AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

ಚಿಪ್ ಕಳ್ಳಸಾಗಣೆ ವಿವಾದದಲ್ಲಿ ಎನ್‌ವಿಡಿಯಾದ ಮಾಜಿ ಉನ್ನತ ಅಧಿಕಾರಿ ಜಯ್ ಪುರಿ ಪತ್ನಿ ಹೆಸರು

ವಿಶ್ವದ ಪ್ರಮುಖ ಚಿಪ್ ತಯಾರಕ ಎನ್‌ವಿಡಿಯಾ ಸುತ್ತ ಹೊಸ ವಿವಾದ. ಮಾಜಿ ಉನ್ನತ ಅಧಿಕಾರಿ ಜಯ್ ಪುರಿ ಅವರ ಪತ್ನಿ, ಸೂಪರ್ ಮೈಕ್ರೋ ಮಾಜಿ ಅಧಿಕಾರಿಯಾದ ಸೆನ್ಲಿ ಚೆನ್ ವಿರುದ್ಧ ಚೀನಾಕ್ಕೆ AI ಚಿಪ್‌ಗಳ ಅಕ್ರಮ ಸಾಗಣೆಯಲ್ಲಿ ಭಾಗಿಯಾದ ಆರೋಪ ಕೇಳಿಬಂದಿದೆ. ಮಡ್ಡಿ ವಾಟರ್ಸ್ ಸಂಶೋಧನಾ ವರದಿಯು ಈ ಸಂಬಂಧ ಪ್ರಶ್ನೆಗಳನ್ನು ಎತ್ತಿದೆ. ಅಮೆರಿಕ-ಚೀನಾ ಟೆಕ್ ಪೈಪೋಟಿಯ ಸಂದರ್ಭದಲ್ಲಿ ಈ ಹಗರಣ ಹೆಚ್ಚಿನ ಗಮನ ಸೆಳೆದಿದೆ.

ಚಿಪ್ ಕಳ್ಳಸಾಗಣೆ ವಿವಾದದಲ್ಲಿ ಎನ್‌ವಿಡಿಯಾದ ಮಾಜಿ ಉನ್ನತ ಅಧಿಕಾರಿ ಜಯ್ ಪುರಿ ಪತ್ನಿ ಹೆಸರು
ಪುರಿ Image Credit source: Muddy Waters
ನಯನಾ ರಾಜೀವ್
|

Updated on: Nov 19, 2026 | 2:25 PM

Share

ವಾಷಿಂಗ್ಟನ್, ನವೆಂಬರ್ 19: ವಿಶ್ವದ ಅತ್ಯಂತ ಪ್ರಸಿದ್ಧ ಚಿಪ್ ತಯಾರಕರಾದ ಎನ್ವಿಡಿಯಾ ಸುತ್ತಲಿನ ವಿವಾದವು ಮುಂದುವರೆದಿದೆ. ಮಾಜಿ ಸಿಇಒ ಜೆನ್ಸನ್ ಹುವಾಂಗ್ ಅವರ ಪ್ರೇಮ ಪ್ರಕರಣದಿಂದ ಹಿಡಿದು ಅವರ ರಾಜೀನಾಮೆ ವರೆಗೆ ಕಂಪನಿಯು ಹಲವು ಟೀಕೆಗಳನ್ನು ಎದುರಿಸಿದೆ. ಈಗ, ಮತ್ತೊಂದು ಆರೋಪ ಕೇಳಿಬಂದಿದೆ.

