ಮುಂಬೈ ಸಾಫ್ಟ್‌ವೇರ್ ಉದ್ಯೋಗ ಬಿಟ್ಟು ಬಂದ ಯುವಕ: ಧಾರವಾಡದ ಹಳೆಯ ಮನೆಯಲ್ಲೇ ಕಾಶಿಯ ವೈಭವ ಮರುಕಳಿಸಿದ ಕಟ್ಟಿಮಠ ಕುಟುಂಬ

ಧಾರವಾಡ, ಅ.12: ಕಿತ್ತೂರು ಸಂಸ್ಥಾನದ ರಾಜಗುರುಗಳ ವಂಶಸ್ಥರಾದ ಧಾರವಾಡದ ಕಟ್ಟಿಮಠ ಕುಟುಂಬವು ತಮ್ಮ ಪೂರ್ವಜರ ಪರಂಪರೆಯನ್ನು ಮುಂದುವರೆಸಿಕೊಂಡು ಅದ್ಧೂರಿ ನವರಾತ್ರಿ ಉತ್ಸವವನ್ನು ಆಚರಿಸುತ್ತಿದೆ. ಧಾರವಾಡ ನಗರದ ಮಂಗಳವಾರ ಪೇಟೆಯಲ್ಲಿರುವ ಸುಮಾರು 150-200 ವರ್ಷಗಳ ಹಳೆಯ ಮನೆಯಲ್ಲಿ, ಈ ಆಚರಣೆಯು ತಲೆಮಾರುಗಳಿಂದ ನಡೆದುಬಂದಿದೆ. ಕುಟುಂಬದ ಯುವಕ, ಸಾಫ್ಟ್‌ವೇರ್ ಎಂಜಿನಿಯರ್ ಕಾರ್ತಿಕ್ ಕಟ್ಟಿಮಠ, ಕಳೆದ ಒಂದೂವರೆ ದಶಕದಿಂದ ಈ ನವರಾತ್ರಿ ಆಚರಣೆಗೆ ವಿಶಿಷ್ಟ ಸ್ಪರ್ಶ ನೀಡುತ್ತಿದ್ದಾರೆ. ಈ ಬಾರಿ ಕಾಶಿಕಾ ನವರಾತ್ರಿ ಉತ್ಸವ ಎಂಬ ಪರಿಕಲ್ಪನೆಯಲ್ಲಿ, ಕಾಶಿಯ ವಿವಿಧ ದೇವಸ್ಥಾನಗಳ ಪ್ರತಿಕೃತಿಗಳನ್ನು ನಿರ್ಮಿಸಿ, ಅಲ್ಲಿನ ದೇವತೆಗಳನ್ನು ಪ್ರತಿಷ್ಠಾಪಿಸಿ ಪೂಜೆ ಸಲ್ಲಿಸಲಾಗುತ್ತಿದೆ. ಬಿಂದು ಮಾಧವ, ವಿಶಾಲಾಕ್ಷಿ, ಗಂಗಾ, ಕಾಶಿಕಾ ದೇವಿಯರಿಗೆ ಪ್ರತಿದಿನ ವಿಭಿನ್ನ ಪೂಜೆಗಳು ನಡೆಯುತ್ತವೆ. ಮುಂಬೈನಲ್ಲಿ ಉದ್ಯೋಗದಲ್ಲಿರುವ ಕಾರ್ತಿಕ್, ರಜೆ ಹಾಕಿ ಬಂದು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ, ಸ್ವತಃ ದೇವಿಯ ಅಲಂಕಾರ ಮತ್ತು ಮೂರ್ತಿಗಳ ನಿರ್ಮಾಣದಲ್ಲಿ ತೊಡಗಿಸಿಕೊಳ್ಳುತ್ತಾರೆ. ಈ ಧಾರ್ಮಿಕ ಕಾರ್ಯಕ್ರಮಗಳು ಧಾರವಾಡದ ಜನರಿಗೆ ಕಾಶಿಯ ಧಾರ್ಮಿಕ ಪರಂಪರೆಯನ್ನು ಪರಿಚಯಿಸುತ್ತಿವೆ. ಆಧ್ಯಾತ್ಮಿಕ ಗುರುಗಳು ಮತ್ತು ಮಠಾಧೀಶರೂ ಈ ವಿಶಿಷ್ಟ ಆಚರಣೆಗೆ ಭೇಟಿ ನೀಡುತ್ತಾರೆ.

ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