ಕಾರ್ಗಿಲ್‌ನಲ್ಲಿ ಮಡಿದ ಸ್ವಂತ ಸೈನಿಕರ ಶವಗಳನ್ನೇ ತಿರಸ್ಕರಿಸಿದ ದೇಶ ನಿಮ್ಮದು,ಪಾಕ್‌ಗೆ ಇತಿಹಾಸದ ಕರಾಳ ಸತ್ಯ ನೆನಪಿಸಿದ ಭಾರತ

ನ್ಯೂಯಾರ್ಕ್​, ಅಕ್ಟೋಬರ್ 23: ಗಡಿಯಾಚೆಗಿನ ಭಯೋತ್ಪಾದನೆಗೆ ನಿರಂತರ ಕುಮ್ಮಕ್ಕು ನೀಡುತ್ತಾ, ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಮಾನವ ಹಕ್ಕುಗಳು ಮತ್ತು ಧಾರ್ಮಿಕ ಸ್ವಾತಂತ್ರ್ಯದ ಮಾತನಾಡುತ್ತಿರುವ ಪಾಕಿಸ್ತಾನಕ್ಕೆ ವಿಶ್ವಸಂಸ್ಥೆಯಲ್ಲಿ ಭಾರತ ತೀವ್ರ ತಪರಾಕಿ ಹಾಕಿದೆ. ವಿಶ್ವಸಂಸ್ಥೆಯಲ್ಲಿ ಭಾರತದ ಪ್ರಥಮ ಕಾರ್ಯದರ್ಶಿ ಭಾವಿಕಾ ಮಂಗಳಾನಂದನ್ ಅವರು ನೆರೆ ರಾಷ್ಟ್ರದ ನಕಲಿ ಕಾಳಜಿ ಹಾಗೂ ಇಬ್ಬಗೆಯ ನೀತಿಯನ್ನು ಕಟು ಶಬ್ದಗಳಲ್ಲಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಅಲ್ಲದೆ, ಜಾಗತಿಕ ದಕ್ಷಿಣದ (Global South) ದೇಶಗಳ ವಿರುದ್ಧ ಮಾತ್ರ ಪಕ್ಷಪಾತ ಹೊಂದಿರುವ ವಿಶ್ವಸಂಸ್ಥೆಯ ವಲಸಿಗರ ಮಾನವ ಹಕ್ಕುಗಳ ವಿಶೇಷ ವರದಿಯ ವಿಧಾನವನ್ನು ಭಾರತ ಇದೇ ವೇಳೆ ಬಲವಾಗಿ ತಿರಸ್ಕರಿಸಿದೆ.

ಸ್ವಂತ ಅಲ್ಪಸಂಖ್ಯಾತರನ್ನೇ ರಕ್ಷಿಸಲಾಗದ ವಿಫಲ ದೇಶ

ಪಾಕಿಸ್ತಾನದಲ್ಲಿ ಹಿಂದೂ, ಕ್ರಿಶ್ಚಿಯನ್, ಸಿಖ್ ಸೇರಿದಂತೆ ಅಲ್ಪಸಂಖ್ಯಾತರ ಸಂಖ್ಯೆ ದಿನೇ ದಿನೆ ಕ್ಷೀಣಿಸುತ್ತಿದೆ. ಅವರ ಮೂಲಭೂತ ಹಕ್ಕುಗಳನ್ನು ನಿರಂತರವಾಗಿ ದಮನಿಸಲಾಗುತ್ತಿದೆ. ತನ್ನ ದೇಶದ ಅಲ್ಪಸಂಖ್ಯಾತರ ಸುರಕ್ಷತೆಯನ್ನೇ ಖಚಿತಪಡಿಸಿಕೊಳ್ಳಲು ಯೋಗ್ಯತೆಯಿಲ್ಲದ ರಾಷ್ಟ್ರವೊಂದು, ಭಾರತದಂತಹ ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವಕ್ಕೆ ಮಾನವ ಹಕ್ಕುಗಳ ಕುರಿತು ಉಪನ್ಯಾಸ ನೀಡುವ ಯಾವುದೇ ಹಕ್ಕನ್ನು ಹೊಂದಿಲ್ಲ ಎಂದು ಮಂಗಳಾನಂದನ್ ಗುಡುಗಿದರು.

