ಏರ್ ಏಷ್ಯಾ ವಿಮಾನದಲ್ಲಿ ತನ್ನ ಸೀಟಿನಲ್ಲೇ ಮಲ ವಿಸರ್ಜನೆ ಮಾಡಿದ ಮಹಿಳೆ
ಏರ್‌ಏಷ್ಯಾ ವಿಮಾನದಲ್ಲಿ ಮಹಿಳಾ ಪ್ರಯಾಣಿಕರೊಬ್ಬರು ತಮ್ಮ ಸೀಟಿನಲ್ಲೇ ಮಲವಿಸರ್ಜನೆ ಮಾಡಿ ಸಹ ಪ್ರಯಾಣಿಕರಲ್ಲಿ ಆಕ್ರೋಶ ಮೂಡಿಸಿದ್ದಾರೆ. 40 ನಿಮಿಷಗಳ ದುರ್ವಾಸನೆಯ ನಂತರ ಸಿಬ್ಬಂದಿ ಸ್ವಚ್ಛಗೊಳಿಸಿದ್ದಾರೆ. ಅನಾರೋಗ್ಯ ಕಾರಣ ಹೇಳಿದರೂ, ಇಂತಹ ಅಶಿಸ್ತಿನ ವರ್ತನೆಗೆ ವಿಮಾನಯಾನ ನಿಷೇಧ ಸಾಧ್ಯತೆ ಇದೆ. ಪ್ರಯಾಣಿಕರು ಆರೋಗ್ಯ ಸಮಸ್ಯೆಗಳಿದ್ದಲ್ಲಿ ಮುಂಚಿತವಾಗಿ ಸಿಬ್ಬಂದಿಗೆ ಮಾಹಿತಿ ನೀಡಬೇಕು. ಸುರಕ್ಷತೆ ಮತ್ತು ನೈರ್ಮಲ್ಯಕ್ಕೆ ಆದ್ಯತೆ ನೀಡುವುದು ಮುಖ್ಯ.
Updated on:Aug 26, 2026 | 1:22 PM
ಕೌಲಾಲಂಪುರ್, ಆಗಸ್ಟ್ 26: ಮಲೇಷ್ಯಾದಿಂದ ಚೀನಾಕ್ಕೆ ಪ್ರಯಾಣಿಸುತ್ತಿದ್ದ ಏರ್ ಏಷ್ಯಾ (AirAsia) ವಿಮಾನ(Flight)ದಲ್ಲಿ ಮಹಿಳಾ ಪ್ರಯಾಣಿಕರೊಬ್ಬರು ತಮ್ಮ ಸೀಟಿನಲ್ಲೇ ಮಲವಿಸರ್ಜನೆ ಮಾಡಿದ ಘಟನೆ ನಡೆದಿದ್ದು, ಸಹ ಪ್ರಯಾಣಿಕರು ಗಂಟೆಗಳ ಕಾಲ ಅಸಹನೀಯ ದುರ್ವಾಸನೆಯಲ್ಲಿ ಪ್ರಯಾಣಿಸುವಂತಾಯಿತು. ವಿಮಾನದಲ್ಲಿದ್ದ ಶೌಚಾಲಯ ಕೇವಲ ಕೆಲವೇ ಹೆಜ್ಜೆಗಳ ದೂರದಲ್ಲಿದ್ದರೂ ಈ ಘಟನೆ ಸಂಭವಿಸಿದ್ದು, ಕ್ಯಾಬಿನ್‌ನಲ್ಲಿದ್ದ ಇತರ ಪ್ರಯಾಣಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಮಧ್ಯರಾತ್ರಿಯ ಘಟನೆ: ರಾತ್ರಿ 10.30 ಕ್ಕೆ ಟೇಕ್‌ಆಫ್ ಆಗಿದ್ದ ವಿಮಾನದಲ್ಲಿ ಮುಂಜಾನೆ ಸುಮಾರು 2 ಗಂಟೆಯ ವೇಳೆ ಪ್ರಯಾಣಿಕರೆಲ್ಲರೂ ನಿದ್ರಿಸುತ್ತಿದ್ದಾಗ ಈ ಘಟನೆ ನಡೆದಿದೆ. 40 ವರ್ಷದ ಮಹಿಳೆಯೊಬ್ಬರು ಸೀಟಿನಿಂದ ಎದ್ದು ಬ್ಯಾಗ್ ಹಿಡಿದು ಶೌಚಾಲಯದತ್ತ ಓಡಿದ್ದಾರೆ.
ಮಹಿಳೆ ವಾಂತಿ ಮಾಡಿಕೊಳ್ಳಲು ಹೋಗಿರಬಹುದು ಎಂದು ಪ್ರಯಾಣಿಕರು ಭಾವಿಸಿದ್ದರು. ಆದರೆ ಅವರ ಸೀಟಿನ ಮೇಲೆ ಮತ್ತು ವಿಮಾನದ ಕಾರ್ಪೆಟ್ ಮೇಲೆ ಮಲ ಹರಡಿಕೊಂಡಿರುವುದು ಕಂಡುಬಂದಿದೆ. ವಿಮಾನದಲ್ಲಿದ್ದ ಇತರ ಪ್ರಯಾಣಿಕರು ಮಹಿಳೆಯನ್ನು ತರಾಟೆಗೆ ತೆಗೆದುಕೊಂಡಾಗ, ತನಗೆ ತೀವ್ರ ಅನಾರೋಗ್ಯ ಮತ್ತು ಅಸ್ವಸ್ಥತೆ ಉಂಟಾಗಿದ್ದ ಕಾರಣ ನಿಯಂತ್ರಿಸಲು ಸಾಧ್ಯವಾಗಲಿಲ್ಲ ಎಂದು ಆಕೆ ಸಮರ್ಥಿಸಿಕೊಂಡಿದ್ದಾಳೆ.
