ಪಿಎಸ್ಎಲ್‌ ‘ಸಿಕ್ಸಸ್’ ಟೂರ್ನಿ: ಪಾಕಿಸ್ತಾನ್ ಮಾಸ್ಟರ್ ಪ್ಲ್ಯಾನ್!

ಪಾಕಿಸ್ತಾನ್ ಸೂಪರ್ ಲೀಗ್ ತನ್ನ ಕ್ರಿಕೆಟ್ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸಲು ಭರ್ಜರಿ ಯೋಜನೆಯೊಂದನ್ನು ಸಿದ್ಧಪಡಿಸುತ್ತಿದೆ. ಇದಕ್ಕಾಗಿ ಹಾಂಗ್ ಕಾಂಗ್ ಸಿಕ್ಸಸ್ ಮಾದರಿಯ ಹೊಚ್ಚ ಹೊಸ ಆರು-ಆಟಗಾರರ ಟೂರ್ನಿಯನ್ನು ಪರಿಚಯಿಸಲು ಮುಂದಾಗಿದೆ.

ಏನಿದು ‘ಪಿಎಸ್ಎಲ್ ಸಿಕ್ಸಸ್’ ಪ್ಲ್ಯಾನ್?

ಪಾಕಿಸ್ತಾನ್ ಸೂಪರ್ ಲೀಗ್ ಸಿಕ್ಸಸ್ ಎಂಬುದು ಆರು ಆಟಗಾರರನ್ನು ಒಳಗೊಂಡಿರುವ ಟೂರ್ನಿ. ಈ ಟೂರ್ನಿಯಲ್ಲಿ ಒಂದು ತಂಡದ ಪರ ಆರು ಆಟಗಾರರು ಮಾತ್ರ ಕಣಕ್ಕಿಳಿಯಲಿದ್ದಾರೆ.

ಪ್ರಮುಖ ಪಿಎಸ್ಎಲ್ ಟೂರ್ನಿಗೆ ಯಾವುದೇ ತೊಂದರೆಯಾಗದಂತೆ, ವರ್ಷದ ಮಧ್ಯಭಾಗದ ಬಿಡುವಿನ ಅವಧಿಯಲ್ಲಿ ಈ ಟೂರ್ನಿಯನ್ನು ಆಯೋಜಿಸಲು ಪ್ಲ್ಯಾನ್ ರೂಪಿಸಲಾಗಿದೆ.

ಅಂದರೆ ಪಾಕಿಸ್ತಾನ್ ಸೂಪರ್ ಲೀಗ್ ಮುಗಿದ ಬಳಿಕ, ಕೆಲ ತಿಂಗಳ ನಂತರ ಪಿಎಸ್​ಎಲ್ ಸಿಕ್ಸಸ್ ಟೂರ್ನಿಯನ್ನು ಆಯೋಜಿಸಲು ಪಾಕಿಸ್ತಾನ್ ಕ್ರಿಕೆಟ್ ಮಂಡಳಿ ಯೋಜನೆ ರೂಪಿಸುತ್ತಿದ್ದಾರೆ.

ಇನ್ನು ಈ ಪಂದ್ಯಗಳನ್ನು ಮುಖ್ಯ ಪಿಎಸ್ಎಲ್ ಪಂದ್ಯಗಳನ್ನು ಆಯೋಜಿಸಲು ಸಾಧ್ಯವಾಗದ ಪಾಕಿಸ್ತಾನದ ಸಣ್ಣ ನಗರಗಳ ಕ್ರೀಡಾಂಗಣಗಳಲ್ಲಿ ಈ ಪಂದ್ಯಗಳನ್ನು ನಡೆಸುವುದು ಪಿಸಿಬಿಯ ಮುಖ್ಯ ಉದ್ದೇಶವಾಗಿದೆ. ಇದರಿಂದ ಸಣ್ಣ ನಗರಗಳ ಕ್ರಿಕೆಟ್ ಅಭಿಮಾನಿಗಳಿಗೂ ಸ್ಟೇಡಿಯಂಗೆ ಬಂದು ಪಂದ್ಯ ವೀಕ್ಷಿಸುವ ಅವಕಾಶ ಸಿಗಲಿದೆ.

ಹೇಗಿರಲಿದೆ ಪಿಎಸ್​ಎಲ್ ಸಿಕ್ಸಸ್?