ಕೃತಕ ಬುದ್ಧಿಮತ್ತೆ ಕ್ಷೇತ್ರದ ಪ್ರಮುಖ ಚಿಪ್ ತಯಾರಿಕಾ ಕಂಪನಿ ಎನ್​ವಿಡಿಯಾದ ಮಾಜಿ ಉನ್ನತ ಅಧಿಕಾರಿ ಅಜಯ್ ಕೆ ಜಯ್ ಪುರಿ, ಪತ್ನಿ ಇದೀಗ ಚೀನಾಗೆ ಅಕ್ರಮವಾಗಿ ಚಿಪ್​ಗಳನ್ನು ಸಾಗಿಸಿದ ಆರೋಪದಲ್ಲಿ ಸಿಲುಕಿದ್ದಾರೆ. ಪುರಿ ಅವರೊಂದಿಗೆ ಕಾಣಿಸಿಕೊಂಡಿರುವ ಮಹಿಳೆ, ಸೂಪರ್ ಮೈಕ್ರೋ ಕಂಪನಿಯ ಮಾಜಿ ಹಿರಿಯ ಅಧಿಕಾರಿಯಾಗಿದ್ದ ಸೆನ್ಲಿ ಚೆನ್ ಅವರೇ ಎಂಬ ಪ್ರಶ್ನೆಯನ್ನು ಅಮೆರಿಕದ ಶಾರ್ಟ್‌ಸೆಲ್ಲಿಂಗ್ ಸಂಸ್ಥೆ ಮಡ್ಡಿ ವಾಟರ್ಸ್ ರಿಸರ್ಚ್ ಎತ್ತಿದೆ. ಅವರು ಪುರಿಯವರ ಪತ್ನಿ ಎಂದು ಹೇಳಲಾಗುತ್ತಿದೆ.

ನವೆಂಬರ್ 17ರಂದು ‘ಎನ್​ವಿಡಿಯಾ: ಮೋರ್ ಚೀನಾ’ ಎಂಬ ವರದಿಯನ್ನು ಬಿಡುಗಡೆ ಮಾಡಿರುವ ಮಡ್ಡಿ ವಾಟರ್ಸ್, ಸಂಸ್ಥೆಯು 2024 ಮತ್ತು 2026 ರ ನಡುವೆ ತೆಗೆದ ಛಾಯಾಚಿತ್ರಗಳನ್ನು ಸಹ ಪರಿಶೀಲಿಸಿದೆ. ಈ ಛಾಯಾಚಿತ್ರಗಳು ಪುರಿ ಅವರ ಪತ್ನಿ ಸೆನ್ಲಿ ಚೆನ್ ಜೊತೆಗಿರುವುದನ್ನು ತೋರಿಸುತ್ತವೆ. ಈ ಚಿತ್ರಗಳಲ್ಲಿ ಜಯ್ ಪುರಿ ಅವರೊಂದಿಗೆ ಕಾಣಿಸಿಕೊಂಡಿರುವ ಮಹಿಳೆಯನ್ನು ಕೆಲವೆಡೆ ‘ಸೆನ್ಲಿ ಚೆನ್’ ಎಂದೂ, ಇನ್ನೂ ಕೆಲವು ಕಡೆ ‘ಸೆನ್ಲಿ ಪುರಿ’ ಎಂದೂ ಗುರುತಿಸಲಾಗಿದೆ.

ಇದನ್ನೂ ಓದಿ: ‘ನಮ್ಮ ಬಾಸ್ ಬೇಕು’: ಜೆನ್ಸೆನ್ ಹುವಾಂಗ್ ಪರ ನಿಂತ ಎನ್​ವಿಡಿಯಾದ 1,600ಕ್ಕೂ ಹೆಚ್ಚು ಉದ್ಯೋಗಿಗಳು

ಈ ಮಹಿಳೆ ಸೂಪರ್ ಮೈಕ್ರೋ ಕಂಪನಿಯಲ್ಲಿ ಕೆಲಸ ಮಾಡಿದ್ದ ಅದೇ ಸೆನ್ಲಿ ಚೆನ್ ಅವರೇ ಎಂಬುದನ್ನು ಸಂಸ್ಥೆ ಪ್ರಶ್ನಿಸಿದೆ. ಆದರೆ ಫೋಟೋಗಳ ಆಧಾರದಲ್ಲಿ ಅವರ ಗುರುತು ಒಂದೇ ಎಂದು ವರದಿ ಖಚಿತಪಡಿಸಿಲ್ಲ.

ಯಾರು ಈ ಜಯ್ ಪುರಿ?

