ಚೇಸಿಂಗ್​ನ ಮಾಸ್ಟರ್ ಪ್ಲ್ಯಾನ್ ಬಿಚ್ಚಿಟ್ಟ ಶುಭ್​ಮನ್ ಗಿಲ್

ವೆಸ್ಟ್ ಇಂಡೀಸ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲೂ ಟೀಮ್ ಇಂಡಿಯಾ ಭರ್ಜರಿ ಜಯ ಸಾಧಿಸಿದೆ. ಈ ಬಾರಿ ಗೆಲುವು ದಾಖಲಿಸಿರುವುದು ಬರೋಬ್ಬರಿ 405 ರನ್​ಗಳ ಗುರಿ ಬೆನ್ನಟ್ಟುವ ಮೂಲಕ ಎಂಬುದು ವಿಶೇಷ. ಗುವಾಹಟಿಯ ಬರ್ಸಪಾರ ಸ್ಟೇಡಿಯಂನಲ್ಲಿ ನಡೆದ ಈ ಮ್ಯಾಚ್​ನಲ್ಲಿ ಮೊದಲು ಬ್ಯಾಟ್ ಮಾಡಿದ ವೆಸ್ಟ್ ಇಂಡೀಸ್ 50 ಓವರ್​ಗಳಲ್ಲಿ 405 ರನ್​ ಕಲೆಹಾಕಿತು. ಈ ಗುರಿ ಬೆನ್ನತ್ತಿದ ಟೀಮ್ ಇಂಡಿಯಾ ಪರ ಶುಭ್​ಮನ್ ಗಿಲ್ (223) ಭರ್ಜರಿ ದ್ವಿಶತಕ ಸಿಡಿಸಿ ಮಿಂಚಿದರು. ಈ ಡಬಲ್ ಸೆಂಚುರಿ ನೆರವಿನೊಂದಿಗೆ ಭಾರತ ತಂಡವು 43.3 ಓವರ್​ಗಳಲ್ಲಿ 406 ರನ್ ಬಾರಿಸಿ 8 ವಿಕೆಟ್​ಗಳ ಅಮೋಘ ಗೆಲುವು ದಾಖಲಿಸಿತು.

ಈ ಗೆಲುವಿನ ಬಳಿಕ ಮಾತನಾಡಿದ ಟೀಮ್ ಇಂಡಿಯಾ ನಾಯಕ ಶುಭ್​ಮನ್ ಗಿಲ್, ವಿಶ್ವ ದಾಖಲೆಯ ವಿಜಯಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ. ಹಾಗೆಯೇ ಮೈದಾನದಲ್ಲಿನ ರಣರಂತ್ರಗಳ ಹೇಗಿತ್ತು ಎಂಬುದನ್ನು ಬಹಿರಂಗಪಡಿಸಿದ್ದಾರೆ.

ಕೆಂಡದಂತಹ ಬಿಸಿಲು ಮತ್ತು ತೀವ್ರ ದೈಹಿಕ ಬಳಲಿಕೆ:

ಮೈದಾನದಲ್ಲಿ ಯಾವುದೇ ಆಯಾಸವಿಲ್ಲದೆ ಬ್ಯಾಟಿಂಗ್ ಮಾಡಿದಂತೆ ಕಂಡರೂ, ಪಂದ್ಯದ ಬಳಿಕ ಮಾತನಾಡಿದ ಶುಭ್‌ಮನ್ ಗಿಲ್ ತಮ್ಮ ದೈಹಿಕ ಸ್ಥಿತಿಯನ್ನು ಹಂಚಿಕೊಂಡಿದ್ದಾರೆ. “ಪ್ರಸ್ತುತ ನನ್ನ ದೇಹದ ಪ್ರತಿಯೊಂದು ಭಾಗವೂ ಸೆಳೆತದಿಂದ ಬಳಲುತ್ತಿದೆ. ಮಧ್ಯಾಹ್ನದ ಬಿಸಿಲು ಅತಿಯಾಗಿತ್ತು. ವೆಸ್ಟ್ ಇಂಡೀಸ್ ಬ್ಯಾಟಿಂಗ್ ಮಾಡುತ್ತಿದ್ದ ಶೈಲಿಯನ್ನು ನೋಡಿದರೆ, ಕೇವಲ 13 ಓವರ್‌ಗಳಲ್ಲೇ ನಾವು 20-25 ಓವರ್‌ಗಳಷ್ಟು ಫೀಲ್ಡಿಂಗ್ ಮಾಡಿದ ಅನುಭವವಾಗಿತ್ತು,” ಎಂದು ಗಿಲ್ ಹೇಳಿದ್ದಾರೆ.

ಚೇಸಿಂಗ್​ಗೆ  ಮಾಸ್ಟರ್ ಪ್ಲ್ಯಾನ್:

400ಕ್ಕೂ ಅಧಿಕ ರನ್‌ಗಳ ಬೆನ್ನಟ್ಟುವಿಕೆ ಎಂದಿಗೂ ಸುಲಭವಲ್ಲ ಎಂದು ಒಪ್ಪಿಕೊಂಡ ಗಿಲ್, ಈ ಇಡೀ ಚೇಸಿಂಗ್ ಅನ್ನು ಸಣ್ಣ ಸಣ್ಣ ಗುರಿಗಳಾಗಿ ವಿಂಗಡಿಸಿದ್ದರು:

ಪವರ್‌ಪ್ಲೇ ಲೆಕ್ಕಾಚಾರ: ಮೊದಲ 10 ಓವರ್‌ಗಳಲ್ಲಿ ವಿಕೆಟ್ ಕಳೆದುಕೊಳ್ಳದೆ 75-80 ರನ್ ಗಳಿಸುವುದು ಭಾರತದ ಯೋಜನೆಯಾಗಿತ್ತು. ಆದರೆ ಗಿಲ್ ಮತ್ತು ರೋಹಿತ್ ಶರ್ಮಾ ಆರಂಭದಿಂದಲೇ ಅಬ್ಬರಿಸಿ, ಮೊದಲ ವಿಕೆಟ್‌ಗೆ ಬರೋಬ್ಬರಿ 255 ರನ್‌ಗಳ ದಾಖಲೆಯ ಜೊತೆಯಾಟವಾಡಿದರು.

