SMAT T20: ಪಂಜಾಬ್ ಸ್ಪಿನ್ನರ್ ಮೋಡಿ: ಕೇವಲ 40 ರನ್​ಗೆ ಆಲೌಟ್

Syed Mushtaq Ali Trophy 2022:  ಸೈಯದ್ ಮುಷ್ತಾಕ್ ಅಲಿ ಟೂರ್ನಿಯ ಗ್ರೂಪ್-ಬಿ ಪಂದ್ಯದಲ್ಲಿ ಪಂಜಾಬ್ ತಂಡವು ಭರ್ಜರಿ ಜಯ ಸಾಧಿಸಿದೆ. ಜೈಪುರದ ಸವಾಯಿ ಮಾನ್​ಸಿಂಗ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಪಂಜಾಬ್ ಹಾಗೂ ಮಣಿಪುರ ತಂಡಗಳು ಮುಖಾಮುಖಿಯಾಗಿತ್ತು. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಮಣಿಪುರ ತಂಡವು ಮೊದಲು ಬ್ಯಾಟಿಂಗ್ ಮಾಡಿತು. ಆದರೆ ಪಂಜಾಬ್ ಬೌಲರ್​ಗಳ ಪರಾಕ್ರಮದ ಮುಂದೆ ಮಣಿಪುರ ಬ್ಯಾಟರ್​ಗಳು ರನ್​ಗಳಿಸುವುದಿರಲಿ, ಕ್ರೀಸ್​ ಕಚ್ಚಿ ನಿಲ್ಲಲು ಕೂಡ ಪರದಾಡಿದರು. ಮೊದಲ ಓವರ್​ನ 4ನೇ ಎಸೆತದಲ್ಲೇ ನಿತೇಶ್​ರನ್ನು ಶೂನ್ಯಕ್ಕೆ ಔಟ್ ಮಾಡುವ ಮೂಲಕ ಅಭಿಷೇಕ್ ಶರ್ಮಾ ಪಂಜಾಬ್​ಗೆ ಮೊದಲ ಯಶಸ್ಸು ತಂದುಕೊಟ್ಟರು. ಇದರ ಬೆನ್ನಲ್ಲೇ ಅಹ್ಮದ್ ಶಾ (0) ಸಿದ್ಧಾರ್ಥ್ ಕೌಲ್ ಎಸೆತದಲ್ಲಿ ವಿಕೆಟ್ ಒಪ್ಪಿಸಿದರು. ಇನ್ನು ಯುಮ್ನಂ (2) ಬಲ್ತೇಜ್ ಎಸೆತದಲ್ಲಿ ಕ್ಯಾಚ್ ನೀಡಿ ನಿರ್ಗಮಿಸಿದರು.

ಈ ಹಂತದಲ್ಲಿ ದಾಳಿಗಿಳಿದ ಸ್ಪಿನ್ನರ್ ಮಯಾಂಕ್ ಮಾರ್ಕಂಡೆ ಬ್ಯಾಕ್ ಟು ಬ್ಯಾಕ್ ವಿಕೆಟ್ ಉರುಳಿಸಿ ಯಶಸ್ಸು ತಂದುಕೊಟ್ಟರು. ಪರಿಣಾಮ ಮಣಿಪುರದ ಐವರು ಬ್ಯಾಟರ್​ಗಳು ಶೂನ್ಯಕ್ಕೆ ಔಟಾಗಿದ್ದರು. ಇದರ ನಡುವೆ ರೆಕ್ಸ್ ಸಿಂಗ್ 23 ಎಸೆತಗಳಲ್ಲಿ 4 ಫೋರ್​ನೊಂದಿಗೆ 25 ರನ್​ ಬಾರಿಸಿದ್ದು ಮಣಿಪುರ ಪರ ಗರಿಷ್ಠ ಸ್ಕೋರ್​. ಅಂತಿಮವಾಗಿ ಮಣಿಪುರ ತಂಡವು 14.1 ಓವರ್​ಗಳಲ್ಲಿ 40 ರನ್​ಗಳಿಗೆ ಸರ್ವಪತನ ಕಂಡಿತು.

ಪಂಜಾಬ್ ಪರ 3.1 ಓವರ್​ ಎಸೆದ ಮಯಾಂಕ್ ಮಾರ್ಕಂಡೆ ಕೇವಲ 4 ರನ್ ನೀಡಿ 4 ಪ್ರಮುಖ ವಿಕೆಟ್ ಕಬಳಿಸಿದರು. ಇನ್ನು ರಮಣ್​ದೀಪ್ ಸಿಂಗ್ 2 ವಿಕೆಟ್ ಪಡೆದು ಮಿಂಚಿದರು.

ಕೇವಲ 41 ರನ್​ಗಳ ಟಾರ್ಗೆಟ್ ಪಡೆದ ಪಂಜಾಬ್ ತಂಡಕ್ಕೆ ಅಭಿಷೇಕ್ ಶರ್ಮಾ (28) ಸ್ಪೋಟಕ ಆರಂಭ ಒದಗಿಸಿದ್ದರು. ಅದರಂತೆ 5.3 ಓವರ್​ಗಳಲ್ಲಿ ಒಂದು ವಿಕೆಟ್ ನಷ್ಟಕ್ಕೆ 43 ರನ್ ಬಾರಿಸುವ ಮೂಲಕ 9 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿದೆ.

ಮಣಿಪುರ ಪ್ಲೇಯಿಂಗ್ 11: ನಿತೇಶ್ ಸೆಡೈ , ಕರ್ಣಜಿತ್ ಯುಮ್ನಂ , ಅಹ್ಮದ್ ಶಾ , ಲ್ಯಾಂಗ್ಲೋನ್ಯಾಂಬಾ ಕೇಶಾಂಗ್ಬಮ್ (ನಾಯಕ) , ಕಂಗಬಮ್ ಪ್ರಿಯೋಜಿತ್ ಸಿಂಗ್ , ರೆಕ್ಸ್ ಸಿಂಗ್ , ಜಾನ್ಸನ್ ಸಿಂಗ್ , ಕಿಶನ್ ಸಿಂಘಾ , ಸುಲ್ತಾನ್ ಕರೀಮ್ , ಚಿಂಗಖಮ್ ಬಿದಾಶ್ , ಬಿಕಾಶ್ ಸಿಂಗ್ , ಬಿಶ್ವೋರ್ಜತ್

ಪಂಜಾಬ್ ಪ್ಲೇಯಿಂಗ್ 11: ಶುಭಮನ್ ಗಿಲ್ , ಅಭಿಷೇಕ್ ಶರ್ಮಾ , ಪ್ರಭ್​ಸಿಮ್ರಾನ್ ಸಿಂಗ್ , ರಮಣದೀಪ್ ಸಿಂಗ್ , ಅನ್ಮೋಲ್ಪ್ರೀತ್ ಸಿಂಗ್ , ಮನ್ದೀಪ್ ಸಿಂಗ್ (ನಾಯಕ) , ಸನ್ವಿರ್ ಸಿಂಗ್ , ಹರ್ಪ್ರೀತ್ ಬ್ರಾರ್ , ಸಿದ್ದಾರ್ಥ್ ಕೌಲ್ , ಮಯಾಂಕ್ ಮಾರ್ಕಂಡೆ , ಬಲ್ತೇಜ್ ಸಿಂಗ್.