Viral Video: ಬೋಲ್ಪುರ: ರೈಲ್ವೇ ಟಿಕೆಟ್ ಕೌಂಟರ್​ನಲ್ಲಿ ಕಾರ್ಯ ನಿರ್ವಹಿಸಿದ ಮಿಸ್ಟರ್ ಮಾರುತಿ

Bolpur: ಹನುಮಂತನಿಗೆ ಗುಡಿ ಕಟ್ಟಿ ಪೂಜೆ ಮಾಡುತ್ತಾರೆ. ಕೋತಿಗೆ (Monkey) ಆಟವಾಡಿಸಿ ಹೊಟ್ಟೆ ಹೊರೆಯುತ್ತಾರೆ. ಕೋತಿಯನ್ನು ಸಾಕಿ ಮನೆಮಕ್ಕಳಂತೆ ನೋಡಿಕೊಳ್ಳುತ್ತಾರೆ. ಆದರೆ ಬೋಲ್ಪುರ ರೈಲ್ವೇ ನಿಲ್ದಾಣದ ಟಿಕೆಟ್​ ಕೌಂಟರಿನಲ್ಲಿ ಈ ಮಾರುತಿಗೆ ಉದ್ಯೋಗ ಕೊಟ್ಟವರು ಯಾರು? ಕೌಂಟರಿನ ಹೊರಗೆ ನೂರಾರು ಜನರು ಸರದಿಯಲ್ಲಿ ನಿಂತಿದ್ದಾರೆ. ಇನ್ನು ಯಾವಾಗ ಟಿಕೆಟ್​ ಸಿಗುತ್ತದೆಯೋ ಎಂದು ಚಡಪಡಿಸುತ್ತಿದ್ದಾರೆ. ಆದರೆ, ಕೌಂಟರಿನೊಳಗಿನ ಮಾರುತಿ ಮಾತ್ರ ಯಾವುದೋ ಪುಸ್ತಕವನ್ನು ನೋಡುತ್ತ, ಕೀಬೋರ್ಡ್​ನಲ್ಲಿ ಟೈಪ್ ಮಾಡುತ್ತ ಕೆಲಸದಲ್ಲಿ ಮುಳುಗಿದ್ದಾನೆ. ರೈಲ್ವೇ ಇಲಾಖೆಯು ಇಂಥ ನಿಷ್ಠಾವಂತ ಉದ್ಯೋಗಿಯನ್ನು ಕನಸು ಮನಸಿನಲ್ಲಿಯೂ ಎಣಿಸಿರಲಿಲ್ಲವೇನೋ.

ಇದನ್ನೂ ಓದಿ : Viral Video : ಜವಾನ್ ಜಮಾನಾ; ಬ್ರೂಕ್ಲಿನ್​ ಸೇತುವೆಯ ಮೇಲೆ ಚಲೇಯಾ ಡ್ಯಾನ್ಸ್​; ಕೃತಜ್ಞತೆ ಸಲ್ಲಿಸಿದ ಶಾರುಖ್​

ಮಂಗಗಳ ಈ ಆಟಗಳನ್ನು ನೋಡದವರು ಯಾರಿದ್ದಾರೆ? ಆದರೆ ಮನುಷ್ಯರಂತೆ ಕೆಲಸದಲ್ಲಿ ತೊಡಗಿಕೊಂಡರೆ ಗಾಬರಿ ಉಂಟಾಗುವುದಲ್ಲವೆ? ಅದರಲ್ಲಿಯೂ ಕಚೇರಿಯಲ್ಲಿ ಕುಳಿತು ಹೀಗೆ ಗಂಭೀರವಾಗಿ ಕುಳಿತು ಕಂಪ್ಯೂಟರ್​ ಬಳಸತೊಡಗಿದರೆ? ಆತಂಕ ಸಹಜವಾಗಿಯೇ ಉಂಟಾಗುತ್ತದೆ.

ಟಿಕೆಟ್ ಕೌಂಟರಿನ ಹೊರಗೆ ನಿಂತವರು ಟಿಕೆಟ್​ಗಾಗಿಯಷ್ಟೇ ನಿಲ್ಲದೇ, ಕೌಂಟರಿನೊಳಗಿನ ಕೌತುಕವನ್ನು ನೋಡಲು ಸಾಲುಗಟ್ಟಿದ್ದರು. ತಮ್ಮ ಮೊಬೈಲ್​ನಲ್ಲಿ ಈ ದೃಶ್ಯವನ್ನು ಸೆರೆಹಿಡಿಯುತ್ತಿದ್ದರು. ಕೆಲ ಮೂಲಗಳ ಪ್ರಕಾರ ಮಿಸ್ಟರ್ ಮಾರುತಿಯವರು ಅರ್ಧಗಂಟೆಗೂ ಹೆಚ್ಚು ಸಮಯ ಹೀಗೆ ಕಚೇರಿ ಕೆಲಸದಲ್ಲಿ ಮುಳುಗಿದ್ದರು. ಕೊನೆಗೆ ಅವರಿಗೆ ಪ್ರಿಯವಾದ ಬಿಸ್ಕೆಟ್​, ಬಾಳೆಹಣ್ಣು ತೋರಿಸಿ ಅವರನ್ನು ಹೊರಕರೆತರಲಾಯಿತು.

ಇದನ್ನೂ ಓದಿ : Viral: ಮುಂಬೈ; ಆಕಾಶದಲ್ಲಿ ತೇಲಾಡುತ್ತಿರುವ ಕಟ್ಟಡಗಳು, ಏನಿದು ಸೋಜಿಗ?

ಅಂತೂ ಗಿಡದಿಂದ ಗಿಡಕ್ಕೆ ನೆಗೆಯುವುದನ್ನು, ಗಿಡದಲ್ಲಿರುವ ಕಾಯಿಗಳನ್ನು ಕೀಳುವುದನ್ನು ಬಿಟ್ಟು ನಾಗರಿಕನಾಗಲು ಈ ಮಾರುತಿ ತಯಾರಿ ನಡೆಸಿರುವ ಹಾಗಿದೆ. ಈ ಘಟನೆಯ ಕುರಿತು ಟಿವಿ9 ಬಾಂಗ್ಲಾ ರೈಲ್ವೇ ಅಧಿಕಾರಿಗಳಿಗೆ ಸಂಪರ್ಕಿಸಿದಾಗ, ಅವರು ನಕ್ಕು ಸುಮ್ಮನಾದರು.

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