ರನ್​ ಮಳೆ ಹರಿಸುವ ಶಾರ್ಜಾದಲ್ಲಿ ಕೊಹ್ಲಿ ಬಾಯ್ಸ್ ಎಡವಿದ್ದು ಎಲ್ಲಿ?

ಶಾರ್ಜಾ ಪಂದ್ಯ RCB ಹುಡುಗ್ರು ಮತ್ತು ಕನ್ನಡಿಗರ ನಡುವಿನ ರಣ ರೋಚಕ ಕಾದಾಟವಾಗಿ ಮಾರ್ಪಟ್ಟಿತ್ತು. ರಾಯಲ್ ಹುಡುಗರಿಗೆ ಪಂಜಾಬ್ ವಿರುದ್ಧದ ಪಂದ್ಯ ಪ್ರತಿಷ್ಠೆಯ ಪಂದ್ಯವಾಗಿತ್ತು. ಕಾರಣ ಇದೇ ಸೀಸನ್​ನಲ್ಲಿ ಕಳೆದ ಬಾರಿ ರಾಹುಲ್ ಹುಡುಗರ ಜೊತೆ ಸೆಣಸಾಡಿದ್ದ ಕೊಹ್ಲಿ ಆರ್ಮಿ ಹೀನಾಯವಾಗಿ ಮುಗ್ಗರಿಸಿತ್ತು. ಹೀಗಾಗಿ, ಶಾರ್ಜಾ ಸಮರದಲ್ಲಿ ಪಂಜಾಬ್​ಗೆ ಸೋಲಿನ ಗುನ್ನಾ ನೀಡಬೇಕೆಂದುಕೊಂಡಿದ್ದ RCB ತಂಡ ಮತ್ತದೇ ಮಿಸ್ಟೇಕ್ ಮಾಡಿದೆ.

ರನ್​ಮಳೆ ಹರಿಸುವ ಶಾರ್ಜಾದಲ್ಲಿ ಕೊಹ್ಲಿ ಬಾಯ್ಸ್ ಎಡವಿದ್ದೆಲ್ಲಿ?
ದುಬೈನಲ್ಲಿ ನಡೆಯುತ್ತಿರುವ ಈ ಬಾರಿಯ ಐಪಿಎಲ್​ನಲ್ಲಿ ಶಾರ್ಜಾ ರನ್​ಮಳೆ ಹರಿಸುವ ಕಣ. ಬ್ಯಾಟ್ಸ್​ಮನ್​ಗಳಿಗೆ ಸ್ವರ್ಗದಂತಿರುವ ಶಾರ್ಜಾದಲ್ಲಿ RCB ಸಾಲು ಸಾಲು ಎಡವಟ್ಟುಗಳನ್ನ ಮಾಡಿಕೊಳ್ತು. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಕ್ಯಾಪ್ಟನ್ ವಿರಾಟ್ ಕೊಹ್ಲಿ, ಹುಮ್ಮಸ್ಸಿನಿಂದ್ಲೇ ಬ್ಯಾಟಿಂಗ್ ತೆಗೆದುಕೊಂಡಿದ್ರು. ರನ್​ಮಳೆ ಹರಿಸುವ ನಿರೀಕ್ಷೆಯಲ್ಲೇ ಆರ್​ಸಿಬಿ ಕಣಕ್ಕಿಳಿಯುತ್ತೆ. ಆದ್ರೆ ಬೆಂಗಳೂರು ತಂಡದ ಓಪನರ್​ಗಳು, ಹೆಚ್ಚು ಹೊತ್ತು ಕ್ರೀಸ್​ನಲ್ಲಿ ನಿಂತು ರನ್​ ಕಲೆಹಾಕೋಕೆ ಸಾಧ್ಯವಾಗಲಿಲ್ಲ. ಹಾಗಾದ್ರೆ, ನಿನ್ನೆ ನಡೆದ ಪಂದ್ಯದಲ್ಲಿ ಕೊಹ್ಲಿ ಪಡೆ ಎಡವಿದ್ದೆಲ್ಲಿ?