ಕಾರ್ಗಿಲ್ ಯುದ್ಧದ ಮುಖವಾಡ ಕಳಚಿದ ಭಾರತ

1999ರ ಕಾರ್ಗಿಲ್ ಯುದ್ಧದ ಕರಾಳ ಇತಿಹಾಸವನ್ನು ನೆನಪಿಸಿದ ಅವರು, “ಯುದ್ಧದಲ್ಲಿ ಪ್ರಾಣ ಕಳೆದುಕೊಂಡ ತನ್ನದೇ ಸೇನೆಯ ಯೋಧರ ಮೃತದೇಹಗಳನ್ನು ಸ್ವೀಕರಿಸಲು ಹಿಂದೇಟು ಹಾಕಿ ನಿರಾಕರಿಸಿದ ನಾಚಿಕೆಗೇಡಿನ ಇತಿಹಾಸ ಪಾಕಿಸ್ತಾನಕ್ಕಿದೆ. ಅಂದು ಆ ಮೃತ ಸೈನಿಕರಿಗೆ ಇಸ್ಲಾಮಿಕ್ ವಿಧಿವಿಧಾನಗಳ ಪ್ರಕಾರ ಸಕಲ ಸೇನಾ ಗೌರವಗಳೊಂದಿಗೆ ಅಂತ್ಯಕ್ರಿಯೆ ನೆರವೇರಿಸಿದ್ದು ಭಾರತೀಯ ಸೇನೆ. ತನ್ನ ಸೈನಿಕರನ್ನೇ ಧಿಕ್ಕರಿಸಿದ ದೇಶ ಇಂದು ಸಮಾಧಿ, ಧರ್ಮ ಮತ್ತು ನಂಬಿಕೆಯ ಬಗ್ಗೆ ನಾಚಿಕೆಯಿಲ್ಲದೆ ಮಾತನಾಡುತ್ತಿರುವುದು ದೊಡ್ಡ ವಿಪರ್ಯಾಸ” ಎಂದು ಛೀಮಾರಿ ಹಾಕಿದರು.

ಪೋಸ್ಟ್​

#IndiaAtUN

Bhavika Mangalanandan, First Secretary, took part in the interactive dialogue with the Special Rapporteur on Freedom of Religion and Belief on the topic of funeral rights in-exceptional circumstances. She made the following observations:

➡️ Report attributes all wrong practices during COVID-19 only to the Global South, turning a blind eye to similar tragic situations in the developed world.

➡️ Fervent advocacy made for rights of terrorists who violate the most sacred human right – the right to life!

➡️ Deeply ironic that a State that did not even accept the bodies of its own soldiers who were killed in combat in 1999 in Kargil, unabashedly speaks with fervor on faith, religious freedom and burial rights.

➡️ Reminded delegate of Pakistan that it was the Indian Army who buried a number of Pakistani soldiers with military honours and in accordance with Islamic rites.

➡️ Advised that Pakistan’s deep obsession with the Indian Union Territory of Jammu & Kashmir should be directed at the developments underway in the parts of Jammu & Kashmir under its illegal occupation, such as Rawalakot.

