10 ವಿಕೆಟ್ ಉರುಳಿಸಿ 10 ಸಾವಿರ ರೂ. ಪಡೆದ ಶೊಯೆಬ್ ಖಾನ್
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 10 ವಿಕೆಟ್ ಪಡೆದ ಮೊದಲ ಬೌಲರ್ ಜಿಮ್ ಲೇಕರ್. 1951 ರಲ್ಲಿ ಬರೆದ ಈ ವಿಶ್ವ ದಾಖಲೆಯನ್ನು 1999 ರಲ್ಲಿ ಅನಿಲ್ ಕುಂಬ್ಳೆ ಸರಿಗಟ್ಟಿದ್ದರು. ಇದಾದ ಬಳಿಕ ನ್ಯೂಝಿಲೆಂಡ್ನ ಸ್ಪಿನ್ನರ್ ಏಜಾಝ್ ಪಟೇಲ್ ಈ ದಾಖಲೆಯನ್ನು ಪುನರಾವರ್ತಿಸಿದ್ದರು. ಇದೀಗ ದೇಶೀಯ ಅಂಗಳದಲ್ಲಿ ಶೊಯೆಬ್ ಖಾನ್ 10 ವಿಕೆಟ್ ಕಬಳಿಸಿ ಮಿಂಚಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 10 ವಿಕೆಟ್ ಪಡೆದಿರುವುದು ಕೇವಲ ಮೂವರು ಬೌಲರ್ಗಳು ಮಾತ್ರ. ಇದಾಗ್ಯೂ ದೇಶೀಯ ಅಂಗಳದಲ್ಲಿ ಕೆಲವರು ಎರಡಂಕಿ ವಿಕೆಟ್ ಉರುಳಿಸಿ ಗಮನ ಸೆಳೆದಿದ್ದಾರೆ. ಈ ಪಟ್ಟಿಗೆ ಹೊಸ ಸೇರ್ಪಡೆ ಶೊಯೆಬ್ ಖಾನ್. ಮುಂಬೈ ಮೂಲದ ಕ್ರಿಕೆಟಿಗ ಶೊಯೆಬ್ ಇದೀಗ 10 ವಿಕೆಟ್ಗಳನ್ನು ಕಬಳಿಸಿ ಸುದ್ದಿಯಲ್ಲಿದ್ದಾರೆ.
ಮುಂಬೈ ಕ್ರಿಕೆಟ್ ಅಸೋಸಿಯೇಷನ್ ಆಯೋಜಿಸುವ ಕಂಗ ಕ್ರಿಕೆಟ್ ಲೀಗ್ನಲ್ಲಿ ಶೊಯೆಬ್ ಖಾನ್ 10 ವಿಕೆಟ್ಗಳನ್ನು ಉರುಳಿಸಿದ್ದಾರೆ. ಗೌರ್-ಸರಸ್ವತ್ ಕ್ರಿಕೆಟ್ ಕ್ಲಬ್ ಮತ್ತು ಜಾಲಿ ಕ್ರಿಕೆಟರ್ಸ್ ನಡುವಿನ ಇ ವಿಭಾಗದ ಪಂದ್ಯದಲ್ಲಿ ಶೊಯೆಬ್ ಈ ಅದ್ಭುತ ಸಾಧನೆ ಮಾಡಿದರು.