40 ನಿಮಿಷಗಳ ಕಾಲ ವಾಸನೆ: ಘಟನೆಯಿಂದಾಗಿ ಅಕ್ಕಪಕ್ಕದ ಸೀಟುಗಳಲ್ಲಿ ಕುಳಿತಿದ್ದ ಪ್ರಯಾಣಿಕರು ಸುಮಾರು 40 ನಿಮಿಷಗಳ ಕಾಲ ವಿಪರೀತ ದುರ್ವಾಸನೆಯಲ್ಲಿ ನರಳಬೇಕಾಯಿತು. ಪರಿಸ್ಥಿತಿಯನ್ನು ನಿಯಂತ್ರಿಸಲು ವಿಮಾನ ಸಿಬ್ಬಂದಿ ತಕ್ಷಣವೇ ಸೋಂಕುನಿವಾರಕಗಳು , ಏರ್ ಫ್ರೆಶ್ನರ್‌ಗಳನ್ನು ಬಳಸಿ ಆ ಜಾಗವನ್ನು ಸ್ವಚ್ಛಗೊಳಿಸಿದರು. ವಿಮಾನ ಸುರಕ್ಷಿತವಾಗಿ ಲ್ಯಾಂಡ್ ಆದ ಬಳಿಕ ಇಡೀ ವಿಮಾನವನ್ನು ಸಂಪೂರ್ಣವಾಗಿ ಡೀಪ್ ಕ್ಲೀನಿಂಗ್ ಮಾಡಲಾಯಿತು.
ಮತ್ತಷ್ಟು ಓದಿ: Plane Crash: ಅಲಾಸ್ಕಾದಲ್ಲಿ 8 ಜನರಿದ್ದ ಪ್ರಯಾಣಿಕರ ವಿಮಾನ ಪತನ
ಏರ್‌ಲೈನ್ಸ್ ಸ್ಪಷ್ಟನೆ: ಏರ್ ಏಷ್ಯಾ ಚೀನಾ ಜನರಲ್ ಮ್ಯಾನೇಜರ್ ಫ್ರಾಂಕ್ ಟ್ಯಾಂಗ್ ಟಿಂಗ್ ಅವರು ಸಿಬ್ಬಂದಿಯ ತ್ವರಿತ ಪ್ರತಿಕ್ರಿಯೆಯನ್ನು ಶ್ಲಾಘಿಸಿದ್ದು, ಪ್ರಯಾಣಿಕರ ಸುರಕ್ಷತೆ ಮತ್ತು ನೈರ್ಮಲ್ಯ ತಮ್ಮ ಮೊದಲ ಆದ್ಯತೆ ಎಂದು ತಿಳಿಸಿದ್ದಾರೆ.
ವಿಮಾನಯಾನ ನಡವಳಿಕೆ ನಿಯಮಗಳು: ಅಂತಾರಾಷ್ಟ್ರೀಯ ವಿಮಾನಯಾನ ನಿಯಮಗಳ ಪ್ರಕಾರ, ವಿಮಾನದೊಳಗೆ ಪ್ರಯಾಣಿಕರು ಇತರರ ಆರೋಗ್ಯ ಅಥವಾ ನೈರ್ಮಲ್ಯಕ್ಕೆ ಧಕ್ಕೆ ತರುವಂತಹ ಅಶಿಸ್ತಿನ ನಡವಳಿಕೆ ತೋರಿದರೆ ಅಂತಹವರನ್ನು ‘ಅನ್‌ರೂಲಿ ಪ್ಯಾಸೆಂಜರ್’ ಎಂದು ಪರಿಗಣಿಸಿ ಭವಿಷ್ಯದಲ್ಲಿ ವಿಮಾನ ಪ್ರಯಾಣದಿಂದ ನಿಷೇಧಿಸುವ ಸಾಧ್ಯತೆಯಿರುತ್ತದೆ.
ಆರೋಗ್ಯ ತುರ್ತುಸ್ಥಿತಿ: ವಿಮಾನದಲ್ಲಿ ಪ್ರಯಾಣಿಸುವಾಗ ಹೊಟ್ಟೆ ನೋವು ಅಥವಾ ಅಜೀರ್ಣದಂತಹ ಸಮಸ್ಯೆಗಳಿದ್ದರೆ ಮುಂಚಿತವಾಗಿಯೇ ಕ್ಯಾಬಿನ್ ಸಿಬ್ಬಂದಿಗೆ ಮಾಹಿತಿ ನೀಡುವುದು ಅಗತ್ಯ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 1:22 pm, Wed, 26 August 26