ಪಾಕಿಸ್ತಾನ್ ಸೂಪರ್ ಲೀಗ್ ಸಿಕ್ಸಸ್ ಟೂರ್ನಿಯು ಜಾಗತಿಕವಾಗಿ ಪ್ರಸಿದ್ಧಿ ಪಡೆದಿರುವ ಹಾಂಗ್ ಕಾಂಗ್ ಸಿಕ್ಸಸ್ ಮಾದರಿಯಲ್ಲೇ ಆಯೋಜನೆಯಾಗುವ ಸಾಧ್ಯತೆಯಿದೆ. ಅದರಂತೆ, ಈ ನೂತನ ಟೂರ್ನಿಯು ಹೊಂದಿರಬಹುದಾದ ಪ್ರಮುಖ ನಿಯಮಗಳ ವಿವರ ಇಲ್ಲಿದೆ…

ಕೇವಲ 6 ಆಟಗಾರರು: ಪ್ರತಿ ತಂಡದಲ್ಲಿ ಸಾಂಪ್ರದಾಯಿಕ 11 ಆಟಗಾರರ ಬದಲಿಗೆ ಕೇವಲ ಆರು ಜನ ಆಟಗಾರರು ಮಾತ್ರ ಕಣಕ್ಕಿಳಿಯುತ್ತಾರೆ.

6 ಓವರ್‌ಗಳ ಪಂದ್ಯ: ಪ್ರತಿ ಇನಿಂಗ್ಸ್‌ನಲ್ಲಿ ಕೇವಲ 6 ಓವರ್‌ಗಳು (36 ಎಸೆತಗಳು) ಮಾತ್ರ ಇರುತ್ತವೆ.

ಬೌಲಿಂಗ್ ಕಡ್ಡಾಯ: ವಿಕೆಟ್ ಕೀಪರ್ ಹೊರತುಪಡಿಸಿ, ಫೀಲ್ಡಿಂಗ್ ಮಾಡುವ ತಂಡದ ಉಳಿದ ಐದೂ ಆಟಗಾರರು ತಲಾ 1 ಓವರ್ ಬೌಲಿಂಗ್ ಮಾಡುವುದು ಕಡ್ಡಾಯವಾಗಿದೆ. ಹಾಗೆಯೇ ಒಬ್ಬನಿಗೆ ಮಾತ್ರ 2 ಓವರ್​ಗಳನ್ನು ಎಸೆಯಲು ಅವಕಾಶ ನೀಡಲಾಗಿದೆ.

ಡಬಲ್ ರನ್: ಪಂದ್ಯದಲ್ಲಿ ರನ್ ವೇಗ ಹೆಚ್ಚಿಸಲು, ಪ್ರತಿ ವೈಡ್ ಅಥವಾ ನೋ-ಬಾಲ್‌ಗೆ ಎದುರಾಳಿ ತಂಡಕ್ಕೆ 2 ರನ್‌ಗಳನ್ನು ನೀಡಲಾಗುತ್ತದೆ ಹಾಗೂ ಹೆಚ್ಚುವರಿ ಎಸೆತವನ್ನು ಹಾಕಬೇಕಾಗುತ್ತದೆ.

ಕಡ್ಡಾಯ ನಿವೃತ್ತಿ: ಒಬ್ಬ ಬ್ಯಾಟ್ಸ್‌ಮನ್ ವೈಯಕ್ತಿಕವಾಗಿ 31 ರನ್ ಗಳಿಸಿದ ತಕ್ಷಣ ಅಜೇಯರಾಗಿಯೇ ಮೈದಾನದಿಂದ ಹೊರನಡೆಯಬೇಕು. ತಂಡದ ಉಳಿದ ಎಲ್ಲಾ ಬ್ಯಾಟ್ಸ್‌ಮನ್‌ಗಳು ಔಟ್ ಆದ ನಂತರವೇ ಈ ನಿವೃತ್ತ ಬ್ಯಾಟ್ಸ್‌ಮನ್ ಮತ್ತೆ ಬ್ಯಾಟಿಂಗ್ ಮಾಡಲು ಮರಳಿ ಬರಬಹುದು.

