ಚೀನಾದ ಪ್ರಯೋಗಾಲಯದಿಂದ ಕೊರೊನಾ ವೈರಾಣು ಉಗಮ ಸಾಧ್ಯತೆ ಹೆಚ್ಚು ಎಂದ ಅಮೆರಿಕಾದ ಹಿರಿಯ ಅಧಿಕಾರಿ

ವಾಷಿಂಗ್​ಟನ್: ಕೊವಿಡ್-19ಗೆ ಕಾರಣವಾದ ಕೊರೊನಾ ವೈರಸ್ ಮೂಲದ ಬಗ್ಗೆ ಇರುವ ಸಿದ್ಧಾಂತಗಳಲ್ಲಿ, ಕೊರೊನಾ ವೈರಸ್ ಚೀನಾದ ಪ್ರಯೋಗಾಲಯದಿಂದ ಬಂದಿದೆ ಎಂಬ ವಾದ ಹೆಚ್ಚು ಸೂಕ್ತವಾಗಿದೆ ಎಂದು ಅಮೆರಿಕಾದ ಹಿರಿಯ ಸರ್ಕಾರಿ ಅಧಿಕಾರಿ ಹೇಳಿದ್ದಾರೆ.

ಅಮೆರಿಕಾ ಅಧ್ಯಕ್ಷ, ಡೊನಾಲ್ಡ್ ಟ್ರಂಪ್​ನ ಉಪ ರಾಷ್ಟ್ರೀಯ ಭದ್ರತಾ ಸಲಹೆಗಾರರಾಗಿರುವ ಮಾಥ್ಯೂ ಪೊಟ್ಟಿಂಗರ್ ಈ ಹೇಳಿಕೆ ನೀಡಿದ್ದಾರೆ. ಕೊರೊನಾ ವೈರಸ್ ಚೀನಾದ ವುಹಾನ್ ಪ್ರಾಣಿ ಮಾರುಕಟ್ಟೆಯಲ್ಲಿ ಉಗಮವಾಗಿದೆ ಎಂಬ ವಾದವನ್ನು ಚೀನಾದ ನಾಯಕರೂ ಸುಳ್ಳು ಎನ್ನುತ್ತಿದ್ದಾರೆ. ಆ ಮೂಲಕ ಕೊರೊನಾ ಪ್ರಯೋಗಾಲಯದಿಂದ ಬಂದಿದೆ ಎಂಬ ವಾದವನ್ನು ಚೀನಾ ನಾಯಕರು ಒಪ್ಪುತ್ತಿದ್ದಾರೆ ಎಂದು ಚೀನಾ ವಿರುದ್ಧ ವ್ಯಂಗ್ಯವಾಗಿ ಮಾತನಾಡಿದ್ದಾರೆ.

ವುಹಾನ್ ಇನ್​​ಸ್ಟಿಟ್ಯೂಟ್ ಆಫ್ ವೈರಾಲಜಿ, ವುಹಾನ್ ಮಾರುಕಟ್ಟೆಯಿಂದ 11 ಮೈಲುಗಳಷ್ಟು ದೂರದಲ್ಲಿದೆ. ಕೊರೊನಾ ವೈರಾಣು ಉಗಮಕ್ಕೆ ವುಹಾನ್​ನ ಪ್ರಯೋಗಾಲಯ ಮೂಲ ಕಾರಣವಾಗಿರುವ ಸಾಧ್ಯತೆ ದಟ್ಟವಾಗಿದೆ ಎಂದು ಪೊಟ್ಟಿಂಗರ್ ಅಭಿಪ್ರಾಯವ್ಯಕ್ತಪಡಿಸಿದ್ದಾರೆ. ರೋಗಕಾರಕ ವೈರಾಣು ಸೋರಿಕೆಯಾಗಿ ಅಥವಾ ಆಕಸ್ಮಿಕವಾಗಿ ಪ್ರಯೋಗಾಲಯದಿಂದ ಹೊರಬಂದಿರಬಹುದು ಎಂದು ಅವರು ಹೇಳಿದ್ದಾರೆ.