World Environment Day 2022: ವೇಮಗಲ್ ಚೆಲ್ಲಕುಟ್ಟಪ್ಪನಿಗೊಂದು ಹಸಿರು ಸಲಾಂ!

World Environment Day 2022: ದಿನೇದಿನೆ ಹಸಿರು ಕ್ಷೀಣಿಸುತ್ತಿರುವ ಈ ನೆಲದಲ್ಲಿ ಸ್ಫೂರ್ತಿ ಚೇತನಗಳ ಸಂಖ್ಯೆ ವಿರಳವೂ ಹೌದು. ಒಂದಾನೊಂದು ಕಾಲದಲ್ಲಿ ಸಾವಿರಾರು ಕೆರೆ ಮತ್ತು ಸಿರಿಧಾನ್ಯಗಳಿಗೆ ಹೆಸರಾಗಿದ್ದ ಕೋಲಾರ ಜಿಲ್ಲೆಯ ವೇಮಗಲ್ ಗ್ರಾಮದ 80 ವರ್ಷ ಪ್ರಾಯದ ಚೆಲ್ಲಕುಟ್ಟಪ್ಪ ತನ್ನದೇ ಆದ ಹಸಿರು ಹೆಜ್ಜೆಗಳನ್ನು ಮೂಡಿಸುತ್ತ ಬಂದಿದ್ದಾರೆ. ಸತ್ತವರ ಸಮಾಧಿಯನ್ನು ತರಹೇವಾರಿ ಗ್ರಾನೈಟ್ ಕಲ್ಲಿನಲ್ಲಿ ವಿನ್ಯಾಸಗೊಳಿಸಿ ನಿರ್ಮಿಸುವ ಹಣವಂತರ ಸಂಖ್ಯೆ ಜಾಸ್ತಿಯಾಗುತ್ತಿರುವ ಈ ಕಾಲದಲ್ಲಿ, ತನ್ನವರು ಸತ್ತಾಗ ಅವರಿಗೂ ನೆರಳು ಸಿಗಲಿ. ಅಲ್ಲಿ ನೆಟ್ಟ ಗಿಡ ಇತರರಿಗೂ ನೆರಳನ್ನು ಕೊಡಲಿ ಎಂಬ ಆಶಯದೊಂದಿಗೆ ಅವರ ಸಮಾಧಿಯ ಬಳಿ ಅತ್ತಿ, ಆಲ, ಅರಳಿ ಮರಳಗಳನ್ನು ನೆಟ್ಟು ಪೋಷಿಸಿ ಆ ಮರಗಳಲ್ಲಿ ತನ್ನವರ ನೆನಪುಗಳನ್ನು ಮೆಲಕು ಹಾಕುವುದು ಒಂದು ಸೂಕ್ಷ್ಮ ಪ್ರಜ್ಞೆ ಮತ್ತು ಪರಿಸರ ಪ್ರೇಮ.
ಡೇವಿಡ್ ಕುಮಾರ್. ಎ (David Kumar A)

ಚೆಲ್ಲಕುಟ್ಟಪ್ಪ ತನ್ನ ತಂದೆ, ತಾಯಿ ಮತ್ತು ಇತರ ಸದಸ್ಯರು ಕಾಲವಾದಾಗ ಅವರ ಸವಿನೆನಪಿಗಾಗಿ ಸುಮಾರು 55 ವರ್ಷಗಳಿಂದಲೂ ಮರಗಳನ್ನು ನೆಡುತ್ತಾ ಬಂದಿದ್ದಾರೆ. ಅವರು ನೆಟ್ಟ ಮರಗಳು ಇಂದು ಹೆಮ್ಮರಗಳಾಗಿ, ಹಸಿರುಮಯವಾಗಿ ಕೇವಲ ಸತ್ತವರ ಸಮಾಧಿಗೆ ಮಾತ್ರ ನೆರಳನ್ನು ನೀಡದೆ ಪಕ್ಷಿಗಳಿಗೆ ಆಹಾರ, ಗೂಡು ಕಟ್ಟಿ ಮರಿಮಾಡಲು ಆಶ್ರಯ, ದಣಿವಾದವರಿಗೆ ನೆರಳು ಹೀಗೆ ನಾನಾ ಬಗೆಯಲ್ಲಿ ಅನುಕೂಲಕರವಾಗಿವೆ. ವೇಮಗಲ್ ಬಳಿಯ ಚೆನ್ನಪ್ಪನ ಕೆರೆ ಅಂಗಳದ ಮೂಲೆಯಲ್ಲಿ 10ಕ್ಕೂ ಹೆಚ್ಚು ಅತ್ತಿ ಮತ್ತು ಅರಳಿ ಮರಗಳು ಕಂಗೊಳಿಸುವುದನ್ನು ನಾವು ನೋಡಬಹುದು. ಈ ಮರಗಳ ಕೆಳಗೆ ವೀರಗಲ್ಲುಗಳನ್ನೂ ಕಾಣಬಹುದಾಗಿದೆ. ಶತಮಾನಗಳ ಹಿಂದೆ ಊರು, ಪ್ರಾಂತ್ಯದ ರಕ್ಷಣೆಗೆ ಹೋರಾಡಿ ಮಡಿದವರ ಬಗ್ಗೆ ಅಲ್ಲಿ ವಿವರಗಳನ್ನು ಕಾಣಬಹುದು.

