Video: ವಿರಾಟ್ ಕೊಹ್ಲಿಯಿಂದ ಬೌಲಿಂಗ್ ಮಾಡಿಸಿದ ಕ್ಯಾಪ್ಟನ್ ರೋಹಿತ್ ಶರ್ಮಾ

T20 World Cup 2021:  ದುಬೈನಲ್ಲಿ ನಡೆದ ಭಾರತ ಮತ್ತು ಆಸ್ಟ್ರೇಲಿಯಾ (India vs Australia) ನಡುವಣ ಟಿ20 ವಿಶ್ವಕಪ್ (T20 World Cup 2021) ಅಭ್ಯಾಸ ಪಂದ್ಯದಲ್ಲಿ ಟೀಮ್ ಇಂಡಿಯಾವನ್ನು ರೋಹಿತ್ ಶರ್ಮಾ (Rohit Sharma) ಮುನ್ನಡೆಸಿದ್ದರು. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆಸ್ಟ್ರೇಲಿಯಾ ಬ್ಯಾಟಿಂಗ್ ಆಯ್ದುಕೊಂಡರು. ಇತ್ತ ಐದು ಬೌಲರುಗಳೊಂದಿಗೆ ಕಣಕ್ಕಿಳಿಯುವ ನಿರ್ಧಾರ ಮಾಡಿದ್ದ ಹಿಟ್​ಮ್ಯಾನ್​ಗೆ 6ನೇ ಬೌಲರ್ ಯಾರು ಎಂಬ ಪ್ರಶ್ನೆಯೊಂದನ್ನು ಕಮೆಂಟೇಟರ್ ಕೇಳಿದ್ದರು. ಈ ವೇಳೆ ವಿರಾಟ್ ಕೊಹ್ಲಿ (Virat Kohli) ಹಾಗೂ ಸೂರ್ಯಕುಮಾರ್ ಯಾದವ್ ಅವರನ್ನು ಬಳಸಿಕೊಳ್ಳುವ ಆಯ್ಕೆಯಿದೆ ಎಂದು ರೋಹಿತ್ ಶರ್ಮಾ ನಗುತ್ತಾ ಉತ್ತರಿಸಿದ್ದರು.

ಆದರೆ ಪಂದ್ಯದ 7ನೇ ಓವರ್​ ವೇಳೆ ರೋಹಿತ್ ಶರ್ಮಾ ಚೆಂಡನ್ನು ವಿರಾಟ್ ಕೊಹ್ಲಿ ಕೈಗಿಡುವ ಮೂಲಕ ಅಚ್ಚರಿ ಮೂಡಿಸಿದರು. ಮೊದಲ ಹೇಳಿದಂತೆ ಹಿಟ್​ಮ್ಯಾನ್ ಕೊಹ್ಲಿಯನ್ನು ಹೆಚ್ಚುವರಿ ಬೌಲರ್ ಆಗಿ ಬಳಸಿಕೊಂಡರು. ಅದು ಕೂಡ ಗ್ಲೆನ್ ಮ್ಯಾಕ್ಸ್​ವೆಲ್ ಹಾಗೂ ಸ್ಟೀವ್ ಸ್ಮಿತ್ ಬ್ಯಾಟಿಂಗ್ ಮಾಡುತ್ತಿದ್ದ ವೇಳೆ ಎಂಬುದು ವಿಶೇಷ.

