ಕೊವಿಡ್19 ಕಾರಣದಿಂದ ಚೀನಾದಲ್ಲಿ ನಡೆಯಬೇಕಿದ್ದ ಫುಟ್​ಬಾಲ್ ವಿಶ್ವಕಪ್ ಕ್ವಾಲಿಫೈಯರ್ ಪಂದ್ಯಗಳು ದುಬೈಗೆ ಸ್ಥಳಾಂತರ

ಚೀನಾದಲ್ಲಿ ನಡೆಯಬೇಕಾಗಿದ್ದ ಫುಟ್​ಬಾಲ್ ವಿಶ್ವಕಪ್ ಕ್ವಾಲಿಫೈಯರ್ ಪಂದ್ಯಗಳು ಕೊರೊನಾ ಸೋಂಕಿನ ಕಾರಣದಿಂದ ದುಬೈಗೆ ಸ್ಥಳಾಂತರಗೊಂಡಿವೆ. ಸಿರಿಯಾ ಹಾಗೂ ಮಾಲ್ಡೀವ್ಸ್ ತಂಡಗಳಲ್ಲಿ ಕೊವಿಡ್-19 ಪ್ರಕರಣಗಳು ಕಂಡುಬಂದ ಹಿನ್ನೆಲೆಯಲ್ಲಿಯೂ ಪಂದ್ಯಗಳನ್ನು ದುಬೈಗೆ ಸ್ಥಳಾಂತರಿಸಲಾಗಿದೆ. ಈ ಬಗ್ಗೆ ಇಂದು (ಮೇ 31) ಚೈನೀಸ್ ಫುಟ್​ಬಾಲ್ ಅಸೋಸಿಯೇಷನ್ ಹೇಳಿಕೆ ನೀಡಿದೆ.

ಗ್ರೂಪ್ ಎ ಫಿಕ್ಸ್​ಚರ್ಸ್​ನ ಚೀನಾ, ಸಿರಿಯಾ, ಮಾಲ್ಡೀವ್ಸ್, ಫಿಲಿಫೈನ್ಸ್ ಹಾಗೂ ಗುಆಮ್ ತಂಡಗಳು ಕೊರೊನಾ ಸೋಂಕಿನ ಪರಿಣಾಮಕ್ಕೆ ಒಳಪಟ್ಟಿವೆ. ಮಾಲ್ಡೀವ್ಸ್ ಹಾಗೂ ಸಿರಿಯಾ ರಾಷ್ಟ್ರೀಯ ಫುಟ್​ಬಾಲ್ ತಂಡದಲ್ಲಿ ಕೊವಿಡ್ ಪ್ರಕರಣಗಳು ಕಂಡುಬಂದ ಕಾರಣ ತಂಡದ ಆಟಗಾರರು ಕಠಿಣ ಕ್ವಾರಂಟೈನ್ ನಿಯಮಗಳನ್ನು ಪಾಲಿಸಬೇಕು. ಹಾಗೂ ಈಗಿನ ಶೆಡ್ಯೂಲ್ ಪ್ರಕಾರ ಆಟ ನಡೆಯಲು ಸಾಧ್ಯವಿಲ್ಲ ಎಂದು ಚೀನಾ ಫುಟ್​ಬಾಲ್ ಅಸೋಸಿಯೇಷನ್ ಸದಸ್ಯರೊಬ್ಬರು ಮಾಹಿತಿ ನೀಡಿದ್ದಾರೆ.

ಏಷಿಯನ್ ಫುಟ್​ಬಾಲ್ ಕಾನ್ಫೆಡರೇಷನ್ ಸಲಹೆಯಂತೆ, ಚೈನೀಸ್ ಫುಟ್​ಬಾಲ್ ಅಸೋಸಿಯೇಷನ್ ಇನ್ನುಳಿದ ಪಂದ್ಯಗಳನ್ನು ಚೀನಾದ ಬದಲಾಗಿ ದುಬೈನಲ್ಲಿ ನಡೆಸಲು ಒಪ್ಪಿಕೊಂಡಿದೆ ಎಂದು ತಿಳಿದುಬಂದಿದೆ. ಎಲ್ಲಾ ಅಂದುಕೊಂಡಂತೆ, ಈ ಮೊದಲು ನಿಗದಿಯಾದಂತೆ ಆಗುತ್ತಿದ್ದರೆ ಚೀನಾದ ನಗರ ಸುಜೋವುನಲ್ಲಿ ಮುಂದಿನ ಪಂದ್ಯ ನಡೆಯಬೇಕಿತ್ತು.

