ದಾಂಪತ್ಯ ಜೀವನದಲ್ಲಿ ಈ ಐದು ವಿಷಯಗಳನ್ನು ಗಂಡನಿಗೆ ಹೆಂಡತಿ ಹೇಳಲೇಬಾರದು!

ಮನೆಯಲ್ಲಿ ಸುಖ, ಸಂತೋಷ ಮತ್ತು ನೆಮ್ಮದಿ ನೆಲೆಸಲು ಕುಟುಂಬ ಸದಸ್ಯರ ನಡುವೆ ಕೆಲವು ನೀತಿ-ನಿಬಂಧನೆಗಳನ್ನು ಅನುಸರಿಸುವುದು ಅತಿ ಮುಖ್ಯ. ವಿಶೇಷವಾಗಿ ದಾಂಪತ್ಯ ಜೀವನ ಸೌಖ್ಯಮಯವಾಗಿರಲು ಪತ್ನಿಯರು ಪತಿಯೊಂದಿಗೆ ಕೆಲವು ವಿಷಯಗಳನ್ನು ಗೋಪ್ಯವಾಗಿ ಇಟ್ಟುಕೊಳ್ಳಬೇಕು ಎಂದು ಆಚಾರ್ಯ ಚಾಣಕ್ಯರು ತಮ್ಮ ನೀತಿಗಳಲ್ಲಿ ಹೇಳಿರುವುದಾಗಿ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞ ಡಾ ಬಸವರಾಜ ಗುರೂಜಿ ವಿವರಿಸಿದ್ದಾರೆ. ಮುಖ್ಯವಾಗಿ ಐದು ವಿಷಯಗಳನ್ನು ಪತ್ನಿಯರು ಜಾಗರೂಕತೆಯಿಂದ ನಿರ್ವಹಿಸಿದರೆ ಗಂಡ-ಹೆಂಡತಿಯ ಬಾಂಧವ್ಯ ಸುಂದರವಾಗಿರುತ್ತದೆ ಎಂದು ಚಾಣಕ್ಯರು ವಿವರಿಸಿರುವುದಾಗಿ ಅವರು ಮಾಹಿತಿ ನೀಡಿದ್ದಾರೆ. ಮೊದಲನೆಯದಾಗಿ, ತವರು ಮನೆಯ ವಿಚಾರಗಳು, ಆರ್ಥಿಕ ಸ್ಥಿತಿ ಅಥವಾ ಸಮಸ್ಯೆಗಳನ್ನು ಪದೇ ಪದೇ ಗಂಡನೊಂದಿಗೆ ಹಂಚಿಕೊಳ್ಳಬಾರದು. ಇದು ಕೆಲವೊಮ್ಮೆ ಕಲಹಗಳಿಗೆ ಕಾರಣವಾಗಬಹುದು.

ಎರಡನೆಯದಾಗಿ, ಕುಟುಂಬದ ಒಳಿತಿಗಾಗಿ ಅಥವಾ ಮಕ್ಕಳಿಗಾಗಿ ಒಂದೆರಡು ಬಾರಿ ಸುಳ್ಳು ಹೇಳುವುದು ಅನಿವಾರ್ಯವಾದರೂ, ಪದೇ ಪದೇ ಸುಳ್ಳು ಹೇಳುವುದರಿಂದ ದಾಂಪತ್ಯದಲ್ಲಿ ಬಿರುಕು ಮೂಡಬಹುದು. ಮೂರನೆಯದಾಗಿ, ಪತ್ನಿ ಎಂದಿಗೂ ತನ್ನ ಗಂಡನನ್ನು ಬೇರೆಯವರೊಂದಿಗೆ ಹೋಲಿಕೆ ಮಾಡಬಾರದು. ಅವರ ಆದಾಯ, ಜೀವನಶೈಲಿ ಅಥವಾ ಸಾಧನೆಗಳನ್ನು ಉಲ್ಲೇಖಿಸಿ ಗಂಡನನ್ನು ನಿಂದಿಸುವುದು ಸಂಬಂಧಕ್ಕೆ ಹಾನಿಕಾರಕ. ನಾಲ್ಕನೆಯದಾಗಿ, ತನ್ನ ವೈಯಕ್ತಿಕ ಉಳಿತಾಯದ ಬಗ್ಗೆ ಗಂಡನಿಗೆ ವಿವರವಾಗಿ ಹೇಳಬಾರದು. ಇದು ಗಂಡನನ್ನು ನಿರ್ಲಕ್ಷ್ಯವನ್ನಾಗಿ ಮಾಡಬಹುದು ಅಥವಾ ಹಣಕಾಸಿನ ವಿಚಾರದಲ್ಲಿ ಬೇಜವಾಬ್ದಾರಿಯನ್ನಾಗಿಸಬಹುದು. ಕೊನೆಯದಾಗಿ, ಎಷ್ಟೇ ಕೋಪ ಅಥವಾ ಬೇಸರ ಇದ್ದರೂ ಗಂಡನ ಜೊತೆ ತಾಳ್ಮೆಯಿಂದ, ನಗುಮುಖದಿಂದ ವ್ಯವಹರಿಸಬೇಕು. ಸಮಸ್ಯೆಗಳಿದ್ದರೆ ಅವುಗಳನ್ನು ನೇರವಾಗಿ ಮತ್ತು ಸಮಾಧಾನದಿಂದ ಹೇಳಿಕೊಳ್ಳಬೇಕು. ಈ ಚಾಣಕ್ಯ ನೀತಿಗಳು ದಾಂಪತ್ಯ ಜೀವನದಲ್ಲಿ ಸಾಮರಸ್ಯ ಮತ್ತು ಯಶಸ್ಸಿಗೆ ದಾರಿ ತೋರಿಸುತ್ತವೆ ಎಂದು ಗುರೂಜಿ ಹೇಳಿದ್ದಾರೆ.