India vs England Test Series: 2ನೇ ಟೆಸ್ಟ್ನಲ್ಲಿ ನದೀಮ್ ಬದಲು ಅಕ್ಸರ್ ಪಟೇಲ್ ಆಟ
ನದೀಮ್ ಮತ್ತು ವಾಷಿಂಗ್ಟನ್ ಸುಂದರ್ ಇಂಗ್ಲೆಂಡ್ ಬ್ಯಾಟ್ಸ್ಮನ್ಗಳ ಮೇಲೆ ಒತ್ತಡ ಹೇರುವಲ್ಲಿ ವಿಫಲರಾದರು ಅಂತ ಬಹಿರಂಗವಾಗೇ ಕೊಹ್ಲಿ ಅಸಾಮಾಧಾನ ಹೊರಹಾಕಿದ್ದರು.
Updated on:Feb 10, 2021 | 10:08 PM
ಚೆನೈಯಲ್ಲಿ ಅನಿರೀಕ್ಷಿತ 227 ರನ್ಗಳ ಸೋಲನ್ನು ಅನುಭವಿಸಿದ ಭಾರತ ತಂಡಕ್ಕೆ ಅದೇ ಮೈದಾನದ ಬೇರೆ ಪಿಚ್ನಲ್ಲಿ ನಡೆಯಲಿರುವ ಎರಡನೇ ಟೆಸ್ಟ್ ಪಂದ್ಯಕ್ಕೆ ಮೊಣಕಾಲು ಗಾಯದಿಂದ ಚೇತರಿಸಿಕೊಂಡಿರುವ ಎಡಗೈ ಸ್ಪಿನ್ನರ್ ಅಕ್ಸರ್ ಪಟೇಲ್ ಆಡುವ ಎಲೆವೆನ್ ಸೇರಿಕೊಳ್ಳವುದು ಖಚಿತ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ ಮೂಲಗಳು ತಿಳಿಸಿವೆ. ಪಟೇಲ್ ತಂಡದೊಂದಿಗೆ ಅಭ್ಯಾಸವನ್ನೂ ಪ್ರಾರಂಭಿಸಿದ್ದು ಮೊದಲ ಟೆಸ್ಟ್ನಲ್ಲಿ ಆಡಿದ ಮತ್ತೊಬ್ಬ ಎಡಗೈ ಸ್ಪಿನ್ನರ್ ಶಾಹಭಾಜ್ ನದೀಮ್ ಅವರು ಪಟೇಲ್ಗೆ ಸ್ಥಾನ ತೆರವು ಮಾಡಲಿದ್ದಾರೆ.
ಮೊದಲ ಟೆಸ್ಟ್ನಲ್ಲಿ ಆಡಬೇಕಿದ್ದ ಪಟೇಲ್ ಅಭ್ಯಾಸ ಮಾಡುತ್ತಿದ್ದಾಗ ಗಾಯಗೊಂಡಿದ್ದರಿಂದ ಕಡೇ ಗಳಿಗೆಯಲ್ಲಿ ಬದಲೀ ಆಟಗಾರನಾಗಿ ಲಭ್ಯರಿದ್ದ ನದೀಮ್ ಅವರನ್ನು ಟೀಮಿಗೆ ಸೇರಿಸಿಕೊಳ್ಳಲಾಗಿತ್ತು.
‘ಅಕ್ಸರ್ ಮೊಣಕಾಲಿಗೆ ಪೆಟ್ಟಾಗಿತ್ತು, ಅವರೀಗ ಚೇತರಿಸಕೊಂಡಿದ್ದು ನೆಟ್ಸ್ನಲ್ಲಿ ಬ್ಯಾಟಂಗ್ ಅಭ್ಯಾಸ ಶುರುಮಾಡಿದ್ದಾರೆ. ಮುಂದಿನ ಎರಡು ದಿನಗಳಲ್ಲಿ ಅವರು ಬೌಲಿಂಗ್ ಅಭ್ಯಾಸವನ್ನು ಆರಂಭಿಸಲಿದ್ದಾರೆ. ಮೊದಲ ಟೆಸ್ಟ್ಗೆ ಅವರೇ ಪ್ರಥಮ ಆಯ್ಕೆಯಾಗಿದ್ದರು. ಎರಡನೇ ಟೆಸ್ಟ್ಗೆ ಆಡುವ ಇಲೆವೆನ್ ಅನ್ನು ಕೋಚ್ ರವಿ ಶಾಸ್ತ್ರೀ, ನಾಯಕ ವಿರಾಟ್ ಕೊಹ್ಲಿ ಮತ್ತು ಬೌಲಿಂಗ್ ಕೋಚ್ ಭರತ್ ಅರುಣ್ ಅಂತಿಮಗೊಳಿಸಲಿದ್ದಾರೆ’ ಎಂದು ಬಿಸಿಸಿಐ ಮೂಲಗಳು ತಿಳಿಸಿವೆ.