7ನೇ ಓವರ್​ ಬೌಲಿಂಗ್ ಮಾಡಿದ ಕೊಹ್ಲಿ ಕೇವಲ 4 ರನ್​ ಮಾತ್ರ ಬಿಟ್ಟು ಕೊಟ್ಟರು. ಇದಾದ ಬಳಿಕ ಮತ್ತೊಮ್ಮೆ ರೋಹಿತ್ ಶರ್ಮಾ ಬೌಲಿಂಗ್​ಗಾಗಿ ಕೊಹ್ಲಿಯನ್ನು ಕರೆ ತಂದರು. ಅದರಂತೆ 13ನೇ ಓವರ್​ ಬೌಲಿಂಗ್ ಮಾಡಿದ ಕೊಹ್ಲಿ ಕೇವಲ 8 ರನ್​ ನೀಡಿ ಬ್ಯಾಟರುಗಳನ್ನು ನಿಯಂತ್ರಿಸಿದರು. ಅದರಂತೆ 2 ಓವರ್​ನಲ್ಲಿ ಕೊಹ್ಲಿ ಕೇವಲ 12 ರನ್​ ನೀಡಿ ಬೌಲಿಂಗ್​ನಲ್ಲೂ ಮಿಂಚಿದರು. ಕೊಹ್ಲಿಯ ಈ ಬೌಲಿಂಗ್ ಪ್ರದರ್ಶನದ ವಿಡಿಯೋ ಇದೀಗ ಸಿಕ್ಕಾಪಟ್ಟೆ ವೈರಲ್ ಆಗಿದೆ. ಮುಂದಿನ ದಿನಗಳಲ್ಲಿ ರೋಹಿತ್ ಶರ್ಮಾ ನಾಯಕತ್ವದಲ್ಲಿ ಕೊಹ್ಲಿ ಆಲ್​ರೌಂಡರ್ ಆಗಿ ಮಾರ್ಪಡಲಿದ್ದಾರೆ ಎಂದು ನೆಟ್ಟಿಗರು ಕಿಚಾಯಿಸಿದ್ದಾರೆ.

After watching Kohli’s Bowling Its a Wow Feeling??.#ViratKohli #INDvsAUS pic.twitter.com/e5pG6dmpeg

— Aniket Kumar (@AniketK44558812) October 20, 2021

ಅಂದಹಾಗೆ ವಿರಾಟ್ ಕೊಹ್ಲಿ ಈ ಹಿಂದೆ ಅಂತರಾಷ್ಟ್ರೀಯ ಕ್ರಿಕೆಟ್ ನಲ್ಲಿ ಬೌಲಿಂಗ್ ಮಾಡಿದ್ದಾರೆ. ಮಧ್ಯಮ ವೇಗದ ಬೌಲರ್ ಆಗಿ ಏಕದಿನ ಮತ್ತು ಟಿ20 ಪಂದ್ಯಗಳಲ್ಲಿ ತಲಾ 4 ವಿಕೆಟ್ ಪಡೆದಿದ್ದಾರೆ. ಒಟ್ಟಾರೆ ಟಿ20 ಕ್ರಿಕೆಟ್​ನಲ್ಲಿ 8 ವಿಕೆಟ್ ಪಡೆದಿದ್ದಾರೆ. ಹಾಗೆಯೇ ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲೂ ಕೊಹ್ಲಿ ಬೌಲಿಂಗ್ ಮಾಡಿದ್ದು, ಈ ವೇಳೆ 7 ವಿಕೆಟ್ ಪಡೆದಿದ್ದಾರೆ.

ಇದನ್ನೂ ಓದಿ: T20 World Cup 2021: ಟಿ20 ಕ್ರಿಕೆಟ್​ನಲ್ಲಿ ನಂಬರ್ 1 ಬ್ಯಾಟರ್ ಯಾರು ಗೊತ್ತಾ​?

ಇದನ್ನೂ ಓದಿ:T20 World Cup 2021: ಟಿ20 ವಿಶ್ವಕಪ್ ಗೆದ್ದವರಿಗೆ ಸಿಗೋ ಹಣವೆಷ್ಟು? ಸೋತರೆ ಸಿಗೋದೆಷ್ಟು? 

ಇದನ್ನೂ ಓದಿ: T20 World Cup Winners: ಟಿ20 ವಿಶ್ವಕಪ್​ನಲ್ಲಿ ಯಾರು ವಿನ್ನರ್, ಯಾರು ರನ್ನರ್: ಇಲ್ಲಿದೆ ಸಂಪೂರ್ಣ ಪಟ್ಟಿ

(Watch: Virat Kohli bowls medium pace against Australia in warm-up match)

Published On - 6:33 pm, Wed, 20 October 21