ಗಾಜಾ ಪ್ರತೀಕಾರ? ಫ್ಲೈದುಬೈ ದಾಳಿ ಪ್ರಕರಣದಲ್ಲಿ ಹೊಸ ತಿರುವು: ಸಹ-ಪೈಲಟ್ ವಿಚಾರಣೆ ವೇಳೆ ಸಿಕ್ಕ ಮಾಹಿತಿ ಏನು?

ಟೆಲ್ ಅವೀವ್, ಅಕ್ಟೋಬರ್ 06: ಫ್ಲೈದುಬೈ ವಿಮಾನದಲ್ಲಿ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಮೇಲೆ ದಾಳಿ ನಡೆಸಿ, ವಿಮಾನವನ್ನು ಅಪಘಾತಕ್ಕೀಡು ಮಾಡಲು ಯತ್ನಿಸಿದ ಆರೋಪ ಎದುರಿಸುತ್ತಿರುವ ಕೋ-ಪೈಲಟ್ ಹಮಾಮ್ ಅಲ್-ಹಮ್ಮಾಮಿ ಪ್ರಕರಣದಲ್ಲಿ ಹೊಸ ಮಾಹಿತಿ ಹೊರಬಿದ್ದಿದೆ. ಇಸ್ರೇಲ್‌ನ ಭದ್ರತಾ ಸಂಸ್ಥೆ ಶಿನ್ ಬೆಟ್ ತನ್ನ ಅಧಿಕಾರಿಗಳನ್ನು ಯುಎಇಗೆ ಕಳುಹಿಸಿದ್ದು, ಅಲ್-ಹಮ್ಮಾಮಿ ವಿಚಾರಣೆಯಲ್ಲಿ ಅವರು ಭಾಗವಹಿಸಿದ್ದಾರೆ ಎಂದು ದಿ ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ.

ಫ್ಲೈದುಬೈಗೆ ಸೇರುವ ಮೊದಲೇ ಯೋಜನೆ?

ತನಿಖೆಯ ಬಗ್ಗೆ ಮಾಹಿತಿ ಹೊಂದಿರುವ ಇಸ್ರೇಲಿ ಅಧಿಕಾರಿಗಳನ್ನು ಉಲ್ಲೇಖಿಸಿ ವರದಿಗಳು, ಅಲ್-ಹಮ್ಮಾಮಿ ಫ್ಲೈದುಬೈಗೆ ಸೇರುವ ಮೊದಲೇ ಟೆಲ್ ಅವೀವ್‌ನ ಬೆನ್ ಗುರಿಯನ್ ವಿಮಾನ ನಿಲ್ದಾಣದ ಬಳಿ ವಿಮಾನವನ್ನು ಅಪಘಾತಗೊಳಿಸುವ ಯೋಜನೆ ಹೊಂದಿದ್ದ ಎಂದು ಹೇಳಿವೆ. ಟೆಲ್ ಅವೀವ್‌ಗೆ ವಿಮಾನ ಸೇವೆ ನಡೆಸುವ ಏರ್‌ಲೈನ್‌ಗಳನ್ನು ಹುಡುಕಿದ ಬಳಿಕ ಫ್ಲೈದುಬೈಗೆ ಸೇರಿದ್ದಾಗಿ ಆತ ವಿಚಾರಣೆಯಲ್ಲಿ ಹೇಳಿದ್ದಾನೆ ಎನ್ನಲಾಗಿದೆ. ಈ ವರ್ಷದ ಆರಂಭದಲ್ಲಿಯೇ ಟೆಲ್ ಅವೀವ್‌ಗೆ ಹಾರಿದ್ದ ಸಂದರ್ಭದಲ್ಲೂ ವಿಮಾನವನ್ನು ಅಪಹರಿಸುವ ಬಗ್ಗೆ ಯೋಚಿಸಿದ್ದಾಗಿ ಆತ ಹೇಳಿದ್ದಾನೆ ಎಂಬ ಮಾಹಿತಿಯೂ ಹೊರಬಂದಿದೆ. ಆದರೆ ಈ ಹೇಳಿಕೆಗಳು ತನಿಖಾಧಿಕಾರಿಗಳ ವಿಚಾರಣೆಯಲ್ಲಿ ದಾಖಲಾಗಿವೆ ಎನ್ನಲಾಗಿದ್ದು, ಅವುಗಳ ಸತ್ಯಾಸತ್ಯತೆ ಇನ್ನೂ ಅಧಿಕೃತವಾಗಿ ದೃಢಪಟ್ಟಿಲ್ಲ.

‘ಗಾಜಾಗೆ ಪ್ರತೀಕಾರ’ ಎಂದು ಹೇಳಿದ್ದನಾ?

