ಪಂಜಾಬ್​ನಲ್ಲಿ ಆ ಕಳ್ಳ ಕಾನ್ಸ್​ಟೇಬಲ್ ಬೀದಿಬದಿ ಕದ್ದ ಕೋಳಿ ಮೊಟ್ಟೆಗಳೆಷ್ಟು? ಕೊನೆಗೂ ಆತ ಸಿಕ್ಕಿಬಿದ್ದಿದ್ದು ಹೇಗೆ?

ಚಂಡೀಗಢ: ಆತ ತನ್ನ ಮೂರು ಚಕ್ರದ ಸೈಕಲ್​ನಲ್ಲಿ ಮೊಟ್ಟೆ ಟ್ರೇಗಳನ್ನು ತುಂಬಿಕೊಂಡು ಅಂಗಡಿ ಅಂಗಡಿಗೂ ಸರಬರಾಜು ಮಾಡುತ್ತಾ ತನ್ನ ಹೊಟ್ಟೆ ತುಂಬಿಸಿಕೊಳ್ಳುವ ಕೆಲಸದಲ್ಲಿ ನಿರತನಾಗಿದ್ದ. ಅಂಗಡಿಯೊಂದರ ಮುಂದೆ ತನ್ನ ಸೈಕಲ್ ನಿಲ್ಲಿಸಿ, ಮೊಟ್ಟೆ ಕೊಟ್ಟು ಬರಲು ರಸ್ತೆಯ ಆ ಕಡೆಗೆ ಸಾಗಿದ್ದಾನೆ. ಅದಕ್ಕೇ ಹೊಂಚುಹಾಕುತ್ತಿದ್ದವನಂತೆ ನರಪೇತಲ ಕಾನ್ಸ್​ಟೇಬಲ್​ ಒಬ್ಬ ತನ್ನ ಶಿಸ್ತು-ಪ್ರಾಮಾಣಿಕತೆಯ ಇಲಾಖೆಗೆ ಕಳಂಕ ತರುವ ರೀತಿಯಲ್ಲಿ ಆ ಸೈಕಲ್​ಗೆ ಆನಿಕೊಂಡು ಅತ್ತಿತ್ತ ಕಳ್ಳನೋಟ ಬೀರುತ್ತಾ, ಸರಾಗವಾಗಿ, ಎಡರು ಬಾರಿಗೆ ಒಟ್ಟು 6 ಮೊಟ್ಟೆಗಳನ್ನು ತನ್ನ ಪ್ಯಾಂಟ್​ ಜೋಬಿಗೆ ತುಂಬಿಕೊಂಡಿದ್ದಾನೆ. ಪವಿತ್ರ ಸಮವಸ್ತ್ರಕ್ಕೂ ಕಳಂಕ ಮೆತ್ತಿದ್ದಾನೆ ಆ ಕಾನ್ಸ್​ಟೇಬಲ್.

ಆತ ಪಂಜಾಬ್​ ಪೊಲೀಸ್​ ಇಲಾಖೆಯಲ್ಲಿ ಮುಖ್ಯ ಕಾನ್ಸ್​ಟೇಬಲ್ ಆಗಿರುವ ಪ್ರತಿಪಾಲ್​ ಸಿಂಗ್​. ಫತೇಗಢ ಸಾಹಿಬ್​ ಪೊಲೀಸ್​ ಠಾಣೆಯಲ್ಲಿ ಸೇವೆಯಲ್ಲಿದ್ದಾನೆ; ಅಲ್ಲಲ್ಲ ಇದ್ದ. ಏಕೆಂದ್ರೆ ಪ್ರೀತಿಪಾಲ್ ಸಿಂಗ್​ನ ಕಳ್ಳತನ ಬೆಳಕಿಗೆ ಬರುತ್ತಿದ್ದಂತೆ ಇಲಾಖೆಯು ಪೊಲೀಸರ ಮಾನ ತೆಗೆದ ಕಾನ್ಸ್​ಟೇಬಲ್​ನನ್ನು ಸಸ್ಪೆಂಡ್​ ಮಾಡಿ, ಮನೆಗಟ್ಟಿದೆ.

