ಅಮೆರಿಕಕ್ಕೆ ಎರಡು ಪಾಂಡಾಗಳ ಉಡುಗೊರೆ: ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಘೋಷಣೆ

ವಾಷಿಂಗ್ಟನ್, ಸೆಪ್ಟೆಂಬರ್ 25: ಅಮೆರಿಕ ಪ್ರವಾಸದಲ್ಲಿರುವ ಚೀನಾ ಅಧ್ಯಕ್ಷ ಷಿ ಜಿನ್‌ಪಿಂಗ್ ಅವರು, ಚೀನಾ ಮತ್ತು ಅಮೆರಿಕ ನಡುವಿನ ಸ್ನೇಹದ ಸಂಕೇತವಾಗಿ ಎರಡು ದೈತ್ಯ ಪಾಂಡಾಗಳನ್ನು ಅಮೆರಿಕಕ್ಕೆ ಕಳುಹಿಸುವುದಾಗಿ ಘೋಷಿಸಿದ್ದಾರೆ. ಪಿಂಗ್ ಪಿಂಗ್ ಮತ್ತು ಫು ಶುವಾಂಗ್ ಹೆಸರಿನ ಈ ಪಾಂಡಾಗಳು ಅಟ್ಲಾಂಟಾ ಮೃಗಾಲಯದಲ್ಲಿ ಇರಲಿವೆ. ಷಿ ಜಿನ್‌ಪಿಂಗ್ ಅವರು ಈ ಪಾಂಡಾಗಳು ಎರಡೂ ದೇಶಗಳ ಜನರ ನಡುವಿನ ಸ್ನೇಹವನ್ನು ಮತ್ತಷ್ಟು ಬಲಪಡಿಸುವ “ಸ್ನೇಹದ ರಾಯಭಾರಿಗಳು” ಆಗಲಿವೆ ಎಂದು ಹೇಳಿದ್ದಾರೆ. ಚೀನಾ ಅಮೆರಿಕಕ್ಕೆ ಎರಡು ದೈತ್ಯ ಪಾಂಡಾಗಳನ್ನು ಕಳುಹಿಸುತ್ತಿದೆ. ಗಂಡು ಪಾಂಡಾ ಪಿಂಗ್ ಪಿಂಗ್, ಹೆಣ್ಣು ಪಾಂಡಾ ಫು ಶುವಾಂಗ್. ಎರಡನ್ನೂ ಅಟ್ಲಾಂಟಾ ಮೃಗಾಲಯದಲ್ಲಿ ಇರಿಸಲಾಗುತ್ತದೆ. ಪಾಂಡಾಗಳ ಆಗಮನದ ದಿನಾಂಕವನ್ನು ಇನ್ನೂ ಅಧಿಕೃತವಾಗಿ ಪ್ರಕಟಿಸಿಲ್ಲ.

ಪಾಂಡಾಗಳು ಏಕೆ ವಿಶೇಷ?

ಈ ಪಾಂಡಾಗಳನ್ನು ಚೀನಾದ ಚೆಂಗ್ಡು ದೈತ್ಯ ಪಾಂಡಾ ಸಂಶೋಧನಾ ಕೇಂದ್ರದಿಂದ ಕಳುಹಿಸಲಾಗುತ್ತಿದೆ. ಏಪ್ರಿಲ್‌ನಲ್ಲಿ ಚೀನಾ ವನ್ಯಜೀವಿ ಸಂರಕ್ಷಣಾ ಸಂಘ (CWCA) ಮತ್ತು ಅಟ್ಲಾಂಟಾ ಮೃಗಾಲಯದ ನಡುವೆ ಹೊಸ ಸಂಶೋಧನಾ ಹಾಗೂ ಸಂರಕ್ಷಣಾ ಒಪ್ಪಂದಕ್ಕೆ ಸಹಿ ಹಾಕಲಾಗಿತ್ತು. ಅದರ ಭಾಗವಾಗಿಯೇ ಈ ಪಾಂಡಾಗಳು ಅಮೆರಿಕಕ್ಕೆ ಬರಲಿವೆ.

‘ಪಾಂಡಾ ರಾಜತಾಂತ್ರಿಕತೆ’ ಎಂದರೇನು?