ಸೋಲಿಗೆ ಕಾರಣ ನಂ.1: ಓಪನಿಂಗ್​ನಲ್ಲಿ ಪಂಕ್ಚರ್ ಆದ ಫಿಂಚ್
ಇದೇ ನೋಡಿ ಮೊದಲ ಕಾರಣ. ಕ್ಯಾಪ್ಟನ್ ಕೊಹ್ಲಿಗೆ ಓಪನರ್​ಗಳ ಮೇಲೆ ಅತೀವ ನಂಬಿಕೆ ಇದೆ. ಅದ್ರಲ್ಲೂ ಌರೋನ್ ಫಿಂಚ್ ಮೇಲೆ ಕ್ಯಾಪ್ಟನ್ ಕೊಹ್ಲಿ, ಭಾರಿ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಹೀಗಾಗಿ ಫಿಂಚ್​ನನ್ನು ಆರಂಭದಿಂದ್ಲೂ ಯಾವ ಪಂದ್ಯದಿಂದ ಡ್ರಾಪ್ ಮಾಡಿಲ್ಲ. ನಾಯಕ ಕೊಹ್ಲಿ ನಂಬಿಕೆ ಉಳಿಸಿಕೊಳ್ಳಬೇಕಿದ್ದ ಫಿಂಚ್ ಮತ್ತೆ ಪಂಜಾಬ್ ವಿರುದ್ಧ ಫೇಲಾಗಿದ್ದಾರೆ. 20ರನ್​ಗೆ ಸುಸ್ತಾದ ಫಿಂಚ್ ಪಂಜಾಬ್ ವಿರುದ್ಧ ಪಂಕ್ಚರ್ ಆದ್ರು.

ಸೋಲಿಗೆ ಕಾರಣ ನಂ.2: ಎಬಿಡಿಗೆ 6ನೇ ಕ್ರಮಾಂಕ ಯಾಕೆ?
RCB ಅಭಿಮಾನಿಗಳಲ್ಲಿ ಮೂಡಿರೋ ಪ್ರಶ್ನೆ ಅಂದ್ರೆ ಇದೊಂದೇ ನೋಡಿ. ಎಬಿಡಿಗೆ ನಿನ್ನೆ ಪಂದ್ಯದಲ್ಲಿ 6ನೇ ಕ್ರಮಾಂಕ ನೀಡಿದ್ದೇಕೆ? ಎಬಿಡಿಯನ್ನು 4ನೇ ಕ್ರಮಾಂಕಕ್ಕೆ ಇಳಿಸೋ ಬದಲು ಕೊಹ್ಲಿ 6ನೇ ಕ್ರಮಾಂಕಕ್ಕೆ ಅತಿದೊಡ್ಡ ಎಡವಟ್ಟು ಮಾಡಿಕೊಂಡ್ರು. ಪಂಜಾಬ್ ಬೌಲರ್​ಗಳು ಬ್ಯಾಕ್ ಟು ಬ್ಯಾಕ್ RCB ತಂಡದ ಬ್ಯಾಟ್ಸ್​ಮನ್​ಗಳನ್ನು ಬೇಟೆಯಾಡ್ತಿದ್ರು. ಹೀಗಾಗಿ, 4ನೇ ಕ್ರಮಾಂಕಕ್ಕೆ ವಾಷಿಂಗ್ಟನ್ ಸುಂದರ್​ಗೆ ಕೊಹ್ಲಿ ಕಣಕ್ಕಿಳಿಸ್ತಾರೆ. ಆದ್ರೆ ಅದು ವರ್ಕೌಟ್ ಆಗೋದಿಲ್ಲ.

ಸೋಲಿಗೆ ಕಾರಣ ನಂ.3: ನಾಯಕ ಕೊಹ್ಲಿ ಮಂದಗತಿಯ ಆಟ
ರನ್ ಮಷೀನ್ ಕೊಹ್ಲಿ ಭರ್ಜರಿ ಫಾರ್ಮ್​ನಲ್ಲಿದ್ದಾರೆ. 3ನೇ ಕ್ರಮಾಂಕದಲ್ಲಿಳಿದ ವಿರಾಟ್ ಶಾರ್ಜಾ​ದಲ್ಲಿ ರನ್​ಸರ್ದಾರ್ ಆಗಿ ಹೊರಹೊಮ್ಮಬಹುದಿತ್ತು. ಆದ್ರೆ, ನಾಯಕ ಕೊಹ್ಲಿ 39 ಎಸೆತದಲ್ಲಿ 48ರನ್​ ಗಳಿಸಲಷ್ಟೇ ಶಕ್ತರಾದ್ರು. ಒಂದೇ ಒಂದು ಸಿಕ್ಸರ್ ಬಾರಿಸದ ವಿರಾಟ್, ಶಾರ್ಜಾದಲ್ಲಿ ಮಂದಗತಿಯ ಬ್ಯಾಟಿಂಗ್ ಮಾಡಿದ್ರು.