@PMOIndia @MEAIndia @IndianDiplomacy @airnewsalerts @DDNewslive @PIB_India @UN

— India at UN, NY (@IndiaUNNewYork) October 22, 2026

ಭಯೋತ್ಪಾದನೆಗೆ ಬೆಂಬಲ

ಪಾಕಿಸ್ತಾನದಲ್ಲಿ ಮೋಸ್ಟ್ ವಾಂಟೆಡ್ ಉಗ್ರರು ರಾಜಾರೋಷವಾಗಿ ಓಡಾಡುತ್ತಿದ್ದಾರೆ. ಒಬ್ಬ ಭಯೋತ್ಪಾದಕ ಕೇವಲ ಅಮಾಯಕರನ್ನು ಕೊಲ್ಲುವುದು ಮಾತ್ರವಲ್ಲ, ಇಡೀ ರಾಷ್ಟ್ರದ ಶಾಂತಿ ಮತ್ತು ಸ್ವಾಸ್ಥ್ಯವನ್ನು ಹಾಳುಮಾಡುತ್ತಾನೆ. ಮಾನವನ ಅತ್ಯಂತ ಪವಿತ್ರವಾದ ‘ಬದುಕುವ ಹಕ್ಕನ್ನು’ ಕಸಿದುಕೊಳ್ಳುವ ಭಯೋತ್ಪಾದಕರ ಹಕ್ಕುಗಳಿಗಾಗಿ ವಿಶ್ವಸಂಸ್ಥೆಯ ವೇದಿಕೆಯಲ್ಲಿ ವಕಾಲತ್ತು ವಹಿಸುವವರಿಗೆ, ಆ ಭಯೋತ್ಪಾದನೆಯಿಂದ ಬಲಿಯಾದ ಮುಗ್ಧ ಜನರ ಬಗ್ಗೆ ಕನಿಷ್ಠ ಕಾಳಜಿಯೂ ಇಲ್ಲದಿರುವುದು ದುರಂತ ಎಂದರು.

ಜಮ್ಮು-ಕಾಶ್ಮೀರದ ಕುರಿತು ಪಾಕಿಸ್ತಾನ ಪದೇ ಪದೇ ಹಸ್ತಕ್ಷೇಪ ಮಾಡುವುದನ್ನು ತಳ್ಳಿಹಾಕಿದ ಅವರು, “ಭಾರತದ ಅವಿಭಾಜ್ಯ ಅಂಗವಾದ ಜಮ್ಮು-ಕಾಶ್ಮೀರದ ಬಗ್ಗೆ ಮಾತನಾಡುವುದನ್ನು ಬಿಟ್ಟು, ರಾವಲಕೋಟ್ ಸೇರಿದಂತೆ ತನ್ನ ಅಕ್ರಮ ಆಕ್ರಮಣದಲ್ಲಿರುವ ಪಾಕ್ ಆಕ್ರಮಿತ ಕಾಶ್ಮೀರದ (PoK) ಜನರ ಅಭಿವೃದ್ಧಿ ಮತ್ತು ಅಲ್ಲಿನ ದುಸ್ಥಿತಿಯ ಕಡೆಗೆ ಪಾಕಿಸ್ತಾನ ಗಮನಹರಿಸಲಿ” ಎಂದು ಸಲಹೆ ನೀಡಿದರು.

ಇದನ್ನೂ ಓದಿ: ಭಯೋತ್ಪಾದನೆಗೆ ಶೂನ್ಯ ಸಹಿಷ್ಣುತೆ: ಪಹಲ್ಗಾಮ್ ದಾಳಿ ಪ್ರಸ್ತಾಪಿಸಿ ಜಾಗತಿಕ ವೇದಿಕೆಯಲ್ಲಿ ಪಾಕ್ ವಿರುದ್ಧ ಭಾರತ ನೇರ ವಾಗ್ದಾಳಿ

ವಿಶ್ವಸಂಸ್ಥೆಯ ವರದಿಗೆ ಆಕ್ಷೇಪ

ಕೋವಿಡ್-19 ಸಾಂಕ್ರಾಮಿಕದ ಅವಧಿಯ ವಲಸಿಗರ ಸ್ಥಿತಿಗತಿಯ ಕುರಿತ ವರದಿಯನ್ನು ಪ್ರಶ್ನಿಸಿದ ಭಾರತ, “ಎಲ್ಲಾ ತಪ್ಪುಗಳು ಅಭಿವೃದ್ಧಿಶೀಲ ರಾಷ್ಟ್ರಗಳಲ್ಲೇ ನಡೆದಿವೆ ಎಂಬಂತೆ ವರದಿ ಸಿದ್ಧಪಡಿಸಲಾಗಿದೆ. ಆದರೆ, ಅಭಿವೃದ್ಧಿ ಹೊಂದಿದ ಶ್ರೀಮಂತ ಪಾಶ್ಚಿಮಾತ್ಯ ದೇಶಗಳಲ್ಲಿ ಸಂಭವಿಸಿದ ಇದೇ ರೀತಿಯ ದುರಂತ ಸನ್ನಿವೇಶಗಳಿಗೆ ವರದಿಗಾರರು ಜಾಣಕುರುಡು ಪ್ರದರ್ಶಿಸಿದ್ದಾರೆ” ಎಂದು ಆಕ್ಷೇಪ ವ್ಯಕ್ತಪಡಿಸಿತು.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