ಇಸ್ರೇಲಿ ಚಾನೆಲ್ 12 ವರದಿ ಪ್ರಕಾರ, ಅಲ್-ಹಮ್ಮಾಮಿ ವಿಚಾರಣೆ ವೇಳೆ ಗಾಜಾ ಸಂಘರ್ಷಕ್ಕೆ ಪ್ರತೀಕಾರವಾಗಿ ಈ ಕೃತ್ಯಕ್ಕೆ ಮುಂದಾಗಿದ್ದಾಗಿ ಹೇಳಿದ್ದಾನೆ ಎನ್ನಲಾಗಿದೆ. ಆತ ‘ಹುತಾತ್ಮನಾಗಿ ಸಾಯಲು’ ಬಯಸಿದ್ದ ಎಂಬ ಹೇಳಿಕೆಯೂ ವರದಿಯಾಗಿದೆ. ಆದರೆ ಈ ಹೇಳಿಕೆಗಳ ಬಗ್ಗೆ ಅಧಿಕೃತ ದೃಢೀಕರಣ ಹೊರಬಂದಿಲ್ಲ. ಪ್ರಕರಣದ ಉದ್ದೇಶ ಮತ್ತು ಹಿನ್ನೆಲೆಯನ್ನು ತನಿಖಾಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.

ಮತ್ತಷ್ಟು ಓದಿ: ಇಸ್ರೇಲ್ ಮೇಲೆ ವಿಮಾನ ಅಪ್ಪಳಿಸುವುದೇ ನನ್ನ ಪ್ಲ್ಯಾನ್ ಆಗಿತ್ತು, ಸಾವಿಗೆ ಹೆದರಲ್ಲ: ಫ್ಲೈದುಬೈ ಸಹ-ಪೈಲಟ್ ಹಮ್ಮಾಮಿ ಸ್ಫೋಟಕ ತಪ್ಪೊಪ್ಪಿಗೆ

ವಿಮಾನದಲ್ಲೇ ಕ್ಯಾಪ್ಟನ್ ಮೇಲೆ ದಾಳಿ

ದುಬೈನಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ಜೋರ್ಡಾನ್ ವಾಯುಪ್ರದೇಶದ ಬಳಿ ಈ ಘಟನೆ ನಡೆದಿತ್ತು ಎಂದು ವರದಿಯಾಗಿದೆ. ಅಲ್-ಹಮ್ಮಾಮಿ ತುರ್ತು ಕ್ರ್ಯಾಶ್ ಆಕ್ಸ್ ಬಳಸಿ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಮೇಲೆ ದಾಳಿ ನಡೆಸಿದ ಆರೋಪವಿದೆ. ಗಂಭೀರವಾಗಿ ಗಾಯಗೊಂಡಿದ್ದರೂ ಸ್ಮಿತ್ ಕಾಕ್‌ಪಿಟ್ ಬಾಗಿಲು ತೆರೆಯುವಲ್ಲಿ ಯಶಸ್ವಿಯಾದರು. ಇದರಿಂದ ಪ್ರಯಾಣಿಕರು ಮತ್ತು ಸಿಬ್ಬಂದಿಗೆ ಒಳಗೆ ಪ್ರವೇಶಿಸಲು ಸಾಧ್ಯವಾಯಿತು. ವಿಮಾನದಲ್ಲಿದ್ದ ಪ್ರಯಾಣಿಕರು ಹಾಗೂ ಆಫ್-ಡ್ಯೂಟಿ ಪೈಲಟ್‌ಗಳು ಸಹ-ಪೈಲಟ್‌ನನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ನೆರವಾದರು.

ವಿಮಾನವನ್ನು ತಬೂಕ್‌ಗೆ ತಿರುಗಿಸಲಾಯಿತು

ಆರಂಭಿಕ ದಾಳಿ ವಿಫಲವಾದ ಬಳಿಕ ಅಲ್-ಹಮ್ಮಾಮಿ ವಿಮಾನದ ನಿಯಂತ್ರಣಕ್ಕೆ ಅಡ್ಡಿಪಡಿಸಲು ಮತ್ತು ವಿಮಾನವನ್ನು ಅಪಘಾತಕ್ಕೀಡು ಮಾಡಲು ಪ್ರಯತ್ನಿಸಿದ್ದಾನೆ ಎಂದು ವರದಿಯಾಗಿದೆ. ಈ ವೇಳೆ ವಿಮಾನ ತೀವ್ರವಾಗಿ ಕೆಳಕ್ಕೆ ಇಳಿದಿತ್ತು ಎನ್ನಲಾಗಿದೆ. ನಂತರ ಆಫ್-ಡ್ಯೂಟಿ ಪೈಲಟ್‌ಗಳು ಹಾಗೂ ಸಿಬ್ಬಂದಿ ವಿಮಾನದ ನಿಯಂತ್ರಣವನ್ನು ಮರಳಿ ಪಡೆದರು. ವಿಮಾನವನ್ನು ಸೌದಿ ಅರೇಬಿಯಾದ ತಬೂಕ್‌ಗೆ ತಿರುಗಿಸಿ ತುರ್ತು ಲ್ಯಾಂಡಿಂಗ್ ಮಾಡಲಾಯಿತು. ವರದಿಗಳ ಪ್ರಕಾರ, ವಿಮಾನ ಬೆಳಗ್ಗೆ 10.57ಕ್ಕೆ ತಬೂಕ್‌ನಲ್ಲಿ ಇಳಿಯಿತು.