ಚೀನಾ ಹಲವು ವರ್ಷಗಳಿಂದ ಸ್ನೇಹ ರಾಷ್ಟ್ರಗಳಿಗೆ ಪಾಂಡಾಗಳನ್ನು ಕಳುಹಿಸುವ ಪರಂಪರೆಯನ್ನು ‘ಪಾಂಡಾ ಡಿಪ್ಲೊಮಸಿ’ ಎಂದು ಕರೆಯಲಾಗುತ್ತದೆ. 1972ರಲ್ಲಿ ಅಮೆರಿಕ ಅಧ್ಯಕ್ಷ ರಿಚರ್ಡ್ ನಿಕ್ಸನ್ ಚೀನಾ ಭೇಟಿ ನೀಡಿದ ನಂತರ ಮೊದಲ ಬಾರಿಗೆ ಲಿಂಗ್-ಲಿಂಗ್ ಮತ್ತು ಹ್ಸಿಂಗ್-ಹ್ಸಿಂಗ್ ಪಾಂಡಾಗಳನ್ನು ಅಮೆರಿಕಕ್ಕೆ ಉಡುಗೊರೆಯಾಗಿ ನೀಡಲಾಗಿತ್ತು. ಅವು ವಾಷಿಂಗ್ಟನ್ ಡಿ.ಸಿ.ಯ ರಾಷ್ಟ್ರೀಯ ಮೃಗಾಲಯದ ಪ್ರಮುಖ ಆಕರ್ಷಣೆಯಾಗಿದ್ದವು. 2024ರಲ್ಲಿ ಅಟ್ಲಾಂಟಾ ಮೃಗಾಲಯದಲ್ಲಿದ್ದ ಮತ್ತೊಂದು ಪಾಂಡಾ ಜೋಡಿಯನ್ನು ಚೀನಾಕ್ಕೆ ಹಿಂತಿರುಗಿಸಲಾಗಿತ್ತು.

ಮತ್ತಷ್ಟು ಓದಿ: ಭಾರತ ಪ್ರವಾಸ ಮುಗಿಸಿ ಹಿಂತಿರುಗಿದ ಬೆನ್ನಲ್ಲೇ ಆಸ್ಪತ್ರೆಗೆ ದಾಖಲಾದ್ರಾ ಷಿ ಜಿನ್‌ಪಿಂಗ್, ಇಲ್ಲಿದೆ ಮಾಹಿತಿ

ಟ್ರಂಪ್–ಷಿ ಭೇಟಿ ವೇಳೆ ನಡೆದ ಚರ್ಚೆಗಳೇನೇನು?

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಷಿ ಜಿನ್‌ಪಿಂಗ್ ನಡುವಿನ ಭೇಟಿಯಲ್ಲಿ ಉಭಯ ದೇಶಗಳ ಸಂಬಂಧ, ವ್ಯಾಪಾರ ಮತ್ತು ಸಹಕಾರದ ಬಗ್ಗೆ ಚರ್ಚೆ ನಡೆಯಿತು. ಟ್ರಂಪ್, “ಅಮೆರಿಕ ಮತ್ತು ಚೀನಾ ಉತ್ತಮ ಸಹಕಾರದೊಂದಿಗೆ ಮುಂದುವರೆಯಬಹುದು” ಎಂದು ಹೇಳಿದರೆ, ಷಿ ಜಿನ್‌ಪಿಂಗ್ ಉಭಯ ದೇಶಗಳ ಸಂಬಂಧ ಹೊಸ ಐತಿಹಾಸಿಕ ಹಂತವನ್ನು ಪ್ರವೇಶಿಸಿದೆ ಎಂದು ಅಭಿಪ್ರಾಯಪಟ್ಟರು. ಅಮೆರಿಕ ಅಧ್ಯಕ್ಷ ಟ್ರಂಪ್ ಮತ್ತು ಷಿ ಜಿನ್​ಪಿಂಗ್ ನಡುವಿನ ಭೇಟಿಯಲ್ಲಿ ಉಭಯ ದೇಶಗಳ ಸಂಬಂಧ, ವ್ಯಾಪಾರ ಮತ್ತು ಸಹಕಾರದ ಬಗ್ಗೆ ಚರ್ಚೆ

ಈ ಘೋಷಣೆಯ ಮಹತ್ವ

ಅಮೆರಿಕ–ಚೀನಾ ಜನರ ನಡುವಿನ ಸ್ನೇಹವನ್ನು ಬಲಪಡಿಸುವ ಪ್ರಯತ್ನ.

ವನ್ಯಜೀವಿ ಸಂರಕ್ಷಣೆ ಮತ್ತು ಸಂಶೋಧನೆಯಲ್ಲಿ ಎರಡೂ ದೇಶಗಳ ಸಹಕಾರಕ್ಕೆ ಉತ್ತೇಜನ.

ಹಲವು ವರ್ಷಗಳ ಬಳಿಕ ಅಮೆರಿಕಕ್ಕೆ ಹೊಸ ಪಾಂಡಾಗಳು ಆಗಮಿಸುತ್ತಿರುವುದು ವಿಶೇಷ ಬೆಳವಣಿಗೆಯಾಗಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