ಪ್ಯಾಟ್ ಕಮ್ಮಿನ್ಸ್​ರ ವಿಶ್ವದ ಅತ್ಯುತ್ತಮ ಟೆಸ್ಟ್ ಇಲೆವೆನ್​​ನಲ್ಲಿ ವಿಲಿಯಮ್ಸನ್, ಸ್ಮಿತ್ ಜೊತೆ ಕೊಹ್ಲಿಗೆ ಸ್ಥಾನ

ಪ್ರತಿ ದಶಕದಲ್ಲಿ ಕ್ರಿಕೆಟ್​ ಶ್ರೇಷ್ಠ ಆಟಗಾರನ್ನು ಸೃಷ್ಟಿಸುತ್ತದೆ. ಈ ದಶಕದ ಹಲವಾರು ಗ್ರೇಟ್​ ಬ್ಯಾಟ್ಸ್​ಮನ್ ಮತ್ತು ಬೌಲರ್​ಗಳನ್ನು ನಾವೀಗ ನೋಡುತ್ತಿದ್ದೇವೆ. ಲೆಜೆಂಡ್​ಗಳು ಕ್ರಿಕೆಟ್ ಇತಿಹಾಸದಲ್ಲಿ ಶಾಶ್ವತ ಹೆಸರನ್ನು, ಸ್ಥಾನವನ್ನು ಗಳಿಸಿಕೊಂಡುಬಿಡುತ್ತಾರೆ. ನಾವೀಗ ಗಮನಿಸುತ್ತಿರುವ ಮಹಾನ್ ಆಟಗಾರರು ಸಹ ಮುಂದೆ ಇದೇ ಸಾಲಿಗೆ ಸೇರುತ್ತಾರೆ. ಭಾರತದ ನಾಯಕ ವಿರಾಟ್​ ಕೊಹ್ಲಿ ಈಗ ವಿಶ್ವದ ಶ್ರೇಷ್ಠ ಬ್ಯಾಟ್ಸ್​ಮನ್ ಅಥವಾ ಮೂವರು ಶ್ರೇಷ್ಠರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಡುತ್ತಾರೆ. ಹಲವಾರು ಮಾಜಿ ಆಟಗಾರರು, ಕಾಮೆಂಟೇಟರ್​ಗಳು ಕೊಹ್ಲಿಯನ್ನು ಸರ್ವಕಾಲಿಕ ಶ್ರೇಷ್ಠರಲ್ಲಿ ಒಬ್ಬರು ಅಂತ ಹೇಳುತ್ತಾರೆ. ಕೊಹ್ಲಿ ಶ್ರೇಷ್ಠ ಎನ್ನುವುದನ್ನು ಅಂಗೀಕರಿಸಲು ಅವರ ಅಂಕಿ-ಅಂಶಗಳು ನೆರವಾಗುತ್ತವೆ. ಅವುಗಳನ್ನು ಒಂದು ಉಸುರಿನಲ್ಲಿ ಓದುವುದು ಖಂಡಿತವಾಗಿಯೂ ಸಾಧ್ಯವಿಲ್ಲ.

ಇದುವರೆಗೆ ಆಡಿರುವ 91 ಟೆಸ್ಟ್​ಗಳಲ್ಲಿ ಅವರು 52.4 ಸರಾಸರಿಯಲ್ಲಿ 7,490 ರನ್​ ಗಳಿಸಿದ್ದಾರೆ 245 ಒಡಿಐ ಪಂದ್ಯಗಳಲ್ಲಿ ಅಭೂತಪೂರ್ವ 59.07 ಸರಾಸರಿಯೊಂದಿಗೆ 12,169 ರನ್ ಗಳಿಸಿದ್ದಾರೆ. ಟಿ20 ಆವೃತ್ತಿಯಲ್ಲೂ ಅವರ ಸರಾಸರಿ 50ಕ್ಕಿಂತ (52.65) ಜಾಸ್ತಿಯಿದೆ. ಈ ಫಾರ್ಮಾಟ್​ನಲ್ಲಿ ಆಡಿರುವ 90 ಪಂದ್ಯಗಳಲ್ಲಿ ಅವರು 3,159 ರನ್ ಗಳಿಸಿದ್ದಾರೆ. 32 ವರ್ಷ ವಯಸ್ಸಿನ ಕೊಹ್ಲಿ ಇದುವರೆಗೆ 70 ಅಂತರರಾಷ್ಟ್ರೀಯ ಶತಕಗಳನ್ನು ಬಾರಿಸಿದ್ದಾರೆ.

