Mexico Shootout: ಮೆಕ್ಸಿಕೋದ ನೈಟ್​ ಕ್ಲಬ್​ನಲ್ಲಿ ಪುಂಡರ ಅಟ್ಟಹಾಸ, ಗುಂಡಿನ ದಾಳಿಗೆ 8 ಮಂದಿ ಬಲಿ, ಐವರಿಗೆ ಗಂಭೀರ ಗಾಯ

ಉತ್ತರ ಅಮೆರಿಕದ ಮೆಕ್ಸಿಕೋ ಸಿಟಿಯ ನೈಟ್​ ಕ್ಲಬ್​ನಲ್ಲಿ ಬಂದೂಕುಧಾರಗಳಿಂದ ನಡೆದ ಗುಂಡಿನ ದಾಳಿಯಲ್ಲಿ 8 ಮಂದಿ ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ. ಝಕಾಟೆಕಾಸ್ ರಾಜ್ಯದಲ್ಲಿ ಶನಿವಾರ ತಡರಾತ್ರಿ ಈ ಘಟನೆ ನಡೆದಿದೆ. ಭಾರಿ ಶಸ್ತ್ರಸಜ್ಜಿತ ವ್ಯಕ್ತಿಗಳು ಎರಡು ವಾಹನಗಳಲ್ಲಿ ಬಾರ್‌ಗೆ ಬಂದಿದ್ದರು, ಬಳಿಕ ಬಾರ್‌ಗೆ ನುಗ್ಗಿ ಮನಬಂದಂತೆ ಗುಂಡು ಹಾರಿಸಿದ್ದಾರೆ. ಈ ಮಟ್ಟಿಗೆ ಭದ್ರತಾ ಸಚಿವಾಲಯದ ವರದಿ ಹೇಳಿದೆ.

ಘಟನೆಯಲ್ಲಿ ಆರು ಮಂದಿ ಸ್ಥಳದಲ್ಲೇ ಮೃತಪಟ್ಟರೆ, ಚಿಕಿತ್ಸೆ ಫಲಕಾರಿಯಾಗದೆ ಇಬ್ಬರು ಮೃತಪಟ್ಟಿದ್ದಾರೆ. ಇದೇ ವೇಳೆ ಗುಂಡಿನ ದಾಳಿಯಲ್ಲಿ ಗಾಯಗೊಂಡಿರುವ ಐವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅವರಲ್ಲಿ ಕ್ಲಬ್ ಉದ್ಯೋಗಿಗಳು, ಸಂಗೀತಗಾರರು ಮತ್ತು ಗ್ರಾಹಕರು ಸೇರಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ತಿಳಿಸಿವೆ. ಕ್ಲಬ್ ನೆಲವು ರಕ್ತದಿಂದ ಆವೃತವಾಗಿದ್ದ ಕಾರಣ ಜನರು ಭಯಭೀತರಾಗಿದ್ದರು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಮತ್ತಷ್ಟು ಓದಿ: ಅಮೆರಿಕದಲ್ಲಿ ಮನೆಯಲ್ಲಿ ಗುಂಡಿನ ದಾಳಿ; 6 ತಿಂಗಳ ಮಗು, ತಾಯಿ ಸೇರಿ 6 ಜನ ಸಾವು

ಎಲ್ ವೆನಾಡಿಟೊ ಎಂದು ಕರೆಯಲ್ಪಡುವ ಬಾರ್, ಜೆರೆಜ್‌ನ ಮಧ್ಯಭಾಗದಲ್ಲಿದೆ. ಕಳೆದ ವರ್ಷ ಜೆರೆಜ್‌ನಲ್ಲಿ ಭಾರೀ ಹಿಂಸಾಚಾರ ನಡೆದಿತ್ತು. ಸಮೀಪದ ಗ್ರಾಮೀಣ ಸಮುದಾಯಗಳ ನೂರಾರು ನಿವಾಸಿಗಳು ತಮ್ಮ ಮನೆಗಳನ್ನು ಬಿಟ್ಟು ಹೋಗಿದ್ದರು.

2022ರ ಅಕ್ಟೋಬರ್ ತಿಂಗಳಿನಲ್ಲಿ ದಕ್ಷಿಣ ಮೆಕ್ಸಿಕೋದ (Mexico) ಸ್ಯಾನ್ ಮಿಗುಲ್ ಟೊಟೊಲಾಪನ್ ನಗರದ ಮುನ್ಸಿಪಲ್ ಹಾಲ್ ಹಾಗೂ ಮನೆಯೊಂದರಲ್ಲಿ ಬದೂಕುಧಾರಿಗಳು ದಾಳಿ (Shooting) ನಡೆಸಿ, ಮೇಯರ್ (Mayor) ಸೇರಿದಂತೆ 18 ಜನರ ಹತ್ಯೆ ಮಾಡಿದ್ದರು.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