ಕಾಳಿಂಗ ಸರ್ಪಗಳು ದುರ್ಬಲ ಹಾವುಗಳನ್ನೇ ತಮ್ಮ ಆಹಾರ ಮಾಡಿಕೊಂಡಿರುವುದು ನಿಮಗೆ ಗೊತ್ತಾ?

ನಿಸರ್ಗ ಅಥವಾ ಪ್ರಕೃತಿ ಸುಂದರವಾಗಿರುವಷ್ಟೇ ಕ್ರೂರಿಯೂ ಆಗಬಲ್ಲದು ಎನ್ನುವುದು ನಮಗೆಲ್ಲ ಗೊತ್ತಿರುವ ಅಂಶವೇ. ನಾವು ಕಂಡು ಅನುಭವಿಸಿರುವ ಈಗಲೂ ಕಂಡುಕೊಳ್ಳುವ ಜಾಗತಿಕ ಸತ್ಯ ಇದು. ಇಂಟರ್ನೆಟ್​ನಲ್ಲಿ ನಿಯಮಿತವಾಗಿ ವಿಡಿಯೋಗಳನ್ನು ನೋಡುವವರಿಗೆ ಸೃಷ್ಟಿಯ ಕೆಲ ಕ್ರೌರ್ಯಗಳೊಂದಿಗೆ ಕೌತುಕ, ವೈಚಿತ್ರ್ಯ, ನಂಬಲಾಗದಂಥ ವಿಸ್ಮಯಗಳ ಪರಿಚಯ ಆಗಿರುತ್ತದೆ. ಪ್ರತಿನಿತ್ಯ ದಿಗಿಲು, ಸೋಜಿಗ ಮತ್ತು ದಿಗ್ಭ್ರಮೆ ಹುಟ್ಟಿಸುವಂಥ ವಿಡಿಯೋಗಳು ಇಂಟರ್ನೆಟ್​ನಲ್ಲಿ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಅಪಲೋಡ್​ ಆಗುತ್ತಿರುತ್ತವೆ. ಈ ಕೌತುಕ ಮತ್ತು ಭೀತಿ ಹುಟ್ಟಿಸುವ ವಿಡಿಯೋಗಳ ಪಟ್ಟಿಗೆ ಮತ್ತೊಂದು ಕೆಟಗೆರಿ ಸೇರಿಕೊಂಡಿದೆ. ಕಾಳಿಂಗ ಸರ್ಪವೊಂದು ಮತ್ತೊಂದು ಸರ್ಪವನ್ನು ತಿನ್ನುತ್ತಿರುವ ಒಂದು ಫೋಟೋ ಇಂಟರ್ನೆಟ್​ನಲ್ಲಿ ಹರಿದಾಡುತ್ತಿದ್ದು ಜನರು ಭಯಮಿಶ್ರಿತ ಕುತೂಹಲದಿಂದ ಅದನ್ನು ನೋಡಿ ಕಾಮೆಂಟ್ ಮಾಡುತ್ತಿದ್ದಾರೆ.

ಭಾರತೀಯ ಅರಣ್ಯ ಸೇವೆ ಅಧಿಕಾರಿಯಾಗಿರುವ ಪ್ರವೀಣ್ ಕಾಸ್ವಾನ್ ಅವರು ತಮ್ಮ ಟ್ವಿಟ್ಟರ್​ ಖಾತೆಯಲ್ಲಿ ಈ ಫೋಟೋವನ್ನು ಶೇರ್ ಮಾಡಿದ್ದಾರೆ.

‘ಒಫಿಯೋಫೇಗಸ್ ಹನ್ನಾ. ಕಾಳಿಂಗ ಸರ್ಪವೊಂದು ಕನ್ನಡಕ ಧರಿಸಿದಂತೆ ಕಾಣುವ ಮತ್ತೊಂದು ಹಾವನ್ನು ತಿನ್ನುತ್ತಿದೆ. ಈ ಸರ್ಪಗಳು ನಮಗಿಂತ ದುರ್ಬಲವಾಗಿರುವ ಹಾವುಗಳನ್ನು ತಿಂದು ಜೀವಿಸುತ್ತವೆ,’ ಎಂದು ಅವರು ಚಿತ್ರದ ಕೆಳಗೆ ಬರೆದಿದ್ದಾರೆ.