ಶಾಹಭಾಜ್ ನದೀಮ್
ನದೀಮ್ ಬೌಲಿಂಗ್ ಪ್ರದರ್ಶನದ ಬಗ್ಗೆ ಕೊಹ್ಲಿ ಮೊದಲ ಟೆಸ್ಟ್ ಮುಗಿದ ನಂತರ ನಿರಾಶೆ ವ್ಯಕ್ತಪಡಿಸಿದ್ದರು. ನದೀಮ್ ಮತ್ತು ವಾಷಿಂಗ್ಟನ್ ಸುಂದರ್ ಇಂಗ್ಲೆಂಡ್ ಬ್ಯಾಟ್ಸ್ಮನ್ಗಳ ಮೇಲೆ ಒತ್ತಡ ಹೇರುವಲ್ಲಿ ವಿಫಲರಾದರು ಅಂತ ಬಹಿರಂಗವಾಗೇ ಕೊಹ್ಲಿ ಅಸಾಮಾಧಾನ ಹೊರಹಾಕಿದ್ದರು. ಆಂಗ್ಲ ಬ್ಯಾಟ್ಸ್ಮನ್ಗಳ ಮೇಲೆ ಜಸ್ಪ್ರೀತ್ ಬುಮ್ರಾ, ಇಶಾಂತ್ ಶರ್ಮ ಮತ್ತು ರವಿಚಂದ್ರನ್ ಅಶ್ವಿನ್ ಸೃಷ್ಟಿಸಿದ್ದ ಒತ್ತಡವನ್ನು ಕಾಯ್ದುಕೊಳ್ಳಲು ಸುಂದರ್ ಮತ್ತು ನದೀಮ್ ವಿಫಲರಾದರು ಅಂತ ಕೊಹ್ಲಿ ಹೇಳಿದ್ದರು.
ಮೊದಲ ಟೆಸ್ಟ್ನಲ್ಲಿ ನದೀಮ್ ಒಟ್ಟು 4 ವಿಕೆಟ್ ಪಡೆದರಾದರೂ ಅದಕ್ಕಾಗಿ 233 ರನ್ಗಳನ್ನು ಖರ್ಚು ಮಾಡಿದರು. ಅದು ಸಾಲದೆಂಬಂತೆ ಮರು ಪಂದ್ಯದಲ್ಲಿ 9 ಬಾರಿ ಓವರ್ಸ್ಟೆಪ್ ಮಾಡಿ ನೋ ಬಾಲ್ಗಳನ್ನು ಎಸೆದರು. ಟೆಸ್ಟ್ ಕ್ರಿಕೆಟ್ನಲ್ಲಿ ಒಬ್ಬ ಸ್ಪಿನ್ನರ್ ನೋ ಬಾಲ್ ಎಸೆಯುವುದನ್ನು ಅಪರಾಧ ಎಂದು ಉಲ್ಲೇಖಿಸಲಾಗುತ್ತದೆ. ತಮ್ಮಿಂದ ಪ್ರಮಾದವಾಗುತ್ತಿರುವುದನ್ನು ಖುದ್ದು ನದೀಮ್ ಅಂಗೀಕರಿಸಿದ್ದಾರೆ. ಎಸೆತವನ್ನು ಬೌಲ್ ಮಾಡುವ ಮುನ್ನ ತಾನು ಮಾಡುವ ಜಿಗಿತದಲ್ಲಿ ಎಡವಟ್ಟಾಗಿ ಓವರ್ಸ್ಟೆಪ್ ಮಾಡುತ್ತಿರುವುದಾಗಿ ಅವರು ಹೇಳಿದ್ದಾರೆ.