ಒಬ್ಬ ಬ್ಯಾಟ್ಸ್​ಮನ್ ಈ ಬಗೆಯ ದಾಖಲೆಗಳನ್ನು ಹೊಂದಿದ್ದರೆ, ಮಾಜಿ ಮತ್ತು ಹಾಲಿ ಆಟಗಾರರು ರಚಿಸುವ ವಿಶ್ವದ ಅತ್ಯುತ್ತಮ ತಂಡದಲ್ಲಿ ಸ್ಥಾನವನ್ನು ತಪ್ಪದೆ ಗಿಟ್ಟಿಸುತ್ತಾರೆ. ಹಿಂದೆ, ಮಾಜಿ ಆಟಗಾರರು ರಚಿಸಿದ ಟೀಮಿನಲ್ಲಿ ಅವರು ಸ್ಥಾನ ಪಡೆದ ಹಾಗೆಯೇ, ಆಸ್ಟ್ರೇಲಿಯಾದ ಮತ್ತು ವಿಶ್ವದ ಹಾಲಿ ಶ್ರೇಷ್ಠ ಬೌಲರ್ ಪ್ಯಾಟ್​ ಕಮ್ಮಿನ್ಸ್ ರಚಿಸಿರುವ ಅತ್ಯುತ್ತಮ ಟೆಸ್ಟ್​ ಇಲೆವೆನ್​ನಲ್ಲೂ ಸ್ಥಾನ ಪಡೆದುಕೊಂಡಿದ್ದಾರೆ.

ಅರ್ಧಕ್ಕೆ ಸ್ಥಗಿತಗೊಂಡ ಐಪಿಎಲ್ ಟೂರ್ನಿಯಲ್ಲಿ ಭಾಗವಹಿಸಿ ಸ್ವದೇಶಕ್ಕೆ ಮರಳಿ ಸಿಡ್ನಿಯಲ್ಲಿ ಕ್ವಾರಂಟೈನಲ್ಲಿರುವ ಕಮ್ಮಿನ್ಸ್ ಯೂಟ್ಯೂಬ್​ನಲ್ಲು ಸದಾ ಸಕ್ರಿಯರಾಗಿರುತ್ತಾರೆ. ಮಂಗಳವಾರದಂದು ಅವರು ತಮ್ಮ ಅಭಿಮಾನಿಗಳೊಂದಿಗೆ ನಡೆಸಿರುವ ಪ್ರಶ್ನೋತ್ತರ ಕಾರ್ಯಕ್ರಮದ ವಿಡಿಯೋ ಒಂದನ್ನು ಪೋಸ್ಟ್ ಮಾಡಿದ್ದಾರೆ.

ತಮ್ಮ ಟೀಮಿಗೆ ಅವರು ಆಯ್ಕೆ ಮಾಡುವ ಮೂರು ಪ್ರಮುಖ ಬ್ಯಾಟ್ಸ್​ಮನ್​ಗಳು ಯಾರೆಂದು ಅಭಿಮಾನಿಯೊಬ್ಬ ಕೇಳಿರುವ ಪ್ರಶ್ನೆಗೆ ಕಮ್ಮಿನ್ಸ್ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್, ತಮ್ಮ ಜೊತೆ ಆಟಗಾರ ಸ್ಟೀವ್ ಸ್ಮಿತ್ ಮತ್ತು ಕೊಹ್ಲಿ ಅವರ ಹೆಸರುಗಳನ್ನು ಹೇಳಿದ್ದಾರೆ.