ಜಯ್ ಪುರಿ ಸುಮಾರು 21 ವರ್ಷಗಳ ಕಾಲ ಎನ್‌ವಿಡಿಯಾದಲ್ಲಿ ಕೆಲಸ ಮಾಡಿದ್ದಾರೆ. ಕಂಪನಿಯ ಜಾಗತಿಕ ಕ್ಷೇತ್ರ ಕಾರ್ಯಾಚರಣೆಗಳ ಕಾರ್ಯನಿರ್ವಾಹಕ ಉಪಾಧ್ಯಕ್ಷರಾಗಿ ಜಾಗತಿಕ ಮಾರಾಟ, ಪಾಲುದಾರಿಕೆ ಮತ್ತು ಇತರ ಪ್ರಮುಖ ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದರು. ಕಂಪನಿಯ ಆಗಿನ ಸಿಇಒ ಜೆನ್ಸನ್ ಹುವಾಂಗ್ ಮತ್ತು ಸಿಎಫ್‌ಒ ಕೊಲೆಟ್ ಕ್ರೆಸ್ ನಂತರ ಅವರು ಮೂರನೇ ಅತ್ಯಂತ ಹಿರಿಯ ಅಧಿಕಾರಿಯಾಗಿದ್ದರು.

2026ರ ಜೂನ್‌ನಲ್ಲಿ ಅವರು ತಮ್ಮ ಕಾರ್ಯನಿರ್ವಾಹಕ ಹುದ್ದೆಯಿಂದ ನಿವೃತ್ತಿಯಾಗುವ ನಿರ್ಧಾರ ಪ್ರಕಟಿಸಿದರು. ಬಳಿಕ ಕಂಪನಿಯಲ್ಲಿ ಹಿರಿಯ ಸಲಹೆಗಾರರಾಗಿ ಮುಂದುವರಿದರು. ಎನ್‌ವಿಡಿಯಾದಲ್ಲಿ ಅವರ ದೀರ್ಘಕಾಲದ ಸೇವೆ ಮತ್ತು ಉನ್ನತ ಹುದ್ದೆಯ ಕಾರಣಕ್ಕೆ ಈ ವಿವಾದ ಹೆಚ್ಚಿನ ಗಮನ ಸೆಳೆದಿದೆ.

ಸೆನ್ಲಿ ಚೆನ್ ವಿರುದ್ಧ ಏನು ಆರೋಪ?

ಸೂಪರ್ ಮೈಕ್ರೋ ಕಂಪನಿಯ ಮಾಜಿ ಮುಖ್ಯ ಬೆಳವಣಿಗೆ ಅಧಿಕಾರಿ ಸೆನ್ಲಿ ಚೆನ್ ವಿರುದ್ಧ ಅಕ್ಟೋಬರ್‌ನಲ್ಲಿ ಸಲ್ಲಿಸಲಾದ ಸಿವಿಲ್ ಮೊಕದ್ದಮೆಯಲ್ಲಿ ಕೆಲವು ಮಾಜಿ ಉದ್ಯೋಗಿಗಳು ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ಎನ್‌ವಿಡಿಯಾದಿಂದ ಜಿಪಿಯು ಚಿಪ್‌ಗಳನ್ನು ಖರೀದಿಸುವುದು ಮತ್ತು ಸೂಪರ್ ಮೈಕ್ರೋದ ಗ್ರಾಹಕರಿಗೆ ಅವುಗಳನ್ನು ಹಂಚಿಕೆ ಮಾಡುವ ಪ್ರಕ್ರಿಯೆಯಲ್ಲಿ ಚೆನ್ ಪ್ರಮುಖ ಪಾತ್ರ ವಹಿಸಿದ್ದರು ಎಂದು ದೂರಿನಲ್ಲಿ ಹೇಳಲಾಗಿದೆ.

ಚೀನಾಕ್ಕೆ ಅಕ್ರಮವಾಗಿ ಸಾಗಿಸಲಾದ ಜಿಪಿಯು ಚಿಪ್‌ಗಳ ಬಗ್ಗೆ ಚೆನ್ ಅವರಿಗೆ ತಿಳಿದಿತ್ತು ಎಂಬ ಆರೋಪವೂ ಇದೆ. ಚೀನಾಕ್ಕೆ ತಿರುಗಿಸಲಾದ ಚಿಪ್‌ಗಳ ಸರಣಿ ಸಂಖ್ಯೆಗಳಿಗೆ ಸಂಬಂಧಿಸಿದಂತೆ ಎನ್‌ವಿಡಿಯಾಗೆ ಇಮೇಲ್ ಕಳುಹಿಸಿ ಚಿಪ್‌ಗಳನ್ನು ಬಿಡುಗಡೆ ಮಾಡುವಂತೆ ಅವರು ಕೇಳಿದ್ದರು ಎಂದು ಮಾಜಿ ಉದ್ಯೋಗಿಯೊಬ್ಬರು ಆರೋಪಿಸಿದ್ದಾರೆ. ಆದರೆ ಇವು ಸಿವಿಲ್ ಮೊಕದ್ದಮೆಯಲ್ಲಿನ ಆರೋಪಗಳಷ್ಟೇ ಹೊರತು, ನ್ಯಾಯಾಲಯದಲ್ಲಿ ಸಾಬೀತಾಗಿಲ್ಲ.

