ಪಾತರಗಿತ್ತಿ ಪಕ್ಕಾ ನಿನ್ ಹಿಡಿಯಾಕ್​ ಬಂದಾರಕ್ಕಾ, ಪೆಂಗ್ವಿನಪ್ಪಾ ಪೆಂಗ್ವಿನವ್ವಾ…

Viral Video : ಚಳಿಗೆ ಮುದುರಿಕೊಂಡು ಕುಸುಕುಸು ಕೆಮ್ಮುತ್ತ, ಸೊರಸೊರ ಮೂಗೇರಿಸುತ್ತ, ಬಿಸಿಬಿಸಿ ಕಾಫೀ ಕುಡಿಯುತ್ತ ಕೆಲಸದಲ್ಲಿ ನೀವೆಲ್ಲ ಮುಳುಗಿರಬಹುದು. ಆದರೆ ಹೊಸ ವರ್ಷಕ್ಕೆ ಹೊಸ ಸೂತ್ಯ ಬಂದಿದ್ದಾನೆ ಒಮ್ಮೆ ಅವನನ್ನು ಕಂಡರೆ ಚಳಿಯೂ ಜ್ವರೂ ಕೆಮ್ಮೂ ನೆಗಡಿಯೂ ಎಲ್ಲವೂ ಓಡಿಹೋಗತ್ತದೆ ಎನ್ನುವ ಸಂದೇಶವನ್ನು ಈ ಪೆಂಗ್ವಿನ್​ಗಳ ಹಿಂಡು ನೀಡುತ್ತಿದೆ. ಯಾಕೆ ಇವು ಹೀಗೆ ಒಂದೇ ಸಮ ಜಿಗಿಯುತ್ತಿವೆ? ಇವರ ಪಿಟಿ ಮಾಸ್ಟರ್ ಎಲ್ಲಿ ಕಾಣ್ತಿಲ್ವಲ್ಲ? ಎಂದು ಯೋಚಿಸ್ತಿದೀರಾ? ಅವರ ಪಿಟಿ ಮಾಸ್ಟರ್ ಹೇಳಿದಂತೆ ಅವರು ಕೇಳುತ್ತಿದ್ದಾರೆ ಸ್ವಲ್ಪ ಸೂಕ್ಷ್ಮವಾಗಿ ಗಮನಿಸಿ. ಹೌದು ಪಿಟಿ ಮಾಸ್ಟರ್​ ಪಾತರಗಿತ್ತಿಯವರನ್ನು ಇವರೆಲ್ಲರೂ ಹಿಂಬಾಲಿಸುತ್ತಿದ್ದಾರೆ.

ಮನಸ್ಸನ್ನು ಅರಳಿಸುವಂಥ ಈ ವಿಡಿಯೋ ಅನ್ನು ಡಿಸೆಂಬರ್ 31ರಂದು ಪೋಸ್ಟ್ ಮಾಡಲಾಗಿದೆ. ಈತನಕ ಈ ವಿಡಿಯೋ 11.9 ಮಿಲಿಯನ್​ ಜನರನ್ನು ಮೋಡಿ ಮಾಡಿದೆ. ಎರಡೇ ಸೆಕೆಂಡುಗಳ ಈ ಪುಟ್ಟ ವಿಡಿಯೋದಲ್ಲಿ ಚಿಟ್ಟೆಯನ್ನು ಹೀಗೆ ಬೆನ್ನಟ್ಟುತ್ತಿರುವ ಈ ಪೆಂಗ್ವಿನ್​ ಜಂಪ್​ ನೋಡಿದ ನೂರಾರು ಜನರು ಮರುಳಾಗಿದ್ದಾರೆ.

ಇದನ್ನೂ ನೋಡಿ : ಕಾವ್ಯಾತ್ಮಕ ಶೈಲಿಯಲ್ಲಿ ಪ್ರಯಾಣಿಕರನ್ನು ಸ್ವಾಗತಿಸಿದ ಪೈಲಟ್ ವಿಡಿಯೊ ವೈರಲ್

ನಾನಂತೂ ಮುಂದಿನ ಜನ್ಮದಲ್ಲಿ ಪೆಂಗ್ವಿನ್ ಆಗಿ ಹುಟ್ಟುತ್ತೇನೆ ಎಂದಿದ್ದಾರೆ ಒಬ್ಬರು. ಕುಂಟಾಬಿಲ್ಲೆ ಹುಟ್ಟಿದ್ದು ಇಲ್ಲಿಯೇ ಅನ್ನಿಸುತ್ತದೆ ಎಂದಿದ್ದಾರೆ ಮತ್ತೊಬ್ಬರು. ಚಿಟ್ಟೆ ನೀನು ಇನ್ನಷ್ಟು ಎತ್ತರಕ್ಕೆ ಹಾರು ಆಕಾಶವನ್ನು ಮುಟ್ಟು ಎನ್ನುತ್ತಿದ್ದಾರೆ ಮಗದೊಬ್ಬರು.

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು? ಹೊಸ ವರ್ಷಕ್ಕೆ ನೀವು ಹೀಗೆ ಇದೇ ಉತ್ಸಾಹದಿಂದ ಕುಣಿದು ಕುಪ್ಪಳಿಸಬೇಕೆನ್ನುವುದು ನಮ್ಮ ಆಶಯ. ಸಣ್ಣಪುಟ್ಟ ಕನಸು ಆಸೆಗಳೆಂಬ ಚಿಟ್ಟೆಗಳನ್ನು ಹೀಗೆ ಪ್ರಯತ್ನಪೂರ್ವಕವಾಗಿ ಬೆನ್ನಟ್ಟಿ ಖುಷಿ ನಿಮ್ಮದಾಗಿಸಿಕೊಳ್ಳಿ.

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