‘ಸಿಂಗಲ್’ ಬ್ಯಾಟಿಂಗ್: ತಂಡದ 5 ವಿಕೆಟ್‌ಗಳು ಉರುಳಿದರೂ ಇನಿಂಗ್ಸ್ ಮುಗಿಯುವುದಿಲ್ಲ! 6ನೇ ಆಟಗಾರ ಒಬ್ಬನೇ ಬ್ಯಾಟಿಂಗ್ ಮುಂದುವರಿಸಬಹುದು. ಆ ಸಮಯದಲ್ಲಿ ಕೊನೆಯದಾಗಿ ಔಟಾದ 5ನೇ ಬ್ಯಾಟ್ಸ್‌ಮನ್ ಕೇವಲ ರನ್ನರ್ ಆಗಿ ಕ್ರೀಸ್‌ನಲ್ಲಿ ನಿಲ್ಲಬೇಕಾಗುತ್ತದೆ.

ವೇಗದ ಆಟ: ಇಡೀ ಪಂದ್ಯವು ಕೇವಲ 45 ರಿಂದ 60 ನಿಮಿಷಗಳಲ್ಲಿ ಮುಗಿದುಹೋಗುವುದರಿಂದ ಬ್ಯಾಟರ್‌ಗಳು ಮೊದಲ ಎಸೆತದಿಂದಲೇ ಸಿಕ್ಸರ್-ಬೌಂಡರಿಗಳ ಸುರಿಮಳೆಗೈಯಬೇಕಾಗುತ್ತದೆ.

ಫ್ರಾಂಚೈಸಿ ಮಾದರಿ: ಹಾಂಗ್ ಕಾಂಗ್ ಸಿಕ್ಸಸ್‌ ಟೂರ್ನಿಯಲ್ಲಿ ದೇಶಗಳು ಭಾಗವಹಿಸಿದರೆ, ಪಿಎಸ್​ಎಲ್ ಸಿಕ್ಸಸ್‌ನಲ್ಲಿ ಪಾಕಿಸ್ತಾನ್ ಸೂಪರ್ ಲೀಗ್​ನ ಫ್ರಾಂಚೈಸಿ ತಂಡಗಳೇ ಭಾಗವಹಿಸಲಿವೆ.

ಇದನ್ನೂ ಓದಿ: ಮೂವರ ನಡುವೆ ಪೈಪೋಟಿ: ಯಾರಿಗೆ ಸಿಗಲಿದೆ ಚಾನ್ಸ್​?

ಒಟ್ಟಾರೆಯಾಗಿ ಹೇಳುವುದಾದರೆ, ‘ಪಿಎಸ್​ಎಲ್ ಸಿಕ್ಸಸ್’ ಕೇವಲ ಕ್ರಿಕೆಟ್‌ನ ಮತ್ತೊಂದು ಆವೃತ್ತಿಯಲ್ಲ, ಬದಲಿಗೆ ಪಾಕಿಸ್ತಾನ್ ಕ್ರಿಕೆಟ್‌ನಲ್ಲಿ ಹೊಸ ಕ್ರಾಂತಿ ಸೃಷ್ಟಿಸಬಲ್ಲ ಕಲ್ಪನೆ. ಟಿ20 ಪಂದ್ಯಗಳಿಗಿಂತಲೂ ವೇಗವಾಗಿ, ಬೌಂಡರಿ-ಸಿಕ್ಸರ್‌ಗಳ ಅಬ್ಬರದೊಂದಿಗೆ ಅಭಿಮಾನಿಗಳನ್ನು ರಂಜಿಸಲು ಈ ಶಾರ್ಟ್-ಫಾರ್ಮ್ಯಾಟ್ ಟೂರ್ನಿ ರೆಡಿಯಾಗುತ್ತಿದೆ. ಸಣ್ಣ ನಗರಗಳ ಜನರಿಗೂ ಮೈದಾನದಲ್ಲೇ ಕ್ರಿಕೆಟ್ ಹಬ್ಬವನ್ನು ತಲುಪಿಸುವ ಮತ್ತು ಫ್ರಾಂಚೈಸಿಗಳಿಗೆ ಹೊಸ ಆದಾಯ ತಂದುಕೊಡುವ ಪಿಸಿಬಿಯ ಈ ಮಾಸ್ಟರ್ ಪ್ಲ್ಯಾನ್ ಎಷ್ಟು ಯಶಸ್ವಿಯಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

Published On - 10:34 am, Sat, 24 October 26