ಮೂರು ದಶಕಗಳ ಬಳಿಕ ಗಾಬಾದಲ್ಲಿ ಗಾಬರಿಗೊಂಡ ಕಾಂಗರೂ ಪಡೆ.. ಗಾಬಾ ಹೆಸರು ಎಲ್ಲಿಂದ ಬಂತು?

ಭಾರತೀಯ ಕ್ರಿಕೆಟ್​ ಪ್ರೇಮಿಗಳ ಪಾಲಿಗೆ ಇಂದು ಅತ್ಯಂತ ಸಂಭ್ರಮದ ದಿನ. ಐತಿಹಾಸಿಕ ಬಾರ್ಡರ್​-ಗಾವಸ್ಕರ್​ ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿರುವ ಭಾರತ ಆಸೀಸ್​ ನೆಲದಲ್ಲೇ ನಿಂತು ಸಂಚಲನ ಮೂಡಿಸಿದೆ. ಅನುಭವಿ ಆಟಗಾರರ ಕೊರತೆಯ ನಡುವೆಯೂ, ಆಸ್ಟ್ರೇಲಿಯಾದ ಬ್ರಿಸ್ಬೇನ್​ನಲ್ಲಿರುವ ‘ಗಾಬಾ’ ಮೈದಾನದಲ್ಲಿ ಬರೋಬ್ಬರಿ 32 ವರ್ಷಗಳ ನಂತರ ಕಾಂಗರೂ ಪಡೆಗೆ ಸೋಲಿನ ರುಚಿ ತೋರಿಸಿರುವ ಭಾರತೀಯ ಪಡೆ ಎಲ್ಲರ ಹೃದಯ ಗೆದ್ದಿದೆ.

ಈ ಸಂಭ್ರಮದ ಕ್ಷಣದಲ್ಲಿ ಭಾರತೀಯ ತಂಡ ರೋಚಕ ಗೆಲುವು ದಾಖಲಿಸಿರುವ ಮತ್ತು ಮೂರು ದಶಕಗಳ ನಂತರ ಆಸೀಸ್​ ಆಟಗಾರರ ಸೋಲಿಗೆ ಸಾಕ್ಷಿಯಾಗಿರುವ ಗಾಬಾ ಮೈದಾನದ ಕಿರು ಪರಿಚಯ ನಿಮಗಾಗಿ..

ಆಸ್ಟ್ರೇಲಿಯಾದ ಕ್ವೀನ್ಸ್​ಲ್ಯಾಂಡ್​ ಪ್ರಾಂತ್ಯದ ಬ್ರಿಸ್ಬೇನ್​ನಲ್ಲಿರುವ ಗಾಬಾ ಕ್ರೀಡಾಂಗಣ ಅತ್ಯಂತ ಪ್ರಮುಖ ಮೈದಾನವೆಂದು ಗುರುತಿಸಿಕೊಂಡಿದೆ. ಗಾಬಾ ಎಂಬ ಹೆಸರು ವೂಲೂನ್​ಗಾಬಾ ಎಂಬುದರ ಸಂಕ್ಷಿಪ್ತ ರೂಪವಾಗಿದ್ದು, ಇದು 1895ರಲ್ಲಿ ವ್ಯವಸ್ಥಿತವಾಗಿ ನಿರ್ಮಾಣಗೊಂಡಿದೆ.

ಅಥ್ಲೆಟಿಕ್ಸ್​, ಆಸ್ಟ್ರೇಲಿಯನ್​ ರೂಲ್ಸ್​ ಫುಟ್​ಬಾಲ್​, ಬೇಸ್​ಬಾಲ್​, ಸೈಕ್ಲಿಂಗ್​, ರಗ್ಬಿ ಸೇರಿದಂತೆ ವಿವಿಧ ಕ್ರೀಡೆಗಳಿಗೆ ಸಾಕ್ಷಿಯಾಗಿರುವ ಈ ಮೈದಾನ ಪ್ರಸ್ತುತ ಅಲ್ಲಿನ ಕ್ವೀನ್ಸ್​ಲ್ಯಾಂಡ್​ ಬುಲ್ಸ್​ ಕ್ರಿಕೆಟ್​ ತಂಡಕ್ಕೆ ತವರು ನೆಲವೆನಿಸಿಕೊಂಡಿದೆ.

