ಕೋಟಿ ಕೊಟ್ಟರೂ ಸಿಗದ ಇಂಥ ಅಪೂರ್ವ ಕ್ಷಣಗಳು

Viral Video : ಎಳೆಯರೊಂದಿಗೆ ಮಾತನಾಡಲು ವಯಸ್ಸಾದವರ ಮನಸ್ಸು ಹಾತೊರೆಯುತ್ತಿರುತ್ತದೆ. ಆದರೆ ಎಳೆಯರಿಗೆ ಸಮಯವೆಲ್ಲಿದೆ? ಒಮ್ಮೆ ಅವರ ಬಳಿ ಕೂತು ಮಾತನಾಡಿಸಿ ನೋಡಿ. ಮಕ್ಕಳಲ್ಲಿರುವ ಮುಗ್ಧತೆ, ಕುತೂಹಲ ಅವರ ಮುಖದಲ್ಲಿ ಹೇಗೆ ಅರಳುತ್ತದೆ ಎನ್ನುವುದನ್ನು ಗಮನಿಸಿ. ನಿಮ್ಮ ಒಂದು ಸ್ಪರ್ಶ ಅವರಲ್ಲಿರುವ ಆಪ್ತತೆಯ ಸೆಲೆಯನ್ನು ಹೇಗೆ ಸ್ಫುರಣಗೊಳ್ಳುವಂತೆ ಮಾಡುತ್ತದೆಯೆಂದು ಅನುಭವಿಸಿ. ಈ ಎಲ್ಲ ಘಳಿಗೆಗಳು ನಿಮ್ಮನ್ನು ವಿನೀತರನ್ನಾಗಿಸುವ ಭಾವವನ್ನು ಅವಲೋಕಿಸಿಕೊಳ್ಳಿ. ಇದೀಗ ವೈರಲ್ ಆಗಿರುವ ಈ ವಿಡಿಯೋ ನೋಡಿ.

ಸಣ್ಣಸಣ್ಣ ಕ್ಷಣಗಳನ್ನು ಉತ್ಸಾಹದಿಂದ ಅನುಭವಿಸಲು ಸಾಧ್ಯವಾಗುವುದು ಮಕ್ಕಳಲ್ಲಿ ಮತ್ತು ವೃದ್ಧರಲ್ಲಿ ಮಾತ್ರ. ಈ ವಿಡಿಯೋ ನೋಡಿದಿರಲ್ಲವೆ? ಛಾಯಾಗ್ರಾಹಕ ಸುತೇಜ್​ ಸಿಂಗ್​ ಪನ್ನು ಎನ್ನುವವರು ಈ ವೃದ್ಧದಂಪತಿಯ ಮನೆಯಂಗಳಕ್ಕೆ ಹೋಗಿದ್ದಾರೆ. ಇಬ್ಬರೂ ಎಳೆಬಿಸಿಲಿಗೆ ಒಡ್ಡಿಕೊಂಡು ಚಳಿಯಲ್ಲಿ ಬಿಸಿಬಿಸಿ ಚಹಾ ಕುಡಿಯುತ್ತ ಕೂತಿದ್ದಾರೆ. ನಿಮ್ಮದೊಂದು ಫೋಟೋ ತೆಗೆಯಬೇಕು  ಎಂದು ಸುತೇಜ್​ ಕೇಳಿದಾಗ ಇಬ್ಬರೂ ಉತ್ಸಾಹದಿಂದ ಪೋಸ್​ ಕೊಡುತ್ತಾ ಹೋಗುತ್ತಾರೆ.

ಇದನ್ನೂ ಓದಿ : ‘ಎಂಬಿಎ ಚಾಯ್​ವಾಲಾ’ ರೂ. 90 ಲಕ್ಷದ ಮರ್ಸಿಡೀಝ್​ ಕಾರು ಖರೀದಿಸಿದ ವಿಡಿಯೋ ವೈರಲ್

ಒಂದು ಸೆಷನ್​ ಮುಗಿದಮೇಲೆ ಫೋಟೋ ಪ್ರಿಂಟ್​ ಮಾಡಿ ಅದನ್ನು ಆ ವೃದ್ಧೆಗೆ ಕೊಡುತ್ತಿರುವಾಗ, ತಾನು ಹೊದ್ದುಕೊಂಡ ಶಾಲನ್ನು ಚಾಚಿ ಆ ಫೋಟೋ ಇಸಿದುಕೊಳ್ಳುತ್ತಾಳೆ! ಆನಂತರ ಮತ್ತಷ್ಟು ಫೋಟೋ ತೆಗೆಸಿಕೊಳ್ಳುವ ಉತ್ಸಾಹ ಈ ದಂಪತಿಯಲ್ಲಿ ಉಕ್ಕುತ್ತದೆ. ಮೈಚಳಿ ಬಿಟ್ಟು ಇಬ್ಬರೂ ಪೋಸ್ ಕೊಡಲಾರಂಭಿಸುತ್ತಾರೆ. ಈ ಭಾವಪೂರ್ಣ ಮತ್ತು ಪರಿಶುದ್ಧ ಘಳಿಗೆಗಳನ್ನು ಪದೇಪದೆ ನೋಡುತ್ತ ಕುಳಿತಿದ್ದಾರೆ ನೆಟ್ಟಿಗರು.

ಇದನ್ನೂ ಓದಿ : ಆಟೋ ಅಂಕಲ್​ ರೂ. 5ರ ಬದಲಿಗೆ 1 ಯೂರೋ ಕೊಟ್ಟರೆ? ಇದು ವಿಶ್ವಗುರು ಮೂಮೆಂಟ್​ ಎಂದ ನೆಟ್ಟಿಗರು

ಈತನಕ ಈ ಪೋಸ್ಟ್ ಅನ್ನು ಸುಮಾರು ಏಳು ಮಿಲಿಯನ್​ ಜನರು ನೋಡಿದ್ದಾರೆ. ಇನ್ನೇನು ಈ ಪೋಸ್ಟ್​ ಇಷ್ಪಪಟ್ಟವರ ಸಂಖ್ಯೆ 7.5 ಲಕ್ಷಕ್ಕೆ ತಲುಪುತ್ತದೆ. ಸಾವಿರಾರು ಜನರು ಈ ವಿಡಿಯೋ ಅನ್ನು ಇಷ್ಟಪಟ್ಟು ಪ್ರತಿಕ್ರಿಯಿಸಿದ್ದಾರೆ. ಹಿರಿಯರಿಗೆ ಹಿಡಿ ಪ್ರೀತಿಗಿಂತ ಇನ್ನೇನು ಬೇಡ ಎಂದು ಹೇಳಿದ್ದಾರೆ. ಈ ವಿಡಿಯೋ ಬಹಳ ಅಮೂಲ್ಯ, ನನ್ನನ್ನು ಇದು ವಿನೀತನನ್ನಾಗಿಸಿದೆ ಎಂದಿದ್ದಾರೆ ಒಬ್ಬರು. ಇಂಥ ಸರಳತೆ, ಸುಂದರತೆ ಜಗತ್ತಿನಲ್ಲಿ ಇನ್ನೇನು ಕೊಟ್ಟರೂ ಸಿಗಲಾರದು ಎಂದಿದ್ದಾರೆ ಮತ್ತೊಬ್ಬರು. ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