ರುಚಿಯಾದ ರಬಡಿ ಹೇಗೆ ತಯಾರಿಸುತ್ತಾರೆ ನೋಡಿದ್ದೀರಾ?

Viral Video : ಭಾರತೀಯ ಸಿಹಿತಿಂಡಿಗಳಿಗೆ ಮನಸೋಲದವರು ಯಾರಿದ್ದಾರೆ? ಅದರಲ್ಲಿಯೂ ಹಾಲಿನಿಂದ ಮಾಡಿದ ಖಾದ್ಯಗಳೆಂದರೆ ಎಂಥವರ ನಾಲಗೆಯೂ ನೀರೂರುತ್ತದೆ. ಖಾದ್ಯ ತಯಾರಿಕೆಯ ಪರಿಮಳ ಮೂಗಿಗೆ ಬಡಿದರೆ ಸಾಕು ಅರಿವಿಲ್ಲದೆಯೇ ಕಾಲುಗಳು ಅತ್ತ ಚಲಿಸುತ್ತವೆ. ಇದೀಗ ವೈರಲ್ ಆಗಿರುವ ವಿಡಿಯೋದಲ್ಲಿ ಇಂದೋರ್​ನಲ್ಲಿ ರಬಡಿ (Rabdi) ಖಾದ್ಯವನ್ನು ಹೇಗೆ ತಯಾರಿಸುತ್ತಾರೆ ಎನ್ನುವುದನ್ನು ನೋಡಬಹುದಾಗಿದೆ.

ಹಾಲನ್ನು ಹೀಗೆ ಕಾಯಿಸುತ್ತಾ ಹೋಗಬೇಕು. ಅದು ತಿಳಿಹಳದಿಯಾಗಿ ಕೆನೆಗಟ್ಟುವ ತನಕ. ಕಡಿಮೆ ಉರಿಯಲ್ಲಿ ಕುದಿಸುತ್ತ, ತೇಲಿಬರುವ ಕೆನೆಯನ್ನು ಪಾತ್ರೆಯ ಅಂಚಿಗೆ ಅಂಟಿಸುತ್ತ ಸಾಕಷ್ಟುಕೆನೆ ಸಂಗ್ರಹವಾಗುತ್ತಿದ್ದಂತೆ ಅದಕ್ಕೆ ಬೆಲ್ಲ, ಗೋಡಂಬಿ, ಪಿಸ್ತಾ ಬಾದಾಮ್​ ಸೇರಿಸಿದರೆ ರಬಡಿ ಸಿದ್ಧ. ಇದರ ರುಚಿ ಬಾಸುಂದಿಯಂತೆಯೂ ಅನ್ನಿಸುತ್ತದೆ.

ಇದನ್ನೂ ಓದಿ : ಆಶಾ ಭೋಸ್ಲೆಯ ‘ಆಂಖೋ ಕೀ ಮಸ್ತಿ’ ಹಾಡಿದ ಗಿಲ್ಗಿಟ್ ಬಲ್ಟಿಸ್ತಾನ್​ನ ತರುಣಿ

ಈ ವಿಡಿಯೋ ನೋಡಿದ ಅನೇಕರು ರುಚಿಯ ಬಗ್ಗೆ ಹೊಗಳಿದ್ದಾರೆ. ಇದನ್ನು ಜಿಲೇಬಿಯೊಂದಿಗೆ ತಿನ್ನುತ್ತೇವೆ ಎಂದಿದ್ದಾರೆ ಅನೇಕರು. ನಮ್ಮ ಭಾರತದ ಅತ್ಯಂತ ರುಚಿಯಾದ ಪದಾರ್ಥಗಳಲ್ಲಿ ಇದೂ ಒಂದು ಎಂದಿದ್ದಾರೆ. ಈ ವಿಡಿಯೋ ಚಿತ್ರೀಕರಿಸಿದ್ದು ಇಂದೋರ್​ನ ಲಕ್ಷ್ಮೀ ನಾರಾಯಣ ದೂದ್​ವಾಲಾ ಅಂಗಡಿಯಲ್ಲಿ.

ಇದನ್ನೂ ಓದಿ : 16 ದೋಸೆ ಪ್ಲೇಟ್​ ಒಂದೇ ಕೈಯಲ್ಲಿ; ವಿದ್ಯಾರ್ಥಿ ಭವನದ ಸರ್ವರ್ ಕೌಶಲಕ್ಕೆ ಆನಂದ ಮಹೀಂದ್ರಾ ಮೆಚ್ಚುಗೆ

ರಬಡಿಯ ಇತಿಹಾಸ ಗೊತ್ತೇ? 1,400 ದಶಕಕ್ಕಿಂತಲೂ ಮೊದಲು ಈ ಖಾದ್ಯದ ತಯಾರಿಕೆ ಚಾಲ್ತಿಯಲ್ಲಿತ್ತು ಎಂದು ಚಂಡಿಮಂಗಲ ಎಂಬ ಕೃತಿಯಲ್ಲಿ ಉಲ್ಲೇಖಿಸಲಾಗಿದೆ. 1965ರಲ್ಲಿ ಉಂಟಾದ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ರಬಡಿ ತಯಾರಿಕೆ ಮೇಲೆ ನಿಷೇಧ ಹೇರಲಾಯಿತು. ಏಕೆಂದರೆ ಈ ಸಿಹಿತಿಂಡಿಗಾಗಿ ಅತಿಯಾದ ಹಾಲಿನ ಬಳಕೆಯಾಗುತ್ತಿದೆ ಎನ್ನುವ ಕಾರಣಕ್ಕೆ. ಆದರೆ ಸಿಹಿತಿಂಡಿ ತಯಾರಕರು ನ್ಯಾಯಾಲಯದ ಮೆಟ್ಟಿಲು ಏರಿದರು. ಒಂದು ವರ್ಷದೊಳಗೆ ನ್ಯಾಯಾಲಯವು ಆದೇಶವನ್ನು ಹಿಂಪಡೆಯಿತು.

ನಿಮಗೀಗ ರಬಡಿ ತಿನ್ನುವ ಆಸೆಯಾಯಿತೆ?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