ಸುಖಾಂತ್ಯಗೊಂಡ ಇಂಡೋ- ಉಕ್ರೇನಿಯನ್ ಪ್ರೀತಿ; ದೆಹಲಿ ನಿಲ್ದಾಣದಲ್ಲಿ ಪ್ರೇಮ ನಿವೇದನೆ- ಇಲ್ಲಿದೆ ಮನಮಿಡಿಯುವ ಕತೆ

30 ವರ್ಷದ ಉಕ್ರೇನಿಯನ್ ಪ್ರಜೆ (Ukrainian Citizen) ಅನ್ನಾ ಹೊರೊಡೆಟ್​ಸ್ಕಾ ಹಾಗೂ ದೆಹಲಿ ಹೈಕೋರ್ಟ್ ವಕೀಲ ಅನುಭವ್ ಭಾಸಿನ್ ಮಾರ್ಚ್​ನಲ್ಲಿ ಮದುವೆಯಾಗುವುದಕ್ಕೆ ಕಾಯುತ್ತಿದ್ದರು. ಯಾವುದೇ ಆಡಂಬರವಿಲ್ಲದ ಸರಳ ಮದುವೆಯ ಯೋಚನೆಯಲ್ಲಿ ಅವರಿದ್ದರು. ಆದರೆ ಅವರ ಕನಸಿಗೆ ಅಡ್ಡಬಂದಿದ್ದು ರಷ್ಯಾ! ಹೌದು. ರಷ್ಯಾ ಉಕ್ರೇನ್ ಮೇಲೆ ಯುದ್ಧವನ್ನು ಘೋಷಿಸಿಬಿಟ್ಟಿತು. ಇದರಿಂದ ಉಕ್ರೇನ್​ ರಾಜಧಾನಿ ಕೀವ್​ನ ಬಂಕರ್​ನಲ್ಲಿ ಅನ್ನಾ ಅಡಗಿಕೊಳ್ಳಬೇಕಾಯಿತು. ಅಲ್ಲಿಂದ ಕೊನೆಗೂ ಪಾರಾಗಿ ಬಂದಿರುವ ಅನ್ನಾ, ಗೆಳೆಯ ಅನುಭವ್​ರನ್ನು ದೆಹಲಿಯಲ್ಲಿ ಭೇಟಿಯಾಗಿದ್ದಾರೆ. ಈ ಜೋಡಿಯ ಪ್ರೇಮ ಕತೆಯನ್ನು ಅನ್ನಾ ಹಾಗೂ ಅನುಭವ್ ಸ್ವತಃ ಹಂಚಿಕೊಂಡಿದ್ದಾರೆ. ಈ ಬಗ್ಗೆ ಇಂಡಿಯನ್​ ಎಕ್ಸ್​ಪ್ರೆಸ್ ವರದಿ ಮಾಡಿದೆ. ‘ರಷ್ಯಾ ಹಾಗೂ ಉಕ್ರೇನ್ ಯುದ್ಧ ಆರಂಭವಾದ ಮೇಲೆ ನಮ್ಮ ನಡುವೆ ಮೂರು ಬಾರಿ ಜಗಳಗಳಾದವು’ ಎಂದು ಹೇಳಿಕೊಂಡಿರುವ ಅನ್ನಾ, ನಂತರದ ಪಯಣದ ಬಗ್ಗೆಯೂ ತಿಳಿಸಿದ್ದಾರೆ. ಈರ್ವರ ಮಾತುಗಳು ಇಲ್ಲಿವೆ.

