Nobel Prize 2021: ಪ್ರಸಕ್ತ ವರ್ಷದ ಭೌತಶಾಸ್ತ್ರ ಕ್ಷೇತ್ರದ ನೊಬೆಲ್​ ಪ್ರಶಸ್ತಿ ಈ ಮೂವರು ವಿಜ್ಞಾನಿಗಳಿಗೆ

ಭೌತಶಾಸ್ತ್ರ ಕ್ಷೇತ್ರದಲ್ಲಿ ನೀಡಲಾಗುವ ನೊಬೆಲ್​ ಪ್ರಶಸ್ತಿ(Nobel Prize In Physics)ಗೆ ಈ ಬಾರಿ (2021)ವಿಜ್ಞಾನಿಗಳಾದ ಸಿಯುಕುರೊ ಮನಾಬೆ(Syukuro Manabe), ಕ್ಲಾಸ್ ಹ್ಯಾಸೆಲ್ಮನ್ (Klaus Hasselmann) ಮತ್ತು ಜಾರ್ಜಿಯೊ ಪ್ಯಾರಿಸಿ(Giorgio Parisi) ಪಾತ್ರರಾಗಿದ್ದಾರೆ. ನಿನ್ನೆ ವೈದ್ಯಕೀಯ ಕ್ಷೇತ್ರದ ನೊಬೆಲ್​ ಪ್ರಶಸ್ತಿ ಘೋಷಿಸಿದ್ದ ನೊಬೆಲ್ ಅಸ್ಸೆಂಬ್ಲಿ ಇಂದು ಭೌತಶಾಸ್ತ್ರ ಕ್ಷೇತ್ರಕ್ಕೆ ನೊಬೆಲ್​ ಪ್ರಶಸ್ತಿ ಪ್ರಕಟಿಸಿದೆ. ಸಂಕೀರ್ಣ ಭೌತಿಕ ವ್ಯವಸ್ಥೆಯನ್ನು ನಾವೆಲ್ಲರೂ ಅರ್ಥ ಮಾಡಿಕೊಳ್ಳಲು ಈ ಮೂವರೂ ವಿಜ್ಞಾನಿಗಳು ನೀಡಿದ ಅಭೂತಪೂರ್ವ ಕೊಡುಗೆಯನ್ನು ಪರಿಗಣಿಸಿ ನೊಬೆಲ್​ ನೀಡಲಾಗುತ್ತಿದೆ ಎಂದು ನೊಬೆಲ್​ ಕಮಿಟಿ ತಿಳಿಸಿದೆ.

ಈ ಮೂವರಲ್ಲಿ ಸಿಯುಕುರೊ ಮನಾಬೆ ಪ್ರಿನ್ಸ್ಟನ್ ವಿಶ್ವವಿದ್ಯಾಲಯದಲ್ಲಿ ಹಿರಿಯ ಹವಾಮಾನ ತಜ್ಞ. ವಾತಾವರಣದಲ್ಲಿ ಇಂಗಾಲದ ಡೈಆಕ್ಸೈಡ್​ ಪ್ರಮಾಣ ಹೆಚ್ಚುವುದರಿಂದ ಭೂ ಮೇಲ್ಮೈ ಮೇಲೆ ಉಷ್ಣತೆ ಹೇಗೆ ಹೆಚ್ಚುತ್ತದೆ ಎಂಬುದನ್ನು ಅವರು ತೋರಿಸಿದ್ದಾರೆ. ಈ ನಿಟ್ಟಿನಲ್ಲಿ ಅವರ ಸಾಧನೆ ಗುರುತಿಸಿ ನೊಬೆಲ್​ ನೀಡಲಾಗಿದೆ. ಹಾಗೇ, ಕ್ಲಾಸ್ ಹ್ಯಾಸೆಲ್ಮನ್ ಜರ್ಮನಿಯ ಹವಾಮಾನಶಾಸ್ತ್ರ ಸಂಸ್ಥೆಯಾದ ಮ್ಯಾಕ್ಸ್​ ಪ್ಲ್ಯಾಂಕ್​​ನಲ್ಲಿ ಪ್ರೊಫೆಸರ್​ ಆಗಿದ್ದು, weather (ಹವಾಮಾನ) ಮತ್ತು climate (ವಾಯುಗುಣ)ವನ್ನು ಒಂದಕ್ಕೊಂದನ್ನು ಸಂಪರ್ಕಿಸಿ, ಜಂಟಿ ಮಾಡೆಲ್​ ರಚಿಸಿದ್ದರು. ಈ ಮೂಲಕ ವೆದರ್​ ಪದೇಪದೆ ಬದಲಾಗುತ್ತಿದ್ದರೂ, ಕ್ಲೈಮೇಟ್​ ಮಾಡೆಲ್​ಗಳು ಹೇಗೆ ವಿಶ್ವಾಸಾರ್ಹವಾಗಿರುತ್ತವೆ ಎಂಬುದಕ್ಕೆ ಉತ್ತರ ಕಂಡು ಹಿಡಿದಿದ್ದಾರೆ. ಇದೇ ಸಾಧನೆಗೆ ಈಗ ಅವರಿಗೆ ನೊಬೆಲ್​ ಒಲಿದಿದೆ.

ಇನ್ನು ಜಾರ್ಜಿಯೋ ಪ್ಯಾರಿಸಿಯವರು ರೋಮ್​​ನ ಸಪಿಯಾನ್ಜಾ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕರಾಗಿದ್ದಾರೆ. ಅಸ್ತವ್ಯಸ್ತಗೊಂಡ ಸಂಕೀರ್ಣ ಅಂಶಗಳಲ್ಲಿ ಅಡಗಿರುವ ಗುಪ್ತ ಮಾದರಿಯನ್ನು ಅನ್ವೇಷಿಸುವ ಮೂಲಕ, ಇವರು ಭೌತಶಾಸ್ತ್ರದ ಸಂಕೀರ್ಣ ವ್ಯವಸ್ಥೆಯ ಥೇರಿಯನ್ನು ಅರ್ಥ ಮಾಡಿಕೊಳ್ಳಲು ಅನುಕೂಲ ಮಾಡಿಕೊಟ್ಟಿದ್ದಾರೆ. ಈ ಮೂಲಕ ಅದ್ಭುತ ಕೊಡುಗೆ ನೀಡಿದ್ದನ್ನು ಪರಿಗಣಿಸಿ ನೊಬೆಲ್​ ನೀಡಲಾಗುತ್ತಿದೆ.

ಇದನ್ನೂ ಓದಿ: Nobel Prize 2021 ಅಮೆರಿಕದ ಡೇವಿಡ್ ಜೂಲಿಯಸ್ ಮತ್ತು ಆರ್ಡೆಮ್ ಪಟಪೌಟಿಯನ್​​ಗೆ 2021ರ ವೈದ್ಯಕೀಯ ನೊಬೆಲ್ ಪ್ರಶಸ್ತಿ

ಚಿರಾಗ್ ಪಾಸ್ವಾನ್​​ಗೆ ಹೆಲಿಕಾಪ್ಟರ್, ಪರಾಸ್​​ಗೆ ಹೊಲಿಗೆ ಯಂತ್ರ ಚಿಹ್ನೆ ನೀಡಿದ ಚುನಾವಣಾ ಆಯೋಗ