1993ರಿಂದ 2005ರ ಅವಧಿಯಲ್ಲಿ ಪುನರ್​ ಅಭಿವೃದ್ಧಿಗೆ ಸಾಕ್ಷಿಯಾಗಿರುವ ಈ ಕ್ರೀಡಾಂಗಣ ಪೂರ್ವದಿಂದ ಪಶ್ಚಿಮಕ್ಕೆ 170.6 ಮೀಟರ್ ಹಾಗೂ ಉತ್ತರದಿಂದ ದಕ್ಷಿಣಕ್ಕೆ 149.9 ಮೀಟರ್​ ವಿಸ್ತೀರ್ಣ ಹೊಂದಿದೆ. ಆಸ್ಟ್ರೇಲಿಯನ್​ ರೂಲ್ಸ್​ ಫುಟ್​ಬಾಲ್​ ವೀಕ್ಷಕರಿಗಾಗಿ ಬೃಹತ್​ ಆಸನ ವ್ಯವಸ್ಥೆ ಹೊಂದಿದ್ದ ಗಾಬಾದಲ್ಲಿ ಈ ಮೊದಲು 42,000 ಜನ ಏಕಕಾಲಕ್ಕೆ ಕುಳಿತುಕೊಳ್ಳುವ ವ್ಯವಸ್ಥೆ ಇತ್ತು. ಆದರೆ, 2010ರಲ್ಲಿ ಮತ್ತಷ್ಟು ಅಭಿವೃದ್ಧಿ ಕೆಲಸಗಳು ನಡೆದು, ನೂತನ ತಂತ್ರಜ್ಞಾನಗಳನ್ನು ಅಳವಡಿಸಿದ ಕಾರಣ ಅಂತಾರಾಷ್ಟ್ರೀಯ ಕ್ರಿಕೆಟ್​ ಪಂದ್ಯಾವಳಿಗಳಿದ್ದಾಗ36 ಸಾವಿರ ಜನ ಕೂತು ವೀಕ್ಷಿಸುವ ಅವಕಾಶ ಕಲ್ಪಿಸಲಾಗಿದೆ. ಆಸ್ಟ್ರೇಲಿಯಾ ಫುಟ್​ಬಾಲ್​ ಲೀಗ್​ ಇದ್ದಾಗ 37,478 ಜನರಿಗೆ ಆಸನ ವ್ಯವಸ್ಥೆ ಕಲ್ಪಿಸಬಹುದಾಗಿದೆ.

ಕ್ರಿಕೆಟ್​ನಲ್ಲಿ ವೇಗದ ಬೌಲಿಂಗ್​ ಮತ್ತು ಬೌನ್ಸಿಂಗ್​ಗೆ ಸಹಕಾರಿಯಾಗಿರುವ ಗಾಬಾವನ್ನು ಮಾರ್ಚ್​ನಿಂದ ಅಕ್ಟೋಬರ್​ ತನಕ ಕ್ರಿಕೆಟ್​ ಪಂದ್ಯಗಳಿಗೆ ಬಳಸಿಕೊಳ್ಳಲಾಗುತ್ತದೆ. ಈ ಮೈದಾನದಲ್ಲಿ ಆಸ್ಟ್ರೇಲಿಯಾ ಆಡಿರುವ 55 ಟೆಸ್ಟ್​ ಮ್ಯಾಚ್​ಗಳ ಪೈಕಿ 33ರಲ್ಲಿ ವಿಜೇತವಾಗಿದೆ. 13 ಪಂದ್ಯ ಡ್ರಾ ಮತ್ತು 1 ಪಂದ್ಯ ಟೈ ಆಗಿದ್ದು, 9 ಪಂದ್ಯಗಳಲ್ಲಿ ಸೋಲು ಕಂಡಿದೆ. ಈ ಪೈಕಿ ಇಂದು ಭಾರತ ನೀಡಿರುವ ಸೋಲಿನ ಆಘಾತ ಕಾಂಗರೂಗಳಿಗೆ 32 ವರ್ಷಗಳ ಬಳಿಕ ನೀಡಿದ್ದಾಗಿದೆ.

ಕುತೂಹಲಕಾರಿ ವಿವರಗಳಿಗಾಗಿ: https://en.wikipedia.org/wiki/The_Gabba#Cricket

ಟೇಸ್ಟಿ ಟೆಸ್ಟ್ | ಕ್ರಿಕೆಟ್​ನ ನಿಜವಾದ ಗಮ್ಮತ್ತು ಇರುವುದೇ ಟೆಸ್ಟ್​ನಲ್ಲಿ ಎಂದು ಮತ್ತೊಮ್ಮೆ ಸಾಬೀತಾಯ್ತು

Published On - 8:08 pm, Tue, 19 January 21