‘‘ಮೊದಲನೆಯ ಬಾರಿಗೆ ಅನುಭವ್​ ಕೀವ್​ನ ತೊರೆಯಲು ಹೇಳಿದ. ಆಗ ನಾನು ರಷ್ಯಾ ನಮ್ಮ ಮೇಲೆ ದಾಳಿ ಮಾಡುವುದಿಲ್ಲ ಎಂದಿದ್ದೆ. ಎರಡನೇ ಬಾರಿ ಅನುಭವ್ ಹೇಗಾದರೂ ಮಾಡಿ ಟ್ರೇನ್ ಹತ್ತಿ ಬರಲು ಕೋರಿಕೊಂಡಿದ್ದರು. ಆಗ ನಾನು ನಿರಾಕರಿಸಿದ್ದೆ. ಮೂರನೇ ಬಾರಿ ನಾವು ಗಲಾಟೆ ಮಾಡಿದ್ದು, ಅನುಭವ್​ ನನಗೆ ಬಂಕರ್​ನಲ್ಲೇ ಉಳಿಯಲು ಹೇಳಿದ. ನಾನು ಹೇಗಾದರೂ ಮಾಡಿ ಭಾರತಕ್ಕೆ ಬರುವ ನಿರ್ಧಾರ ಮಾಡಿದ್ದೇನೆ. ನೀನು ಕಾಯುತ್ತಿರು, ನಾನು ಭಾರತಕ್ಕೆ ಬರುತ್ತೇನೆ ಎಂದಿದ್ದೆ’’ ಹೀಗೆ ಅನ್ನಾ ತಮ್ಮ ಪಯಣವನ್ನು ವಿವರಿಸಿದ್ದಾರೆ.

ಮಾರ್ಚ್​ 17ರಂದು ಕೊನೆಗೂ ಭಾರತಕ್ಕೆ ಆಗಮಿಸಿದರು ಅನ್ನಾ. ದೆಹಲಿಯ ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಅವರನ್ನು ಅನುಭವ್​ ಸಂಗಡಿಗರು ಧೋಲ್ ನುಡಿಸುತ್ತಾ ಸ್ವಾಗತಿಸಿದ್ದ ವಿಶೇಷ. ಅನುಭವ್ ಅನ್ನಾ ಮುಂದೆ ಮಂಡಿಯೂರಿ ವಿಮಾನ ನಿಲ್ದಾಣದಲ್ಲೇ ಪ್ರಪೋಸ್​ ಕೂಡ ಮಾಡಿದರು. ‘‘ನೀವು ನನ್ನನ್ನು ಮದುವೆಯಾಗುತ್ತೀರಾ?’’ ಎಂಬ ಅನುಭವ್ ಕೋರಿಕೆಗೆ​ ಅನ್ನಾ ಎಸ್ ಎಂದರು.

‘‘ನಾನು ಪ್ರಯಾಣದಿಂದ ಬಳಲಿದ್ದೆ. ಅನುಭವ್​ ಅವರಿಂದ ಪ್ರಪೋಸ್ ನಿರೀಕ್ಷಿಸಿರಲಿಲ್ಲ. ಸಂತಸದಿಂದ ಯೆಸ್ ಎಂದೆ. ಅವರ ಜತೆ ಇರಲು ಕದನವನ್ನು ದಾಟಿ ಬರಬೇಕಾಯಿತು. ಅನುಭವ್​ ತಾಯಿ ಹೂವಿನ ಮೂಲಕ ನನ್ನನ್ನು ಸ್ವಾಗತಿಸಿದರು. ಅದು ಬಹಳ ಚೆನ್ನಾಗಿತ್ತು’’ ಎಂದಿದ್ದಾರೆ ಅನ್ನಾ.

ದೆಹಲಿ ವಿಮಾನ ನಿಲ್ದಾಣದಲ್ಲಿ ಅನುಭವ್ ಪ್ರೇಮ ನಿವೇದನೆ; ವಿಡಿಯೋ ಇಲ್ಲಿದೆ:

ದೆಹಲಿ ವಿಮಾನ ನಿಲ್ದಾಣದಲ್ಲಿ ಅನುಭವ್ ಪ್ರೇಮ ನಿವೇದನೆ

ಅನ್ನಾ- ಅನುಭವ್ ಭೇಟಿಯಾಗಿದ್ದು ಯಾವಾಗ?

