‘ಕೆ. ಶಿವರಾಮ್​ ಅವರಿಗಾಗಿಯೇ ಆ ಸಿನಿಮಾ ಮಾಡಿದ್ವಿ’: ತರುಣ್​ ಸುಧೀರ್​ ಭಾವುಕ ಮಾತು

ಸಿನಿಮಾ ನಟ, ನಿವೃತ್ತ ಐಎಎಸ್​ ಅಧಿಕಾರಿ ಕೆ. ಶಿವರಾಮ್​ ಅವರ ನಿಧನಕ್ಕೆ (K Shivaram Death) ಕನ್ನಡ ಚಿತ್ರರಂಗದ ಅನೇಕರು ಕಂಬನಿ ಮಿಡಿದಿದ್ದಾರೆ. ಗುರುವಾರ (ಫೆ.29) ಅವರು ಇಹಲೋಕ ತ್ಯಜಿಸಿದರು. ಇಂದು (ಮಾರ್ಚ್​ 1) ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಸಿನಿಮಾ ಕ್ಷೇತ್ರದ ಸೆಲೆಬ್ರಿಟಿಗಳು, ರಾಜಕೀಯದ ಗಣ್ಯರು, ಅಪಾರ ಸಂಖ್ಯೆಯ ಬೆಂಬಲಿಗರು ಹಾಗೂ ಅಭಿಮಾನಿಗಳು ಬಂದು ಅಂತಿಮ ನಮನ ಸಲ್ಲಿಸಿದ್ದಾರೆ. ‘ಕಾಟೇರ’ ನಿರ್ದೇಶಕ ತರುಣ್​ ಸುಧೀರ್​ (Tharun Sudhir) ಕೂಡ ಅಂತಿಮ ದರ್ಶನ ಪಡೆದಿದ್ದಾರೆ. ಬಳಿಕ ಮಾಧ್ಯಮಗಳ ಜೊತೆ ಮಾತನಾಡಿ, ಶಿವರಾಮ್​ ಜೊತೆಗಿನ ಒಡನಾಟದ ದಿನಗಳನ್ನು ತರುಣ್​ ಸುಧೀರ್​ ನೆನಪಿಸಿಕೊಂಡಿದ್ದಾರೆ. ಕೆ. ಶಿವರಾಮ್​ (K Shivaram) ಅವರು ಕೊನೆಯದಾಗಿ ನಟಿಸಿದ್ದ ‘ಟೈಗರ್​’ ಚಿತ್ರಕ್ಕೆ ತರುಣ್​ ಸುಧೀರ್​ ಅವರು ಕಥೆ ಬರೆದಿದ್ದರು. ‘ನಾವು ಆ ಸಿನಿಮಾದ ಕಥೆ ಬರೆಯುವಾಗ ಹೀರೋ ಪ್ರದೀಪ್​ಗಿಂತಲೂ ಹೆಚ್ಚಾಗಿ ಶಿವರಾಮ್​ ಅವರ ಮೇಲೆ ನನಗೆ ಕ್ರೇಜ್​ ಇತ್ತು. ಅವರನ್ನು ಡಿಫರೆಂಟ್​ ಆಗಿ ತೋರಿಸಬೇಕು ಎಂಬ ಉದ್ದೇಶದಿಂದ ಮಾಡಿದ ಸಿನಿಮಾ ಅದು. ತುಂಬಾ ಇಷ್ಟಪಟ್ಟು ಅವರನ್ನು ಬೇರೆ ಬೇರೆ ಶೇಡ್​ಗಳಲ್ಲಿ ತೋರಿಸಿದ್ವಿ. ಅದು ಅವರ ಕೊನೆಯ ಸಿನಿಮಾ ಆಗುತ್ತದೆ ಅಂತ ನಾವು ಅಂದುಕೊಂಡಿರಲಿಲ್ಲ. ಯಾಕೆಂದರೆ, ಆ ಚಿತ್ರದ ಬಳಿಕವೂ ಅವರು ಬೇರೆ ಸಿನಿಮಾದ ಪ್ಲ್ಯಾನ್​ ಬಗ್ಗೆ ಮಾತನಾಡುತ್ತಿದ್ದರು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ’ ಎಂದು ತರುಣ್​ ಸುಧೀರ್​ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.