170ಕ್ಕೂ ಹೆಚ್ಚು ಜನರಿದ್ದ ವಿಮಾನ

ಫ್ಲೈದುಬೈ ವಿಮಾನದಲ್ಲಿ 170ಕ್ಕೂ ಹೆಚ್ಚು ಪ್ರಯಾಣಿಕರು ಮತ್ತು ಸಿಬ್ಬಂದಿ ಇದ್ದರು. ಅವರಲ್ಲಿ ಹೆಚ್ಚಿನವರು ಇಸ್ರೇಲಿ ಪ್ರಯಾಣಿಕರಾಗಿದ್ದರು ಎಂದು ವರದಿಯಾಗಿದೆ. ಯುಎಇ ಪ್ರಾಸಿಕ್ಯೂಟರ್ ಜನರಲ್ ಈ ಘಟನೆಯನ್ನು ‘ಭಯೋತ್ಪಾದಕ ದಾಳಿ’ ಎಂದು ಬಣ್ಣಿಸಿದ್ದಾರೆ. ಅಲ್-ಹಮ್ಮಾಮಿಯನ್ನು ಯುಎಇ ಅಧಿಕಾರಿಗಳು ವಶಕ್ಕೆ ಪಡೆದು ತನಿಖೆ ನಡೆಸುತ್ತಿದ್ದಾರೆ.

ಇಸ್ರೇಲ್‌ಗೆ ಮಾಹಿತಿ ನೀಡುತ್ತಿರುವ ಯುಎಇ

ತನಿಖೆಯ ಬಗ್ಗೆ ಯುಎಇ ಅಧಿಕಾರಿಗಳು ಇಸ್ರೇಲ್‌ಗೆ ನಿರಂತರವಾಗಿ ಮಾಹಿತಿ ನೀಡುತ್ತಿದ್ದಾರೆ ಎಂದು ಮೂಲವೊಂದು ತಿಳಿಸಿರುವುದಾಗಿ ವರದಿಯಾಗಿದೆ. ಈ ಹಿನ್ನೆಲೆಯಲ್ಲಿ ಶಿನ್ ಬೆಟ್ ಅಧಿಕಾರಿಗಳು ವಿಚಾರಣೆಯಲ್ಲಿ ಭಾಗವಹಿಸಿರುವುದು ಪ್ರಕರಣದ ಗಂಭೀರತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಅಲ್-ಹಮ್ಮಾಮಿಯ ಹಿಂದಿನ ಪ್ರಯಾಣಗಳು, ಫ್ಲೈದುಬೈಗೆ ಸೇರುವ ಉದ್ದೇಶ, ಟೆಲ್ ಅವೀವ್‌ಗೆ ಸಂಬಂಧಿಸಿದ ಆತನ ಯೋಜನೆ ಮತ್ತು ಈ ಘಟನೆಯ ಹಿಂದೆ ಬೇರೆಯವರ ಸಹಾಯವಿತ್ತೇ ಎಂಬುದರ ಬಗ್ಗೆಯೂ ತನಿಖೆ ಮುಂದುವರೆದಿದೆ. ಸದ್ಯ ಪ್ರಕರಣಕ್ಕೆ ಸಂಬಂಧಿಸಿದ ಹಲವು ವಿವರಗಳು ತನಿಖಾ ಮೂಲಗಳು ಮತ್ತು ಮಾಧ್ಯಮ ವರದಿಗಳ ಆಧಾರದಲ್ಲಿವೆ. ಅಲ್-ಹಮ್ಮಾಮಿ ವಿರುದ್ಧದ ಆರೋಪಗಳು ಮತ್ತು ವಿಚಾರಣೆಯಲ್ಲಿ ಆತ ನೀಡಿದ್ದಾನೆ ಎನ್ನಲಾದ ಹೇಳಿಕೆಗಳ ಅಂತಿಮ ಸತ್ಯಾಸತ್ಯತೆ ತನಿಖೆ ಪೂರ್ಣಗೊಂಡ ಬಳಿಕವೇ ಸ್ಪಷ್ಟವಾಗಲಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