2019ರಲ್ಲಿ ಅನ್ನಾ ಹಾಗೂ ಅನುಭವ್ ಮೊದಲ ಬಾರಿಗೆ ಭೇಟಿಯಾಗಿದ್ದರು. ಕೀವ್​ನ ಖಾಸಗಿ ಕಂಪನಿಯಲ್ಲಿ ಅನ್ನಾ ಕೆಲಸ ಮಾಡುತ್ತಿದ್ದು, ರಜೆಯ ಸಂದರ್ಭದಲ್ಲಿ ಭಾರತಕ್ಕೆ ಆಗಮಿಸಿದ್ದರು. ಆ ಸಂದರ್ಭದಲ್ಲಿ ಅನುಭವ್ ಪರಿಚಯವಾಗಿ, ಈರ್ವರೂ ನಂಬರ್ ಬದಲಾಯಿಸಿಕೊಂಡಿದ್ದರು. ವಾಟ್ಸಾಪ್​ನಲ್ಲಿ ಮಾತುಕತೆ ಮುಂದುವರೆಯಿತು. 2020ರಲ್ಲಿ ಅನ್ನಾ ರೋಡ್​ ಟ್ರಿಪ್​ಗೆಂದು ರಾಜಸ್ಥಾನಕ್ಕೆ ಆಗಮಿಸಿದರು. ಆ ಸಂದರ್ಭದಲ್ಲಿ ಲಾಕ್​ಡೌನ್ ಅನೌನ್ಸ್ ಆಯಿತು.

‘‘ಅನ್ನಾಗೆ ಲಾಕ್​ಡೌನ್ ಸಂದರ್ಭದಲ್ಲಿ ಸಹಾಯ ಮಾಡಿದೆ. ಆಗ ಈರ್ವರೂ ಹತ್ತಿರವಾದೆವು’’ ಎಂದಿದ್ದಾರೆ ಅನುಭವ್. 2021ರ ಫೆಬ್ರವರಿಯಲ್ಲಿ ಈರ್ವರೂ ದುಬೈನಲ್ಲಿ ಭೇಟಿಯಾದರು. ನಂತರದಲ್ಲಿ ಭಾರತದಲ್ಲಿ ಮತ್ತೆ ಭೇಟಿಯಾದರು. ವಿಶೇಷವೆಂದರೆ ಅನುಭವ್​ ತಾಯಿ ಅನ್ನಾಗೆ ತಮ್ಮ ಪುತ್ರನನ್ನು ಮದುವೆಯಾಗುವಂತೆ ಕೇಳಿಕೊಂಡರು.

‘‘ನನ್ನ ಪರವಾಗಿ ನನ್ನ ತಾಯಿ ಪ್ರಪೋಸ್ ಮಾಡಿದರು. ವಿಶೇಷ ವಿವಾಹ ಕಾಯ್ದೆಯ ಅನ್ವಯ ನಮ್ಮ ಮದುವೆಯ ಸಿದ್ಧತೆಯಲ್ಲಿರುವಾಗ ರಷ್ಯಾ ಯುದ್ಧ ಘೋಷಿಸಿತು’’ ಎಂದಿದ್ದಾರೆ ಅನುಭವ್. ಕೀವ್​ನಿಂದ ಅನ್ನಾ ಕೆಲವೇ ವಸ್ತ್ರಗಳೊಂದಿಗೆ ಹಾಗೂ ಅವರ ಅಜ್ಜಿ ಉಡುಗೊರೆಯಾಗಿ ನೀಡಿದ ಕಾಫಿ ಮೆಷೀನ್​ನೊಂದಿಗೆ ಹೊರಟರು. ‘‘ಯುದ್ಧ ನಡೆಯುತ್ತಿದೆ. ಕಾಫಿ ಮೆಷೀನ್ ತೆಗೆದುಕೊಂಡು ಹೊರಟಿದ್ದೀರಲ್ಲ ಎಂದು ಕೇಳಿದರೆ, ಅದು ಮದುವೆಯ ಉಡುಗೊರೆ. ಅದನ್ನು ಬಿಟ್ಟು ಬರಲು ಸಾಧ್ಯವಿಲ್ಲ’’ ಎಂದು ಅನ್ನಾ ಹೇಳಿದ್ದನ್ನು ಅನುಭವ್ ನೆನಪಿಸಿಕೊಂಡಿದ್ದಾರೆ.

