ ಕೆಜೆ 38 ರನ್, ಮುಹಮ್ಮದ್ ಆಶಿಕ್ 38 ರನ್ ಬಾರಿಸಿದರು. ಆದರೆ ಉಳಿದ ಬ್ಯಾಟ್ಸ್ಮನ್ಗಳಿಗೆ ವಿಶೇಷವಾದದ್ದನ್ನು ಮಾಡಲು ಸಾಧ್ಯವಾಗಲಿಲ್ಲ, ಇದರಿಂದಾಗಿ ಕೊಚ್ಚಿ ಬ್ಲೂ ಟೈಗರ್ಸ್ ತಂಡವು 19 ಓವರ್ಗಳಲ್ಲಿ 216 ರನ್ಗಳಿಗೆ ಆಲೌಟ್ ಆಯಿತು. ಅಂದರೆ, ಈ ಪಂದ್ಯದಲ್ಲಿ, ಎರಡೂ ತಂಡಗಳು ಒಟ್ಟಾಗಿ 37 ಬೌಂಡರಿಗಳು ಮತ್ತು 30 ಸಿಕ್ಸರ್ಗಳನ್ನು ಒಳಗೊಂಡಂತೆ ಒಟ್ಟು 465 ರನ್ ಗಳಿಸಿದವು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 9:35 pm, Wed, 27 August 25