ಮುಖ್ಯ ಕಾನ್ಸ್​ಟೇಬಲ್ ಪ್ರೀತಿಪಾಲ್​ ಸಿಂಗ್ ಅತ್ತಿತ್ತ ಕಳ್ಳನೋಟ ಬೀರುತ್ತಾ, ಸಲೀಸಾಗಿ ಒಟ್ಟು 6 ಮೊಟ್ಟೆ ಎಗರಿಸಿದ್ದು ವಿಡಿಯೋದಲ್ಲಿ ದಾಖಲಾಗಿದೆ. ಮೊದಲ ಬಾರಿಗೆ ಸೈಕಲ್​ಗೆ ಆನಿಕೊಂಡು ಎರಡೇ ಎರಡು ಮೊಟ್ಟೆಗಳನ್ನು ತನ್ನ ಪ್ಯಾಂಟ್​ ಜೇಬಿಗೆ ಹಾಕಿಕೊಳ್ಳುತ್ತಾನೆ. ಆ ಮೇಲೆ ಯಾರೂ ನೋಡುತ್ತಿಲ್ಲ ಅಂತಾ ದುರಾಸೆಗೆ ಬಿದ್ದು, ಮಾನಗೆಟ್ಟು ಎರಡನೆಯತ ಬಾರಿಗೆ ಇನ್ನೂ ನಾಲ್ಕು ಮೊಟ್ಟೆಗಳನ್ನು ಅದೇ ಜೇಬಿಗೆ ತುರುಕಿಕೊಳ್ಳುತ್ತಾನೆ. ದಾಹ ಸಾಲದೆ ಇನ್ನೂ ನಾಲ್ಕಾರು ಎತ್ತಿಹಾಕಿಕೊಳ್ಳುತ್ತಿದ್ದನೋ ಏನೂ ಆದ್ರೆ ಅಷ್ಟೊತ್ತಿಗೆ ಪಾಪಾ ಆ ಸೈಕಲ್​ ವ್ಯಾಪಾರಿ ಬಂದುಬಿಟ್ಟಿದ್ದಾನೆ.

ಮುಖ್ಯ ಕಾನ್ಸ್​ಟೇಬಲ್​ನ ಅಂಡಾಬಂಡಾ ಕಳ್ಳಾಟ ಹೀಗಿತ್ತು:

ಮೊಟ್ಟೆವಾಲಾನನ್ನು ನೋಡಿದ ಕಾನ್ಸ್​ಟೇಬಲ್ ಏನೂ ಘಟಿಸಿಯೇ ಇಲ್ಲ ಎಂಬಂತೆ ತನ್ನ ಕೈಗಳನ್ನು ಪ್ಯಾಂಟಿಗೆ ಒರೆಸಿಕೊಳ್ಳುತ್ತಾ, ಅಲ್ಲಿಂದ ಜಾಗ ಖಾಲಿ ಮಾಡುತ್ತಾನೆ. ಮೊಟ್ಟೆವಾಲಾ ಬಹುಶಃ ಅದನ್ನೆಲ್ಲ ನೋಡಿದ್ದ ಅನಿಸುತ್ತದೆ. ಇದೆಲ್ಲಾ ಮಾಮೂಲು ಎಂಬಂತೆ ಕಾನ್ಸ್​ಟೇಬಲ್ ಕಡೆಗೆ ಕೈತೋರಿಸಿ, ಇವನ ಹಣೆಬರಹ ಇಷ್ಟೇ. ಇವನಿಗೆ ಕದಿಯುವ ಚಾಳಿ ಇದ್ದಿದ್ದೇ ಎಂದು ಹತಾಶನಾಗಿ ಪ್ರತಿಕ್ರಿಯಿಸುತ್ತಾನೆ. ಇವಿಷ್ಟೂ ವಿಡಿಯೋದಲ್ಲಿ ದಾಖಲಾಗಿದೆ.

ತಮ್ಮ ಕಾನ್ಸ್​ಟೇಬಲ್ ಮೊಟ್ಟೆ ಕದಿಯುವ ಚಾಳಿ ನೋಡಿದ ಹಿರಿಯ ಅಧಿಕಾರಿಗಳು ತನಿಖೆಗೆ ಆದೇಶಿಸಿ, ಅದಕ್ಕೂ ಮೊದಲು ನೀನು ಮನೆಗೆ ಹೋಗು ಎಂದು ಸಸ್ಪೆಂಡ್​ ಮಾಡಿದ್ದಾರೆ. ಜೊತೆಗೆ ಆ ವಿಡಿಯೋ ಸಮೇತ ಟ್ವೀಟ್​ ಮಾಡಿ.. ಹೀಗೀಗೆ ನಮ್ಮ ಕಾನ್ಸ್​ಟೇಬಲ್ ಕಳ್ಳತನಕ್ಕೆ ಇಳಿದಿದ್ದಾನೆ. ನೀವೂ ನೋಡಿ ಎಂದು ವಿಡಿಯೋ ಟ್ವೀಟ್​ ಪೋಸ್ಟ್ ಮಾಡಿದ್ದಾರೆ. ಅದೀಗ Social Mediaದಲ್ಲಿ Viral Video ಆಗಿದೆ. ನೀವೂ ನೋಡಿ..

(Head Constable Pritpal Singh egg stealing video goes viral in Social Media Punjab Police suspend him)