ಅತ್ತ ಮೈಸೂರಲ್ಲಿ ದಸರಾ ವೈಭವ, ಇತ್ತ ಚಾಮರಾಜನಗರದಲ್ಲಿ ನಿರಾಸೆ; ಸತತ 2ನೇ ವರ್ಷವೂ ದಸರಾ ರದ್ದು
Updated on:Oct 08, 2026 | 4:25 PM
ಮೈಸೂರು ದಸರಾ ವೈಭವದ ನಡುವೆ, ಚಾಮರಾಜನಗರದಲ್ಲಿ ಸತತ ಎರಡನೇ ವರ್ಷವೂ ದಸರಾ ಮಹೋತ್ಸವ ರದ್ದಾಗಿದೆ. ಬರಗಾಲದ ನೆಪವೊಡ್ಡಿ ದಸರಾ ನಿಲ್ಲಿಸಿರುವುದು ಜಾನಪದ ಕಲಾವಿದರಲ್ಲಿ ತೀವ್ರ ಬೇಸರ ಮೂಡಿಸಿದೆ. ಅವಕಾಶ ವಂಚಿತ ಕಲಾವಿದರು ಸ್ವತಃ ಹಣ ಸಂಗ್ರಹಿಸಿ ಪರ್ಯಾಯ ದಸರಾ ಆಚರಿಸಲು ಮುಂದಾಗಿದ್ದಾರೆ, ಇದು ಜಿಲ್ಲಾಡಳಿತದ ನಡೆಗೆ ಕಲಾವಿದರ ಆಕ್ರೋಶದ ಪ್ರತೀಕವಾಗಿದೆ.
ಮೈಸೂರು ದಸರಾ ಮಹೋತ್ಸವ ಅದ್ದೂರಿಯಾಗಿ ನಡೆಯಲು ಸಿದ್ಧವಾಗುತ್ತಿದ್ದರೂ, ಪಕ್ಕದ ಗಡಿ ಜಿಲ್ಲೆ ಚಾಮರಾಜನಗರದಲ್ಲಿ ಸತತ ಎರಡನೇ ವರ್ಷವೂ ದಸರಾ ಮಹೋತ್ಸವ ರದ್ದುಗೊಂಡಿದೆ. ಮೈಸೂರು ಹಿಂದೆಂದೂ ಕಂಡರಿಯದ ದಸರಾ ಆಚರಣೆಗೆ ಸಿದ್ಧವಾಗಿದ್ದರೆ, ಚಾಮರಾಜನಗರದ ಜಾನಪದ ಕಲಾವಿದರು ನಿರಾಸೆಯಲ್ಲಿದ್ದಾರೆ. ಚಾಮರಾಜನಗರ ಜಿಲ್ಲೆಯನ್ನು ಜಾನಪದ ಕಲೆಗಳ ತವರೂರು ಎಂದು ಕರೆಯಲಾಗುತ್ತದೆ. ಇಲ್ಲಿ ಸಾವಿರಾರು ಜಾನಪದ ಕಲಾವಿದರು ಇದ್ದು, ದಸರಾ ಮಹೋತ್ಸವದಲ್ಲಿ ತಮ್ಮ ಕಲಾಪ್ರದರ್ಶನಕ್ಕೆ ವೇದಿಕೆ ಸಿಗುತ್ತದೆ ಎಂದು ಕಾತರಿಸುತ್ತಿದ್ದರು. ಆದರೆ, ಜಿಲ್ಲಾಡಳಿತ ಬರಗಾಲದ ನೆಪವೊಡ್ಡಿ ಈ ವರ್ಷ ದಸರಾ ಆಚರಣೆ ಇಲ್ಲ ಎಂದು ಘೋಷಿಸಿದೆ. ಈ ನಿರ್ಧಾರದಿಂದಾಗಿ ಕಲಾವಿದರಿಗೆ ದೊಡ್ಡ ಆರ್ಥಿಕ ನಷ್ಟವಾಗಿದ್ದು, ಕಲಾ ಪ್ರದರ್ಶನಕ್ಕೆ ಅವಕಾಶವೂ ಸಿಗದಂತಾಗಿದೆ. ತಮ್ಮ ಬೇಸರ ವ್ಯಕ್ತಪಡಿಸಿರುವ ಕಲಾವಿದರು, ಜಿಲ್ಲಾಡಳಿತದ ನಡೆಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮೈಸೂರಿಗೆ ಹೋಗಿ ಅವಕಾಶ ಕೇಳಲು ಎಲ್ಲರಿಗೂ ಸಾಧ್ಯವಿಲ್ಲ. ಹೀಗಾಗಿ, ಕಲಾವಿದರು ಸ್ವತಃ ಹಣ ಸಂಗ್ರಹಿಸಿ ಪರ್ಯಾಯ ದಸರಾ ಆಚರಿಸಲು ನಿರ್ಧರಿಸಿದ್ದಾರೆ.
ಮತ್ತಷ್ಟು ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published on: Oct 08, 2026 04:24 PM