ಇದನ್ನೂ ಓದಿ : ಶರಣು ಮಣ್ಣಿಗೆ : ಮನುಷ್ಯರು ಮೋಸ ಮಾಡಬಹುದು ಮಣ್ಣು ಎಂದಿಗೂ ವಂಚಿಸಲಾರದು

‘ಈ ಕೆಲಸದಲ್ಲಿ ತೊಡಗಿಕೊಳ್ಳುವುದರಲ್ಲಿ ನನಗಂತೂ ನೆಮ್ಮದಿ ಇದೆ. ಮನುಷ್ಯ ಸ್ವಾರ್ಥದ ಹಪಾಹಪಿಗೆ ಬಿದ್ದಿದ್ದಾನೆ. ಆದರೆ ಏನೇ ಆದರೂ ಉಸಿರು ಕೊಡುವುದು ಮರಗಳೇ ಅಲ್ಲವೆ? ಜೀವ ಇರುವ ತನಕ ಗಿಡ ನೆಡುತ್ತಲೇ ಇರುತ್ತೇನೆ. ಸ್ಥಳ ಕೊಟ್ಟರೆ ಇನ್ನೂ ಜಾಸ್ತಿ ಗಿಡಗಳನ್ನು ನೆಡುತ್ತೇನೆ’ ಎನ್ನುವ 80ರ ಚೆಲ್ಲಕುಟ್ಟಪ್ಪನೊಳಗೆ ಓರ್ವ ಪರಿಸರ ಪ್ರೇಮಿ ಇನ್ನೂ ಜಾಗೃತನಾಗಿದ್ದಾನೆ. ಮೊನ್ನೆಯಷ್ಟೇ ಛತ್ರಿ ಮಾತ್ರದ ಗಿಡವನ್ನು ನೆಟ್ಟು ಅದನ್ನು ಮೇಕೆ, ದನಗಳು ತಿನ್ನದಂತೆ, ಗಿಡದ ಸುತ್ತ ಬಿದಿರು ಕಡ್ಡಿಗಳನ್ನು ನೆಟ್ಟು ಅದರ ಬೆಳವಣಿಗೆಯನ್ನು ಪ್ರತಿ ದಿನ ಬಂದು ನೋಡುವಷ್ಟು, ಗಿಡದೊಂದಿಗೆ ಮಾತನಾಡುವಷ್ಟು ಪ್ರೀತಿಯನ್ನು ಇನ್ನೂ ಉಳಿಸಿಕೊಂಡಿದ್ದಾರೆ.  ಆಗಲಿ ಹೋದ ತನ್ನವರ ಆತ್ಮವನ್ನು ಗಿಡದ ಚಿಗುರಿನಲ್ಲಿ ಕಾಣಬಯಸುತ್ತಾರೆ.

‘ಮರ ಬೆಳೆಸಿದವನು ಎಂದಿಗೂ ಸಾಯಲಾರ ‘ – ‘ A gardener never dies’

ಪ್ರತಿಕ್ರಿಯೆಗಾಗಿ : tv9kannadadigital@gmail.com