Viral: ಪೊಲೀಸರಿಗೆ ತುಂಬಾ ಆಟವಾಡಿಸಿಬಿಟ್ಟಿಯಂತೆ , ಹೌದೇನು ಹ್ಯೂಡಿನಿ?

Viral : ಇದು ಎಲ್ಲಿಂದಲೋ ತಪ್ಪಿಸಿಕೊಂಡು ಲಂಡನ್​ನ ಲ್ಯಾಂಕಾಸ್ಟರ್ ನಗರದ ಬೀದಿಗಳಲ್ಲಿ ಸುತ್ತುತ್ತಿತ್ತು. ಆಗಾಗ ಅವರಿವರ ಮನೆಗಳಲ್ಲಿ ಕುತೂಹಲದಿಂದ ಇಣುಕಿ ನೋಡುತ್ತಿತ್ತು. ಪಾರ್ಕಿಂಗ್ ಲಾಟ್ ಮತ್ತು ಮುಖ್ಯರಸ್ತೆಗಳಲ್ಲಿ ಓಡಾಡುತ್ತ ಟ್ರಾಫಿಕ್ ಅವ್ಯವಸ್ಥೆಗೂ ಕಾರಣವಾಗಿತ್ತು. ಅಂತೂ ಇದನ್ನು ಅಂದರೆ ಈ ಆಡನ್ನು ಪೊಲೀಸರು ಕೊನೆಗೂ ಅರೆಸ್ಟ್​ ಮಾಡಿದ್ದಾರೆ! ಅವರಿಂದ ತಪ್ಪಿಸಿಕೊಳ್ಳುತ್ತ ಬಹುಕಾಲ ಚಳ್ಳೆಹಣ್ಣು ತಿನ್ನಿಸುತ್ತಿದ್ದ ಈ ಮಾಯಾವಿ ಆಡಿಗೆ ಪೊಲೀಸರು ಅಕ್ಕರೆಯಿಂದ ಹ್ಯೂಡಿನಿ (Houdini) ಎಂದು ನಾಮಕರಣ ಮಾಡಿದ್ದಾರೆ.

ಒಂದಷ್ಟು ದಿನಗಳ ಹಿಂದೆ ಲ್ಯಾಂಕಾಸ್ಟರ್​​ನ ಪಾರ್ಕಿಂಗ್ ಲಾಟ್ ಒಂದರ ಬಳಿ ಕಂಡುಬಂದಿದ್ದ ಈ ಆಡನ್ನು ಪೊಲೀಸರು ಹುಡುಕುತ್ತಿದ್ದರು. ‘ಆಡನ್ನು ಹಿಡಿಯಲು ಬಹಳ ದೂರದತನಕ ಬೆನ್ನಟ್ಟಬೇಕಾಯಿತು. ಇದರಿಂದ ಆ ರಸ್ತೆಗಳುದ್ದಕ್ಕೂ ವಾಹನಸಂಚಾರ ಏರುಪೇರಾಯಿತು. ಕೊನೆಗೂ ನನಗದು ಸಿಕ್ಕಿದ್ದು ನೆಮ್ಮದಿ ತಂದಿದೆ. ಈ ನುಣುಚಿಕೊಳ್ಳುವ ಆಡಿಗೆ ನಾವು ಅಕ್ಕರೆಯಿಂದ ಹ್ಯೂಡಿನಿ ಎಂದು ಹೆಸರಿಟ್ಟಿದ್ದೇವೆ’ ಎಂದು ಲ್ಯಾಂಕಾಸ್ಟರ್ ಪೊಲೀಸರು ಫೇಸ್‌ಬುಕ್‌ ಪೋಸ್ಟಿನಲ್ಲಿ ತಿಳಿಸಿದ್ದಾರೆ.

ಇದನ್ನೂ ಓದಿ : Viral: ಈ ಫೋಟೋದಲ್ಲಿರುವ ಖ್ಯಾತ ಹಿನ್ನೆಲೆ ಗಾಯಕಿ ಯಾರು?

ಹಸುಗಳು ಕುರಿಗಳು ನಮ್ಮಲ್ಲಿ ಟ್ರಾಫಿಕ್ ಜಾಮ್ ಸೃಷ್ಟಿಸುವುದು ತೀರಾ ಸಾಮಾನ್ಯ. ಊರಿಂದೂರಿಗೆ ಹೋಗುವ ಕುರಿಹಿಂಡುಗಳನ್ನು ನಾವು ಸಹಯಾತ್ರಿಕರಂತೆಯೇ ಕಾಣುತ್ತೇವೆ. ಎಮ್ಮೆಗಳಂತೂ ರಸ್ತೆಗಳ ನಟ್ಟನಡುವೆ ಮಲಗಿ ಮೆಲುಕು ಹಾಕುತ್ತ ಅವಸರದಲ್ಲಿರುವ ಪ್ರಯಾಣಿಕರತ್ತ ಶಾಂತ ದೃಷ್ಟಿ ಬೀರುವುದು ದಿನನಿತ್ಯದ ವಿದ್ಯಮಾನ. ನಮ್ಮ ದೇಶದಲ್ಲಿ ಇಂಥವು ಸುದ್ದಿಯಾಗುವುದೇ ಇಲ್ಲ. ಬಲುಶಿಸ್ತಿನ ಪಾಶ್ಚಾತ್ಯ ದೇಶಗಳಲ್ಲಿ ಆಡೊಂದು ಪೊಲೀಸರಿಗೆ ಆಟ ಆಡಿಸಿದ್ದು ವಿಶೇಷ ಸಂಗತಿಯಾಗಿದೆ.

ಇದನ್ನೂ ಓದಿ : ನಿನ್ನ ಮೇಕೆಯಮ್ಮ ಅಲ್ಲಿದ್ದಾಳೆ ನೋಡು; ಪುಟ್ಟನ ವಿಡಿಯೋ ವೈರಲ್

ಈ ಆಡಿನ ಕತೆ ಓದಿ ನಿಮಗೇನನ್ನಿಸಿತು? ಪ್ರಾಣಿಗಳು ಮನುಷ್ಯರನ್ನು ಇನ್ನಿತರ ರೀತಿಗಲಲ್ಲಿ ಫಜೀತಿ ಮಾಡಿದ ಸಂಗತಿಗಳು ನಿಮ್ಮ ಅನುಭವಕ್ಕೆ ಬಂದಿವೆಯೇ? ಪ್ರತಿಕ್ರಿಯಿಸಿ.

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