ಸುಂದರ್ ಮೊದಲ ಇನ್ನಿಂಗ್ಸ್ನಲ್ಲಿ 26 ಓವರ್ಗಳನ್ನು ಬೌಲ್ ಮಾಡಿ ಒಂದೂ ವಿಕೆಟ್ ಪಡೆಯದೇ ಹೋದರು. ಅವರ ಮೇಲಿನ ವಿಶ್ವಾಸವನ್ನು ಸಂಪೂರ್ಣವಾಗಿ ಕಳೆದುಕೊಂಡಂತೆ ಗೋಚರಿಸಿದ ಕೊಹ್ಲಿ ಎರಡನೇ ಇನ್ನಿಂಗ್ಸ್ನಲ್ಲಿ ಕೇವಲ 1 ಓವರ್ ಮಾತ್ರ ಬೌಲ್ ಮಾಡಿಸಿದರು. ಆದರೆ, ಬ್ಯಾಟಿಂಗ್ನಲ್ಲಿ ಮಿಂಚಿದ ಸುಂದರ್ ಅಡುವ ಇಲೆವೆನ್ನಲ್ಲಿ ಸ್ಥಾನ ಉಳಿಸಿಕೊಳ್ಳುವ ಸಾಧ್ಯತೆಯಿದೆ.
ಇದನ್ನೂ ಓದಿ: ಭಾರತದ ಸೋಲಿಗೆ ಪಿಚ್ ಕಾರಣ ಎಂದ ವಿರಾಟ್ ಕೊಹ್ಲಿ, ಬೌಲರ್ಗಳಿಂದ ಗೆಲುವು ದಕ್ಕಿತು ಎಂದ ಜೋ ರೂಟ್
ವಾಷಿಂಗ್ಟನ್ ಸುಂದರ್
ಆದರೆ, ಎಡಗೈ ರಿಸ್ಟ್ ಸ್ಪಿನ್ನರ್ ಕುಲ್ದೀಪ್ ಯಾದವ್ ಅವರನ್ನು ಮೊದಲ ಟೆಸ್ಟ್ನಿಂದ ಹೊರಗಿಟ್ಟಿದ್ದಕ್ಕೆ ಸಾಕಷ್ಟು ಚರ್ಚೆಗಳು ನಡೆದರೂ ಚೈನಾಮನ್ಗಳನ್ನು ಬೌಲ್ ಮಾಡುವ ಯಾದವ್ರನ್ನು ಎರಡನೇ ಟೆಸ್ಟ್ನಲ್ಲಿ ಆಡಿಸುವ ಸಾಧ್ಯತೆ ತೀರಾ ಕಮ್ಮಿ.
ಮೊದಲ ಟೆಸ್ಟ್ನಲ್ಲಿ ಯಾವ ಕಾಂಬಿನೇಷನೊಂದಿಗೆ ಕಣಕ್ಕಿಳಿಯಬೇಕುನ್ನುವ ಬಗ್ಗೆ ನಮ್ಮಲ್ಲಿ ಸ್ಪಷ್ಟತೆ ಇತ್ತು. ಮೊದಲ ಟೆಸ್ಟ್ಗೆ ಆಯ್ಕೆ ಮಾಡಿದ ಸದಸ್ಯರ ಬಗ್ಗೆ ನಮಗೆ ಯಾವುದೇ ವಿಷಾದವಿಲ್ಲ. ಮುಂಬರುವ ದಿನಗಳಲ್ಲಿ ನಾವು ಭಿನ್ನ ಕಾಂಬಿನೇಷನ್ಗಳ ಬಗ್ಗೆ ಯೋಚಿಸಲಿದ್ದೇವೆ. ಬಲಗೈ ಬ್ಯಾಟ್ಸ್ಮನ್ಗೆ ಆಫ್ ಸ್ಟಂಪ್ನಿಂದ ಆಚೆ ಹೋಗುವ ಎಸೆತಗಳನ್ನು ಬೌಲ್ ಮಾಡುವ ಬೌಲರ್ಗಳ ಬಗ್ಗೆ ನಾವು ಯೋಚಿಸಿಬೇಕಿದೆ, ಅದು ಖಂಡಿತವಾಗಿಯೂ ಆಕ್ರಮಣವನ್ನು ವೈವಿಧ್ಯಮಯ ಮಾಡಲಿದೆ,’ ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
Published On - 8:35 pm, Wed, 10 February 21