2.5 ಬಿಲಿಯನ್ ಡಾಲರ್ ಮೌಲ್ಯದ ಸರ್ವರ್‌ಗಳ ಅಕ್ರಮ ಮಾರಾಟದ ಆರೋಪ

ಈ ವಿವಾದದ ಹಿನ್ನೆಲೆ ಸೂಪರ್ ಮೈಕ್ರೋ ಕಂಪನಿಯ ಸರ್ವರ್‌ಗಳನ್ನು ಚೀನಾಕ್ಕೆ ಅಕ್ರಮವಾಗಿ ಸಾಗಿಸಿದ ಪ್ರಕರಣ. ಅಮೆರಿಕದ ತನಿಖಾ ಸಂಸ್ಥೆಗಳ ಆರೋಪದ ಪ್ರಕಾರ, ಸೂಪರ್ ಮೈಕ್ರೋ ಜೊತೆ ಸಂಬಂಧ ಹೊಂದಿದ್ದ ಮೂವರು ವ್ಯಕ್ತಿಗಳು ಆಗ್ನೇಯ ಏಷ್ಯಾದ ಮಧ್ಯವರ್ತಿ ಕಂಪನಿಯ ಮೂಲಕ ಸುಮಾರು 2.5 ಬಿಲಿಯನ್ ಡಾಲರ್ ಮೌಲ್ಯದ ಸರ್ವರ್‌ಗಳನ್ನು ಚೀನಾದ ಖರೀದಿದಾರರಿಗೆ ಮಾರಾಟ ಮಾಡುವ ಯೋಜನೆಯಲ್ಲಿ ಭಾಗಿಯಾಗಿದ್ದರು. ಈ ಸರ್ವರ್‌ಗಳಲ್ಲಿ ಎನ್‌ವಿಡಿಯಾ ತಯಾರಿಸಿದ ಉನ್ನತ ಸಾಮರ್ಥ್ಯದ ಜಿಪಿಯು ಚಿಪ್‌ಗಳಿದ್ದವು.

ಈ ಪ್ರಕರಣದಲ್ಲಿ ಸೂಪರ್ ಮೈಕ್ರೋ ಸಹ-ಸಂಸ್ಥಾಪಕ ಯಿಹ್-ಶ್ಯಾನ್ ಲಿಯಾವ್, ಮಾಜಿ ತೈವಾನ್ ಮಾರಾಟ ವ್ಯವಸ್ಥಾಪಕ ರೂಯಿ-ತ್ಸಾಂಗ್ ಚಾಂಗ್ ಮತ್ತು ಮಧ್ಯವರ್ತಿ ಟಿಂಗ್-ವೇ ‘ವಿಲ್ಲಿ’ ಸನ್ ವಿರುದ್ಧ ಅಮೆರಿಕದಲ್ಲಿ ಕ್ರಿಮಿನಲ್ ಆರೋಪಗಳನ್ನು ದಾಖಲಿಸಲಾಗಿದೆ. ವರದಿಗಳ ಪ್ರಕಾರ, ಸನ್ ತಪ್ಪೊಪ್ಪಿಕೊಂಡಿದ್ದು, ಉಳಿದ ಇಬ್ಬರ ಪ್ರಕರಣಗಳು ನ್ಯಾಯಾಂಗ ಪ್ರಕ್ರಿಯೆಯಲ್ಲಿವೆ.

ಮಡ್ಡಿ ವಾಟರ್ಸ್ ಏಕೆ ಈ ವಿಷಯ ಪ್ರಸ್ತಾಪಿಸಿದೆ?