ಸದರಿ ಚಿತ್ರವನ್ನು ಅವರು ಶೇರ್ ಮಾಡಿದ್ದು ಕೆಲವೇ ದಿನಗಳ ಹಿಂದೆಯಾದರೂ ಈಗಾಗಲೇ 1,700 ಕ್ಕಿಂತ ಹೆಚ್ಚು ಜನ ಅದನ್ನು ಲೈಕ್ ಮಾಡಿದ್ದಾರೆ ಮತ್ತು ಈ ಸಂಖ್ಯೆ ಬೆಳೆಯುತ್ತಲೇ ಇದೆ.

ತಮ್ಮ ಪೋಸ್ಟ್​ಗೆ ಮತ್ತಷ್ಟು ವಿವರಣೆಯನ್ನು ಸೇರಿಸಿರುವ ಪ್ರವೀಣ್ ಅವರು, ‘ಈ ಕಾಳಿಂಗ ಸರ್ಪದ ವೈಜ್ಞಾನಿಕ ಹೆಸರು ಒಫಿಯೋಫೇಗಸ್ ಹನ್ನಾ ಅಗಿದೆ. ಒಫಿಯೋಫೇಗಸ್ ಗ್ರೀಕ್ ಭಾಷೆಯಿಂದ ಎತ್ತಿಕೊಳ್ಳಲಾಗಿದ್ದು ಅದರರ್ಥ ಹಾವು-ತಿನ್ನುವುದು; ಮತ್ತು ಹನ್ನಾ ಗ್ರೀಕ್ ಪುರಾಣದ ಪ್ರಕಾರ ಮರಗಳಲ್ಲಿ ವಾಸಿಸುವ ದೇವತೆಯಾಗಿದೆ. ಹಾಗಾಗಿ ಕಾಳಿಂಗ ಸರ್ಪ ತನ್ನ ಹೆಸರಿಗೆ ತಕ್ಕಂತೆ ಬದುಕುತ್ತದೆ. ಗೂಡುಗಳನ್ನು ನಿರ್ಮಿಸಿಕೊಳ್ಳುವ ಏಕೈಕ ಹಾವು ಇದಾಗಿದೆ,’ ಎಂದು ಬರೆದಿದ್ದಾರೆ.

ಅವರ ಪೋಸ್ಟ್​ಗೆ ಹಲವಾರು ಜನ ಪ್ರತಿಕ್ರಿಯಿಸಿದ್ದಾರೆ. ಕೆಲವರು ಆಶ್ಚರ್ಯ ವ್ಯಕ್ತಪಡಿಸಿದ್ದರೆ, ಬೇರೆ ಕೆಲವರು ಅದಕ್ಕೆ ಸಂಬಂಧಿಸಿದ ಮತ್ತಷ್ಟು ವಿವರಣೆಯನ್ನು ಕೇಳಿದ್ದಾರೆ.

ಒಬ್ಬರು, ‘ಹಾವನ್ನು ತಿನ್ನುವ ಹಾವುಗಳಿರೋದು ಗೊತ್ತಿರಲಿಲ್ಲ. ವಿಷಯವನ್ನು ವಿವರಿಸಿದ್ದಕ್ಕೆ ಥ್ಯಾಂಕ್ಸ್,’ ಅಂತ ಟ್ವೀಟ್​ ಮಾಡಿದ್ದರೆ ಮತ್ತೊಬ್ಬರು, ‘ಅದರ ಕಣ್ಣುಗಳನ್ನೊಮ್ಮೆ ಗಮನಿಸಿ.’ ಎಂದು ಹೇಳಿದ್ದಾರೆ, ಇನ್ನೊಬ್ಬರು, ‘ಉತ್ತಮ ಮಾಹಿತಿ,’ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: Viral Video: ದೈತ್ಯಾಕಾರದ ಹುಲಿ ಎದುರು ನಿಂತು ಕಣ್ಣಲ್ಲಿ ಕಣ್ಣಿಟ್ಟು ‘ಹಲೋ ಬ್ರದರ್​’ ಎಂದ ವ್ಯಕ್ತಿ! ಹುಲಿಯ ರಿಯಾಕ್ಷನ್​ ಹೇಗಿದೆ ನೋಡಿ