ಮೈದಾನದ ಪರಿಸ್ಥಿತಿಯ ಬಳಕೆ: ಮೈದಾನದ ಒಂದು ಬದಿಯ ಬೌಂಡರಿ ಲೈನ್ ತುಂಬಾ ಚಿಕ್ಕದಾಗಿತ್ತು. ವೇಗದ ಬೌಲರ್‌ಗಳು ಬಂದಾಗಲೆಲ್ಲಾ ಆ ಚಿಕ್ಕ ಬೌಂಡರಿಯನ್ನೇ ಟಾರ್ಗೆಟ್ ಮಾಡಲು ಗಿಲ್ ನಿರ್ಧಲರಿಸಿದ್ದರು.

ಒತ್ತಡ ನಿವಾರಣೆ: 25 ಓವರ್‌ಗಳ ಮುಕ್ತಾಯಕ್ಕೆ ಭಾರತ 200-210 ರನ್ ಗಳಿಸುವ ಗುರಿ ಇಟ್ಟುಕೊಂಡಿತ್ತು. ಆದರೆ ರನ್ ವೇಗ ಎಷ್ಟಿತ್ತೆಂದರೆ ಭಾರತ 230-240 ರನ್ ಗಳಿಸಿತ್ತು. ಇದರಿಂದಾಗಿ ಒತ್ತಡ ಸಂಪೂರ್ಣವಾಗಿ ವೆಸ್ಟ್ ಇಂಡೀಸ್ ಬೌಲರ್‌ಗಳ ಮೇಲೆ ಬಿದ್ದಿತು.

ಈ ಲೆಕ್ಕಾಚಾರದೊಂದಿಗೆ ಚೇಸಿಂಗ್ ಮಾಡಿರುವುದರಿಂದ ನಾವು 43.3 ಓವರ್​ಗಳಲ್ಲಿ 406 ರನ್​ಗಳಿಸಲು ಸಾಧ್ಯವಾಯಿತು ಎಂದು ಶುಭ್​ಮನ್ ಗಿಲ್ ಹೇಳಿದ್ದಾರೆ.

ಬದಲಾವಣೆಯ ಮುನ್ಸೂಚನೆ:

ಸರಣಿ ಈಗಾಗಲೇ ಭಾರತದ ಕೈವಶವಾಗಿರುವುದರಿಂದ, ಕೊನೆಯ ಏಕದಿನ ಪಂದ್ಯದಲ್ಲಿ ಇದುವರೆಗೆ ಅವಕಾಶ ಸಿಗದ ಬೆಂಚ್ ಕಾಯುತ್ತಿರುವ ಆಟಗಾರರಿಗೆ ಅವಕಾಶ ನೀಡಲು ನಾಯಕ ಶುಭ್‌ಮನ್ ಗಿಲ್ ಬಯಸಿದ್ದಾರೆ. ಅದರಂತೆ ಮೂರನೇ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ಪ್ಲೇಯಿಂಗ್ ಇಲೆವೆನ್​ನಲ್ಲಿ ಮಹತ್ವದ ಬದಲಾವಣೆ ಕಂಡು ಬರುವುದನ್ನು ಎದುರು ನೋಡಬಹುದು.

ಇದನ್ನೂ ಓದಿ: ಒಂದಲ್ಲ, ಎರಡಲ್ಲ… ಬರೋಬ್ಬರಿ 7 ಭರ್ಜರಿ ದಾಖಲೆ ಬರೆದ ಶುಭ್​ಮನ್ ಗಿಲ್

ಒಟ್ಟಾರೆಯಾಗಿ ಹೇಳುವುದಾದರೆ, ಗುವಾಹಟಿಯಲ್ಲಿ ನಡೆದ ಈ ಪಂದ್ಯವು ಕೇವಲ ಒಂದು ಗೆಲುವಲ್ಲ; ಇದು ಭಾರತೀಯ ಕ್ರಿಕೆಟ್‌ನ ಮುಂದಿನ ಪೀಳಿಗೆಯ ನಾಯಕತ್ವ ಮತ್ತು ಬ್ಯಾಟಿಂಗ್ ಬಲಕ್ಕೆ ಹಿಡಿದ ಕೈಗನ್ನಡಿ. ನಾಯಕನ ಜವಾಬ್ದಾರಿಯನ್ನು ಹೊತ್ತು, ಅತಿಯಾದ ಬಿಸಿಲು ಮತ್ತು ದೈಹಿಕ ಸೆಳೆತದ ನಡುವೆಯೂ ಶುಭ್‌ಮನ್ ಗಿಲ್ ಆಡಿದ ಅಜೇಯ 223 ರನ್‌ಗಳ ಇನಿಂಗ್ಸ್ ಕ್ರಿಕೆಟ್ ಪ್ರೇಮಿಗಳ ಮನಸ್ಸಿನಲ್ಲಿ ಸದಾ ಕಾಲ ಹಸಿರಾಗಿರಲಿದೆ.

Published On - 9:53 am, Thu, 1 October 26