ಈ ಪಂದ್ಯದಲ್ಲಿ ಗೌರ್-ಸರಸ್ವತ್ ಕ್ರಿಕೆಟ್ ಕ್ಲಬ್ ಪರ ಕಣಕ್ಕಿಳಿದ ಎಡಗೈ ಸ್ಪಿನ್ನರ್ ಶೊಯೆಬ್, ಜಾಲಿ ಕ್ರಿಕೆಟರ್ಸ್ ಬ್ಯಾಟರ್ಗಳನ್ನು ಬ್ಯಾಕ್ ಟು ಬ್ಯಾಕ್ ಪೆವಿಲಿಯನ್ಗೆ ಕಳುಹಿಸಿದರು. ಅಲ್ಲದೆ 17.4 ಓವರ್ ಬೌಲಿಂಗ್ ಮಾಡಿ ತಲಾ 10 ವಿಕೆಟ್ ಪಡೆದು ಇತಿಹಾಸ ನಿರ್ಮಿಸಿದರು. ಶೊಯೆಬ್ ಖಾನ್ ಅವರ ಈ ಸ್ಪಿನ್ ಮೋಡಿಯಿಂದಾಗಿ ಜಾಲಿ ಕ್ರಿಕೆಟರ್ಸ್ ತಂಡವು ಮೊದಲ ಇನಿಂಗ್ಸ್ನಲ್ಲಿ ಕೇವಲ 67 ರನ್ಗಳಿಗೆ ಆಲೌಟ್ ಆಯಿತು.
10 ಸಾವಿರ ರೂ. ಬಹುಮಾನ:
ಈ ಪಂದ್ಯದಲ್ಲಿ ಶೊಯೆಬ್ ಖಾನ್ 10 ವಿಕೆಟ್ ಉರುಳಿಸುತ್ತಿದ್ದಂತೆ ಗೌರ್-ಸರಸ್ವತ್ ಕ್ರಿಕೆಟ್ ಕ್ಲಬ್ ತಂಡದ ಮಾಲೀಕರಾದ ರವಿ ಮಾಂಡ್ರೇಕರ್ ಅವರು 10 ಸಾವಿರ ರೂ. ಬಹುಮಾನ ಮೊತ್ತವನ್ನು ನೀಡಿದರು. ಈ ಮೂಲಕ ಯುವ ಸ್ಪಿನ್ನರ್ ಸಾಧನೆಯನ್ನು ಪ್ರೋತ್ಸಾಹಿಸಿದ್ದು ವಿಶೇಷವಾಗಿತ್ತು.
ಇದನ್ನೂ ಓದಿ: ಟಿ20 ಕ್ರಿಕೆಟ್ನಲ್ಲಿ ಹೊಸ ಚರಿತ್ರೆ: ಪೂರನ್ ಪವರ್ಗೆ ಹಳೆಯ ದಾಖಲೆ ಉಡೀಸ್
ಅಂದಹಾಗೆ ಕಂಗ ಕ್ರಿಕೆಟ್ ಲೀಗ್ನಲ್ಲಿ ಸಚಿನ್ ತೆಂಡೂಲ್ಕರ್ ಕೂಡ ಆಡಿದ ಇತಿಹಾಸವಿದೆ. ಹೀಗಾಗಿ ಇದೀಗ 10 ವಿಕೆಟ್ಗಳೊಂದಿಗೆ ಗಮನ ಸೆಳೆದಿರುವ ಶೊಯೆಬ್ ಖಾನ್ ಮುಂದೊಂದು ದಿನ ರಣಜಿ ಅಥವಾ ಭಾರತದ ಪರ ಕಣಕ್ಕಿಳಿದರೂ ಅಚ್ಚರಿಪಡಬೇಕಿಲ್ಲ.
ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 10 ವಿಕೆಟ್ ಪಡೆದ ಬೌಲರ್ಗಳು:
| ಒಂದು ಇನ್ನಿಂಗ್ಸ್‌ನಲ್ಲಿ 10 ವಿಕೆಟ್ಗಳನ್ನು ಪಡೆದ ಬೌಲರ್ಗಳು | ವರ್ಷ |
| ಜಿಮ್ ಲೇಕರ್ (ಇಂಗ್ಲೆಂಡ್) | 1956 |
| ಅನಿಲ್ ಕುಂಬ್ಳೆ (ಭಾರತ) | 1999 |
| ಏಜಾಝ್ ಪಟೇಲ್ (ನ್ಯೂಝಿಲೆಂಡ್) | 2021 |