ಸೋಲಿಗೆ ಕಾರಣ ನಂ.4: ಸಣ್ಣ ಮೈದಾನದಲ್ಲಿ ಕಡಿಮೆ ಟಾರ್ಗೆಟ್
ಗೆಲುವಿನ ರಿದಮ್​ನಲ್ಲಿದ್ದ RCB ಶಾರ್ಜಾ ಮೈದಾನದಲ್ಲಿ ರನ್​ ಮಳೆ ಹರಿಸಬಹುದಿತ್ತು. ಬಿಗ್ ಸ್ಕೋರ್ ಕಲೆಹಾಕಬಹುದಿದ್ದ ಮೈದಾನದಲ್ಲಿ ಕೊಹ್ಲಿ ಹುಡುಗ್ರು ರನ್ ಕಲೆಹಾಕೋಕೆ ಪರದಾಡಿದ್ರು. ಜೊತೆಗೆ, ಪವರ್​ಪ್ಲೇನಲ್ಲಿ RCB ಪ್ರಮುಖ ಬ್ಯಾಟ್ಸ್​ಮನ್​ಗಳು ಪೆವಿಲಿಯನ್ ಸೇರಿಬಿಟ್ಟಿದ್ರು. ಇದ್ರಿಂದ ಬೆಂಗಳೂರು ತಂಡ ಬಿಗ್ ಸ್ಕೋರ್ ಕನಸಿಗೆ ಕೊಳ್ಳಿಇಟ್ಟಿತ್ತು.

ಸೋಲಿಗೆ ಕಾರಣ ನಂ.5: ದುಬಾರಿ ಬೌಲರ್ ಆದ ಸಿರಾಜ್
ಮೊಹಮ್ಮದ್ ಸಿರಾಜ್ ದುಬಾರಿ ಬೌಲರ್ ಆಗಿ ಹೊರಹೊಮ್ಮಿದ್ದಾರೆ. ಶಾರ್ಜಾದಲ್ಲಿ RCB ಪಂಜಾಬ್​ಗೆ ಕೇವಲ 172ರನ್​ಗಳ ಗುರಿ ನೀಡಿತ್ತು. ಬೌಲರ್​ಗಳಿಗೆ ಇದೊಂದು ಸವಾಲಾಗಿತ್ತು. ಇದೇ ದೃಷ್ಟಿಕೋನದಲ್ಲಿ ಪಂಜಾಬ್ ಬ್ಯಾಟ್ಸ್​ಮನ್​ಗಳ ವಿಕೆಟ್ ಪಡೆಯೋಕೆ RCB ಬೌಲರ್​ಗಳು ಮಾಸ್ಟರ್ ಪ್ಲ್ಯಾನ್ ಮಾಡಬೇಕಿತ್ತು. ಆದ್ರೆ ಮೊಹಮ್ಮದ್ ಸಿರಾಜ್ 3 ಓವರ್​ನಲ್ಲಿ 1 ಒಂದು ವಿಕೆಟ್ ಪಡೆದು 44ರನ್ ನೀಡಿ ದುಬಾರಿ ಬೌಲರ್ ಆದ್ರು.

ಇದೆಲ್ಲದರ ಜೊತೆಗೆ, ಕೊನೆ ಓವರ್ ಕೊನೆ ಬಾಲ್ ಕೂಡ ಪಂದ್ಯದ ಫಲಿತಾಂಶ ಬದಲಿಸುವ ಅವಕಾಶ ಇತ್ತು. ಆದ್ರೆ ಕೊನೆ ಬಾಲ್​ನಲ್ಲಿ ಒಂದು ರನ್​ ಬೇಕಿದ್ದಾಗ ಯಜ್ವಿಂದರ್ ಚಹಲ್ ಬಾಲ್​ಗೆ ಪೂರನ್ ಸಿಕ್ಸರ್ ಬಾರಿಸಿ ಪವರ್ ತೋರಿಸಿದ್ರು. ಪಂಜಾಬ್ ಈ ಗೆಲುವಿನ ಮೂಲಕ ಐಪಿಎಲ್ ಪಾಯಿಂಟ್ಸ್​ ಟೇಬಲ್​ನಲ್ಲಿ ಯಾವುದೇ ಏರಿಕೆ ಕಂಡಿಲ್ಲವಾದ್ರೂ, ಕೊನೆಯ ಸ್ಥಾನದಲ್ಲೇ ಇದೆ. ಆದ್ರೆ RCB ಈ ಸೋಲಿನ ಮೂಲಕ ದುಬೈನಲ್ಲಿ 2ನೇ ಬಾರಿ ಮುಗ್ಗರಿಸಿದೆ.