ಮಡ್ಡಿ ವಾಟರ್ಸ್ ಒಂದು ಶಾರ್ಟ್‌ಸೆಲ್ಲಿಂಗ್ ಸಂಶೋಧನಾ ಸಂಸ್ಥೆ. ಕಂಪನಿಯ ಷೇರುಗಳ ಬೆಲೆ ಕುಸಿಯಬಹುದು ಎಂದು ನಿರೀಕ್ಷಿಸಿ, ಅದರ ಷೇರುಗಳ ವಿರುದ್ಧ ಹೂಡಿಕೆ ಮಾಡುವ ಮೂಲಕ ಲಾಭ ಗಳಿಸಲು ಪ್ರಯತ್ನಿಸುವ ಸಂಸ್ಥೆ ಇದು. ನವೆಂಬರ್ 17ರ ವರದಿಯಲ್ಲಿ ಎನ್‌ವಿಡಿಯಾದ ವಿರುದ್ಧ ತನ್ನ ಶಾರ್ಟ್ ಪೊಸಿಷನ್ ಅನ್ನು ಬಹಿರಂಗಪಡಿಸಿದೆ.

ಜಯ್ ಪುರಿ ಅವರೊಂದಿಗಿನ ಫೋಟೋಗಳಲ್ಲಿರುವ ಮಹಿಳೆ ಸೂಪರ್ ಮೈಕ್ರೋದ ಮಾಜಿ ಅಧಿಕಾರಿ ಸೆನ್ಲಿ ಚೆನ್ ಅವರೇ ಎಂಬುದನ್ನು ಸ್ಪಷ್ಟಪಡಿಸುವಂತೆ ಮಡ್ಡಿ ವಾಟರ್ಸ್, ಚೆನ್ ಈಗ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿರುವ ಕ್ರೋನೋಸ್ಕೇಲ್ ಕಂಪನಿಯ ಹೂಡಿಕೆದಾರರ ಸಂಪರ್ಕ ವಿಭಾಗವನ್ನು ಕೇಳಿದೆ. ಆದರೆ ತನಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ ಎಂದು ಸಂಸ್ಥೆ ಹೇಳಿದೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Follow Us
ನಯನಾ ರಾಜೀವ್
ನಯನಾ ರಾಜೀವ್

ನಯನಾ ರಾಜೀವ್ ಮೂಲತಃ ಶಿವಮೊಗ್ಗ ಜಿಲ್ಲೆಯ ಸಾಗರದ ಬಾಳೆಗೆರೆಯವರು, ಹಿಂದಿಯಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಮಾಧ್ಯಮ ಕ್ಷೇತ್ರದಲ್ಲಿ 10ಕ್ಕೂ ಹೆಚ್ಚು ವರ್ಷ ಕೆಲಸ ಮಾಡಿದ ಅನುಭವವಿದೆ. ಕನ್ನಡ ಪ್ರಭ ದಿನಪತ್ರಿಕೆಯಲ್ಲಿ 3 ವರ್ಷಗಳ ಕಾಲ ಕೆಲಸ ಮಾಡಿದ್ದಾರೆ. ಒನ್​ ಇಂಡಿಯಾ ಕನ್ನಡ ವೆಬ್​ಸೈಟ್​ನಲ್ಲಿ ನಾಲ್ಕೂವರೆ ವರ್ಷ ಕೆಲಸ ನಿರ್ವಹಿಸಿದ್ದಾರೆ. ಡಿಜಿಟಲ್ ವಿಭಾಗದಲ್ಲಿ ಕಳೆದ 6 ವರ್ಷಗಳಿಂದ ಕೆಲಸ ಮಾಡುತ್ತಿದ್ದೇನೆ. ಟಿವಿ 9 ಕನ್ನಡ ಡಿಜಿಟಲ್​ನಲ್ಲಿ ಸೀನಿಯರ್ ಸಬ್​ ಎಡಿಟರ್ ಆಗಿ ಕಳೆದ ಮೂರು ವರ್ಷಗಳಿಂದ ಕೆಲಸ ಮಾಡುತ್ತಿದ್ದಾರೆ. ಆಸಕ್ತಿಕರ ಕ್ಷೇತ್ರ ಟ್ರೆಕಿಂಗ್ ಮತ್ತು ಸಂಗೀತ.

Read More