‘ನನ್ನ ತಂಡದಲ್ಲಿ ಕೇನ್ ವಿಲಿಯಮ್ಸನ್ ಮೂರನೇ ಕ್ರಮಾಂಕದಲ್ಲಿ, ಸ್ಮಿತ್ 4 ಮತ್ತು ಕೊಹ್ಲಿ 5 ನೇ ಕ್ರಮಾಂಕದಲ್ಲಿ ಆಡುತ್ತಾರೆ. ಈ ಆರ್ಡರ್ ಹಿಂದೆ ಮುಂದೆ ಆಗಬಹುದು, ಆದರೆ ಈ ಮೂರು ಜನ ಮಾತ್ರ ನನ್ನ ತಂಡದಲ್ಲಿರುತ್ತಾರೆ.’ ಎಂದು ಕಮ್ಮಿನ್ಸ್ ಹೇಳಿದ್ದಾರೆ.

ಕೊಲ್ಕತಾ ನೈಟ್​ ರೈಡರ್ಸ್ ಪರ ಆಡುವ ಕಮ್ಮಿನ್ಸ್, ಐಪಿಎಲ್​ 2021ರಲ್ಲಿ ತಮ್ಮ ಜ್ ಟೀಮಿಗೆ ಅತಿ ಹೆಚ್ಚು ವಿಕೆಟ್​ಗಳನ್ನು ಪಡೆದರು. ಟೂರ್ನಿ ಸ್ಥಗಿತಗೊಳ್ಳುವ ಮೊದಲು ಆಡಿದ 7 ಪಂದ್ಯಗಳಿಂದ ಅವರು 9 ವಿಕೆಟ್ ಪಡೆದರು. ಪಾಯಿಂಟ್ಸ್​ ಟೇಬಲ್​ನಲ್ಲಿ ಕೆಕೆಆರ್ 7ನೇ ಸ್ಥಾನದಲ್ಲಿತ್ತು.

ಕೊಹ್ಲಿ ಸಹ ಕೊನೆಯ ಬಾರಿ ಕ್ರಿಕೆಟ್​ ಮೈದಾನದಲ್ಲಿ ಕಾಣಿಸಿಕೊಂಡಿದ್ದು ಇದೇ ಐಪಿಎಲ್ ಟೂರ್ನಿಯಲ್ಲಿ. ಅವರು ಆಡಿದ 7 ಪಂದಯಗಳಲ್ಲಿ 198 ರನ್​ ಗಳಿಸಿದ್ದರು. ಪಾಯಿಂಟ್ಸ್​ ಟೇಬಲ್​ನಲ್ಲಿ ಕೊಹ್ಲಿಯ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮೂರನೇ ಸ್ಥಾನದಲ್ಲಿತ್ತು.

ಮುಂದಿನ ತಿಂಗಳು ನಡೆಯಲಿರುವ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​ ಪಂದ್ಯದಲ್ಲಿ ಆಡಲು ಟೀಮ್ ಇಂಡಿಯಾದೊಂದಿಗೆ ಕೊಹ್ಲಿ ಇಂಗ್ಲೆಂಡ್​ಗೆ ಪ್ರಯಾಣ ಬೆಳಸಲಿದ್ದಾರೆ. ಅದಾದ ನಂತರ ಭಾರತ ಇಂಗ್ಲೆಂಡ್​ ಇರುದ್ಧ 5-ಪಂದ್ಯಗಳ ಟೆಸ್ಟ್​ ಸರಣಿ ಆಡಲಿದೆ.

ಇದನ್ನೂ ಓದಿ: IPL 2021: ಐಪಿಎಲ್ ಮುಂದುವರೆದಿದ್ದರೂ ನಾನು ಕಣಕ್ಕಿಳಿಯುತ್ತಿರಲಿಲ್ಲ; ಯಜ್ವೇಂದ್ರ ಚಹಲ್ ಈ ನಿರ್ಧಾರಕ್ಕೆ ಕಾರಣವೇನು?