ಇದೀಗ ಕೊರೊನಾ ಸೋಂಕಿನ ಕಾರಣದಿಂದ ಮುಂದಿನ ಪಂದ್ಯಗಳು ದುಬೈನಲ್ಲಿ ನಡೆಯುವುದು ಖಚಿತವಾಗಿದ್ದು, ಪಂದ್ಯ ನಡೆಯುವ ಸ್ಥಳದ ಬಗ್ಗೆ ವಿವರಗಳು ಇನ್ನಷ್ಟೇ ತಿಳಿದುಬರಬೇಕಿದೆ. ಈ ಮೊದಲು ಮಾಲ್ಡೀವ್ಸ್ ತಂಡದ ಸ್ಟ್ರೈಕರ್ ಅಲಿ ಅಶ್ಫಕ್ ಟ್ವೀಟ್ ಮಾಡಿ, ತಾನು ಕೊವಿಡ್ ಪಾಸಿಟಿವ್ ಆಗಿರುವುದನ್ನು ತಿಳಿಸಿದ್ದರು. ಜೊತೆಗೆ, ಕ್ವಾಲಿಫೈಯರ್ ಪಂದ್ಯಗಳಲ್ಲಿ ಆಡುತ್ತಿಲ್ಲ ಎಂಬುದನ್ನೂ ಖಚಿತಪಡಿಸಿದ್ದರು.

ಭಾನುವಾರ ನಡೆದ ಪಂದ್ಯದಲ್ಲಿ ಚೀನಾ ತಂಡ ಗುಆಮ್ ತಂಡವನ್ನು 7-0 ಅಂತರದಿಂದ ಸೋಲಿಸಿತ್ತು. ಹಾಗೂ ಚೀನಾ ತಂಡವು ಗುರುವಾರ ಮಾಲ್ಡೀವ್ಸ್ ತಂಡದ ವಿರುದ್ಧ ಆಡಬೇಕಿತ್ತು. ಸಿರಿಯಾ ಮತ್ತು ಮಾಲ್ಡೀವ್ಸ್ ತಂಡಗಳು ಜೂನ್ 7ರಂದು ಎದುರಾಗಬೇಕಿತ್ತು.

ಈವರೆಗಿನ ಪಂದ್ಯಗಳ ಅನುಸಾರ ಅಂಕಪಟ್ಟಿಯಲ್ಲಿ ಚೀನಾ ಎರಡನೇ ಸ್ಥಾನದಲ್ಲಿದೆ. ಸಿರಿಯಾ ತಂಡ ಮೊದಲ ಸ್ಥಾನದಲ್ಲಿದೆ. ಫುಟ್​ಬಾಲ್ ವಿಶ್ವಕಪ್ ಕನಸು ನನಸಾಗಿಸಲು ಉಭಯ ತಂಡಗಳು ಬಿರುಸಿನ ಕಾದಾಟದಲ್ಲಿ ತೊಡಗಿವೆ.

ಇದನ್ನೂ ಓದಿ: ನಿಮಗೆ ಕನ್ನಡ ಬರುತ್ತಾ? ನೆಟ್ಟಿಗರು ಕೇಳಿದ ವಿಭಿನ್ನ ಪ್ರಶ್ನೆಗಳಿಗೆ ನಯವಾಗಿಯೇ ಉತ್ತರಿಸಿದ ಕೊಹ್ಲಿ; ನೀವೂ ಓದಿ

KL Rahul: ರಾಹುಲ್ ಫಿಟ್ನೆಸ್​ಗೆ ಅಥಿಯಾ ಶೆಟ್ಟಿ ಫಿದಾ; ಪ್ರಣಯ ಪಕ್ಷಿಗಳ ಪ್ರೀತಿಗೆ ಮತ್ತೊಂದು ಸಾಕ್ಷಿ