ಅನ್ನಾ ಅನುಭವ್

ಎಲ್ವಿವ್​ಗೆ ತಮ್ಮ ತಾಯಿಯೊಂದಿಗೆ ತಲುಪಿದ ಅನ್ನಾ ನಂತರ ಪೋಲಿಷ್ ಗಡಿಗೆ ಬಂದರು. ಪೋಲೆಂಡ್​ನಿಂದ ಎರಡು ವಾರಗಳ ಕಾಲ ಕಳೆದ ನಂತರ ಭಾರತಕ್ಕೆ ಎರಡು ವರ್ಷಗಳ ವೀಸಾ ಸಿಕ್ಕಿತು. ಅನ್ನಾ ತಾಯಿ ನಾರ್ವೆಗೆ ತೆರಳಿದ್ದು, ಅಲ್ಲಿಂದ ಅವರು ಮೆಕ್ಸಿಗೋಗೆ ತೆರಳಿ ಪತಿಯೊಂದಿಗೆ ವಾಸಿಸಲಿದ್ದಾರೆ ಎಂದು ಅನುಭವ್ ಮಾಹಿತಿ ನೀಡಿದ್ದಾರೆ.

ಅನ್ನಾಗೆ ವೀಸಾ ಕೊಡಿಸಲು ಹಗಲು- ರಾತ್ರಿ ಕಷ್ಟಪಟ್ಟಿದ್ದನ್ನು ಅನುಭವ್ ನೆನಪಿಸಿಕೊಂಡರು. ಸುಪ್ರೀಂ ಕೋರ್ಟ್​ನ ಹಿರಿಯ ವಕೀಲರೊಂದಿಗೆ ಅವರು ನಿರಂತರ ಸಂಪರ್ಕದಲ್ಲಿದ್ದರು. ಅಂತಿಮವಾಗಿ ಪೋಲೆಂಡ್​ನ ಭಾರತೀಯ ರಾಯಭಾರ ಕಚೇರಿಯಿಂದ ಸಹಾಯ ದೊರಕಿತು ಎಂದಿದ್ದಾರೆ ಅನುಭವ್.

ಪ್ರಸ್ತುತ ಅನ್ನಾ ಹಾಗೂ ಅನುಭವ್ ಏಪ್ರಿಲ್ 27ರಂದು ವಿವಾಹವಾಗಲು ನಿರ್ಧರಿಸಿದ್ದಾರೆ. ಉಕ್ರೇನ್​ನಲ್ಲಿ ನಡೆಯುತ್ತಿರುವ ಯುದ್ಧ ಕೊನೆಗೊಳ್ಳುವುದಕ್ಕೆ ಅನ್ನಾ ಕಾಯುತ್ತಿದ್ದಾರೆ. ಅಲ್ಲಿ ಅವರ ಅಜ್ಜಿಯೊಂದಿಗೆ ಒಂದು ಸಾಕುಶ್ವಾನವೂ ಇದೆ. ‘‘ಉಕ್ರೇನ್​ಗೆ ತೆರಳಿ ಅಲ್ಲಿಂದ ಶ್ವಾನವನ್ನು ಮರಳಿ ತರಬೇಕು. ಮುಂದಿನ ಜೀವನವನ್ನು ಭಾರತದಲ್ಲಿ ಕಳೆಯುತ್ತೇನೆ’’ ಎಂದು ಇಂಡಿಯನ್​​ ಎಕ್ಸ್​ಪ್ರೇಸ್​ಗೆ ತಿಳಿಸಿದ್ದಾರೆ ಅನ್ನಾ.

ಇದನ್ನೂ ಓದಿ:

ಎರಡೆರಡು ಬಾರಿ ಪವಾಡಸದೃಶ್ಯ ರೀತಿಯಲ್ಲಿ ಪ್ರಾಣಾಪಾಯದಿಂದ ಪಾರಾದ ಕೇರಳದ ಬಾಲಕ; ವೈರಲ್ ವಿಡಿಯೋ ನೋಡಿ ಹೌಹಾರಿದ ನೆಟ್ಟಿಗರು

ದೇಶದಲ್ಲಿ 24ಗಂಟೆಯಲ್ಲಿ 4100 ಮಂದಿ ಕೊರೊನಾದಿಂದ ಸಾವು; ಮೃತರ ಸಂಖ್ಯೆಯಲ್ಲಿ ಏಕಾಏಕಿ ಏರಿಕೆಯಾಗಲು ಕಾರಣವೇನು?